Exodus

26 You go use ten tent cloths to make the tabernacle, you go use quality linen wey them twist, blue thread, purple wool, and red material, to make the cloths. You go weave cherubs as design for the cloths. 2 Each tent cloth go long reach 28 cubits* and wide reach 4 cubits. All the tent cloths go be the same size. 3 You go join five tent cloths together, one by one, to form one set, and you go join the other five tent cloths together, to form one set. 4 You go use blue thread tie hole for the edge of one tent cloth for the end of the set, and you go do the same thing for the outside edge of the other set where e go join. 5 You go make 50 holes for one tent cloth, and 50 holes for the edge of the other tent cloth, so that them go dey opposite each other where them join. 6 Make you use gold make 50 hooks and join the tent cloths together with the hooks, and the tabernacle go come be one.

7 “You go still use goat hair make cloths for the tent wey go dey ontop the tabernacle. Na 11 tent cloths you go make. 8 Each tent cloth go long reach 30 cubits and wide reach 4 cubits. All the 11 tent cloths go be the same size. 9 You go join five of the tent cloths together and join the other six tent cloths together, and you go fold the six tent cloths for front of the tent. 10 And you go make 50 holes for the edge of one tent cloth, for the set wey dey outside, and 50 holes for the edge of the tent cloth for the other place where them go join. 11 You go use copper make 50 hooks and put the hooks inside the holes and join the tent together, and e go become one. 12 You go hang the tent cloths wey remain. Half of the tent cloth wey remain, you go hang-am for the back of the tabernacle. 13 The long part of the tent cloths wey remain, you go hang-am for the tabernacle, one cubit for each side, to cover-am.

14 “You go still use ram skins wey them dye with red color to make cover for the tent, and you go use sealskins make cover wey go dey ontop of that one.

15 “You go use acacia wood make frames for the sides of the tabernacle, and them go stand straight. 16 Each of the frame go high reach ten cubits and e go wide reach one and half cubit. 17 Each frame get two legs* wey join to each other. Na so you go make all the frames for the tabernacle. 18 You go make 20 frames for the left side* of the tabernacle, make them face left.*

19 “You go make 40 silver base and put them under the 20 frames: two base go dey under one frame to put the two legs of the frame, and each frame wey de follow go get two base under-am for the two legs to enter. 20 For the other side of the tabernacle wey be the right side,* you go make 20 frames 21 and their 40 silver base, two base go dey under one frame, and two base go dey under each frame wey go follow. 22 For the back of the tabernacle,* you go make six frames. 23 You go make two frames wey go be the two corner posts for the back of the tabernacle. 24 Them go be double posts from bottom go reach the up side, and join together for the first ring. Na so you go do for the two of them, and them go form the two corner posts. 25 And na eight frames go dey and their 16 silver base, two base go dey under one frame and two base under each frame wey go follow.

26 “You go use acacia wood make long sticks, five of them go connect the frames for one side of the tabernacle, 27 and five long sticks go connect the frames for the other side of the tabernacle, and five long sticks go connect the frames for the back of the tabernacle.* 28 The middle long stick wey pass for the center of the frames go start from one end go reach the other end.

29 “You go cover the frames with gold, and you go use gold make their rings to hold the long sticks, and you go cover the sticks with gold. 30 You must set the tabernacle according to the plan wey I don show you for the mountain.

31 “You go make curtain with blue thread, purple wool, red material, and quality linen wey them twist. You go weave cherubs ontop of-am. 32 You go hang-am ontop four acacia wood pillars wey them cover with gold. You go make their hooks with gold. The pillars go dey ontop four base wey them make with silver. 33 You go hang the curtain under the hooks and bring the ark of the Testimony and put-am there for back of the curtain. The curtain go separate the Holy Room and the Most Holy Room for una. 34 You must put cover ontop the ark of the Testimony and put-am inside the Most Holy Room.

35 “You go put the table outside the curtain,* and the lampstand go dey opposite the table for the left side* of the tabernacle; and you go put the table for the right side.* 36 You go make screen* for the domot of the tent with this things wey them weave together: blue thread, purple wool, red material, and quality linen wey them twist. 37 You go use acacia wood make five pillars for the screen* and cover them with gold. You go use gold make their hooks, and use copper make five base for them.