Study Book for Our Life and Preaching Meeting
© 2024 Watch Tower Bible and Tract Society of Pennsylvania
SEPTEMBER 2-8
FINE-FINE LESSON FROM BIBLE | PSALMS 79-81
Show Love for Jehovah Wonderful Name
w17.02 9 ¶5
Jesus Sacrifice—Perfect Gift From the Father
5 How we fit show say we love Jehovah name? Na our character. Jehovah want make we dey holy. (Read 1 Peter 1:15, 16.) This one mean say we go serve only Jehovah and we go use all our heart obey-am. Even when them de suffer us, we go do everything wey we fit do to follow wetin Jehovah talk for Bible. When we de do wetin good, we de let our light shine and this one de bring praise to Jehovah name. (Matt. 5:14-16) As people wey dey holy, we de use the way we de live our life prove say Jehovah laws dey good and the things wey Satan talk na lie. All of us de make mistake. But when e happen, make we use all our heart repent and stop to do things wey de spoil Jehovah name.—Ps. 79:9.
Romans 10:13—“De Call the Name of Jehovah”
When Bible talk say “de call the name of Jehovah”, the meaning pass to just know God name and de use-am worship-am. (Psalm 116:12-14) E still mean to de trust God and de beg-am to help us.—Psalm 20:7; 99:6.
God name de important to Jesus Christ. The first things wey e talk when e de teach im disciples how to pray na: “Our Papa wey dey heaven, make your name dey holy.” (Matthew 6:9) Jesus still show say we must know, obey, and love the Person wey get that name if we want get life wey no go end.—John 17:3, 6, 26.
Fine-Fine Things Wey You See for Bible
it-2 111
Joseph
Them Make the Name Wey Be Joseph Important. As Joseph get big position among the sons of Jacob, e make sense say sometimes, na im name them use represent all the tribe of Israel (Ps 80:1) or other ones wey them later add join the northern kingdom. (Ps 78:67; Am 5:6, 15; 6:6) E name still appear for some prophecy for Bible. For the vision wey Ezekiel see, Joseph inherit double portion (Eze 47:13), one of the gate of the city wey be “Jehovah Dey There” get Joseph name (Eze 48:32, 35), and when Bible talk about how Jehovah people go take come together as one again, e talk about Joseph as chief of one part of the nation and Judah as chief of the other part. (Eze 37:15-26) Obadiah prophecy show say ‘the house of Joseph’ go join destroy ‘the house of Esau’ (Ob 18), and Zechariah prophecy show say Jehovah go save ‘the house of Joseph.’ (Zec 10:6) Bible show say instead of Ephraim, Joseph tribe na one of the tribe wey dey part of spiritual Israel.—Re 7:8.
Since Joseph tribe dey among the tribe for Revelation 7:8, e show say the prophecy wey Jacob talk when e want die go concern spiritual Israel. So e really make sense to know say, the Powerful One of Jacob wey be Jehovah God, give Jesus Christ as the Fine Shepherd wey come die “because of the sheep.” (Joh 10:11-16) Jesus Christ na still the main foundation stone, and spiritual Israel wey be God temple de rest on top-am. (Eph 2:20-22; 1Pe 2:4-6) And this Shepherd and Stone dey with Almighty God.—Joh 1:1-3; Ac 7:56; Heb 10:12; compare Ge 49:24, 25.
SEPTEMBER 9-15
FINE-FINE LESSON FROM BIBLE PSALMS 82-84
Value the Privilege Wey You Get
wp16.6 8 ¶2-3
Wetin We Fit Learn From Bird
The people wey de stay for Jerusalem know the bird wey them de call swallow, and this bird de normally build their nest under the edge of roof wey dey building. Some of this bird build their nest for Solomon temple. E fit be say, some of this bird wey de build their nest for the temple area each year de see this area as safe place where them fit train their children and nobody go disturb them.
