Study Book for Our Life and Preaching Meeting
© 2024 Watch Tower Bible and Tract Society of Pennsylvania
JULY 1-7
FINE-FINE LESSON FROM BIBLE PSALMS 57-59
Jehovah De Spoil the Plan of People Wey Dey Against Im Servants
“For Every Corner for the Earth”
14 Before Stephen enemies kill-am, e no fear to preach to them. (Acts 6:5; 7:54-60) For the time wey “people start to really suffer the congregation” well-well, all the disciples except the apostles scatter go the whole areas of Judea and Samaria. But this one no stop the preaching work. Philip go Samaria “to preach about the Christ” and e help to make new disciples. (Acts 8:1-8, 14, 15, 25) Bible talk say: “After Stephen die, the disciples wey scatter because them de suffer them, go far reach Phoenicia, Cyprus, and Antioch, but them preach the word to only Jew people. But, some of the men among them from Cyprus and Cyrene come Antioch and start to talk to the people wey de speak Greek, and de preach the good news about the Lord Jesus.” (Acts 11:19, 20) The good news really spread go many place because of the suffer wey them suffer the disciples.
15 For this our time, something like this still happen for the former Soviet Union. Especially around 1950, them carry thousands of Jehovah Witness by force go Siberia. Because them scatter them go different-different place for that area, this one help to make the good news continue to spread for that place wey big well-well. Many Witness for no fit get the money to travel reach 10,000 km go preach the good news for there. But na the government come send them go there. One brother talk say: “E come happen say na the government theirself make-am possible for many people for Siberia wey want really know God to come know the truth.”
Fine-Fine Things Wey You See for Bible
“Make Una Stand Strong and No Shake”
16 Make your heart strong. Wetin King David talk show say im love for Jehovah no go ever shake. E talk say: “My heart strong, O God.” (Ps. 57:7) We too fit get strong heart and trust Jehovah with all our heart. (Read Psalm 112:7.) See how this one help Brother Bob wey we don talk about before. When the doctor tell-am say them go keep blood for one corner just in case them need-am, e no waste time to tell them say if anything go make them give-am blood, e go comot for their hospital at once. Brother Bob talk say: “I don make up my mind before about wetin I go do, so I no worry about wetin fit happen.”
17 Brother Bob no shake because e don make up im mind long time before e go hospital. See the three things wey help-am. (1) E really want make Jehovah happy. (2) E study Bible and our book them to understand how Jehovah de see life and blood. (3) E believe with all im heart say Jehovah go bless-am if e obey E law no matter wetin happen. We too go fit get strong heart no matter the kind problem wey we fit face.
JULY 8-14
FINE-FINE LESSON FROM BIBLE PSALMS 60-62
Jehovah De Keep Us Safe, E De Protect Us, and E De Make Us Stand Strong
it-2 1118 ¶7
Tower
Another Way Them De Use-Am. People wey de put their faith for Jehovah and de obey-am get real protection. David talk say: “Na you [Jehovah] be the place wey I fit hide when trouble dey, the strong house wey de protect me from the enemy.” (Ps 61:3) The people wey know wetin im name mean, wey trust-am, and wey de do wetin e want with all their heart, no go fear anything, because: “Jehovah name na strong house. When righteous person run enter inside, e de protect-am.”—Pr 18:10; compare 1Sa 17:45-47.
it-2 1084 ¶8
Tent
Them still de use the word “tent” for other ways sometimes. Person tent na place wey e de rest and protect imself from things wey fit cause problem for-am. (Ge 18:1) According to how them de welcome person, visitors get the mind say them go respect and care for them when person welcome them enter im tent. So, when Revelation 7:15 talk about the great crowd say God “go spread im tent cover them,” e mean say e go protect them and keep them safe. (Ps 61:3, 4) Isaiah talk about the preparation wey God wife, wey be Zion go make for im sons wey e go born. Them tell-am say “make your tent dey wide more.” (Isa 54:2) So, e make the place wey im children go dey safe to dey wide.
