The First Book of Chronicles
22 Then David talk say: “This na the house of Jehovah the true God, and this na altar wey them go use do offering wey them de burn for Israel.”
2 Then David command the people say make them gather all the strangers wey dey the land of Israel together, and e give them the work to de cut and shape the stones wey them go use build the house of the true God. 3 David still gather plenty iron wey them go use do nails for the doors of the gates and for the things wey them fit use tight two things together, and e still gather copper wey plenty sotey them no fit measure them, 4 with cedar timbers wey them no fit count, because Si′don people and Tyre people bring plenty-plenty cedar timbers for David. 5 And David talk say: “My son Sol′o·mon dey young and e never too sabi things, and the house wey e go build for Jehovah go fine well-well, so that people for all the lands go know how the house get honor and fine reach. So I go gather things for-am wey e go use build-am.” So before David die, e gather plenty things wey Sol′o·mon go use build the house.
6 Apart from that one, e call Sol′o·mon im son and tell-am say make e build house for Jehovah the God of Israel. 7 David tell Sol′o·mon im son say: “As for me, e be really dey my heart to build house for the name of Jehovah my God. 8 But Jehovah tell me say, ‘You don kill plenty people and you don fight big-big wars, you no go build house for my name because you don kill plenty people for the earth for my front. 9 See! You go get son wey go be person wey get peace,* and I go make-am rest from all im enemies wey surround-am, because na Sol′o·mon* go be im name and for im time, I go make Israel people get peace and nothing go disturb them. 10 Na im be the person wey go build house for my name. E go be my son and I go be im papa. I go make sure say im kingdom for Israel last forever.’
11 “Now, my son, make Jehovah dey with you, and make you succeed and build the house of Jehovah your God, just as e don talk about you. 12 The only thing be say make Jehovah give you sense and help you understand things when e don give you authority to rule Israel, so that you go de obey the law of Jehovah your God. 13 Then you go succeed if you sofri follow the directions and the judgments wey Jehovah command Moses say make e give Israel people. Make you get strong heart and dey strong. Make you no fear or de shake. 14 I don really suffer to gather the things wey you go use build Jehovah house. The things wey I gather na 100,000 talents* of gold and 1,000,000 talents of silver, with plenty copper and iron wey them no fit measure, and I don gather timbers and stones, but you go still add more join them. 15 Plenty people dey wey go work for you, people wey de cut stones, people wey de use stone build, carpenters, and people wey sabi all kind of handwork. 16 The gold, silver, copper, and iron plenty pass wetin them fit measure. Get up make you start the work, and make Jehovah dey with you.”
17 Then David command all the leaders of Israel say make them help im son Sol′o·mon. E talk say: 18 “Jehovah una God no dey with una? And e never make una rest from una enemies from every side? Because e don give me the people wey de stay for the land, and Jehovah and im people don de control the people wey dey the land. 19 Now, make una decide with all una heart and soul* say una go serve Jehovah una God, and make una start to build the holy place of Jehovah the true God, so that them go bring the ark of the agreement of Jehovah and the holy things of the true God come the house wey una build for the name of Jehovah.”