The person wey write Psalm 84—one of Korah sons, wey de serve for temple for one week every six months—see all this nests for the temple area.[2] Because e de hungry-am to get permanent place wey e go de stay for Jehovah house like this bird, e talk say: “How l really love your great tabernacle, O Jehovah of armies! E de hungry me to go the courtyard of Jehovah house. Yes, e really de hungry me . . . Even bird de stay there. And swallow get nest for imself where e de care for im children near your great altar, O Jehovah of armies, my King and my God!” (Psalm 84:1-3) Like the person wey write this psalm, we and our young children de show say e de really hungry us, and say we value-am as we de always go the congregation of God people?—Psalm 26:8, 12.
w08 7/15 30 ¶3-4
No Expect Too Much From Yourself, and Dey Happy
Old age or sickness fit make us no fit do some things wey we for like do for Jehovah organization. If you be papa or mama, you fit de feel say you no de too gain from your personal study or when you go meeting because you de use most of your time and power for your children. But, you no think say to de focus on the things wey you no fit do sometimes fit make you no see the things wey you de fit do?
For many-many years wey don pass, one person wey be Levite show say e really de hungry for something wey e no fit get. E get the privilege to serve for temple for two weeks every year. But the things wey e talk show say e for really like to get permanent place wey e go de stay for Jehovah house. (Ps. 84:1-3) Wetin help this faithful man to allow wetin e get reach-am? E come see say to stay for Jehovah house even for one day na special privilege. (Ps. 84:4, 5, 10) For the same way, instead of us to de focus on the things wey we no fit do, make we try put mind for the things wey we fit do and value-am.
You Dey Important to Jehovah Your God!
12 If you de struggle with sickness, make you dey sure say Jehovah know your problem. Beg Jehovah to help you use better eye look your condition. Then read Bible to see the better-better things wey Jehovah don keep to comfort you. Put mind for the verse them wey show say all of us dey important to Jehovah. If you do this one, you go see say Jehovah dey good to all e true servants.—Ps. 84:11.
Fine-Fine Things Wey You See for Bible
it-1 816
People Wey Their Papa No Dey Again
Since e dey easy to forget this kind people wey no get who de help them, Jehovah use the statement “people wey their papa no dey again” take describe how Israel people righteous reach or how them don comot from the righteous ways. When the nation de do the things wey Jehovah want, them care for people wey their papa no dey again. When them stop to do the things wey Jehovah want, them come forget this people wey their papa no dey again, and this one na sign wey show say their nation no strong again for God side. (Ps 82:3; 94:6; Isa 1:17, 23; Jer 7:5-7; 22:3; Eze 22:7; Zec 7:9-11; Mal 3:5) Jehovah curse come dey on top people wey de treat people wey their papa no dey again for bad way. (De 27:19; Isa 10:1, 2) Jehovah describe imself as Person Wey De Save (Pr 23:10, 11), Wey De Help (Ps 10:14), and Papa (Ps 68:5) for this kind people. Na im be judge for this kind people (De 10:17, 18), e de show them mercy (Ho 14:3), e de make their mind come down (Ps 146:9), and e de keep them alive.—Jer 49:11.
One thing wey de show who true Christians really be, na to de care for people wey their husband no dey again or people wey their papa or mama no dey again. James wey be disciple write give Christians say: “The kind worship wey clean and pure for the eyes of our God and Papa na to care for children wey no get papa and mama, and widows wey de face problem, and to make sure say person no get stain from this world.”—Jas 1:27.
SEPTEMBER 16-22
FINE-FINE LESSON FROM BIBLE PSALMS 85-87
Prayer De Help Us Endure
w12 5/15 25 ¶10
The Glory of Jehovah De Show for Your Life?
10 For Jehovah glory to fit de show for our life, ‘we no go tire to de pray.’ (Rom. 12:12) Make we de pray to Jehovah to help us serve-am for way wey e like. This one mean say, we go de beg Jehovah to give us holy spirit, to give us more faith, to give us power to fit run from temptation, and to help us make we fit de “handle the word of God wey be the truth for correct way.” (2 Tim. 2:15; Matt. 6:13; Luke 11:13; 17:5) As pikin de depend on im papa, na so we self go de depend on our Papa for heaven wey be Jehovah. If we beg-am to help us serve-am well, we fit de sure say e go help us. Make we no ever feel say we de disturb-am! Instead, make we de praise-am for prayer, de thank-am, and de beg-am to direct us especially when we de face problem. And make we still de beg-am to help us so that we go fit serve-am for way wey go bring praise to im holy name.—Ps. 86:12; Jas. 1:5-7.
