Study Book for Our Life and Preaching Meeting
MARCH 6-12
FINE-FINE LESSON FROM BIBLE | 1 CHRONICLES 23-26
“Worship for Temple Come Really Arrange Well”
it-2 241
Levites
When David de rule, e arrange the work wey the Levites de do, and e really arrange-am well. E choose people wey go be supervisor, officers, judges, gatekeepers, and people wey de care for contribution. E even still arrange plenty people wey go de help the priest for temple, for the courtyard and for dining room, for matter wey concern offering, sacrifice, cleaning, to de weigh things, to de measure things, and to de guard the temple. E arrange the Levites wey be musician for 24 group just the way e arrange the priest. And them de run shift for their work. Them de cast lot to know who go dey duty. Them still de do this kind thing for the work wey gatekeepers de do.—1Ch 23, 25, 26; 2Ch 35:3-5, 10.
it-2 686
Priest
For the work wey them de do for temple, they arrange the priest to de work with different officers. Them de cast lot to know who them go give some kind work. Each of the group for the 24 division de work one-one week, and this one mean say them go dey duty two times for one year. E clear say all the priest de serve when them de do festival because the people de bring plenty sacrifice as they do when them dedicate the temple. (1Ch 24:1-18, 31; 2Ch 5:11; compare 2Ch 29:31-35; 30:23-25; 35:10-19.) Priest fit serve for other time as far as say e no go disturb the work wey other priest wey dey duty de do. As e be for rabbinic tradition, when Jesus dey this earth, the priest plenty well-well. Because of this one, them de share the work wey them go do for the week give the different family wey dey the 24 division. Each family de serve for one day or more than one day depending on how them many reach.
it-2 451-452
Music
As them de do preparation to build Jehovah temple, David arrange 4,000 Levites wey go de sing music. (1Ch 23:4, 5) Among this 4,000 Levites, them train 288 to de sing to Jehovah and they come be expert. (1Ch 25:7) Na three better musicians wey be Asaph, Heman, and Jeduthun (wey e name fit still be Ethan) de direct the arrangement for this music matter. Since each of them na from one of Levi three sons wey be Gershom, Kohath, and Merari, as them take mention their name, e mean say them represent the three chief Levite family wey de play music for the temple. (1Ch 6:16, 31-33, 39-44; 25:1-6) All the sons of this three men na 24 and all of them dey among the 288 musician wey them train to be expert. Them de cast lot to know which son them go choose as head for one division of musicians. Then them go still select another 11 expert to work under the person wey them choose, and some of them go be e sons and others na Levites. Na like this them take share the 288 ([1 + 11] × 24 = 288) expert Levite musicians for 24 divisions as they do for the priest them. If them divide all the remaining 3,712 musicians wey still de learn, each of the 24 division go still get average of about 155 men to join them. This one mean say each expert go train about 13 Levites for the different-different stage for music. (1Ch 25:1-31) Since the people wey de blow trumpet na priest, e mean say them go join the Levites wey be musician.—2Ch 5:12; compare Nu 10:8.
it-1 898
Gatekeeper
For the Temple. Small time before David die, e make sure say e arrange the Levites and people wey de work for temple, and some of them na gatekeepers and them reach 4,000. For their division, them de work seven days at once. Them get the work to guard Jehovah house and to make sure say them de open the door for the temple and de close-am for the correct time. (1Ch 9:23-27; 23:1-6) Apart from the work wey them de do as guards, some of them de care for the contribution wey people de bring come the temple. (2Ki 12:9; 22:4) After some time pass, when Jehoiada wey be the high priest anoint Jehoash as king, they arrange special guards to guard the gates of the temple so that them go fit protect Jehoash wey still young from Queen Athaliah wey want collect the throne by force. (2Ki 11:4-8) When King Josiah destroy lie-lie worship, the doorkeepers help them remove the things wey they use for Baal worship from the temple. Then they burn all this things for outside the city.—2Ki 23:4.