w02 4/15 16 ¶14
Na We De Gain From God Laws
14 We dey sure and we de happy say God law no de change. For this time wey we de live wey things no settle, na Jehovah be our rock wey no de shake, and e dey from everlasting go reach everlasting. (Psalm 90:2) E talk about imself say: “I be Jehovah; I no de change.” (Malachi 3:6) God laws dey for Bible and we fit trust them finish—e no be like human being ideas wey de always change. (James 1:17) For example, for many years the people wey de study how human being de behave, advice say make papa and mama allow their children do as them like, but them later change their mind and talk say their advice na mistake. The advice wey the world de give for this matter be like wetin breeze de blow up and down. But, Jehovah Word no de change. For hundreds of years, Bible don give advice about how to use love train children. Apostle Paul talk say: “Una wey be papa, make una no de make una children vex, but make una continue to train them and teach them as Jehovah want.” (Ephesians 6:4) E de really make our mind come down to know say we fit trust Jehovah laws; them no go change!
Fine-Fine Things Wey You See for Bible
w06 6/1 11 ¶6
Lessons From Book Two of Psalms
62:11. God no need power from another place. Na im de give power. ‘Na im get power.’
JULY 15-21
FINE-FINE LESSON FROM BIBLE PSALMS 63-65
“Your Love Wey No De Fail Better Pass Life”
w01 10/15 15-16 ¶17-18
Who Go Separate Us From the Love Wey God Get for Us?
17 How the love wey God get for you dey important reach to you? You de feel the way David feel, when e write say: “Because your love wey no de fail better pass life, my own mouth go praise you. So I go use all my life praise you; I go call your name when I de pray to you”? (Psalm 63:3, 4) True-true, e get anything wey this world fit give us wey better pass the love wey God get for us and the better friendship wey we de enjoy with-am? For example, you think say to de pursue work wey go give you plenty money better pass the peace of mind and joy wey we de get when we get tight friendship with God? (Luke 12:15) Some Christians don face some kind condition wey them go need to decide whether them go continue to serve God or them go kill them. Na wetin happen to many Jehovah Witness for the different-different Camp wey Nazi government suffer people for World War II. Even though say some no fit continue, many of our brothers decide to continue to do the things wey go make God love them, and them ready to die if e mean say them go die. The people wey continue to do the things wey go make God love them dey sure say, them go get life wey no go end for future. This na something wey we no fit get from this world. (Mark 8:34-36) But no be only life wey no go end we go enjoy.
18 Na true say we no fit get life wey no go end without Jehovah, but just think how that kind life wey long well-well go be without God wey create us. E no go get meaning if we no know Jehovah. For this last days, Jehovah don give im people work wey them de enjoy to do. So when Jehovah, wey de always do wetin e get for mind give us life wey no go end, we dey sure say na better-better things we go learn and do. (Ecclesiastes 3:11) No matter how many thousands of years we continue to learn, we no go fit understand how “the better-better things of God and im sense and the things wey e know” deep reach.—Romans 11:33.
“De Talk Thank You for Everything”
Na correct thing for us to thank God. We dey sure say you don think about the plenty things wey God don give you and still de give you. (Deut. 8:17, 18; Acts 14:17) Instead make we just think small about the good things wey God don do for us, e good make we take time think deep about the blessings wey God don give us and our family. When you think deep about the open hand wey God get, e go make you thank God more-more. And e go still make you see say God really love you and de care for you.—1 John 4:9.
w15 10/15 24 ¶7
Continue to Think Deep About Spiritual Things
7 Na true say we no need plenty power to read, but we go really need power to fit focus and think deep about wetin we de read. Na this one make our brain wey no dey perfect de like to do things wey dey easy. So, the best time to think deep na when your brain dey relax and for quiet place wey things wey go disturb us no dey. One of the person wey write Psalm see say the best time for-am to think deep na when e dey awake for bed for night. (Ps. 63:6) Jesus wey get perfect brain know say e dey good to dey for quiet place to fit think deep and pray.—Luke 6:12.
w09 7/15 16 ¶6
Copy Jesus—Teach With Love
6 We de enjoy to de talk about the things wey we love. When we talk about something wey really touch our heart, we de happy and our whole body go de sweet us. This one na true, especially when we de talk about person wey we love. We de always happy to tell other people wetin we know about that person. We de praise, honor, and defend the person. We de do this one because we want make other people like the person and im character just as we like-am.