How Jehovah De Answer Our Prayer
17 Read Psalm 86:6, 7. King David dey sure say Jehovah hear e prayers and answer them. You too fit dey sure of this one. The examples wey we don talk about for this article teach us say Jehovah fit give us the sense and power wey we need to endure. Jehovah fit still use our brothers and sisters and some people wey no de worship-am now, help us when we need help.
18 Na true say some times, Jehovah fit no answer our prayer the way wey we expect, but we know say e go always answer them. E go give us wetin we need for the time wey we need-am. So, continue to pray and believe say Jehovah go hear your prayer. And dey sure say Jehovah go care for you now, and for paradise e go “give everything wey get life wetin them want.”—Ps. 145:16.
Fine-Fine Things Wey You See for Bible
it-1 1058 ¶5
Heart
Serve Jehovah With “Complete Heart.” For the heart wey dey our body to fit work well, all the different part of the heart must dey complete. But e dey possible make the heart wey we take de serve Jehovah no complete. David pray say: “Make my heart to be one to fear your name.” This one show say person heart fit divide for the way e de feel. (Ps 86:11) This kind person fit de use half heart worship God. (Ps 119:113; Re 3:16) Person fit still get double heart (meaning two different heart). This kind person fit de try to serve two oga or master, or e fit de talk one thing but wetin dey im mind different. (1Ch 12:33; Ps 12:2, ftn) Jesus really condemn this kind thing.—Mt 15:7, 8.
SEPTEMBER 23-29
FINE-FINE LESSON FROM BIBLE PSALMS 88-89
The Way Jehovah De Rule Na the Best
w17.06 28 ¶5
Show Say Jehovah Na Your King!
5 E still get another thing wey make us fit talk say na Jehovah suppose rule us. Everything wey e de do correct finish. E talk for Bible say: “I be Jehovah, the Person wey de show love wey no de fail, wey no de bend matter, and wey de do wetin correct for the earth. Na this kind thing de sweet me.” (Jer. 9:24) Jehovah no need person to write law for-am about wetin correct. E de always do the correct thing. Na this one make-am give human being law wey them go follow. Bible help us know say Jehovah throne dey on top wetin correct, and e de rule well. This one make us dey sure say all of Jehovah law, im advice, and im decision dey righteous. (Ps. 89:14; 119:128) Even as Satan lie say Jehovah no fit rule us well, e never still fit make the world to be place where everybody de do wetin correct.
w17.06 29 ¶10-11
Show Say Jehovah Na Your King!
10 Jehovah no de force people to do wetin e want. This one don make us dey free and we get joy. (2 Cor. 3:17) David talk say: “Glory and respect dey for where E [God] dey. Power and joy dey im house.” (1 Chron. 16:7, 27) For the same way, one of the person wey write Psalms wey im name na Ethan write say: “The people wey de praise you with happy mind go dey happy. Them continue to de waka with the light wey de shine from your face, O Jehovah. Because of your name, them de happy from morning go reach night. Them de get honor because you dey righteous.”—Ps. 89:15, 16.
11 To de always think about how Jehovah good reach go help us dey sure say the way e de rule us na the best. We go feel like one person wey talk for Bible say: “Because one day for inside your temple better pass one thousand days for another place!” (Ps. 84:10) This one na true talk! Because na Jehovah make us, e know wetin go make us really happy. And e don give us the things wey we need to dey happy. Anything wey e tell us na for our own good, and we de really happy when we do them. Yes, we go really happy even if e mean say we go sacrifice some things to fit do wetin e want.—Read Isaiah 48:17.
w14 10/15 10 ¶14
Make Your Faith for the Kingdom No Shake
14 Think about the thing wey Jehovah promise King David as E make covenant with David. (Read 2 Samuel 7:12, 16.) Jehovah make this covenant with David the time wey David de rule for Jerusalem. E promise-am say the Messiah go come from im family line. (Luke 1:30-33) Later, Jehovah come still talk say this person wey go be the Messiah go be close family member of David. E say na David pikin go “get the right according to law” to the throne of God Kingdom. (Ezek. 21:25-27) Through Jesus, David kingship go last forever. True-true, David pikin go endure forever, im throne go endure like the sun. (Ps. 89:34-37) Yes, the Messiah rule no go ever become bad, and the things wey e go do go last forever!
