The First Book of Chronicles
13 David come talk with the people wey de control one-one thousand soldiers and the people wey de control hundred-hundred soldiers, and with all the leaders. 2 Then David tell all the people of Israel wey gather say: “If e good for una eye and if Jehovah our God like-am, make we send message to all our brothers wey remain for all the areas for Israel, and to the priests and the Levites for their cities wey get place them wey grass dey for animals, say make them come join us. 3 And make we carry the Ark of our God come back,” because them no take care of-am for the time of Saul. 4 All the people gree say make them do like that, because this thing good for the people eye. 5 So David gather all Israel people, from the river* of Egypt and even go far reach Le′bo-ha′math,* so that e go bring the Ark of the true God from Kir′i·ath-je′a·rim.
6 David and all Israel people go Ba′al·ah, wey be Kir′i·ath-je′a·rim, and wey dey the land of Judah, so that from there them go carry the Ark of the true God, Jehovah, wey sitdown for im throne ontop* the cherubs, where people de call im name. 7 But, them put the Ark of the true God ontop one new wagon and carry-am come from the house of A·bin′a·dab, and Uz′zah and A·hi′o de direct the wagon. 8 David and all Israel people de use all their power celebrate for front of the true God with songs, harps, other music instruments wey get strings, tambourines, cymbals and trumpets. 9 But when them reach the place wey them de separate grain from plant, wey them de call Chi′don, Uz′zah stretch im hand and hold the Ark, because the cows wey de drag the wagon almost make-am fall. 10 This one make Jehovah really vex for Uz′zah and e kill-am for there, because e stretch im hand to hold the Ark, e come die for there for front of God. 11 But because Jehovah don really vex and kill Uz′zah, this one make David vex* and them de call that place Pe′rez-uz′zah* till today.
12 So David really fear the true God that day and talk say: “How I fit carry the Ark of the true God come where I dey?” 13 David no bring the Ark come where e dey for the City of David, but e talk say make them carry-am go the house of O′bed-e′dom wey be Gitʹtite person. 14 The Ark of the true God dey with the family of O′bed-e′dom, and e dey im house for three months, and Jehovah continue to bless the family of O′bed-e′dom and everything wey e get.