Fine-Fine Things Wey You See for Bible
w07 11/15 15 ¶6
You De Make Other People Dey Strong?
E dey easy to destroy house pass to build new one. Na so e still be with wetin we de talk with our mouth. Because we no dey perfect, all of us de make mistake. King Solomon talk say: “Nobody dey righteous for this earth wey de always do good, wey no de ever sin.” (Ecclesiastes 7:20) E no de hard to see other people mistake and talk bad about them. (Psalm 64:2-4) But to fit de talk good things about person, na something wey we go need to de practice.
JULY 22-28
FINE-FINE LESSON FROM BIBLE PSALMS 66-68
Jehovah De Help Us Carry Our Load Everyday
How Jehovah De Answer Our Prayer
15 Many times, Jehovah no de answer our prayer the way we de expect. But the answer wey Jehovah de give na wetin we need to fit continue to worship-am well. So continue to look for wetin show say Jehovah de answer your prayer. One sister wey e name na Yoko be feel say Jehovah no de answer e prayers, so e start to write the things wey e de pray for inside book. After some time, e check the book to see wetin e don pray for. And e see say Jehovah don answer plenty of them, even some wey e don forget. So we need to de take time think about how Jehovah de answer our prayer.—Ps. 66:19, 20.
w10 12/1 23 ¶6
Show Say You Care About Papa or Mama Wey Dey Single
Na Jehovah use im holy spirit move people to write the songs or Psalms, wey Israel people go use sing when them de worship-am. Imagine the encouragement wey the widows and children wey no get papa for Israel go don get when them sing the song wey remind them say Jehovah na “papa” and “Judge” for them and say e go help them. (Psalm 68:5; 146:9) We self fit talk things wey be say for many years to come, e go encourage papa or mama wey dey single. Even though say e don pass 20 years, Ruth wey be mama wey dey single, still de happy when e de remember the time wey one papa tell-am say: “You de really do well for the way you de train your two sons. Abeg continue.” Ruth talk say: “E touch me well-well as I hear this things wey e tell me.” True-true, “kind words be like good medicine” and e fit encourage papa or mama wey dey single pass the way we fit ever think-am. (Proverbs 15:4, Contemporary English Version) You fit think of any particular thing wey you fit talk from your mind to praise papa or mama wey dey single for wetin them de do?
w09 4/1 31 ¶1
The Papa for People Wey Their Papa No Dey Again
“GOD dey for e holy place. E be Papa for people wey their papa no dey again.” (Psalm 68:5) This words teach us better lesson about Jehovah say e know wetin people wey no get who go help them need. The way e care for children wey their papa or mama don die, really dey clear for the Law wey e give Israel people. Make we check the first time wey Bible talk about “pikin wey im papa no dey again” for Exodus 22:22-24.
Jehovah De Help Us Fit Endure
17 Read Psalm 40:5. When person want build house, e plan na to complete-am and pack enter. But when e de build the house, plenty stage dey where e fit stop and think about the progress wey e don make. Na so e still be as we de worship Jehovah. E dey important make we de always stop and take time think about how Jehovah de help us fit endure our problem and still de worship-am well. At the end of everyday, ask yourself say: ‘How Jehovah don bless me today? How Jehovah de help me fit endure even when I still dey inside problem?’ Check if you go fit see one or more blessing from Jehovah wey show say e de help you fit endure your problem and still hold-am tight.
Fine-Fine Things Wey You See for Bible
w06 6/1 10 ¶5
Lessons From Book Two of Psalms
68:18—“E give men as gifts.” Who be the men? Them choose this men from the men wey them carry as slave for the time wey them win the Promise Land. Them later send this men to go help the Levites for their work.—Ezra 8:20
JULY 29–AUGUST 4
FINE-FINE LESSON FROM BIBLE PSALM 69
How Psalm 69 Talk About the Things Wey Happen for Jesus Life
w11 8/15 11 ¶17
Them Wait for the Messiah
17 Them go hate the Messiah for no reason. (Ps. 69:4) Apostle John quote wetin Jesus talk say: “If to say I no do the kind things wey no other person do and wey [the people] see, e for no be sin for them, but now, them don see me and them hate me and still hate my Papa. But this one happen so that wetin them write for their Law go happen as them write-am say: ‘Them hate me for no reason.’ ” (John 15:24, 25) Many times, the “Law” mean everything about the Scripture. (John 10:34; 12:34) The book of Matthew, Mark, Luke, and John show say people hate Jesus, especially leaders for Jew people religion. Jesus talk say: “The world no get any reason to hate una, but e hate me because I de talk the truth say the things wey e de do wicked.”—John 7:7.