Fine-Fine Things Wey You See for Bible
cl 281 ¶4-5
Na Only You De Loyal
4 For person to de loyal as them use-am for the Hebrew Scriptures, e mean say person go dey kind and e go get love. And because of this love, e de join imself to something and e no de leave that thing until wetin e get for mind to do wey concern that thing don happen. Wetin person go do to get this kind love pass wetin de make person dey faithful. The truth be say, person fit de faithful just because e need to. But to de loyal na something wey fit happen when person get love. Another thing be say, the word ‘faithful’ na something wey them fit use describe things wey no get life. For example, one of the person wey write Psalm talk say the moon na ‘faithful witness for sky.’ E talk this one because the moon na something wey de always come out for night. (Psalm 89:37) But them no fit describe the moon as something wey dey loyal. Why? Because na love de make person dey loyal, and things wey no get life no fit show this kind character.
5 The way Bible talk about to dey loyal, really make sense. When person dey loyal, e mean say friendship dey between the person wey de show this character and the person wey e de show-am to. This kind character no be something wey de change anyhow. E no be like big sea wey heavy breeze de blow up and down. Instead, to dey loyal, or to get love wey no de fail, de make person get the power to continue to hold something tight no matter wetin happen.
SEPTEMBER 30–OCTOBER 6
FINE-FINE LESSON FROM BIBLE PSALMS 90-91
To Get Long Life, Trust Jehovah
wp19.3 5 ¶3-5
The Struggle for Long Life
No be all science people agree say, the treatment wey de make person wey don old look young again, go fit make person life long pass as e de be today. Na true say since many-many years wey don pass, the number of years wey people de expect to live don go up. But the main reason for this one na when person de always keep im body and the place wey e de stay clean, when e de always keep imself from infection wey fit cause disease, and when e de use medicines like antibiotics and vaccines. Some people wey de study human being body believe say human being don reach the age wey them suppose reach before them die.
About 3,500 years wey don pass, Moses wey write Bible talk say: “We de live reach 70 years, or 80 years if person really dey strong. But na so-so trouble and pain plenty for inside; the years de finish quick, and we go just go like that.” (Psalms 90:10) Even as human being de try their best to make the number of their years long pass as e de be now, life still dey as Moses describe-am.
But, some things wey God create like the one wey them de call red sea urchin or one type of the one wey them de call quahog clam fit live pass 200 years. And trees like giant sequoia fit live for thousands of years. When we compare the number of years wey we de live with this things and other things wey get life, e no de make us wonder say, ‘This our life wey be 70 or 80 years, na so e just reach?’
wp19.1 5, box
Wetin Be God Name?
Many people don wonder about this question. Maybe you self don think about-am. Them fit ask the question like this: If na God make the heaven and the earth and everything wey dey inside, then where that God come from?
Many science people agree say everything for this world and for heaven get beginning, and the first verse for Bible agree with this one. E talk say: “For the beginning, God make heaven and earth.”—Genesis 1:1.
Everything for this world and for heaven no fit create e self; e no fit come from nothing. Something no fit come out from nothing. If nothing dey before the whole world start, then nothing for dey anywhere today. Even though say e fit hard us to understand, the truth be say person wey no get beginning and end suppose dey to fit make this things. Na Jehovah God wey be spirit and wey get power well-well be that Person.—John 4:24.
Bible talk about God say: “From everlasting go reach everlasting, you be God. Even before you make mountains, or the earth and the world.” (Psalms 90:2) So God don always dey. And “for the beginning” e make everything for heaven and earth.—Revelation 4:11.
How Love De Help Us Make We No De Fear
16 Satan know say our life dey important to us. E talk say we go dey ready to leave everything wey we get, and even spoil our friendship with Jehovah because we want save our life. (Job 2:4, 5) That one na big lie! But as e be say na Satan be “the person wey de cause death,” e de try to use that normal fear wey we get about death to make us leave Jehovah. (Heb. 2:14, 15) Sometimes, people wey Satan de control fit talk say them go kill us if we no stop to worship Jehovah. For other times, if we get serious sickness, Satan fit use that chance try to make us break Jehovah law. Doctors and our family members wey no de serve Jehovah fit de tell us say make we take blood, and that one dey against God law. Or somebody fit de tell us say make we accept one kind treatment wey dey against wetin Bible talk.
