Study Book for Our Life and Preaching Meeting
© 2024 Watch Tower Bible and Tract Society of Pennsylvania
NOVEMBER 4-10
FINE-FINE LESSON FROM BIBLE PSALM 105
“E De Remember Im Agreement Forever”
How We Fit Make Our Faith for Jehovah Promise to Bring Paradise Strong?
11 Make we talk about some of the things wey Jehovah promise im people for the past wey be like say e no go ever happen. E promise Abraham and Sarah when them don already old say them go born pikin. (Gen.17:15-17) E still tell Abraham say e pikin them go inherit the land of Canaan. For the long time wey Israel people wey be Abraham children be slave for Egypt, person fit think say that Jehovah promise to Abraham no go ever happen. But e happen as Jehovah talk. Later, Jehovah promise Elizabeth say, e go born pikin even though say Elizabeth don already old. E still tell Mary say e go born pikin wey be God Son when e never sleep with man before. And na this one go make the promise wey Jehovah don make many years ago for garden of Eden to happen.—Gen. 3:15.
12 When we think about all Jehovah promise wey don already happen, we go see say Jehovah get power no be small. This one go make our faith for Jehovah promise say e go bring paradise, strong more-more. (Read Joshua 23:14; Isaiah 55:10, 11.) Another thing be say, e go make-am possible for us to help other people believe say Jehovah promise to make this earth paradise, no be just story, but e go really happen. When Jehovah de talk about e promise to make new heavens and new earth, e talk say, “This things na true and people fit trust-am.”—Rev. 21:1, 5.
it-2 1201 ¶2
God Word
Things wey God create, both the ones wey get life and the ones wey no get life de obey God word, and e fit use them to make anything wey e want happen. (Ps 103:20; 148:8) Im word na something wey we fit depend on; anything wey e promise, e still de remember to do-am. (De 9:5; Ps 105:42-45) As e don talk, im word “de last forever”; e no go ever come back to-am when e never happen.—Isaiah 40:8; 55:10, 11; 1 Peter 1:25.
Fine-Fine Things Wey You See for Bible
w86 11/1 19 ¶15
Young People—Una Part for One Happy Family
15 “Them chain im [Joseph] leg, and them put iron for im neck; Until the time wey wetin e talk happen, Jehovah word make-am dey clean.” (Psalm 105:17-19) For 13 years, Joseph suffer as slave and prisoner until the thing wey Jehovah promise happen. This things wey Joseph face make-am get plenty fine-fine character. Na true say no be Jehovah cause all this problem, but e get reason why e allow them to happen. Joseph go continue to put im hope for “Jehovah word” even with all this plenty wahala wey e de face? E go continue to de get better-better character more-more? E go continue to dey patient, dey humble, de near Jehovah more-more, and make up im mind to handle any assignment even though e hard? The truth be say Joseph come out from im problem like gold wey don pass through fire—e come pure well-well and God come value-am more-more sotey after some time, God use-am for wonderful way.—Genesis 41:14, 38-41, 46; 42:6, 9.
NOVEMBER 11-17
FINE-FINE LESSON FROM BIBLE PSALM 106
“Them Forget God Wey De Save Them”
“Who De Support Jehovah?”
13 The dark cloud, the lightning, and other wonderful sign wey Jehovah show Israel people about imself make them fear. So them want make Moses go up for Mount Sinai and talk with Jehovah for them. (Ex. 20:18-21) When Moses go up for Mount Sinai, e no come back quick as them expect. As them no see Moses their leader, maybe the people confuse inside wilderness and no know wetin to do. E fit be say the people too put their mind for leader wey them fit see, like Moses. So them tell Aaron say: “Make god for us wey e go de lead us, because we no know wetin don happen to this Moses, the man wey carry us comot from Egypt.”—Ex. 32:1, 2.
Fine-Fine Things Wey You See for Bible
w06 7/15 13 ¶9
Lessons From Book Three and Four of Psalms
106:36, 37. This verses de connect idol worship with sacrifice wey them de make to demons. This one show say person wey de use idol fit open chance for demons to de control-am. Bible advice us say: “Make una no put hand for idol worship.”—1 John 5:21.