w10 12/15 8 ¶7-8
Put All Your Heart for True Worship
7 One thing happen for Jesus life wey show say e really put body for true worship. For the beginning of im preaching work, for the Passover season for 30 C.E. Jesus and im disciples come Jerusalem and them see “people wey de sell cow, sheep, and doves, and the people wey de change money for where them sitdown” for the temple. Wetin Jesus do, and how this one affect im disciples?—Read John 2:13-17.
8 Wetin Jesus do and talk that day, remind the disciples of one psalm wey David write, wey say: “The love wey I get for your house go be like fire wey de burn inside my heart.” (Ps. 69:9) Why? Because na big risk e take for wetin e do, and e put im life for danger. And na the people wey dey in charge of the temple—the priest, the scribes, and other people—dey behind this business wey them de do, wey them no suppose do for there. As Jesus expose and scatter their plan, e de show say e dey against the way the religious people de do things that time. Everything wey the disciples see make-am clear for their eye say, Jesus really get love for God house, or true worship. But wetin to put body do things mean? E different from to do things like say time no dey again?
g95 10/22 31 ¶4
Person Fit Die if Im Heart Break?
Some people talk say one of the things wey cause Jesus Christ death na im heart wey break. Them talk about-am say: “Insult don break my heart, and the wound no get cure.” (Psalm 69:20) Na the normal heart them de talk about for here? Maybe na so e be, because the things wey happen to Jesus some hours before e die really pain-am—no be just pain for body, but e still pain-am for mind. (Matthew 27:46; Luke 22:44; Hebrews 5:7) Another thing be say, the heart wey break fit be the reason why “blood and water” flow comot from Jesus body when them chuk-am with spear after e don die. When them injure the heart or any blood vessel, e fit make blood enter the chest or the pericardium—one membrane wey contain fluid wey surround the heart. No matter where e dey, wound fit cause wetin be like “blood and water” to flow.—John 19:34.
it-2 650
Plant Wey Get Poison
Bible talk about the Messiah say them go give-am plant wey get poison as food. (Ps 69:21) This one happen when them give Jesus wine wey them mix with something wey de bitter before them hang Jesus. When e taste-am, e no gree drink-am even if e be like say the drink for reduce im pain. When them de talk about how this prophecy take happen, Matthew (27:34) use the Greek word kho·leʹ (gall) wey be the same word wey dey the Greek Septuagint for Psalm 69:21. But the thing wey Mark write mention myrrh (Mr 15:23), and this one don make some people feel say the plant wey get poison or “something wey de bitter” na “myrrh.” Another thing be say, e fit still be say them add both the drug wey be myrrh and something wey de bitter for the drink.
Fine-Fine Things Wey You See for Bible
w99 1/15 18 ¶11
De Pray to Thank Jehovah
11 When many people pray, na just to ask God for something, but make our love for Jehovah de move us to thank and praise-am whether na when we de do our own prayer or when we de pray with other people. Apostle Paul write say: “Make una no de overworry unaself about anything, but for everything, make una de pray and de really beg God for help and still de thank-am. Make una de tell God the things wey de worry una, and the peace wey God de give go protect una heart and the way una de think through Jesus Christ. This peace pass anything wey person fit understand.” (Philippians 4:6, 7) Yes, apart from say we go de pray and de really beg God for help, make we still de thank-am for the plenty things wey e de teach us and the things wey e de give us to help us survive. (Proverbs 10:22) One person wey write Psalm sing say: “De thank God as your sacrifice to-am, and do wetin you promise the Person Wey High Pass.” (Psalm 50:14) And one of David prayer get words wey really de touch person. E say: “I go sing to praise the name of God. I go honor-am; I go thank-am.” (Psalm 69:30) No be the same thing we go do when we de do our own prayer or when we de pray with other people?