17 Na true say we no want die. But we know say even if we die, Jehovah no go stop to love us. (Read Romans 8:37-39.) When people wey be Jehovah friend die, e still de remember them as if them still dey alive. (Luke 20:37, 38) E de hungry Jehovah to bring them come back to life. (Job 14:15) No be small thing Jehovah give so that we “go . . . get life wey no go end.” (John 3:16) We know say Jehovah really love us, and e de care for us. So, instead make we leave Jehovah when we de sick or when them talk say them go kill us, e good make we near Jehovah because e go make our mind calm down. E go give us sense and power. Na exactly wetin Valérie and e husband do be that.—Ps. 41:3.
Fine-Fine Things Wey You See for Bible
wp17.5 5
You Get Angel Wey Dey Guard You?
Bible no teach us say each person get angel wey de guard-am. Na true say e get one time wey Jesus talk say: “Make una make sure say una no treat any one of this small ones [Jesus disciples], as if them no be anything, because I de tell una say their angels for heaven de always look the face of my Papa wey dey heaven.” (Matthew 18:10) But Jesus no de talk say each person get angel wey de guard-am, instead e say the angels de care for each of im disciples. So people wey de worship Jehovah for the correct way no de open eye put their life for danger, and de expect say the angels go protect them.
That one mean say angels no de help people? No. (Psalm 91:11) Some people de feel say God de use angel guide and protect them. Kenneth wey we don talk about before, na one person wey feel like that. Even though say we no fit argue this matter, e fit be say wetin Kenneth talk dey correct. Jehovah Witness people de always see how the angels de help them as them de do their preaching work. But because we no fit see the angels, we no fit talk how Jehovah de use this angels help each person with their different matter. Even with that one, we no do any bad thing if we de thank the Almighty for any support wey e de give us.—Colossians 3:15; James 1:17, 18.
OCTOBER 7-13
FINE-FINE LESSON FROM BIBLE PSALMS 92-95
To De Serve Jehovah Na the Best Way of Life!
w18.04 26 ¶5
Young People, You De Put Mind to Do More for Jehovah?
5 The main reason why we need to do more for Jehovah na to show say we really happy for the love wey e show us and the things wey e don do for us. One of the person wey write Psalm talk say: “Na good thing to thank Jehovah . . . You don make me over glad, O Jehovah, because of the things wey you do; I shout with all my heart because of your handwork.” (Ps. 92:1, 4) As young person, think about everything wey you owe Jehovah—your life, your faith, the Bible, the congregation, and the better hope wey you get about the future. To de put mind to do more for Jehovah na way wey we de show say we thank Jehovah for all this blessings, and this one de make us near-am more-more.
Who De Mold Your Thinking?
8 Like good papa or mama, Jehovah want make all im children enjoy the best life wey we fit think about. (Isa. 48:17, 18) So e de teach us things wey go guide us to live the best life, and how to treat other people. E want make we de think the way e de think and do the things wey e want. This one no put us for tight corner or collect our freedom at all. Instead, e give us chance to think deep and be better people. (Ps. 92:5; Prov. 2:1-5; Isa. 55:9) E help us to choose things wey go make us dey happy and enjoy life. (Ps. 1:2, 3) True-true, na better thing to de think like Jehovah, because the way e de think de benefit us!
You Dey Important to Jehovah Your God!
18 As we de old, we fit dey sure say Jehovah still get work for us to do. (Ps. 92:12-15) Jesus teach us say no matter how we feel say our power small reach, Jehovah value anything wey we fit do for e service. (Luke 21:2-4) So put mind for the thing wey you fit do. See example of some things wey you fit do: You fit tell people about Jehovah, pray for our brothers and sisters, and encourage other people to continue to serve Jehovah well. Jehovah de see you as person wey una de work together. And the reason no be because of wetin you fit do, but na because you dey ready to do wetin e want.—1 Cor. 3: 5-9.
Fine-Fine Things Wey You See for Bible
cl 176 ¶18
‘God Sense Really Dey Deep No Be Small’
18 Notice how apostle Paul take talk about how Jehovah sense really dey special. E say: “The better-better things of God and im sense and the things wey e know really dey deep no be small! Person no fit really understand the way e de judge and person no fit really know im ways!” (Romans 11:33) Paul show strong feeling for the way e talk for this verse. E show strong fear and respect for the kind sense wey Jehovah get. The Greek word wey e choose to use for “deep” na almost the same thing wey them use for “abyss.” So, the things wey e talk de bring clear picture for our mind. When we think about the sense wey Jehovah get, e just be like say we de look one place wey no get end, wey deep well-well, sotey we no fit even understand how e big, wide, or deep reach, not to talk of say make we trace-am or use map describe how e be. (Psalm 92:5) This one no show you the kind person wey Jehovah be?
