Exodus
30 “You go make one altar where them go de burn incense. You go make-am with acacia wood. 2 E go be square shape, e go long reach one cubit,* e go wide reach one cubit, and e go high reach two cubits. You go make the horns to dey together with the altar. 3 You go cover-am with pure gold: the top part, all the sides around-am, and im horns; and you go use gold make design* round-am for the up part. 4 You go still make two rings with gold for the altar under the design,* two for one side and two for the other side, and the rings go hold the poles wey them go use carry the altar. 5 Use acacia wood make the poles and cover them with gold. 6 You go put-am for front of the curtain wey near the ark of the Testimony, for front of the cover wey dey ontop the Testimony, where I go show myself to you.
7 “Aaron go burn perfume incense ontop of-am, to make smoke comot from ontop the altar when e de maintain the lamps every morning. 8 And when Aaron light the lamps for evening,* e go burn the incense. This one na incense offering wey una go de do everytime for front of Jehovah, for all una generation. 9 Make una no ever burn incense wey no dey according to law ontop-am, or do offering wey them de burn, or give grain offering ontop-am, and make una no ever pour drink offering ontop-am. 10 Once every year, Aaron must put some of the blood of the sin offering wey them de use to forgive sins ontop the horns of the altar to make the altar clean. Aaron go make-am clean from sins once every year for all una generation. This one really dey holy to Jehovah.”
11 Then Jehovah tell Moses say: 12 “Anytime when you de register and count the sons of Israel, each person must pay price to cover for im life* to Jehovah, for the time wey una de do the registration. Them go do this one so that them no go get punishment when them register them. 13 This one na wetin everybody wey them don register go give: half shekel* according to the shekel wey them de normally use for the holy place.* Twenty ge′rahs* na one shekel. Half shekel na the contribution wey them de give to Jehovah. 14 Anybody wey them don register wey dey 20 years go up, go give Jehovah contribution. 15 Make rich person no give pass the half shekel,* and make poor person no give wetin no reach the half shekel as contribution to Jehovah to pay for una life.* 16 You go take the silver money from Israel people wey them use pay for their life and give-am to support the work for the tent of meeting, so that e go make Jehovah to remember Israel people* and e go be payment for their life.”*
17 Jehovah still tell Moses say: 18 “Make you use copper make basin and basin stand; then put-am between the tent of meeting and the altar, and put water inside wey them go de use wash. 19 Aaron and im sons go wash their hand and their leg for there. 20 When them enter inside the tent of meeting, or when them go near the altar to do their work and do offerings wey them de make with fire to Jehovah wey the smoke de go up, make them wash theirself with water so that them no go die. 21 Them must wash their hands and their legs so that them no go die, and this one go be law wey go dey for long time for them, for Aaron and im sons, for all their generation.”
22 Jehovah continue to tell Moses say: 23 “Then you go take the best perfumes: 500 shekels of solid myrrh, and half of that amount, wey be 250 shekels of sweet cinnamon, 250 shekels of sweet calamus, 24 and 500 shekels of cassia, wey them measure according to the shekel wey them de normally use for the holy place,* together with one hin* of olive oil. 25 Then make you use-am make holy anointing oil; make you really mix-am well together.* E go be holy anointing oil.
26 “You go use-am anoint the tent of meeting and the ark of the Testimony, 27 together with the table and all the things wey them de use for the table, the lampstand and the things wey them de use for the lampstand, the altar of incense, 28 the altar of offering wey them de burn and all the things wey them de use for the altar, and the basin and the basin stand. 29 You must separate them to do my work* so that them fit really dey holy. Anybody wey de touch them go dey holy. 30 And you go anoint Aaron and im sons, and you go make them dey holy to serve as priests for me.
31 “You go tell Israel people say, ‘This one go continue to be holy anointing oil for me for all una generation. 32 Make una no use-am for anybody body, and make una no ever use this things make any oil like this one. The anointing oil na something wey dey holy. E go continue to be something wey dey holy for una. 33 Anybody wey make any oil like-am and wey put some of-am ontop person wey no get right to use-am,* una must kill the person* from im people.’”
34 Then Jehovah tell Moses say: “Take the same amount of this perfumes: stacte drops, onycha, perfume galbanum, and pure frankincense. 35 Make you use-am make incense; make you really mix the spice together well,* put salt, make e dey pure, and holy. 36 Make you pound some of-am to form smooth powder, and put some of the powder for front of the Testimony for inside the tent of meeting, where I go show myself to you. The incense go really dey holy for una. 37 This incense wey you go make with this things, make una no ever make-am for unaself to use. Make you see-am as something wey dey holy to Jehovah. 38 Anybody wey make anything like this one to enjoy the smell, una must kill* the person comot from im people.”