Leviticus

9 For the eighth day, Moses call Aaron and im sons and the elders of Israel. 2 E tell Aaron say: “Take one small cow for yourself for sin offering and one ram for offering wey them de burn, wey dey well for body, and bring them come front of Jehovah. 3 But you go tell Israel people say, ‘Make una take one male goat for sin offering and one small cow and one young ram, each of them go dey one year, them go dey well for body, and na for offering wey them de burn, 4 and one bull and one ram for peace sacrifice them; una go sacrifice them for front of Jehovah, and one grain offering wey them mix with oil, because today Jehovah go appear to una.’”

5 So them bring everything come front of the tent of meeting, just as Moses don command. Then everybody come front and stand for front of Jehovah. 6 And Moses talk say: “This one na wetin Jehovah don command una to do, so that the glory of Jehovah go fit appear to una.” 7 Then Moses tell Aaron say: “Come near the altar and bring your sin offering and your offering wey them de burn, and do sacrifice for yourself to dey clean, and for your family;* and bring the offering of the people, and do sacrifice for them to make them dey clean, just as Jehovah don command.”

8 Quick-quick, Aaron go near the altar and kill the small cow of the sin offering for im own sins. 9 Then the sons of Aaron bring the blood come give-am and e dip im finger inside the blood and put-am ontop the horns of the altar, and e pour the rest of the blood for the down part of the altar. 10 The fat and the kidneys and the fat wey dey ontop the liver wey them take from the sin offering, e burn them to make smoke comot from ontop the altar, just as Jehovah don command Moses. 11 And e burn the flesh and the skin with fire for outside the camp.

12 Then e kill the animal of the offering wey them de burn, and the sons of Aaron give-am the blood, and e sprinkle-am ontop all the sides of the altar. 13 Them give-am the pieces of the offering wey them de burn and the head, and e burn them to make smoke comot from ontop the altar. 14 And e still wash the intestines and the legs* and burn them to bring out smoke from ontop the offering wey them de burn ontop the altar.

15 Then e give the offering of the people and take the goat of the sin offering wey be for the people, and kill-am and use-am make sin offering like the first one. 16 And e give the offering wey them de burn and handle-am according to the normal way wey them de do-am.

17 The next thing wey e do na to give the grain offering, and full im hand with some of them and burn-am to make smoke comot from ontop the altar. This one add to the offering wey them de burn for morning.

18 After that one, e kill the bull and the ram of the peace sacrifice wey be for the people, then the sons of Aaron give-am the blood, and e sprinkle-am round for all the sides of the altar. 19 As for the fat for the bull, the fat from the tail of the ram, the fat wey cover the parts for inside the animal, the kidneys, and the fat wey dey ontop the liver, 20 them put all this animal fat ontop the breast, and after, e burn the animal fat to make smoke comot from ontop the altar. 21 But Aaron wave the breasts and the right leg go back and front as offering wey them de wave for front of Jehovah, just as Moses don command.

22 Then Aaron raise im hands face the people and bless them, and come down after e don make the sin offering and the offering wey them de burn and the peace sacrifice them. 23 For the end, Moses and Aaron go inside the tent of meeting and come out and bless the people.

Jehovah glory come appear to all the people, 24 and fire come out from Jehovah and start to burn the whole offering wey them de burn and the animal fat for ontop the altar. When all the people see-am, them start to shout and them kneel down and bow face ground.