AUGUST 5-11
FINE-FINE LESSON FROM BIBLE PSALMS 70-72
“Tell the Next Generation” About God Power
w99 9/1 18 ¶17
Young People—Train Your Mind!
17 To fit run from the different-different trap wey Satan de use, you go need to always shine your eye. And sometimes too, you go really need strong heart. Sometimes, you fit see say you dey different, no be just from other young people like you, but even from the whole world. David wey write Psalm pray say: “Because na you be my hope, O Jehovah, the Lord Wey High Pass; I don de trust you since when I dey young. O God, you don de teach me since when I dey young, and till now I still de talk about the wonderful things wey you do.” (Psalm 71:5, 17) Them know David as person wey get strong heart. But which time e start to get strong heart? As young person! Even before the time wey e fight Goliath, David don show say e really get strong heart when e de protect im papa sheep—e kill both lion and bear. (1 Samuel 17:34-37) But David give Jehovah the praise for the things wey e do. E even talk say na Jehovah ‘e don de trust since when e dey young.’ David no see the problems wey e face as anything because e trust Jehovah. You self go see say Jehovah go give you power and strong heart to fit “win the world” if you trust-am.—1 John 5:4.
g04 10/8 23 ¶3
How We Suppose Treat Old People?
One of the person wey write Psalm pray say: “No troway me when I don old. No abandon me when I no get power again.” (Psalm 71:9) God no de “troway” im servants wey serve-am well even when them de feel say them no fit use them do anything again. This person wey write Psalm no feel say Jehovah abandon-am; instead, e understand say e need to trust Jehovah wey make-am more-more even as e de old. If person hold Jehovah tight like this, Jehovah go support-am throughout im life. (Psalm 18:25) Most times, na our brothers and sisters e de use give us this support.
w14 1/15 23 ¶4-5
De Serve Jehovah Before the Days of Wahala Come
4 If you don get many-many years of experience as person wey don grow, you get one important question to ask yourself, ‘Wetin I go do with my life now wey I still get some power?’ As Christian wey get experience, you get many chance wey other people no get. You fit teach young people the things wey you don learn from Jehovah. You fit make other people strong as you de tell them the plenty things wey you don enjoy as you de serve Jehovah. King David pray for chance to do this one. E write say: “O God, you don de teach me since when I dey young . . . Even when I don old and when I don grow white hair, God abeg make you no leave me. So that I go fit tell the next generation about your power, and tell anybody wey come life about how you strong reach.”—Ps. 71:17, 18.
5 How you fit tell other people the better sense and experience wey you don gain for all this years? You fit invite young servants of God come your house, so that una go fit enjoy together and learn from each other? You fit ask them to follow you go preaching and show them the joy wey you don get as you de serve Jehovah? Elihu wey live for Bible time talk say: “Make old people talk, and make the people wey don live for many years teach sense.” (Job 32:7) Apostle Paul encourage Christian women wey get experience make them encourage other people with wetin them de talk and their example. E write say: “Make old women be . . . teachers of wetin good.”—Titus 2:3.
Fine-Fine Things Wey You See for Bible
it-1 768
Euphrates
Boundary of Israel People Territory. For the word wey God tell Abraham, e make agreement to give Abraham pikin the land wey be “from Egypt river go reach the great river, wey be the Eu·phraʹtes river.” (Ge 15:18) E still repeat this promise to the nation of Israel. (Ex 23:31; De 1:7, 8; 11:24; Jos 1:4) First Chronicles 5:9 talk say people wey come from Reuben family line, for the time before David start to rule increase their territory, and the territory come far reach where person de from enter the wilderness for the Euphrates river. But, since the Euphrates na about 800 km (500 mi), when person de travel go the east side of Gilead (1Ch 5:10), this one fit mean say Reuben people increase their territory E of Gilead go reach where the Syrian Desert start, this desert continue go reach the Euphrates. (RS talk say, ‘e far reach where them de enter the desert this side of the Euphrates’; JB talk say, ‘to the beginning of the desert wey end for the Euphrates river.’) So e be like say the first time wey wetin Jehovah promise happen, na the time wey David and Solomon rule, when the different-different boundary of Israel territory increase, and the Aramaean kingdom of Zobah come join-am. So the territory come reach Euphrates river, and e clear say na along the road wey dey the north side of Syria. (2Sa 8:3; 1Ki 4:21; 1Ch 18:3-8; 2Ch 9:26) Because the Euphrates dey important, most times them just de call-am “the River.”—Jos 24:2, 15; Ps 72:8.