NOVEMBER 18-24
FINE-FINE LESSON FROM BIBLE PSALMS 107-108
“De Thank Jehovah, Because E Dey Good”
w07 4/15 20 ¶2
Make the Congregation Praise Jehovah
2 The congregation no be just any kind of group. No be just any group for community or club, where people wey come from the same place, or wey like to do the same things, or like the same kind of sport de come together to form. Instead, the main reason for the congregation arrangement na for the worship of Jehovah God. As the book of Psalms show, na so e don be for long time now. For Psalm 35:18, we read say: “Then I go give you thanks for the big congregation; I go praise you for front of plenty people.” For the same way, Psalm 107:31, 32 talk say: “Make people thank Jehovah for im love wey no de fail, and for all im wonderful work wey e don do for people. Make them praise-am for the congregation of the people.”
w15 1/15 9 ¶4
De Thank Jehovah and Get Blessing
4 To fit get the kind heart wey de sabi talk thank you and to maintain-am, we must agree say our blessings na from Jehovah, and we must use better heart de think deep about this blessings and the different ways wey Jehovah don show us love wey no de fail. When one of the person wey write psalm do this one, e really surprise to see the many wonderful things wey Jehovah don do.—Read Psalm 40:5; 107:43.
Fine-Fine Things Wey You See for Bible
it-2 420 ¶4
Moab
Later, when David become king, war still dey between Israel people and Moab people. David win Moab people finish, and e make them pay wetin Bible call tribute to-am. E clear say for the end of the war, them kill two part out of three part of Moab men. E be like say David make them lie down for ground and e measure them with line. E measure two line of Moab men come out wey them go kill, and one full line of Moab men wey them no go kill. (2Sa 8:2, 11, 12; 1Ch 18:2, 11) Maybe na for this same war Benaiah wey be Jehoiada son for kill “the two sons of Ariel wey come from Moab.” (2Sa 23:20; 1Ch 11:22) The way David win the war make wetin prophet Balaam talk since more than 400 years before this time happen. E say: “One star go come out from Jacob, and one person with the rod of authority go come out from Israel. And e go surely break the forehead of Moab into two and the head of all the wicked warriors.” (Nu 24:17) E fit still be say na this war wey them win make the person wey write this psalm talk about how God talk say Moab na Im ‘washing pot or washbasin’—Ps 60:8; 108:9.
NOVEMBER 25–DECEMBER 1
FINE-FINE LESSON FROM BIBLE PSALMS 109-112
Support Jesus, Wey Be the King!
w06 9/1 13 ¶6
Lessons From Book Five of Psalms
110:1, 2—Wetin “[David] Lord,” wey be Jesus Christ, de do for the time wey e sitdown for God right hand? After Jesus come back to life, e go heaven and e sitdown for God right hand de wait until 1914 wey e go start to rule as King. For that time wey e de wait, Jesus rule over im anointed ones, e de guide them as them de preach and help people come serve Jehovah, and e even de prepare them for the time wey them go rule with-am for im Kingdom.—Matthew 24:14; 28:18-20; Luke 22:28-30.
w00 4/1 18 ¶3
People Wey De Fight Against God No Go Succeed!
3 Plenty people don dey against Jehovah people since the 20th century. For many place, people wey get bad things for mind don de try their best to make us stop to preach the good news of God Kingdom. Na our number one enemy wey be the Devil, wey “de waka up and down like lion wey de make loud noise, de find person wey e go chop” de control and push this people to fight against us. (1 Peter 5:8) After “the time wey them give the nations don complete” for 1914, God make im Son King to rule this earth, and e give-am command say: “Go de win among your enemies.” (Luke 21:24; Psalm 110:2) Then, Jesus use im power as King to pursue Satan comot from heaven, and throw-am come this earth. Satan de really vex because e know say na small time e get. And na this anger e de use follow anointed Christians and their brothers and sisters. (Revelation 12:9, 17) Wetin don happen as this people wey de fight against God de always attack Im people?
be 76 ¶2
Continue to De Make Progress—De Grow
The encouragement to use your gift mean say you go de use your mind do things wey you suppose do even when them no tell you to do-am. You de make time to work with different people for preaching? You de look for chance to help new people, young people, or people wey fit get some kind problem for body and no fit do things by theirself for your congregation? You de join clean Kingdom Hall or to help for different-different ways for conventions and assemblies? You fit de do auxiliary pioneer from time to time? You fit serve as regular pioneer or help for congregation wey them need more publishers? If you be brother, you de try to do the things wey go make you qualify to be ministerial servant and elder as Bible talk? When you dey ready to help and to do more for Jehovah organization, that one na sign say you de grow.—Ps. 110:3.
