Hebrews
2 Because of this one, e dey important make we really put our mind for the things wey we don hear, so that we no go ever shift comot small-small. 2 If the word wey God use angels talk prove say doubt no dey and everybody wey break law and wey no obey, get punishment wey agree with correct judgment, 3 una no think say e go hard us to escape if we treat as nothing, the message about the big thing wey God don do to save us? Na our Lord first start to talk about this message, and the people wey hear as e talk, talk say na true. 4 And God join to prove say na true. E do this one with signs and wonderful things and different-different miracles, and with holy spirit wey e share for im servants as e want-am.
5 No be under angels e don put the earth wey de come, wey we de talk about. 6 But one person prove-am when e write say: “Wetin be man wey you de think about-am, or wetin son of man be wey you de care for-am? 7 You make-am to low pass angels small, you reward-am with praise and honor, and choose-am make e de control the work wey your hand do. 8 You put everything under im control.”* As God put everything under im control, nothing remain wey e no put under-am. But now, we never de see say everything dey under-am. 9 But we de see Jesus, wey God don make-am low pass angels small, and because e suffer sotey e die, God don reward-am now with praise and honor. Because of the special favor of God, e face death for everybody.
10 Everything dey to bring honor to God and na im make them. So that e go bring honor to many sons, na fine thing e do as e allow the Main Leader to suffer. As e suffer, e qualify to save them. 11 The person wey de make people holy, and the people wey e de make holy, all of them come from one person. And because of this one, e no de shame to call them brothers. 12 As e talk: “I go talk about your name to my brothers, I go praise you with song for inside the congregation.” 13 And e still talk say: “I go trust-am.” And e talk again say: “See! Me and the young children, wey Jehovah don give me.”
14 So since the “young children” na flesh and blood, e don be flesh and blood before too, so that because of im death, e fit destroy the person wey fit cause death, wey be Devil, 15 and so that e go fit free* all the people wey the fear of death don hold as slave all their life. 16 No be really angels e de help, but na Abraham pikin* e de help. 17 Because of this one, e need to be like im “brothers” for everything, so that e fit be high priest wey de show mercy and wey dey faithful for things about God. E do this one so that e go give im life for the sins of the people as sacrifice wey de make people get peace again with God.* 18 Since e suffer when e face test, e go fit help people wey de face test.