AUGUST 12-18
FINE-FINE LESSON FROM BIBLE PSALMS 73-74
What if We De Jealous People Wey No De Serve God?
“Jehovah . . . De Save People Wey Life Don Tire”
14 The person wey write Psalm 73 na Levite. Because of this one, e get the honor to serve Jehovah for the house of worship. Even with this one, one time for e life, e condition make life tire-am. Why? E begin jealous wicked and proud people, no be because of the bad things wey them de do, but na because e be like say things de go well for them. (Ps. 73:2-9, 11-14) Them think say they don get everything—them get money, better life, and e be like say them no get any worry-worry for life. So as this Levite see as things be for this people, e begin dey sad sotey e talk say: “True-true, as I don keep my heart pure, and wash my hand clean to show say I no know anything, na for nothing.” E dey clear say, this kind thing fit don make-am stop to serve Jehovah.
“Jehovah . . . De Save People Wey Life Don Tire”
15 Read Psalm 73:16-19, 22-25. The Levite “enter the holy place of God.” For there, maybe as e dey with other people wey de worship God, this one make e mind come down, e think well, and sofri pray to Jehovah about e condition. So, this one make-am see say the way e de think dey foolish, and e fit even no be friend of Jehovah again. E still understand say wicked people dey ontop “ground wey fit draw person fall” and their life go “end for bad way.” The Levite try to see things the way Jehovah de see things so that e go stop to jealous wicked people. Because of this one, e come dey happy again and e mind come down. E talk say: “Apart from [Jehovah] I no want any other thing for this earth.”
16 Wetin we learn? Make we no ever jealous wicked people wey be like say them de do well. Their happiness no de last, and they no get hope to live forever for future. (Eccl. 8:12, 13) If we jealous them, this one fit make us dey sad sotey life go tire us, and e fit even spoil our friendship with Jehovah. So if you notice say you don de jealous wicked people wey be like say things de go well for them, make you do wetin that Levite do. Obey the advice wey Jehovah de give us because of the love wey e get for us, and near our brothers and sisters wey de do wetin Jehovah want. When you love Jehovah pass any other thing for this life, you go really dey happy. And you go remain for that road wey go make you get “the real life.”—1 Tim. 6:19.
w14 4/15 4 ¶5
Copy Moses Faith
5 How we fit run from “the enjoyment of sin wey be for short time”? No ever forget say the enjoyment wey sin de bring no de last. Make the things wey you don learn de help you see say “the world and all the things wey dey inside de pass de go.” (1 John 2:15-17) De think deep about the future of sinners wey no gree change. Them dey for “ground wey de draw person fall . . . and their life end for bad way!” (Ps. 73:18, 19) When temptation to put hand for sin come, ask yourself say: ‘Which kind future I want for myself?’
w13 2/15 25-26 ¶3-5
No Allow Anything Make You No Get the Glory of God
3 One of the person wey write Psalm dey sure say Jehovah go hold im right hand and give-am blessing wey de last. (Read Psalm 73:23, 24.) How Jehovah take de do this one? Jehovah de bless im servants wey carry body down and e de honor them for many ways. E de help them understand the things wey e get for mind to do. (1 Cor. 2:7) E de give people wey listen to im word and obey-am the better chance to be im tight friend.—Jas. 4:8.
4 Jehovah still give im servants the honor to preach about-am. (2 Cor. 4:1, 7) And this preaching work de bring plenty blessing. Jehovah promise people wey use this better chance to preach about-am to praise im name and help other people say: “I go honor people wey de honor me.” (1 Sam. 2:30) This kind people de get good name with Jehovah, and most times, other people wey de serve God de talk well about them.—Prov. 11:16; 22:1.