Fine-Fine Things Wey You See for Bible
it-1 524 ¶2
Agreement
Agreement to Be Priest Just Like Melchizedek. Bible talk about this agreement for Psalm 110:4, and the person wey write Hebrews talk about the Christ as priest like Melchizedek for Hebrews 7:1-3, 15-17. Na agreement wey Jehovah make with only Jesus Christ. Maybe Jesus talk about-am when e de make agreement about one kingdom with im disciples. (Lu 22:29) In line with Jehovah agreement, Jesus Christ wey be the Son of God go be priest like Melchizedek. Melchizedek na king and priest of God for earth. Jesus Christ go be both King and High Priest, no be for this earth, but for heaven. Na when e go heaven after e come back to life e become King and High Priest, and this one no go change. (Heb 6:20; 7:26, 28; 8:1) This agreement go continue forever since Jesus go do im work as King and High Priest under Jehovah direction forever.—Heb 7:3.
DECEMBER 2-8
FINE-FINE LESSON FROM BIBLE PSALMS 113-118
Wetin We Go Take Pay Jehovah Back?
w01 1/1 11 ¶13
Make Your Love for Jehovah De Grow
13 From wetin Jesus talk, e clear say the first and important thing na say make we love Jehovah. The truth be say them no born us with love for Jehovah, but na something wey we must learn to get. The things wey we first hear about Jehovah draw us to-am. Small-small we come learn how e take arrange this earth for people to stay. (Genesis 2:5-23) We learn about how e treat people for this earth, as e no troway us even when we sin. Instead, e do something to help us. (Genesis 3:1-5, 15) E de treat people wey hold-am tight for kind way, and e even give us im only Son so that E go fit forgive us our sins. (John 3:16, 36) The more we de learn about Jehovah, the more our love for-am de grow. (Isaiah 25:1) King David say e love Jehovah because of the way E de care for-am. (Psalm 116:1-9) For this our time, Jehovah de care for us, de guide us, de make us strong, and de encourage us. The more we de learn about-am, the more our love for-am de grow.—Psalm 31:23; Zephaniah 3:17; Romans 8:28.
w09 7/15 29 ¶4-5
De Happy for Wetin Jehovah Don Do for You—Use All Your Heart De Give
One of the person wey write psalms ask say: “Wetin I go use pay Jehovah back for all the good things wey e don do for me?” (Ps. 116:12) Wetin e don gain? Jehovah really help-am when e de face hard time, and E even save-am from death. Now e want “pay Jehovah back” for the things wey E do for-am. Wetin e fit do to pay Jehovah back? E talk say: “I go do wetin I promise Jehovah.” (Ps. 116:3, 4, 8, 10-14) E make-up im mind to do all the things wey e promise Jehovah and to do everything wey Jehovah want make e do.
You fit do the same thing. How? Na when you de follow Jehovah law and advice for everything wey you de do. So, make sure say the worship of Jehovah go continue to be the number one thing for your life, and you go de let God spirit guide you for everything wey you de do. (Eccl. 12:13; Gal. 5:16-18) The truth be say, you no go fit ever pay Jehovah finish for everything wey e don do for you. But still, e really de make Jehovah happy to see say you de try your best and you de use all your heart worship-am. (Prov. 27:11) Na really wonderful privilege we get to make Jehovah heart glad as we de do our best to worship-am!
Wetin We Fit Learn From the Book of Leviticus
9 Number two lesson: We de serve Jehovah because our heart de glad for the things wey e de do. We go learn about this lesson as we want talk about another sacrifice wey Israel people de do. For the book of Leviticus, we learn say person for Israel fit still do sacrifice because e want thank God. (Lev. 7:11-13, 16-18) The person no de do this sacrifice because e suppose to do-am. Instead, e de do this sacrifice because e want do-am. So the person de do this sacrifice from e heart because e love Jehovah, im God. For this sacrifice, the person, e family, and the priest them go chop the meat of the sacrifice together. But na only Jehovah them de give some kind part for the animal. Which part?
10 Number three lesson: Because of love, we de give Jehovah our best. To Jehovah, the fat for animal na the best part for the animal. God still talk say some parts of the animal, like the kidney, dey special. (Read Leviticus 3:6, 12, 14-16.) So when any Israel person give this parts of the animal and the fat as sacrifice to Jehovah, this one de really make Jehovah happy. And this one show say that Israelite want really give Jehovah e best. For the same way, Jesus give Jehovah e best as e do everything wey e fit do to worship Jehovah because of love. (John 14:31) Jesus de glad to do wetin God want and e get strong love for the law of God. (Ps. 40:8) Because Jesus serve God from e heart, God really glad!
