Exodus

29 “This one na wetin you go do to make them dey holy so that them fit serve as priests for me: Take one young bull, two rams wey no get problem for body, 2 bread wey no get yeast, bread wey no get yeast wey them mix with oil and wey get ring shape, and wafers wey no get yeast and wey them put oil. You go make them with better wheat flour* 3 and put them inside basket and use the basket bring them come, together with the bull and the two rams.

4 “You go bring Aaron and im sons come the domot of the tent of meeting and use water wash them. 5 Then you go take the cloths and dress Aaron with the long cloth, the eph′od* coat wey no get hand, the eph′od, and the breastpiece,* and you go tie the eph′od belt wey them weave* round im waist make e tight. 6 You go put the special headtie ontop im head and put the holy sign of dedication* for the special headtie, 7 and take the anointing oil and pour-am ontop im head and anoint-am.

8 “Then bring im sons come front and wear the long cloths for their body, 9 and wrap the cloth wey them de tie like belt around them, Aaron together with im sons, and put their headtie for their head; and the work of priests go always dey their hand, and this one go be law wey go dey for long time. Na like this you go appoint Aaron and im sons to serve as priests.*

10 “You go come bring the bull come front of the tent of meeting and Aaron and im sons go put their hands ontop the bull head. 11 Kill the bull for front of Jehovah, for the domot of the tent of meeting. 12 Use your finger take some of the blood of the bull, and put-am for the horns wey dey the altar, and pour the rest of the blood for the down part of the altar. 13 Then take all the fat wey cover the intestines, the fat wey dey ontop the liver, and the two kidneys and the fat wey dey ontop them, and burn them so that their smoke go comot from ontop the altar. 14 But make you burn the flesh of the bull, im skin, and im shit, with fire for outside the camp. This one na sin offering.

15 “Then take the one ram, and Aaron and im sons go put their hands ontop the ram head. 16 Kill the ram and take im blood and sprinkle-am for all the sides of the altar. 17 Cut the ram to pieces and wash im intestines and im legs,* and arrange the pieces together with im head. 18 You must burn the whole ram to make the smoke comot from ontop the altar. Na offering wey them de burn to Jehovah, wey get better smell.* This one na offering wey them make with fire to Jehovah.

19 “After that one, you go take the other ram, and Aaron and im sons go put their hands ontop the ram head. 20 Kill the ram and take some of im blood and put-am for the down part of Aaron right ear, and for the down part of im sons right ear, and for the thumb of their right hand and the big toe of their right leg, and sprinkle the blood for all the sides of the altar. 21 Then take some of the blood wey dey ontop the altar, and some of the anointing oil and splash-am ontop Aaron and im cloths and ontop im sons and im sons cloths, so that Aaron and im cloths and im sons and their cloths fit dey holy.

22 “Then remove the fat from the ram, the fat from the tail, the fat wey cover the intestines, the fat wey dey ontop the liver, the two kidneys and the fat wey dey ontop them, and the right leg, because this one na ram wey them de use choose priests. 23 Still take one round bread, and bread wey get ring shape wey them put oil, and wafers from the basket wey them put bread wey no get yeast, wey dey front of Jehovah. 24 You must put all of them for Aaron hand, and for the hands of im sons, and you go wave them go back and front, as offering wey them de wave for front of Jehovah. 25 Then you go take them from their hand and burn them for the altar, ontop the offering wey them de burn, as something wey get better smell* for front of Jehovah. This one na offering wey them make with fire to Jehovah.

26 “Then take the breast of the ram wey them de use appoint priests, wey them use do sacrifice to appoint Aaron, and wave-am go back and front as offering wey them de wave for front of Jehovah, and that one go be your own share. 27 You go make this things holy: the breast of the offering wey them de wave, and the leg of the holy part wey them wave and wey them remove from the ram wey them de use appoint priests, from wetin them use do sacrifice to appoint Aaron and im sons. 28 E go be for Aaron and im sons, and this one go be law wey go dey for long time for Israel people, because na holy part and e go be holy part wey Israel people give. Na their holy part wey them give Jehovah from their peace sacrifice them.

29 “The sons of Aaron wey go come after-am go use the holy cloths wey be Aaron own when them don anoint them and appoint them as priests. 30 The priest wey go come from among im sons, wey go take over from-am and wey go come inside the tent of meeting to work for the holy place go wear them for seven days.

31 “You go take the ram wey them de use appoint priests and boil im flesh for holy place. 32 Aaron and im sons go chop the flesh of the ram and the bread wey dey inside the basket, for the domot of the tent of meeting. 33 Make them chop the things wey una use do sacrifice for sins, wey them use appoint them as priests* and to make them dey holy. But person wey no get right to chop them* no go chop them, because them be something wey dey holy. 34 If any of the flesh of the sacrifice wey them de use appoint priests and the bread remain till morning, then you must burn wetin remain with fire. Make una no ever chop-am, because na something wey dey holy.

35 “This one na wetin you go do for Aaron and im sons, according to everything wey I don command you. You go use seven days to choose them as priests.* 36 You go sacrifice the bull of the sin offering everyday for God to forgive sin, and you go do sacrifice of sin for the altar to make-am dey clean from sin, and you must anoint the altar to make-am dey holy. 37 You go use seven days to make the altar dey clean from sin and you must make-am dey holy so that e go come be altar wey really dey holy. Anybody wey touch the altar go dey holy.

38 “This one na wetin you go sacrifice for the altar: always sacrifice two rams wey dey one year old, everyday. 39 Sacrifice one young ram for morning and the other ram for evening.* 40 Make you sacrifice the first young ram with the tenth part of one e′phah measure* of better flour wey them mix with the fourth part of one hin* of oil from olive wey them pound, and the fourth part of one hin of wine of drink offering. 41 You go sacrifice the second young ram for evening,* together with the same grain and drink offerings, just like the one for morning. You go do this sacrifice as something wey get better smell,* offering wey them make with fire to Jehovah. 42 For all una generation, e go be offering wey them de burn everytime for the domot of the tent of meeting for front of Jehovah, where I go show myself to una to talk to you for there.

43 “I go show myself to Israel people for there, and my glory go make-am dey holy. 44 I go make the tent of meeting and the altar dey holy, and I go make Aaron and im sons dey holy so that them fit serve as priests for me. 45 I go stay among Israel people and I go be their God. 46 And them go surely know say I be Jehovah their God wey bring them come out from the land of Egypt, so that I fit stay among them. I be Jehovah their God.