Second Corinthians
8 Now my brothers, we want make una know about the special favor of God wey e don give the congregations for Mac·e·do′ni·a. 2 When them de face serious test with suffer, them really happy to give wetin them get even though say them overpoor. This one show say them really get open hand no be small. 3 Them give according to wetin them get, true-true, I fit talk say them even give pass wetin them get. 4 From their own heart, them continue to really beg us say make we give them the chance to open their hand give, so that them go fit join for the work to care for the holy ones. 5 And them do pass as we expect. Them first give theirself to the Lord and to us as God want. 6 So we encourage Titus say just as e don start this work among una, make e still collect this gift wey una open hand give till e complete-am. 7 But just as una de do more for everything, for faith, for the word, for the things wey una know, for all una hard work, and for the love wey we get for una, make una still do more to open hand give.
8 I de talk this one, no be to command una, but na to make una know how other people de try their best and to test how real una love be. 9 Una know the special favor of our Lord Jesus Christ, say even as e dey rich, e become poor person because of una, so that e poverty go fit make una dey rich.
10 And for this matter, wetin I think na say: This one na for una gain, because for one year now, una no only start to do this thing, but una still show say una really want do-am. 11 So now, make una still complete wetin una don start to do so that as una ready to do-am, una go fit complete-am according to wetin una get. 12 If person don first dey ready to give, them go really accept this one if na according to wetin person get, no be according to wetin person no get. 13 I no want make-am easy for other people and make-am hard for una; 14 but na for things to dey equal, make the plenty wey una get now fit cover for the things wey them need, so that the plenty wey them get fit still cover for the things wey una no get, and this one go make things equal. 15 Just as them don write-am say: “The person wey get plenty, im own no too plenty and the person wey get small, im own no too small.”
16 Now we thank God as e make Titus to really de worry about una the same way like us, 17 because true-true, e do as we encourage-am. But because e really want do wetin we talk, e don decide by im self to come see una. 18 But we de send-am together with the brother wey them don praise for all the congregations for the work wey e de do for the good news. 19 No be only that one, but the congregations don still appoint-am to join de travel with us, as we de share this gift wey una give from una heart to praise the Lord and to show say we dey ready to help. 20 So we no want make anybody complain about us for the way we de share this contribution wey una don open una hand give. 21 We de ‘try to do everything for straight way, no be only for the eyes of Jehovah, but still for the eyes of people.’
22 Apart from that one, we de send them together with our brother wey we don test plenty times and see say e de really do well for many things, but now, e de even do well more because of the full trust wey e get for una. 23 But if any question dey about Titus, e be my partner* and e de work together with me for una gain; or if questions dey about our brothers, them be apostles for congregations and them de bring honor to Christ. 24 So make una show them say una love them, and show the congregations why we don boast about una.