Fine-Fine Things Wey You See for Bible
True Worship Go Give You More Joy
10 We de worship Jehovah when we de join sing song. (Ps. 28:7) To sing song na one important way wey Israel people worship Jehovah. King David choose 288 Levites to sing for temple. (1 Chron. 25:1, 6-8) Today, we fit show our love for God when we de sing song to praise God. The number one important thing no be how our voice be. Think about this example: When we de talk, “all of us de make mistake many times,” but that one no de make us stop to talk for congregation or for preaching. (Jas. 3:2) For the same way, make we no de worry about how our voice be when we de sing, and allow this one make us no de sing song to praise Jehovah.
MARCH 13-19
FINE-FINE LESSON FROM BIBLE | 1 CHRONICLES 27-29
“Advice Wey Papa Give E Son With Love”
w05 2/15 19 ¶9
Do Everything to Remain as True Christian
9 Prove-am to yourself say wetin dey Bible na the truth. If we no really sabi the things wey dey Bible well, we no go fit continue to be better servant of Jehovah. (Philippians 1:9, 10) Everybody wey be Christian need to prove-am to e self say, the things wey e believe na the truth wey dey inside Bible, whether na young person or na old person. Paul tell brothers and sisters say: “Dey sure of everything; no leave the good things.” (1 Thessalonians 5:21) Young Christians wey get family wey de worship Jehovah must know say them no go de depend on the faith of their papa and mama. Solomon papa wey be David tell-am say: “know the God of your papa and serve this God with complete heart.” (1 Chronicles 28:9) E no go really make sense for Solomon to just fold hand de look e papa as e de make e faith for Jehovah strong. Solomon go need to know Jehovah for e self, and na wetin e do be that. E beg God say: “Give me better sense and knowledge now to lead this people, because who go fit really judge this your people wey many well-well?”—2 Chronicles 1:10.
w12 4/15 16 ¶13
Continue to Serve Jehovah With All Your Heart
13 The lesson de clear. Na better thing we de do if we no de miss things wey we de enjoy and wey de make us happy, like to de attend congregation meeting and to de put body for preaching. But we need to do more to fit continue to serve Jehovah with all our heart. (2 Chron. 25:1, 2, 27) If for deep inside our heart, we continue to de love the things wey we don leave, wey be some kind things wey the world de do, we de put our friendship with Jehovah for danger. (Luke 17:32) Na only if we “really hate bad thing [and] hold good thing tight” we go fit “enter the Kingdom of God.” (Rom. 12:9; Luke 9:62) All of us need to make sure say, nothing for this world wey Satan de control go stop us make we no de use all our heart support God Kingdom, no matter how e fine reach or even if e be like say e make sense.—2 Cor. 11:14; read Philippians 3:13, 14.
w17.09 32 ¶20-21
“Get Strong Heart, and Do the Work”
20 King David remind Solomon say Jehovah go dey with-am until e build the temple finish. (1 Chron. 28:20) Even though say Solomon dey young and e never really get experience, e fit do the work because e let wetin e papa tell-am enter e heart. Solomon really show say e get strong heart, e do the work, and because Jehovah help am, e use seven and half years build the big temple wey fine well-well.
21 Jehovah fit still help us the way e help Solomon. E fit help us get strong heart and do our work well, whether na for family or for congregation. (Isa. 41:10, 13) If we show say we get strong heart as we dey serve Jehovah, we fit dey sure say e go bless us now, and still bless us for future. So, “get strong heart, and do the work.”
Fine-Fine Things Wey You See for Bible
w17.03 29 ¶6-7
Be Better Friend Even When Things Dey Wey Fit Scatter Wuna Friendship
David get other friends wey no leave-am when things hard for-am. One of them na Hushai. Bible call-am David friend. (2 Sam. 16:16; 1 Chron. 27:33) Hushai fit be one of the people wey de work for the king palace and e and the king na friend and them de do things together. Sometimes, the king de send-am message about things wey e no want make people know.
When Absalom use force collect kingship from e papa wey be David, many Israel people support-am. But Hushai no join them. When David de run, Hushai go meet-am. E really pain David say e own pikin and other people wey e trust don leave-am. But Hushai no leave David. E ready to die for David and to do wetin go scatter Absalom plan. E no just do this one because e de work for the king. But e do-am because na better friend e be.—2 Sam. 15:13-17, 32-37; 16:15–17:16.