OCTOBER 14-20
FINE-FINE LESSON FROM BIBLE PSALMS 96-99
“De Tell People the Good News”!
w11 3/1 6 ¶1-2
Wetin Be the Good News?
CHRISTIANS de preach the “good news about the Kingdom” as them de tell other people about-am, and de explain say the Kingdom na government wey go rule the world for future and e go rule for correct way. But for Bible, them still use the word “good news” for other ways. Some example na, “the good news about how e de save people” (Psalm 96:2); “the good news of God” (Romans 15:16); and “the good news about Jesus Christ.”—Mark 1:1.
The good news na all the truth wey Jesus teach wey im disciples write. Before Jesus go heaven, e tell im disciples say: “So, make una go, and make people from all the nations my disciples, make una baptize them for the name of the Papa, the Son and the holy spirit, make una teach them to do all the things wey I don command una.” (Matthew 28:19, 20) So the work wey true Christians get no be just to tell other people about the Kingdom; but to help them come serve Jehovah.
w12 9/1 16 ¶1
Wetin Go Happen for Judgment Day?
As we see for the picture wey dey the right side, many people de think say for Judgement Day, plenty-plenty people go stand for front of God throne, and God go use the things wey them don do before take judge them. Some go go heaven, and other people go de burn for hell. But Bible show say the reason for Judgement Day na to free people from the bad things wey dey happen for this world. (Psalm 96:13) God don choose Jesus to be the judge wey go make sure say partial no go dey this world again.—Read Isaiah 11:1-5; Acts 17:31.
w12 9/15 12 ¶18-19
Peace for One Thousand Years—And Forever!
18 Satan spoil the better friendship wey Jehovah and humans get as e push them to sin against Jehovah. Since 1914, God Kingdom don de work to bring back that friendship wey be don lost. (Eph. 1:9, 10) For the one thousand years wey Jesus go rule this earth, many better-better things wey “eye no fit see” now go happen. Then “the end” go come. This one mean say Jesus go stop to de rule. Wetin go come happen? Even though say them don give Jesus “all the authority for heaven and for earth,” e no get long throat. E no get the mind to collect wetin be Jehovah own. E go humble imself and “give the Kingdom to im God and Papa.” E go use im special position and authority “to the praise of God.”—Matt. 28:18; Phil. 2:9-11.
19 By that time, the people wey remain for this earth go don dey perfect. Them go follow Jesus example and use all their mind show say them accept Jehovah as their ruler. The last test na chance to show say them really want Jehovah to rule them. And them go show-am when them pass this test. (Rev. 20:7-10) After that one, Jehovah go destroy anybody wey no follow im way forever; whether na human being or na spirit. This one go really sweet and e go be happy time! Everybody for heaven and for earth go praise Jehovah, and Jehovah go “be everything to everybody.”—Read Psalm 99:1-3.
Fine-Fine Things Wey You See for Bible
it-2 994
Song
No be only for Psalms them talk about the “new song”, but e still show for the things wey Isaiah and apostle John write. (Ps 33:3; 40:3; 96:1; 98:1; 144:9; 149:1; Isa 42:10; Re 5:9; 14:3) The things wey dey around this word wey be “new song” show say them sing this song because of the new things wey don happen as Jehovah don de rule. The person wey write Psalm 96:10 dey happy and e talk say: “Jehovah don be King!” E be like say the main thing wey this “new song” de talk about na the new things wey don happen as Jehovah de rule, and wetin this things mean for heaven and earth.—Ps 96:11-13; 98:9; Isa 42:10, 13.
OCTOBER 21-27
FINE-FINE LESSON FROM BIBLE PSALMS 100-102
Show Say You Value Jehovah Love Wey No De Fail
Wetin You Need to Do to Fit Ready to Baptize?
