Deuteronomy

8 “Make una make sure say una follow all the commandments wey I de give una today, so that una fit continue to live and plenty and enter inside the land and take-am as una own, the land wey Jehovah swear about to una papa-papa them. 2 Remember the long road wey Jehovah your God make you waka this 40 years for inside the wilderness, to make you carry body down and to test you so that e go know wetin dey your heart, whether you go obey im commandments or you no go obey. 3 So e make you carry body down and allow hunger catch you and give you manna as food, wey you or your papa them no know, so that e go make you know say no be only bread go make person dey alive, but na every word wey come from Jehovah mouth de make person dey alive. 4 The cloths wey you wear no fade* and your leg no swell up for this 40 years. 5 You really know for inside your heart say just as man de correct im son, Jehovah your God be de correct you.

6 “Now you must obey the commandments of Jehovah your God as you de follow im way and as you de fear-am. 7 Because Jehovah your God de bring you come inside good land, land wey get rivers of water,* place them wey water de come out from and underground water wey de flow for the level land* and for the area wey mountains dey, 8 land wey get wheat and barley, grapevines, fig trees, and pomegranates,* land wey get olive oil and honey, 9 land wey hunger no go dey and you no go lack anything, land wey the stones for there get iron and wey you go fit get copper from the mountains.

10 “When you don chop belleful, you must praise Jehovah your God for the good land wey e don give you. 11 Make you dey careful make you no forget Jehovah your God and no fail to obey im commandments, the things wey e don decide, and the laws wey I de command you today. 12 When you chop belleful and you build better-better house them and live inside them, 13 when your animals and your sheep plenty, and your silver and gold plenty, and you get surplus of everything, 14 no allow your heart dey proud and make you to forget Jehovah your God wey bring you come out of the land of Egypt, from the place* wey you be dey as slave, 15 wey make you waka pass inside great wilderness wey fit make person fear, wilderness wey get snakes wey get poison, and scorpions, and dry ground wey water no dey. E make water flow come out from the hard rock, 16 and e give you manna as food for the wilderness, wey your papa them no know, to make you carry body down and to test you so that you go gain for future. 17 If you talk for your heart say, ‘Na my own power and my strong hand don make me get this plenty property,’ 18 remember say na Jehovah your God de give you power to get plenty property, so that e go fit do wetin dey im agreement wey e swear to your papa-papa them, as e dey today.

19 “If you ever forget Jehovah your God and you follow other gods and serve them and bow down to them, I de warn you today say you go surely die. 20 Like the nations wey Jehovah de destroy for una front, na so una go die finish, because una no listen to the voice of Jehovah una God.