MARCH 20-26
FINE-FINE LESSON FROM BIBLE | 2 CHRONICLES 1-4
“King Solomon No Make Better Decision”
it-1 174 ¶5
Army
As Solomon start to de rule, e do something wey nobody don do for Israel army before. Peace really dey the time wey e de rule, but e still gather plenty horse and chariot. (Check CHARIOT.) Na Egypt them for buy many of the horse. Them build many city wey go fit contain all the horse, the chariot and the people wey de ride them. (1Ki 4:26; 9:19; 10:26, 29; 2Ch 1:14-17) But Jehovah no ever bless this thing wey Solomon do. When e die and when them divide the kingdom, things no come de go well for Israel army again. Later Isaiah write say: “Trouble go follow people wey go meet Egypt to help them, wey de put mind for the plenty horse wey them get, wey trust their war chariot because them plenty well-well, and wey trust the people wey de ride the horse because them mighty. But they no ask the Holy One of Israel for help, and they no look for Jehovah.”—Isa 31:1.
it-1 427
Chariot
For Israel, e no get anytime wey their army don get chariot wey plenty well-well until Solomon time. This one na because of the warning wey God give say, make king no gather plenty horse as if na the horse go fit save them. Na this one make them no de too use chariot, since na horse them de use ride the chariot. (De 17:16) When Samuel de warn the people about the load wey the king go put on top them, e tell them say: “E go take wuna sons and put them for e chariot.” (1Sa 8:11) When Absalom and Adonijah de try to collect the kingship by force, each of them get chariot wey they make for theirself and them put 50 men to run for front of their chariot. (2Sa 15:1; 1Ki 1:5) When David win the king of Zobah, e keep 100 chariot horses.—2Sa 8:3, 4; 10:18.
As King Solomon de make the army of Israel strong well-well, e increase the number of chariots to 1,400. (1Ki 10:26, 29; 2Ch 1:14, 17) Both for Jerusalem and other places, e get towns wey them de call chariot cities. Na for this cities them de take care of all this things wey them de use for war.—1Ki 9:19, 22; 2Ch 8:6, 9; 9:25.
Fine-Fine Things Wey You See for Bible
w05 12/1 19 ¶6
Lessons From the Book of Second Chronicles
1:11, 12. The thing wey Solomon pray for make Jehovah see say na to get better sense and knowledge really dey important to-am. Our own prayer too, de show wetin really dey important for us. So e go make sense if we de check the things wey we de pray for.
MARCH 27–APRIL 2
FINE-FINE LESSON FROM BIBLE | 2 CHRONICLES 5-7
“My Heart Go Always Dey There”
w02 11/15 5 ¶1
No Tire to De Meet Together
Later, when David be king for Jerusalem, e come decide say e go like to build house for Jehovah. But since David na man wey don fight many war, Jehovah tell-am say no be e go build house for e name. Instead, E choose David son wey be Solomon to build the temple. (1 Chronicles 22:6-10) After Solomon build the temple finish for seven and half years, e dedicate-am for 1026 B.C.E. Jehovah really accept the temple, E talk say: “I don make this house wey you build holy as I don put my name for there forever, and my eyes and my heart go always dey there.” (1 Kings 9:3) As long as Israel people continue to de serve Jehovah well, Jehovah go continue to de bless the house. But if they follow wetin bad, Jehovah go stop to bless the house, and them go destroy-am.—1 Kings 9:4-9; 2 Chronicles 7:16, 19, 20.
it-2 1077-1078
Temple
History. This temple dey until 607 B.C.E., when them destroy-am. Na Babylon army wey dey under King Nebuchadnezzar destroy-am. (2Ki 25:9; 2Ch 36:19; Jer 52:13) God allow the nations wey dey around Israel people to de attack Judah and Jerusalem because them start to de put hand for lie-lie worship. Sometimes, this nations go collect the better-better things wey dey the temple. E still get sometimes wey Israel people abandon the temple. King Shishak for Egypt still use force collect the better-better things wey dey the temple (993 B.C.E.) for the time wey Solomon pikin wey be Rehoboam de rule. And this one happen only about 33 years after them don dedicate the temple. (1Ki 14:25, 26; 2Ch 12:9) King Asa (977-937 B.C.E.) get respect for Jehovah house. But because e want protect Jerusalem, e come go bribe King Ben-hadad I of Syria, with silver and gold from the temple, so that e go fit break the agreement wey e make with Baasha wey be king of Israel.—1Ki 15:18, 19; 2Ch 15:17, 18; 16:2, 3.
