Exodus
17 All Israel people comot from the wilderness of Sin stage by stage, according to the command of Jehovah, and them stay for Reph′i·dim. But water no dey for the people to drink.
2 So the people start to quarrel with Moses and talk say: “Give us water make we drink.” But Moses tell them say: “Why una de quarrel with me? Why una continue to test Jehovah?” 3 But for there, the people de really hungry for water, and them continue to complain against Moses and talk say: “Why you bring us come out from Egypt to kill us and our sons and our animals as you no give us water drink?” 4 At last, Moses beg Jehovah say: “Wetin I go do with this people? Small time, them go stone me!”
5 Then Jehovah tell Moses say: “Make you go first before the people, and carry some of the elders of Israel with you, and take your stick wey you use nack River Nile. Hold-am for your hand and waka de go. 6 See! I go stand for there for your front ontop the rock for Hor′eb. You must nack the rock and water go come out of-am, and the people go drink-am.” Moses do like that for front of the elders of Israel. 7 So e call the place Mas′sah* and Mer′i·bah,* because Israel people quarrel and because them test Jehovah as them talk say: “Jehovah dey with us or e no dey?”
8 Then Am′a·lek people come, and them fight against Israel for Reph′i·dim. 9 With that one, Moses tell Joshua say: “Choose men for us and go fight Am′a·lek people. Tomorrow, I go stand ontop the hill and hold the stick of the true God for my hand.” 10 Then Joshua do just as Moses tell-am, and e fight Am′a·lek people. Moses, Aaron, and Hur go ontop the hill.
11 As long as Moses continue to raise im hands up, Israel people go de win, but anytime wey e just allow im hands come down, Am′a·lek people go de win. 12 When Moses hands don tire-am, them bring stone and put-am under Moses, and e sitdown ontop-am. Then Aaron and Hur support im hands, one person for each side. This one make im hands no move until sun don go down. 13 Then Joshua win Am′a·lek and im people with sword.
14 Jehovah come tell Moses say: “Write this thing for the book so that people go remember, and make you repeat-am for Joshua, ‘I go remove Am′a·lek finish from the earth* and people no go remember them again.’” 15 Then Moses build one altar and call-am Je·ho′vah-nis′si,* 16 and e talk say: “Because them show say them raise their hand against the throne of Jah, Jehovah go fight with Am′a·lek from generation to generation.”