Numbers

14 Then all Israel people raise their voice, and the people continue to cry loud and de shout for the whole of that night. 2 All Israel people start to complain against Moses and Aaron and all the people talk against them say: “E for better if to say we don die for the land of Egypt, or e for better if to say we don die for this wilderness! 3 Why Jehovah de bring us come this land make them kill us with sword? Our enemies go carry our wives and children go. E no better make we go back to Egypt?” 4 Them even de tell each other say: “Make we choose person wey go lead us and go back to Egypt!”

5 Then Moses and Aaron kneel down and bow face ground for front of the whole group* of Israel people wey gather. 6 Joshua the son of Nun and Ca′leb the son of Je·phun′neh, wey dey among the people wey go check the land, tear their cloths, 7 and them tell all Israel people say: “The land wey we enter inside go check na really, really good land. 8 If Jehovah happy with us, e go surely bring us come inside this land and give-am to us, land wey milk and honey de flow for inside. 9 Make una no ever turn against Jehovah and make una no fear the people of the land, because we go finish them.* Them no get protection again, and Jehovah dey with us. Make una no fear them.”

10 But, all Israel people talk say them want stone them. But the glory of Jehovah appear ontop the tent of meeting to all the people of Israel.

11 Then Jehovah tell Moses say: “How long this people no go show me respect, and how long them no go put faith for me even with all the signs wey I don do among them? 12 Make I strike them with disease and wipe them comot, and make I make you to be nation wey big and wey dey powerful pass them.”

13 But Moses tell Jehovah say: “Then Egypt people go hear about wetin you do to this people after you don use your power bring them from the land of Egypt, 14 and them go talk about-am to the people wey de live for this land. Them don hear too say, you, Jehovah, dey with this people and you don appear to them face-to-face. You be Jehovah and your cloud de stand ontop them and you de go for their front for inside the pillar of cloud for daytime and inside the pillar of fire for night. 15 If you kill all this people at once,* the nations wey don hear about who you be go talk say: 16 ‘Jehovah no fit bring this people come inside the land wey e swear say e go give them, so e kill them for the wilderness.’ 17 Now, abeg, Jehovah, make your power dey great as you promise when you talk say: 18 ‘Jehovah no de quick vex and e de always show love wey no de fail, e de forgive person wey do bad thing and person wey break law, but e no go ever leave person wey do bad make e no face punishment, e de allow the sons, the grandchildren,* and the great-grandchildren* to face the punishment for the sin of their papa-papa them.’ 19 Abeg, forgive the sin of this people because of your big love wey no de fail, just as you don forgive this people from Egypt come reach now.”

20 Then Jehovah talk say: “I forgive them according to wetin you don talk. 21 But another thing be say, as long as I dey alive, the glory of Jehovah go full all the earth. 22 But, nobody among the men wey don see my glory and my signs wey I do for Egypt and for the wilderness and e still continue to test me this ten times and e no listen to my voice 23 go ever see the land wey I swear to give their papa them. No, nobody among this people wey no show me respect go see-am. 24 But because my servant Ca′leb dey different from the other people* and e continue to follow me with all im heart, I go surely bring-am come inside the land where e go, and im children go take the land as their own. 25 Since A·malʹek people and Ca′naan people de live for the lowland,* make una turn back tomorrow, and move go the wilderness for the road of the Red Sea.”

26 Then Jehovah tell Moses and Aaron say: 27 “How long this wicked people go continue to complain against me? I don hear wetin Israel people de complain against me. 28 Tell them say, ‘This one na wetin Jehovah talk: “As long as I dey alive I go do una wetin I don hear una de talk! 29 For this wilderness, una dead body go fall for ground, yes, all of una wey dey from 20 years go up, wey them don register, all of una wey don complain against me. 30 Nobody among una go enter inside the land wey I swear* say una go live for inside, except Ca′leb the son of Je·phun′neh and Joshua the son of Nun.

31 “‘“And I go bring una children come inside, wey una talk say una enemies go carry go, and them go know the land wey una reject. 32 But una own dead body go fall for ground for this wilderness. 33 Now una sons go be shepherds for the wilderness for 40 years, and them go answer for the things wey una do wey show say una no dey faithful,* until the last dead body among una go fall for ground for the wilderness. 34 According to the number of the days wey una check the land, 40 days, one day for one year, one day for one year, una go answer for una sins for 40 years, then una go know wetin e mean to dey against me.*

35 “‘“Me, Jehovah, don talk-am. This one na wetin I go do to all this wicked people, the people wey don gather together against me: Na for inside this wilderness their own go finish, and na here them go die. 36 The men wey Moses send to check the land and wey make all the people complain against-am when them come back with bad report about the land, 37 yes, the men wey bring back the bad report about the land, them go strike them and them go die for front of Jehovah. 38 But Joshua the son of Nun and Ca′leb the son of Je·phun′neh, wey be dey among the people wey go check the land, go surely continue to live.”’”

39 When Moses tell all Israel people this things, the people start to cry no be small. 40 Apart from that one, them get up for early morning and try to go up for the top of the mountain and de talk say: “See, we don ready to go up to the place wey Jehovah talk about because we don sin.” 41 But Moses talk say: “Why una de do pass the things wey Jehovah command? Una no go succeed for this thing wey una want do. 42 Make una no go up, because Jehovah no dey with una, and una enemies go win una. 43 A·malʹek people and Ca′naan people go dey there to face una and them go use sword kill una. Because una stop to obey Jehovah, Jehovah no go dey with una.”

44 But them go the top of the mountain when them no get the right, but the ark of the agreement of Jehovah and Moses no comot from the middle of the camp. 45 Then A·malʹek people and Ca′naan people wey de live for that mountain come down and strike them, and scatter them go reach Hor′mah.