The Second Book of Samuel
5 After some time, all the tribes of Israel come meet David for Heb′ron and tell-am say: “See! We be your own flesh and blood.* 2 Before-before when Saul still be our king, na you de lead Israel people go fight* and Jehovah tell you say: ‘You go be shepherd for my people Israel, and you go be Israel people leader.’” 3 So all the elders for Israel come meet the king for Heb′ron and King David make agreement with them for Heb′ron for Jehovah front. Them come anoint David as king for Israel.
4 Na 30 years David dey when e start to rule as king, and e rule for 40 years. 5 E rule Judah people for Heb′ron for 7 years and 6 months, and e rule all the people for Israel and Judah, for Jerusalem for 33 years. 6 The king and im men enter road and start to go Jerusalem so that them go fight Jeʹbus people wey de stay for there. The people come de laugh David, de talk say: “You no fit ever enter inside here! Even blind people and people wey no fit waka go drive you comot.” Them be de think for their mind say, ‘David no fit ever enter this place.’ 7 But David take over the safe place for Zion, wey them de call the City of David now. 8 So David talk that day say: “Make the people wey go attack Jeʹbus people pass the water pipe go kill the ‘blind people and people wey no fit waka,’ wey hate David!”* Na im make them de talk say: “Blind people and people wey no fit waka no go ever enter the house.” 9 Then David start to stay for the safe place, and them call the place,* the City of David; and e start to build walls and other buildings for the Hill* and for other place them for the city. 10 Na so David position as king come de strong more-more, and Jehovah of armies dey with-am.
11 Hi′ram wey be king of Tyre come send people make them go meet David. E still send cedar timbers, carpenters, and people wey de use stone build walls, and them start to build house* for David. 12 This one make David know say Jehovah don make im position as king strong for Israel, and e don raise im kingdom high because of Im people Israel.
13 After David comot from Heb′ron come Jerusalem, e come get other concubines and other wives, and them born other sons and daughters for David. 14 The name of the children wey them born for-am for Jerusalem na: Sham·mu′a, Sho′bab, Nathan, Sol′o·mon, 15 Ib′har, E·li′shu·a, Ne′pheg, Ja·phi′a, 16 E·lish′a·ma, E·li′a·da, and E·liph′e·let.
17 When Phi·lisʹti·a people hear say them don anoint David as king for Israel, all Phi·lisʹti·a people come up come find David. When David hear this one, e go* enter the safe place. 18 Then Phi·lisʹti·a people come, and them arrange theirself for different-different place for the Lowland* of Reph′a·im. 19 So David ask Jehovah say: “Make I go up go fight Phi·lisʹti·a people? You go put them for my hand?” Then Jehovah tell David say: “Make you go up, because I go surely put Phi·lisʹti·a people for your hand.” 20 So David come Ba′al-pe·ra′zim, and kill them for there. Then e talk say: “Jehovah don scatter my enemies for my front, the way water wey burst come out de use force scatter things.” Na im make e call that place Ba′al-pe·ra′zim. 21 Phi·lisʹti·a people run leave their idols for there, but David and im men carry them troway.
22 After this one, Phi·lisʹti·a people come again and arrange theirself for different-different place for the Lowland* of Reph′a·im. 23 Then David ask Jehovah wetin e go do, but E tell David say: “Make you no go up go face them direct, instead, make you go round, attack them from back and fight them for front of the ba′ca trees. 24 And when you hear sound wey be like say people de march ontop the ba′ca trees, then make you no waste time attack them because Jehovah don first you go, to destroy the soldiers of Phi·lisʹti·a people.” 25 So David do exactly wetin Jehovah don command-am, and e kill Phi·lisʹti·a people from Ge′ba go reach Ge′zer.