Revelation

13 And e* stand for one place ontop the sand for the sea.

And I see one big wicked animal wey de come out from the sea, wey get ten horns and seven heads, and ten crowns dey ontop im horns, but names wey de talk against God dey ontop im head. 2 Now the big wicked animal wey I see be like leopard, but im leg be like bear leg and im mouth be like lion mouth. The dragon come give the animal im power and im throne, and plenty authority.

3 I see say e be like say them wound one of im heads well-well, but im wound wey almost kill-am be don heal, and this one really surprise all the people for the earth, them come de follow the big wicked animal. 4 And them worship the dragon because na im give the big wicked animal authority and them talk this things take worship the big wicked animal, say: “Na who be like the big wicked animal, and who fit follow-am fight war?” 5 Them give-am mouth wey de talk big-big things and wey de talk against God, and them still give-am authority to do as e like for 42 months. 6 And e open im mouth de talk bad things against God, de talk bad things about im name and the place wey e de stay, even about the people wey de stay for heaven. 7 Them allow-am to fight war with the holy ones and win them, and them give-am authority to rule every tribe, people wey get different-different skin color, people wey de speak different-different language and every nation. 8 And all the people wey de stay for the earth go worship-am. From when the world start, them never write any of their names for the scroll of life of the Lamb wey them kill.

9 If anybody get ear, make e hear. 10 If e be say them must catch anybody, them go catch-am. If anybody use sword kill person,* them must use sword kill-am. Na because of this one the holy ones need to endure and get faith.

11 Then I see another big wicked animal wey de come out from the earth, and e get two horns like lamb, but e start to talk like dragon. 12 For front of the first big wicked animal, e de use all the power wey that one get. And e make the earth and the people for inside, worship the first big wicked animal wey the wound wey nearly kill-am don heal. 13 And e de do big miracles,* e de even make fire come down from heaven to the earth for front of people.

14 E de deceive people wey de stay for the earth, because of the miracles wey them allow-am to do for front of the big wicked animal, and e de tell the people wey de stay for the earth say make them make image wey be like the big wicked animal* wey sword wound and still, e survive. 15 And them allow-am make e breathe life put for* the image of the big wicked animal so that the image of the big wicked animal go talk and do make them kill all the people wey no gree worship the image of the big wicked animal.

16 E de force everybody, whether them be ordinary people, people wey get high position, rich people, poor people, free people and slaves, say make them put mark for their right hand or for front of their head, 17 and say nobody fit buy or sell apart from person wey get the mark, the name of the big wicked animal, or the number of im name. 18 Person need sense to know this one: Make the person wey de understand something well, calculate the number of the big wicked animal because na human being number, and im number na 666.