Hebrews
8 Now the main point of wetin we de talk na say: We get this kind high priest, and e don sitdown for the right hand side of the throne of the Great God for heaven. 2 Na servant* of the holy place and of the correct tent. Na Jehovah make this tent, no be man. 3 Them appoint every high priest to give gifts and make sacrifice them; so e dey important as this person make sacrifice too. 4 If e dey for earth, e for no be priest, since men don already dey wey de give gifts as the Law talk. 5 This men de do holy work wey just be example and shadow of* the things for heaven; just as when Moses want make the tent, God give-am this command: E talk say: “Make sure say you follow the same example* wey I show you for the mountain to make everything.” 6 But now, Jesus don get work* wey better pass by far, because e still be the middleman for one agreement wey still better pass by far, and wey them use Law make ontop better promise them.
7 If to say that first agreement no get problem, them for no need the second one. 8 E complain about the people when e talk say: “This na wetin Jehovah talk, ‘See! The time de come when I go make new agreement with the people of Israel and with the people of Judah. 9 E no go be like the agreement wey I make with their papa-papa them for the day wey I hold their hand and lead them comot from the land of Egypt. Because them no continue to keep my agreement, so I stop to care for them,’ this na wetin Jehovah talk.
10 “Jehovah talk say, ‘Na this one be the agreement wey I go make with the people of Israel after those days. I go put my laws inside their mind, and I go write them inside their hearts, and I go be their God, and them go be my people.
11 “‘And any of them no go teach im own countryman and im own brother again say: “Know Jehovah!” Because all of them go know me, from the one wey small pass go reach the one wey big pass among them. 12 I go forgive them for the bad things wey them do, and I no go remember their sins again.’”
13 As e talk say “new agreement,” e don make the former one stop to work. Now, wetin don stop to work and don de old, don near when e no go dey again.