18 Your love for Jehovah na the best thing wey you get. (Read Proverbs 3:3-6.) Strong love for Jehovah go help you face any problem wey come as you de worship Jehovah. And e go help you continue to worship Jehovah even when you de face problem. Plenty times, Bible talk say Jehovah love for im servants no de fail. This one mean say Jehovah no de ever stop to love im servants or leave them. (Ps. 100:5) Jehovah make you to get the kind character wey e get. (Gen. 1:26) So how you fit show this kind love wey Jehovah get?
19 The first thing na to de thank Jehovah. (1 Thess. 5:18) Ask yourself everyday say, ‘Wetin Jehovah don do for me wey show say e love me?’ Then, make sure say you pray to-am to thank-am and mention the things wey e don do for you. This things wey show say Jehovah love you, see-am say na you e do-am for, na the same way apostle Paul de see Jehovah love. (Read Galatians 2:20.) Ask yourself say, ‘I want show Jehovah say I love-am as e don show say e love me?’ Your love for Jehovah go help you continue to hold Jehovah tight when you face temptation and problem. And you go continue to worship Jehovah well and de show everyday say you love-am.
‘Use Your Sense Well and Dey Careful!’
10 Some of the bad things wey you need to run from na, to de show feeling to person wey you no want marry, to overdrink, to chop too much, to de talk wetin go pain another person, to de watch film and video wey them de fight and kill people, to watch naked people picture or video, and other things like this ones. (Ps. 101:3) Satan wey be our enemy, no de rest. E de always look for the chance to spoil our friendship with Jehovah. (1 Pet. 5:8) If we no dey careful, e go plant wicked things for our mind and heart, like bad-belle (envy), lie-lie, long-throat, de carry shoulder, and no de forgive. (Gal. 5:19-21) When person start to get this bad characters, e fit no think say na serious thing. And if e no quick remove them, them go start to grow for the person heart like plant wey get poison, and put the person for serious trouble.—Jas. 1:14, 15.
w11 7/15 16 ¶7-8
You Go Obey Jehovah Warning?
7 How we fit run from lie-lie teachers? We no de allow them enter our house or greet them. We no still de read their books, watch TV program wey concern them, go their Web site, or add our comment for their Web page (blog). Why we no de do all this things? Na because of love. We love “the God of truth,” so we no get time for lie-lie teaching wey no agree with im Word wey be truth. (Ps. 31:5; John 17:17) We still love Jehovah organization and na there we de learn better truth—even Jehovah name and wetin the name mean, wetin God get for mind for this earth, wetin de happen to people wey don die, and the hope say people wey don die go come back to life. You fit remember how you feel when you first learn all this better-better truth and other ones wey them no mention for here? Why you go come allow anybody deceive and tell you lie about the organization wey you learn all this truth from?—John 6:66-69.
8 No matter wetin lie-lie teachers talk, we no go follow them! Why we go go this kind well wey the water don dry? Them go just deceive us and we no go happy. Instead, make we make up our mind to hold Jehovah and im organization tight, because e don tey wey them don de quench our thirst with the pure water of truth from God Word wey de cool us for body.—Isa. 55:1-3; Matt. 24:45-47.
Fine-Fine Things Wey You See for Bible
it-2 596
Pelican
When one bird wey them de call pelican load imself with food, e de fly go place wey dey lonely. For there, e go just stay for one place and e go rest im head for im shoulder. When person see-am from far, e go think say na white stone, and e de stay like that for hours. One of the person wey write Psalm compare the way e de feel to this way wey the bird de behave. E write say: “I resemble the pelican for wilderness.” (Ps 102:6) For here, “wilderness” no mean desert wey dry, but e mean area wey people no de stay, wey fit be swamp. For some seasons, pelican bird still de stay for swamps wey dey the Jordan Valley for the north side. Na three different types of pelican bird them de see for Israel. The one wey common pass na the eastern white pelican (Pelecanus onocrotalus); but them no de quick see the Dalmatian pelican (Pelecanus crispus) and the pink-backed pelican (Pelecanus rufescens).
Pelican bird de like place wey nobody dey to disturb-am. For there, e go lay im egg, hatch them, and rest after e don go catch fish. Because this bird de like place wey dey lonely or wey them abandon, Bible use-am when e de talk about how them go destroy some place and abandon them. When Isaiah de talk about how Edom go be after them destroy-am, e talk say the pelican bird go de stay for the land. (Isa 34:11) Zephaniah prophecy still show say pelican birds go stay for Nineveh, and this one mean say Nineveh go face complete destruction and no human being go stay there.—Zep 2:13, 14.