5 What about the future of people wey “get hope for Jehovah and do wetin e want”? Jehovah promise say: “E [Jehovah] go honor you and give you the earth as your own. When e de destroy wicked people, you go see-am.” (Ps. 37:34) Them de really hope to see the honor wey big pass—to get life wey no go end.—Ps. 37:29.
Fine-Fine Things Wey You See for Bible
it-2 240
Leviathan
Psalm 74 de talk about how God don de save im people, and verse 13 and 14 use some things take represent how Jehovah take save Israel people from Egypt. For here, the word wey be ‘sea monsters [Heb., than·ni·nimʹ, plural of tan·ninʹ]’ wey them use for verse 13, na the same thing as ‘Leviathan’ wey them use for the next verse. And when the verse talk about the heads of the Leviathan wey scatter, e fit de talk about how Jehovah destroy Pharoah and im army for the time of the Exodus. For here, the Aramaic translations talk about ‘the strong ones of Pharoah’ as ‘the heads of Leviathan.’ (Compare Eze 29:3-5, where them talk about Pharaoh as ‘great sea monster’ for middle of the places wey river Nile de flow pass; still check Eze 32:2.) E clear say Isaiah 27:1 use Leviathan (LXX, “the dragon”) as something wey de represent one empire, and this na organization wey de cover different-different countries for the world, and the person wey de rule na person wey people know as ‘serpent’ and “dragon.” (Re 12:9) The prophecy na about how Jehovah save Isreal people. So when Bible say Jehovah turn im attention to Leviathan, Babylon must dey among. But verse 12 and 13 still see Assyria and Egypt as part of-am. So, e clear say the Leviathan for here de talk about one empire or organization wey de cover different-different countries for the world, wey dey against Jehovah and im people.
AUGUST 19-25
FINE-FINE LESSON FROM BIBLE PSALMS 75-77
No De Boast—Why?
w18.01 28 ¶4-5
Jehovah Servants Dey Different From Other People
4 Paul talk say people go de love theirself and them go like money too much. After that one, e still talk say people go de make mouth, them go de think say nobody better pass them, and them go de carry body up. This kind character de always come when person de feel say other people no reach anything, because e get money, get high position, e fine for body, or e sabi do things. This kind people de want make people de praise and respect them. One man wey sabi this matter talk say: ‘For this kind person mind, e get small altar where e de worship imself.’ Some people talk say to de carry body up bad well-well, sotey even people wey de carry body up no like to see this character for other people body.
5 Jehovah no like am at all if person de carry body up. Jehovah hate this kind character. (Prov. 6:16, 17) Person wey de carry body up no fit be God friend. (Ps. 10:4) Na Devil get this kind character. (1 Tim. 3:6) E de pain to see say even some people wey serve God well start to de carry body up. For example, Uzziah wey be king for Judah serve Jehovah well for many years. But Bible tell us say: “When e see say e don strong, e begin carry e self up, and cause trouble for e self. And e do wetin Jehovah wey be e God no like. E enter inside the temple of Jehovah and start to burn incense on top of the altar.” E even get one time wey King Hezekiah start to carry body up, but e come later change.—2 Chron. 26:16; 32:25, 26.
w06 7/15 11 ¶2
Lessons From Book Three and Four of Psalms
75:4, 5, 10—Wetin the word ‘horn’ mean? Animal horn na powerful thing wey e de use fight. So when them use the word ‘horn’, e de represent power, or strength. Jehovah de raise the horn of im people, and e de put them for high position. But e de cut the horn of wicked people. Bible warn us say make we no de raise our horn high. This one mean say make we no de carry body up. Since na Jehovah de raise us put for high position, make we de see any assignment wey we get for congregation as something wey come from-am.—Psalm 75:7.
Fine-Fine Things Wey You See for Bible
w06 7/15 11 ¶3
Lessons From Book Three and Four of Psalms
76:10—How the things wey ‘people do because them de vex’ de bring praise to Jehovah? When God allow people to treat us for bad way because we de serve-am, e de bring better result. Any problem wey we face fit train us for some kind way. The only suffer wey Jehovah de allow make we face na the one wey fit give us this kind training. (1 Peter 5:10) Bible help us see say ‘even the last thing wey your enemy do because e de vex, God go use-am give imself glory.’ What if we suffer sotey we die? This one too fit bring praise to Jehovah, because people wey see us as we endure and no leave Jehovah fit start to praise-am.