Fine-Fine Things Wey You See for Bible
w10 12/1 11 ¶7
E Know “the Heart of People”
When we think about Solomon prayer, e fit make our mind come down. Other people fit no really understand how we de feel for inside—the kind pain wey we get for heart. (Proverbs 14:10) But Jehovah know our heart and e really de care for us. If we tell-am everything wey de worry us for mind, e go make our mind come down and the problem no go too hard to bear. Bible tell us say: “Throw all wuna problem give-am, because e de care for wuna.”—1 Peter 5:7.
APRIL 10-16
FINE-FINE LESSON FROM BIBLE | 2 CHRONICLES 8-9
“E Value Better Sense”
w99 11/1 20 ¶4
When Person Get Open Hand
True-true, na big sacrifice the queen of Sheba make as e use e time and power take travel go visit Solomon. E be like say Sheba be dey the area wey be the Republic of Yemen today. So, e mean say, the queen of Sheba and e camel really travel far because e pass 1,000 miles [1,600 km] from their place to Jerusalem. As Jesus talk, the queen of Sheba come from the end of the earth. Wetin make the queen of Sheba pass through all this stress? The main reason why e come na to hear the wisdom of Solomon.—Luke 11:31.
w99 7/1 30 ¶4-5
Visit Wey Bring Better Blessing
Anyhow wey e happen, the queen of Sheba reach Jerusalem “with plenty people wey follow-am, camels wey carry balsam oil and plenty gold and precious stones.” (1 Kings 10:2a) Some people talk say some of the “plenty people wey follow-am” na guards wey carry weapon. This one fit be true because the queen na powerful and important person and e de travel with things wey fit cost reach plenty millions of dollars.
Know say, when the queen hear about Solomon, e still hear say na Jehovah give Solomon everything wey e get. So, no be business make-am visit Solomon. E clear say the main reason why e come na to hear the wisdom of Solomon and maybe to even learn something about e God wey be Jehovah. Since e fit be say e come from the family of Shem or Ham wey worship Jehovah, e fit don de hungry-am to know about the religion of e ancestors.
w99 7/1 30-31
Visit Wey Bring Better Blessing
When queen of Sheba see the kind wisdom wey Solomon get and how Jehovah don bless e kingdom for Jerusalem, e really surprise-am. (1 Kings 10: 4, 5) Some people talk say this one mean say the things wey e see shock-am sotey e no fit talk. One professor even talk say the things wey e see fit don make-am faint! No matter wetin happen, the thing wey the queen hear and see really surprise-am. E talk say Solomon servants go dey happy because of the wisdom wey them de enjoy from Solomon. The queen still praise Jehovah as E make Solomon king for Israel. Then e give the king plenty gift wey cost well-well. Only the gold wey e give-am fit reach $40,000,000 for our today money. Solomon still give the queen plenty gift. All the things wey the queen like and ask for, Solomon give-am.—1 Kings 10:6-13.
it-2 990-991
Solomon
After the queen of Sheba don use e eye see how the temple and Solomon house big and fine reach, the table wey Solomon for de chop, how e servants take de serve-am drink, the kind cloth wey the servants de wear, and the sacrifice wey them de always do for the temple, e really surprise-am and e talk say: “In fact, wetin I hear no even reach half of wetin you get. The sense and property wey you get really-really pass wetin I hear.” After, e still talk say all the servant wey de serve the king go always de happy. All this things wey the queen see move-am to give praise to Jehovah, to bless Jehovah, the God wey show love to Israel as e make Solomon king to de rule and judge them.—1Ki 10:4-9; 2Ch 9:3-8.
