The Second Book of Chronicles
31 As them just do all this one finish, all Israel people wey dey there comot go the cities of Judah, and them pieces the idol pillars, scatter the idol poles* and scatter the high place* them and the altars for the whole of Judah and Benjamin plus the ones wey dey E′phra·im and Ma·nas′seh, until them don destroy all of them finish. After that one, all the Israel people go back to their cities, each of them go back to im own place.
2 Then Hez·e·ki′ah appoint the priests for their different-different groups, and the Levites for their different-different groups so that each of the priests and the Levites go do their work wey them give them, to do the offerings wey them de burn and the peace sacrifice them, to work for God and to de thank and praise God for the gates of the compounds* of Jehovah. 3 The king give them part of im own things make them de use do the offerings wey them de burn, plus the morning and evening offerings, and the offerings wey them de burn for Sabbath days, the new moons, and the festivals, according to wetin them write for the Law of Jehovah.
4 Another thing be say, e command the people wey de live for Jerusalem say make them give the priests and the Levites wetin them suppose give them, so that them go fit follow exactly* wetin dey the law of Jehovah. 5 As Israel people just hear the command, them bring plenty-plenty firstfruits of grain, new wine, oil, and honey, and all the things wey them harvest for farm. Them bring the tenth part of everything and the things wey them bring plenty well-well. 6 And the people of Israel and Judah wey de live for the cities of Judah still bring the tenth part of the cows and sheep and the tenth part of the holy things wey them don make holy to Jehovah their God. Them bring them and pack them ontop each other for plenty place. 7 For the third month, them start to arrange their contributions ontop each other for different-different groups, and them finish-am for the seventh month. 8 When Hez·e·ki′ah and the leaders come and see the things wey the people don gather together, them praise Jehovah and bless im people, Israel.
9 Hez·e·ki′ah ask the priests and the Levites about the things wey them gather, 10 and Az·a·ri′ah the chief priest of the house of Za′dok tell-am say: “From the time wey them start to bring the contributions come the house of Jehovah, the people de chop belleful and plenty things still dey because Jehovah don bless im people, and this plenty things still remain.”
11 So Hez·e·ki′ah tell them say make them arrange storerooms* for the house of Jehovah, so them arrange them. 12 Them continue to bring the contributions, the tenth parts,* and the holy things as them suppose do. Them come choose Con·a·ni′ah wey be Levite to be the person wey dey in charge to de take care of all this things, and na Shim′e·i wey be im brother be the next person after-am. 13 Je·hi′el, Az·a·zi′ah, Na′hath, As′a·hel, Jer′i·moth, Jo′za·bad, E′li·el, Is·ma·chi′ah, Ma′hath, and Be·nai′ah na assistants wey de help Con·a·ni′ah and im brother Shim′e·i, as King Hez·e·ki′ah command them, and na Az·a·ri′ah be the person wey dey in charge for the house of the true God. 14 And Ko′re the son of Im′nah wey be Levite wey be gateman for the east side, de care for the offerings wey people heart move them to give the true God, and e de share the contribution wey them give Jehovah and the things wey holy pass. 15 And the people wey dey under-am na E′den, Mi·ni′a·min, Jesh′u·a, She·mai′ah, Am·a·ri′ah, and Shec·a·ni′ah, them de live for the cities of the priests and them de do the work of people wey them trust. Them de share the things wey Israel people bring give their brothers for the different groups equal-equal, whether the people big or small. 16 This one join the one wey them de share give the men wey them write their names for the family register, wey de come everyday to work for the house of Jehovah and to do the work wey them give their different-different groups. The people wey them register na from three years go up.
17 Them write the names of the priests for the family register according to their family group for their papa side, and them write the names of Levites wey dey 20 years go up according to the work wey them give their groups. 18 All their children, their wives, their sons, and their daughters, all their people, na part of the people wey them write their names for the family register—because them make theirself clean for the holy work as e be say them de do the work of people wey them trust— 19 plus the priests wey be children-children of Aaron wey de live for the areas wey grass dey for the animals wey surround their cities. For all the cities, them choose men according to their names to de give food to every man among the priests, and to everybody wey im name dey inside the family register of the Levites.
20 Hez·e·ki′ah do this one for the whole of Judah, and e continue to do wetin good and correct for the eyes of Jehovah im God, and e no stop to obey-am. 21 And every work wey e do to look for im God, whether e concern the work wey them de do for the house of the true God or the Law and the commandment, e do-am with all im heart, and e succeed.