11 Like the sacrifice wey Israel people do to thank God, we de use our worship de show how we feel about Jehovah. We de give Jehovah our best, no be so? Why we de do-am? Na because we love Jehovah with all our heart. Na this strong love de make us worship God from our heart and really love the way e de do things. So as Jehovah de receive worship from e servants for the whole world, we dey sure say e de really glad! Make we remember say, Jehovah de see wetin we de do and e like-am. But no be only that one. E still de see the reason why we de do this things and e like-am too. This one de give us comfort. For example, if you don old and you no de fit do the things wey you de do before, you fit dey sure say Jehovah understand. Maybe you de feel say you no fit do plenty things for Jehovah again. But, e de see say the strong love wey you get de make you do wetin you fit do. E de glad to accept your best.
Fine-Fine Things Wey You See for Bible
w12 5/15 22 ¶1-2
Question Wey Some People Don Ask
One person wey write psalms sing say: “The death of people wey hold Jehovah tight na really serious matter to-am.” (Ps. 116:15) Jehovah value the life of everybody wey de worship-am for the correct way. But, no be just the death of one servant of Jehovah this Psalms 116 de talk about.
So when person de give burial talk for one Christian wey die, e no go make sense to apply Psalms 116:15 when e de talk about the person, even if the person hold Jehovah tight before e die. Why? Na because the meaning of wetin dey that psalms really wide. E mean say God de count the death of the whole group of people wey hold-am tight as something wey really de serious for-am to let-am happen.—See Psalm 72:14; 116:8.
DECEMBER 9-15
FINE-FINE LESSON FROM BIBLE PSALM 119:1-56
“How Young Man Fit Keep E Way Clean?”
w87 11/1 18 ¶10
You Dey Clean for Everything Wey You De Do?
10 For Ephesians 5:5 Paul warn say: “Una know this one, and una understand-am well say, nobody wey de put hand for sex wey no clean, or person wey de do things wey no clean, or person wey get long throat wey mean to worship idols, go get any share for the Kingdom of Christ and God.” Even with that one, every year them de reprove or disfellowship plenty brothers or sisters because them de put hand for sex wey no clean—‘them de sin against their body.’ (1 Corinthians 6:18) Sometimes, this one de happen because them no “de do things as [God] word talk.” (Psalms 119:9) For example, many brothers no de dey careful again when them dey vacation from work. Them no de remember to do things wey de help them near Jehovah again and them de make friends with other people wey no de serve Jehovah wey still dey vacation like them. Because some Christians de think for their mind say ‘this people really nice,’ them don join them for some kind things wey no clean wey them de do. For the same way, other people don become tight friends with people wey them de work with. Na so one elder come dey too close to one woman wey de work for-am sotey the elder abandon e family, and e come go de stay with the woman! Them come disfellowship-am. Bible no de lie when e talk say, “Bad friends de spoil better character”!—1 Corinthians 15:33.
w06 6/15 25
“I Really Love the Things Wey You De Remind Me”
JEHOVAH de give im people better advice wey de help them to fit handle this hard times wey them de face. We de see some of this advice when we de do our Bible reading. We fit still see other advice from comments wey people make for meeting or other things wey we de hear for meeting. Many of this things wey we de read or hear about no dey new to us. E fit be say we don hear or read about them before. But since we fit forget things, we need to continue to remind ourself about the things wey Jehovah get for mind, im laws, and things wey e want make we do. Make we value this things wey God de remind us. Them de make us strong again as them de help us put mind for the better-better things wey make us decide to follow Jehovah way. Na this one make the person wey write Psalms 119:24 sing say: “I really love the things wey you de remind me.”
w10 4/15 20 ¶2
Comot Your Eyes From Useless Things!
2 The kind things wey we de look fit still cause problem for us. The connection between our eyes and our mind really strong sotey things wey we see fit start something for our mind, or make us really want get wetin our heart want. And because na Satan de control this world, plenty pictures and different-different things wey fit deceive us full everywhere—even if na small we just look them. (1 John 5:19) No wonder the person wey write this psalm beg God say: “Make my eyes no see things wey dey useless. Keep me for your ways make I continue de live.”—Ps. 119:37.
