Ezra
7 After this things, for the time when Ar·ta·xerx′es wey be king of Persia de rule, Ez′ra* come go back. Ez′ra na the son of Se·rai′ah, wey be son of Az·a·ri′ah, son of Hil·ki′ah, 2 son of Shal′lum, son of Za′dok, son of A·hi′tub, 3 son of Am·a·ri′ah, son of Az·a·ri′ah, son of Me·ra′ioth, 4 son of Zer·a·hi′ah, son of Uz′zi, son of Buk′ki, 5 son of Ab·i·shu′a, son of Phin′e·has, son of El·e·a′zar, son of Aaron wey be chief priest. 6 This Ez′ra come* from Babylon. Na person wey de copy book* and e really know* the Law of Moses, wey Jehovah the God of Israel be don give Israel people. The king give-am everything wey e ask for because the hand of Jehovah im God dey ontop-am.
7 Some Israel people, the priests, the Levites, the people wey de sing, the gatemen, and the temple servants* go up go Jerusalem for the seventh year wey King Ar·ta·xerx′es don de rule. 8 And Ez′ra come Jerusalem for the fifth month, for the seventh year wey the king don de rule. 9 For the first day of the first month, e enter road comot from Babylon and e reach Jerusalem for the first day of the fifth month because the good hand of im God dey ontop-am. 10 Ez′ra be don ready im heart* to check the Law of Jehovah, to follow-am, and to teach people for Israel the directions and judgments wey dey inside the Law.
11 This na the letter wey King Ar·ta·xerx′es give Ez′ra wey be priest and person wey de copy book,* and wey really sabi* the commandments of Jehovah and im directions wey e give Israel people:
12 * “This na Ar·ta·xerx′es, the king of kings, to Ez′ra wey be priest, the person wey de copy the Law of the God of the heavens: Make you get correct peace. Now 13 I don give the command say every Israel person together with their priests and Levites wey dey the area wey I de rule wey want follow you go Jerusalem, make e go. 14 Because the king and the seven people wey de advice-am don send you say make you go check whether the people for Judah and Jerusalem de obey the Law of your God wey dey your hand,* 15 and say make you carry the silver and the gold wey the king and the people wey de advice-am don use their own mind give the God of Israel, wey de stay for Jerusalem, 16 with all the silver and the gold wey you collect* for all Babylon area plus the gifts wey the people and the priests use their own mind bring for the house of their God wey dey Jerusalem. 17 And make you quick-quick use this money buy bulls, rams, small-small sheep, with wetin them go need to do the grain offerings and drink offerings wey them de do with them, and make you use them do sacrifice ontop the altar of the house of una God for Jerusalem.
18 “And you fit use the silver and gold wey remain do anything wey good for your eyes and the eyes of your brothers, according to wetin una God want. 19 And all the containers wey them give you for the work of the house of your God, make you put them for front of God for Jerusalem. 20 And all the other things wey them go need for the house of your God, make you collect money from the place wey them de keep the king money take do them.
21 “Me, King Ar·ta·xerx′es, don command all the people wey de handle money matter for the area wey dey the Other Side of the River* say, everything wey Ez′ra the priest, wey be the person wey de copy* the Law of the God of the heavens talk say make una do, make una do-am quick-quick, 22 even though say e reach 100 talents* of silver, 100 cor measures* of wheat, 100 bath measures* of wine, 100 bath measures of oil, and salt wey plenty sotey e no get measure. 23 Make them use all their heart do everything wey the God of the heavens command them say make them do for the house of the God of the heavens, so that e no go vex for the people wey dey the areas wey the king de rule and the king sons. 24 And I still de tell una say make una no tell any of the priests, Levites, people wey de sing and play music instruments, the gatemen, temple servants,* and the people wey de work for the house of God say make them pay tax, money wey them suppose pay to kings, or road money.
25 “And you, Ez′ra, make you use the sense wey your God don give you* to choose magistrates and judge them, to judge all the people wey dey the area wey dey the Other Side of the River, all the people wey know the laws of your God, and make you teach anybody wey no know the laws. 26 And anybody wey no obey the Law of your God and the law of the king, make them punish-am quick-quick, whether na to kill-am, pursue-am comot, tell-am make e pay fine, or na to put-am for prison.”
27 Make them praise Jehovah, the God of our papa-papa them, wey put-am for the heart of the king to make the house of Jehovah wey dey Jerusalem fine! 28 And e don show me love wey no de fail for front of the king and the people wey de advice-am and all the strong leaders wey the king get. So I no fear* because the hand of Jehovah my God dey ontop me and from Israel I gather men wey be leaders to go with me.