The First Book of Chronicles
15 And e continue to build house them for imself for the City of David, and e arrange place for the Ark of the true God and make tent for-am. 2 Na that time David talk say: “Make nobody carry the Ark of the true God, apart from the Levites, because Jehovah don choose them to carry the Ark of Jehovah and work for-am all the time.” 3 Then David gather all Israel people for Jerusalem, so that them go bring the Ark of Jehovah come the place wey e don arrange for-am.
4 David gather the children-children of Aaron and the Levites: 5 the people wey come from the family of Ko′hath na, U·ri′el wey be the leader and 120 of im brothers; 6 the people wey come from the family of Me·rar′i na, A·sai′ah wey be the leader and 220 of im brothers; 7 the people wey come from the family of Ger′shom na, Joel wey be the leader and 130 of im brothers; 8 the people wey come from among the children-children of E·li·za′phan na, She·mai′ah wey be the leader and 200 of im brothers; 9 the people wey come from among the children-children of Heb′ron na, E′li·el wey be the leader and 80 of im brothers; 10 the people wey come from among the children-children of Uz′zi·el na, Am·min′a·dab the leader and 112 of im brothers. 11 Apart from that one, David call Za′dok and A·bi′a·thar wey be priests and U·ri′el, A·sai′ah, Joel, She·mai′ah, E′li·el, and Am·min′a·dab, wey be Levites, 12 and e tell them say: “Na una be the leaders of the Levites family groups from una papa side. Make una and una brothers make unaself clean and bring the Ark of Jehovah the God of Israel come the place wey I don prepare for-am. 13 As e be say una no carry-am the first time, Jehovah our God vex for us no be small, because we no check the correct way to do-am.” 14 So the priests and the Levites make theirself clean, so that them go carry the Ark of Jehovah the God of Israel come.
15 Then the Levites use the poles carry the Ark of the true God for their shoulder, just as Moses be don command them according to wetin Jehovah talk. 16 Then David tell the chiefs of the Levites say make them choose their brothers wey be the people wey de sing so that them go use all their heart sing, with music instruments: instruments wey get strings, harps, and cymbals.
17 So the Levites choose He′man wey be the son of Joel, and from among im brothers, them choose A′saph the son of Ber·e·chi′ah, and from the family of Me·rar′i wey be their brothers, them choose E′than the son of Kush·a′iah. 18 Their brothers wey dey with them for the second group na, Zech·a·ri′ah, Ben, Ja·a′zi·el, She·mir′a·moth, Je·hi′el, Un′ni, E·li′ab, Be·nai′ah, Ma·a·sei′ah, Mat·ti·thi′ah, E·liph′e·le·hu, and Mik·ne′iah and O′bed-e′dom and Je·i′el wey be gatemen. 19 The people wey de sing wey their name na He′man, A′saph, and E′than go play the cymbals wey them make with copper; 20 and Zech·a·ri′ah, A′zi·el, She·mir′a·moth, Je·hi′el, Un′ni, E·li′ab, Ma·a·sei′ah, and Be·nai′ah be de play music instruments wey get strings, wey them tune to play Al′a·moth* sound; 21 and Mat·ti·thi′ah, E·liph′e·le·hu, Mik·ne′iah, O′bed-e′dom, Je·i′el, and Az·a·zi′ah de play harps wey them tune to play Shem′i·nith* sound, to direct the songs. 22 Chen·a·ni′ah wey be the leader of the Levites make sure say everything go well as them de carry the Ark from one place go another place, because e sabi that work well, 23 and the people wey work as watchmen for the Ark na Ber·e·chi′ah and El·ka′nah. 24 The priests wey be Sheb·a·ni′ah, Josh′a·phat, Ne·than′el, A·ma′sai, Zech·a·ri′ah, Be·nai′ah, and E·li·e′zer blow the trumpets loud for front of the Ark of the true God, and O′bed-e′dom and Je·hi′ah still work as watchmen for the Ark.
25 Then David and the elders for Israel and the people wey de control one-one thousand soldiers de waka to go bring the ark of the agreement of Jehovah come from the house of O′bed-e′dom and them de happy as them de go. 26 When the true God help the Levites wey de carry the ark of the agreement of Jehovah, them use seven young bulls and seven rams do sacrifice. 27 David wear coat wey no get hand wey them make with better material, just like all the Levites wey de carry the Ark, the people wey de sing, and Chen·a·ni′ah wey be the oga of the people wey de carry the Ark and the people wey de sing; David too still wear one eph′od wey them make with linen. 28 All Israel people de carry the ark of the agreement of Jehovah come up and them de happy, de shout, and de blow horn, trumpet, cymbals, and them de play loud songs with music instruments wey get strings and harps.
29 But when them carry the ark of the agreement of Jehovah enter the City of David, Saul daughter wey im name na Mi′chal look down from window and see King David as e de jump up and down and de celebrate; e come start to hate David for im heart.