Fine-Fine Things Wey You See for Bible
it-2 1097
Throne
The only throne of person wey don rule for Israel wey they really describe well-well na the one wey Solomon make. (1Ki 10:18-20; 2Ch 9:17-19) E clear say the throne dey for one Hall wey them de call Hall of the Throne. This Hall na one of the building wey dey on top of Mount Moriah for Jerusalem. (1Ki 7:7) Na better ivory throne wey them use pure gold cover, and e get one round canopy for the back of the throne, and e still get armrest (where them de rest hand). Even though say na ivory fit be the main material for this royal chair, the way them de normally build things for the temple show say e fit be say na wood them take make-am. But them really decorate-am well with ivory and them cover-am with pure gold. When person de look the throne, e go just be like say na only ivory and gold them use make-am. After Bible don mention say na six steps dey for the throne, e still talk say: “Two lion stand for the side of the two armrest. And e get 12 lions wey stand for the six steps, one-one for each side of the six step.” (2Ch 9:17-19) Lion de represent the kind authority wey person wey de rule get. So as them make lion put for the throne, e really make sense. (Ge 49:9, 10; Re 5:5) E fit be say the 12 lions represent the 12 tribes of Israel. So, this one fit de show say them de support and respect the person wey de rule for this throne. One thing wey them make join the throne na wetin them de call footstool and them make-am with gold. From the way them take describe-am, this ivory-and-gold throne wey get canopy, and the big-big lion wey dey e front show say e pass any other throne wey dey that time, whether na the one wey people wey de dig ground to find out wetin don happen for past see, or na the one for statue wey them don carve to show different throne for past, or na the one wey them write about. As Bible talk for Chronicles, “no other kingdom don make anything wey be like this one.”—2Ch 9:19.
APRIL 17-23
FINE-FINE LESSON FROM BIBLE | 2 CHRONICLES 10-12
“Gain Dey for Better Advice”
w18.06 13 ¶3
Rehoboam for Make God E Tight Friend
This one na hard thing for Rehoboam. If e do wetin the people want, e no go enjoy some of the good things wey e de enjoy. E family and the servants for palace no go enjoy this things too. But if e no do as the people want, e no go get their support again. Wetin Rehoboam go do? E first go meet the elders wey they don de give Solomon advice before. But after, e go take advice from e friends, wey they be age mate. Rehoboam follow their advice, and e decide say e go show the people pepper. E tell them say: “I go make wuna load heavy pass this one, and I go add more. My papa punish wuna with whip, but I go punish wuna with whip wey e get chuku-chuku.”—2 Chron. 10:6-14.
w01 9/1 28-29
How You Fit Make Better Decision
Jehovah still give us mature people for congregation wey we fit discuss with if we get decision to make. (Ephesians 4:11, 12) But when we de go meet other people for advice, we no want be like people wey de waka-waka de ask different people until they see the one wey go tell them wetin they want hear. Then na that one them go come follow. E good make we remember the example of Rehoboam. When e get serious decision to make, e receive better advice from older men wey don serve e papa. But instead make e follow their advice, e still go look for advice from people wey be e age mate and e choose to follow their advice. Because of this one, e make bad decision and e come lost big part of e kingdom.—1 Kings 12:1-17.
When we de look for advice, e good make we find people wey don get experience for life, people wey really know wetin dey Bible and wey get respect for Bible advice. (Proverbs 1:5; 11:14; 13:20) When e dey possible, e go good make you take time think deep about Bible advice and about all the information wey you don gather. As you de use Bible check things, the best decision go come dey clear.—Philippians 4:6, 7.
it-2 768 ¶1
Rehoboam
Plenty of the people separate theirself from Rehoboam because e treat them for bad way. The only tribe wey continue to support the house of David na Judah and Benjamin. But the priests and Levites for the two kingdoms still support-am and some people wey no plenty from the other ten tribes.—1Ki 12:16, 17; 2Ch 10:16, 17; 11:13, 14, 16.
Fine-Fine Things Wey You See for Bible
it-1 966-967
Demon Wey Be Like Goat
The thing wey Joshua talk for Joshua 24:14 show say the lie-lie worship wey Egypt people de do the time wey Israel people be slave for their land don affect Israel people. And the book of Ezekiel show say this kind lie-lie worship affect them for long time. (Eze 23:8, 21) The law wey them give Israel people for wilderness say make them stop to de make sacrifice to the demons wey be like goat na one reason wey make some people wey read book well-well feel say Israel people do this goat worship. (Le 17:1-7) Another reason why them talk like that be say, Jeroboam arrange priest for the high places and for the demons wey be like goat and for the small cow image wey e make. (2Ch 11:15) This kind goat worship wey Israel people de do be like the one wey them de do well-well for Egypt especially for Lower Egypt. Herodotus (II, 46) claim say Greek people get their worship of Pan and satyrs from Egypt people. This gods na woodland god wey de show man wey naked and they describe-am say, e get horns, goat tail, and goat leg. Some people don talk say that kind god wey part of am na animal na the reason why people de describe Satan say e get tail, horns, and e leg be like goat leg, and na wetin people wey talk say them be Christian believe around 500-1000 C.E (wey them still de call Dark Ages).