AUGUST 26–SEPTEMBER 1
FINE-FINE LESSON FROM BIBLE PSALM 78
Israel People No Continue to Hold Jehovah Tight—Warning Example for Us
w96 12/1 29-30
“Remember the Days Wey Don Pass”—Why?
E really dey sad say Israel people commit the sin wey be to de always forget. Wetin come be the result? “Plenty times them test God, and them make the Holy One of Israel feel bad. Them no remember im power, the day wey e save them from their enemy.” (Psalms 78:41, 42) Last-last, Jehovah reject them because them forget the things wey Jehovah don command them.—Matthew 21:42, 43.
One person wey write Psalm set better example. E write say: “I go remember the things wey Jah don do; I go remember the wonderful things wey you don do long time ago. And I go think deep about all your work, and I go study the things wey you de do.” (Psalm 77:11, 12) When we de remember and de think deep about the things wey we don do for Jehovah service and the different ways wey Jehovah don show us love, e go de move us, de encourage us, and we go de thank Jehovah. Another thing be say, when we de “remember the days wey don pass”, e fit make us no tire and e go move us to do everything wey we fit do to continue to endure and stand well for Jehovah side.
w06 7/15 17 ¶16
‘Stop to De Complain’
16 When we de complain, we go de think of only ourself and the problem wey we de face. This one go come make-am hard for us to remember the blessings wey we de enjoy as Jehovah Witness People. For us not to get the mind to de complain, we need to put the blessings wey we don get clear for our mind. For example, each of us get the better chance to bear Jehovah name. (Isaiah 43:10) We fit work hard to make our friendship with Jehovah tight, and we fit talk to-am any time as the Person wey de hear prayer. (Psalm 65:2; James 4:8) Our life really make sense because we understand say na Jehovah get the right and authority to rule, and we remember say na big honor for us to continue to hold-am tight. (Proverbs 27:11) We fit join de preach the good news about the kingdom everytime. (Matthew 24:14) Faith for Jesus Christ sacrifice make-am possible for us to get clean conscience. (John 3:16) Na all this blessing we de enjoy no matter the kind problem wey we need to endure.
w11 7/1 10 ¶3-4
Jehovah Get Feelings?
One of the person wey write Psalm talk say: “Many times na e them challenge God for the wilderness and make God feel bad for the desert!” (Verse 40) The next verse talk say: “Plenty times them test God, and them make the Holy One of Israel feel bad.” (Verse 41) Notice the way this writer describe how them don de disobey God. This their bad character start when them dey the wilderness, after God save them from Egypt. The people start to complain against God, and them ask whether God fit, and whether e ready to care for them. (Numbers 14:1-4) One book wey Bible translators de use talk say, another way to talk “them challenge God” fit be to say ‘them make their heart strong against God’ or ‘them tell God No.’ But because Jehovah de show mercy, E de forgive im people when them show say them don repent, but after them go sin again. And them do like this many times.—Psalm 78:10-19, 38.
How Jehovah de feel each time im people disobey-am? Verse 40 talk say “them make God feel bad.” Another translation talk say ‘them make-am feel sorrow.’ One Bible research work explain say: ‘Wetin e mean for here na say Israel people character na just to cause pain, e just be like the way pikin wey dey stubborn and de always disobey de behave.’ Just as pikin wey de misbehave de make im papa and mama feel pain for heart, na so Israel people “make the Holy One of Israel feel bad” because them dey stubborn.—Verse 41.
Fine-Fine Things Wey You See for Bible
w06 7/15 11 ¶4
Lesons From Book Three and Four of Psalms
78:24, 25—Why them call manna “the grain of heaven” and “the bread of the ones wey get power pass humans”? This things wey this two verse talk no mean say manna na angels food. Na “the grain of heaven” because e come from heaven. (Psalm 105:40) Since angels, or “the ones wey get power pass humans,” de stay for heaven, “the bread of the ones wey get power pass humans” fit mean say na God wey de stay for heaven de give them. (Psalm 11:4) Jehovah fit don still use angels give Israel people manna.