OCTOBER 28–NOVEMBER 3
FINE-FINE LESSON FROM BIBLE PSALMS 103-104
E Remember Say “We Be Dust”
Copy Jehovah Example—Ready to Adjust
5 As Jehovah de carry body down and de feel for people, this one de make-am ready to adjust. Jehovah show say e really de carry body down the time wey e want destroy Sodom and Gomorrah. Jehovah use e angels tell Lot say make e and im family run go the area wey mountains dey. But Lot de fear the area. So e beg Jehovah say make e allow-am and im family run go Zoar. And Jehovah don decide say e go destroy Zoar. Jehovah get the power to tell Lot say e must do wetin E don tell-am, but Jehovah no do like that, e allow Lot run go Zoar. This one mean say Jehovah no go destroy Zoar again. (Gen. 19:18-22) Plenty years later, Jehovah show say e de feel for people when e forgive the people of Nineveh. Jehovah send prophet Jonah say make e go tell Nineveh people say E go destroy them and their city, because of their wicked life. But when the people repent, Jehovah pity them and e no destroy them again.—Jonah 3:1, 10; 4:10, 11.
Trust Jehovah Like Samson
16 Even though say Samson suffer because of im mistake, e no stop to do im best for the work wey Jehovah give-am. Even if we make mistake and them give us strong correction or no allow us to de do the work wey we be de do for Jehovah organization, make we no stop to worship Jehovah. Remember say when we make mistake, Jehovah no de troway us. (Ps. 103:8-10) Even with our mistake, we fit still dey useful to Jehovah just like Samson.
17 Make we see the example of one brother wey im name na Michael. Na ministerial servant and regular pioneer for im congregation. But e do something wey make-am no be ministerial servant and regular pioneer again. E talk say: “Before this thing happen, I de do my best for my congregation and de worship Jehovah well. But before I know, I start to feel say I no fit do anything for Jehovah service again. I know say Jehovah no go troway me, but I wonder if my friendship with-am go ever be as e be before or if I go ever fit do the things wey I de do for congregation before.”
18 The good thing be say Brother Michael no stop to worship Jehovah. E talk say: “I do my best to get my friendship with Jehovah again. To fit do this one, I start to study and think deep about wetin I study and I always pray to Jehovah every time and tell-am everything wey dey my mind.” After some time, Brother Michael become ministerial servant and regular pioneer again for im congregation. Now, e don be elder and e still be regular pioneer. E talk say: “The support and encouragement from brothers and sisters for congregation, especially the elders, help me see say Jehovah still love me. Now I de fit do my work for congregation with clean conscience. Wetin happen to me teach me say Jehovah ready to forgive anybody wey really repent.” We too fit dey sure say even if we don make mistake before, Jehovah go use us and still bless us only if we comot hand from wetin we do and continue to worship-am.—Ps. 86:5; Prov. 28:13.
Wetin Fit Help You If You Plan to Do More for Jehovah?
2 If you get plan to do more, but you never fit do as you plan, make you no worry, e no mean say you don fail. Even if na small thing you plan to do, you go need to work hard and dey patient to fit do-am. As you de try to do wetin you plan, this one de show say you value your friendship with Jehovah and say you want give-am your best. Know say wetin you de do de make Jehovah happy. Remember say e no de expect you to do pass your power. (Ps. 103:14; Mic. 6:8) So when you plan to do something, make sure say na wetin you go fit do. After you don make the plan, wetin go help you fit do-am? Make we talk about some things wey fit help you.
Fine-Fine Things Wey You See for Bible
cl 55 ¶18
Power to Create—The “God Wey Make Heaven and Earth”
18 Wetin we learn from the way Jehovah use im power create things? We de surprise when we see the different-different things wey e make. One person wey write Psalm talk say: “O Jehovah, your handwork plenty no be small! . . . The things wey you don make, full the earth.” (Psalms 104:24) This one na really true! People wey de study things wey get life don see-am say e pass one million different-different type of things wey get life for this earth. But different-different idea still dey about how many millions of other ones dey wey them never know about. Sometimes, person wey be artist fit see say e no get idea of wetin to make and e fit no get the power to do-am. But Jehovah idea to create plenty different-different new things and im power to create them no de ever finish.