The First of Kings
19 Then A′hab tell Jez′e·bel all the things wey E·li′jah don do and how e use sword kill all the prophets. 2 So Jez′e·bel send person to go tell E·li′jah say: “Make the gods punish me and add join-am if by this time tomorrow, I no do you like each* of them!” 3 Because of this one, e start to fear. So e stand up and run make them no kill-am.* E come Be′er-she′ba, wey dey the land of Judah, and e leave im servant for there. 4 E go wilderness and for inside the wilderness, e waka go the place wey go take one day to reach there. Then e sitdown under one broom tree, de beg say make e* die. E talk say: “I no fit again! Now, O Jehovah, take my life* because I no better pass my papa-papa them.”
5 Then e lie down and start to sleep under the broom tree. At once, one angel touch-am and tell-am say: “Stand up make you chop.” 6 When e look, e see say near im head, one round loaf of bread dey ontop hot stones and one container of water dey there. E chop and drink and lie down again. 7 After, the angel of Jehovah come back the second time. E touch-am and talk say: “Stand up make you chop, because the journey go too far for you.” 8 So e stand up and e chop and drink. That food give-am power to fit waka 40 days and 40 nights, until e reach Hor′eb, the mountain of the true God.
9 For there, e enter one cave and sleep there that night, and see! e hear Jehovah word as E ask-am say: “E·li′jah, wetin you de do here?” 10 So E·li′jah talk say: “I don really de serve Jehovah the God of armies with all my heart, but Israel people no keep your agreement, them don scatter your altars and them don use sword kill your prophets, na only me remain. Now, them want kill me.”* 11 But E tell-am say: “Go outside and stand ontop the mountain for front of Jehovah.” And see! Jehovah de pass for E·li′jah front, and strong and heavy breeze come de scatter mountains and de break rocks for front of Jehovah, but Jehovah no dey inside the breeze. After the breeze don blow finish, ground come begin shake open, but Jehovah no dey inside there. 12 After the ground don shake, fire come start de burn, but Jehovah no dey inside the fire. After the fire don burn finish, E·li′jah come hear one gentle and cool voice. 13 As E·li′jah just hear the voice, e cover im face with im prophet cloth. Then e go outside and stand for the place wey them de take enter the cave. Then one voice ask-am say: “E·li′jah, wetin you de do here?” 14 So E·li′jah talk say: “I don de serve Jehovah the God of armies with all my heart, but Israel people no keep your agreement, them don scatter your altars, and them don use sword kill your prophets, na only me remain. Now them want kill me.”*
15 Jehovah tell-am say: “Go back, go the wilderness of Damascus. When you reach there, anoint Haz′a·el as king to rule Syria. 16 And make you anoint Je′hu the grandson of Nim′shi as king to rule Israel, and make you anoint E·li′sha* the son of Sha′phat wey come from A′bel-me·ho′lah as prophet to replace you. 17 Anybody wey escape from Haz′a·el sword, Je′hu go kill-am, and anybody wey escape from Je′hu sword, E·li′sha go kill-am. 18 And I still get 7,000 people for Israel wey never bend their knees to Ba′al, and wey never kiss-am with their mouth.”
19 As e comot from there, e see E·li′sha the son of Sha′phat as e de use 24 bulls wey them tie two-two de dig ground for farm, and e de control the last two bulls wey dey back-back. So E·li′jah go meet-am and e throw im prophet cloth for im body. 20 So E·li′sha leave the bulls and run follow E·li′jah and talk say: “Abeg, allow me make I go kiss my papa and mama, and tell them bye-bye. Then I go follow you.” E answer-am say: “Make you go, I no stop you.” 21 So e go back, carry two bulls and use them do sacrifice. E use the wood wey the bulls take de work cook the meat and give-am to the people, and them chop. After that one, e stand up follow E·li′jah and start to work for-am.