But they no talk wetin all this “things wey get hair” (seʽi·rimʹ) really be. Some people think say them be like ordinary goat or idol wey be like goat, but e no get anything wey prove say na so e really be; even other scripture no talk anything wey show say na like that e really be. The word wey them use fit show say, for the mind of the people wey de worship them, this kind lie-lie god get shape like goat or get hair for body. Or as them use goat for all this place, e fit be say na just to show how all this kind things wey them de use for idol worship yeye reach. E just be like the word wey them de use for idol wey come from one word wey them de use call some kind animal shit, but e no mean say na animal shit them take make the idol.—Le 26:30; De 29:17.
APRIL 24-30
FINE-FINE LESSON FROM BIBLE | 2 CHRONICLES 13-16
“De Always Trust Jehovah?”
How Young Brothers Fit Make People Trust Them?
12 When King Asa dey young, e dey humble and e get strong heart. For example, after e papa wey e name na Abijah die, Asa come be king and e start to remove the idols from the land. E still “tell the people of Judah say make them look for Jehovah, the God of their grand papa them. And make them obey the Law and the commandment.” (2 Chron. 14:1-7) And when Zerah from Ethiopia attack Judah with 1,000,000 soldiers, Asa show say e get sense when e beg Jehovah for help. E talk say: “O Jehovah, e no matter to you whether people wey you want help dey plenty or they no get power. Abeg, help us Jehovah our God, because na you we trust.” This fine thing wey Asa talk, show say e really get faith for Jehovah say e go save all of them. Asa trust Jehovah and “Jehovah win Ethiopia people.”—2 Chron. 14:8-12.
How Young Brothers Fit Make People Trust Them?
13 To fight 1,000,000 soldiers no easy, no be so? But Asa succeed because e trust Jehovah. But the sad thing be say, when Asa face different problem wey e no big reach the first one, e no trust Jehovah. When wicked King Baasha of Israel threaten Asa, Asa go meet king of Syria for help. The result of this decision wey Asa make no good at all! Jehovah use prophet Hanani, tell Asa say: “Because you trust the king of Syria and you no trust Jehovah your God, the army wey the king of Syria get don escape from your hand.” From that time na so-so war Asa begin fight. (2 Chron. 16:7, 9; 1 Ki. 15:32) Wetin we learn?
How Young Brothers Fit Make People Trust Them?
14 Continue to dey humble and de trust Jehovah. The time wey you baptize, you show say you get strong faith and you trust Jehovah. And Jehovah really dey happy to welcome you as part of e family. The thing wey you need to do now na to continue to trust Jehovah. E fit easy to trust Jehovah when you need to make big decision for your life. But wetin you go do for other situation? E really dey important make you trust Jehovah when you de make decision even if na decision about wetin you de use relax and enjoy yourself, the kind work wey you go do to survive, and the things wey you plan to use your life do! No trust the sense wey you get. Instead, check inside Bible to look for things wey fit guide you to make better decision and then follow the direction wey Bible give you. (Prov. 3:5, 6) If you do like that, you go make Jehovah dey happy and people for congregation go respect you.—Read 1 Timothy 4:12.
Fine-Fine Things Wey You See for Bible
w17.03 19 ¶7
Use All Your Heart Serve Jehovah!
7 How person go take know whether na all e heart e de use serve Jehovah? Make e ask e self say, ‘I ready to do wetin go make Jehovah happy, to talk about-am and e organization, and to make congregation clean for God eye?’ You think say e easy for Asa to comot e grandmama from e position? Asa really get mind! You fit no know anybody wey bad like Asa grandmama. But something fit happen wey fit make you do like Asa. For example, if them disfellowship your person for your family or your friend because e no gree repent, wetin you go do? You go get mind say you no go do things with-am?