Fine-Fine Things Wey You See for Bible
w05 4/15 10 ¶2
Trust Jehovah Word
2 One main point wey Psalm 119 de talk about na the value wey God word or message get. E fit be say for the psalm to dey easy to remember, the person wey write the song arrange-am for style wey them de call alphabetic style (from a-z). Na Hebrew alphabet them use write the 176 verses wey dey this psalm. For the original Hebrew alphabet, each of the 22 stanza wey dey this psalm get 8 lines wey start with the same letter. This psalm de talk about God word, im law, advice, ways, commandments, judgement, and wetin e talk. For this article and the one wey go follow-am, we go discuss Psalm 119, and e go dey in line with the correct translation of the Hebrew Bible. When we de think about the experience of Jehovah servant wey live that time and wey de live for this our time, make e de move us to value this better song more-more and make us de thank Jehovah more-more for im Word wey be Bible.
DECEMBER 16-22
FINE-FINE LESSON FROM BIBLE PSALM 119:57-120
How to Endure When People De Against Us
w06 6/15 20 ¶2
“I Really Like Your Law!”
2 E go good to ask say, “How God law take be wetin de comfort the person wey write this psalm?” Wetin really help-am na the trust wey e get say Jehovah value-am. Because the person wey write this psalm really know the better-better things wey dey that law, e make-am happy even though say the people wey dey against-am de cause trouble for-am. E come see say Jehovah really de treat-am well. And as e de do the things wey dey God law, e make-am get sense pass im enemies and e even save im life. To de obey the law make-am get peace and clean conscience.—Psalm 119:1, 9, 65, 93, 98, 165.
w00 12/1 14 ¶3
You Really Love the Things Wey Jehovah De Remind You?
3 The person wey write this psalm really like the things wey God de remind-am, na im make-am sing say: “I de quick and I no de waste time to follow your commandments. The ropes of wicked people surround me, but I no de forget your law.” (Psalms 119:60, 61) Na the things wey Jehovah de remind us de help us endure when people de suffer us, because we trust say our Papa for heaven fit cut the rope wey our enemies take tie us to hold us down. E de free us from this kind problem so that we fit continue to do our preaching work.—Mark 13:10.
w06 9/1 14 ¶4
Lessons From Book Five of Psalms
119:71—Any good thing de come out when person de suffer? Hardship de teach us how to really depend on Jehovah, to pray to-am more-more, to study Bible more-more and do wetin e talk. But the way we de react when we face hardship fit show us the kind character wey we get wey we need to correct. Suffer no go make us become bad person if we allow-am to train us.
w17.07 13 ¶3, 5
“Cry With People Wey De Cry”
3 E dey clear say na Jehovah wey de pity person be the number one person wey de make our mind come down. (Read 2 Corinthians 1:3, 4.) Jehovah wey really know how our problem de do us for body, promise im people say: “Na me be the person wey de comfort [una].”—Isa. 51:12; Ps. 119:50, 52, 76.
5 We no de shake because we trust say Jehovah go help us. So, e good make we de tell Jehovah everything about the problem wey we de face for prayer. E really de make our mind come down to know say Jehovah understand our pain and e de give us the comfort wey we need! But how e take de do-am?
Fine-Fine Things Wey You See for Bible
w06 9/1 14 ¶5
Lessons From Book Five of Psalms
119:96—Wetin this verse mean when e say “anything wey dey perfect still get limit”? The person wey write this psalm de talk about wetin human being de see as perfect. E fit be say e de think for im mind say anything wey dey perfect for human being eye still get limit. But God commandment no get limit at all. The commandments de guide us for everything for our life. The New International Version talk say: ‘For everything wey dey perfect I don see limit, but your command no get limit.’
DECEMBER 23-29
FINE-FINE LESSON FROM BIBLE PSALM 119:121-176
How We Fit Run From Problem Wey Fit Make Us Sad
w18.06 17 ¶5-6
Train Your Conscience With Laws and ‘Advice From’ Bible
5 If we want make laws for Bible help us, we no go only read, or know them. But our love for the laws go de grow, and we go follow them. Bible talk say: “Hate bad thing and like good thing.” (Amos 5:15) But wetin go help us do that one? We go need to learn how to see things the way God de see them. For example, maybe you no de fit get better sleep. Then doctor tell you say make you de chop good food, de do exercise, and change some things for your life. When you follow the thing wey the doctor talk, you see say e work. You no go dey happy say the doctor help you?
6 Na so e still be with the laws wey God don give us. This laws de protect us so that sin no go put us for trouble. And e de help us live better life. For example, Bible talk say make we no de lie, de cheat, de thief, de put hand for sex matter wey God hate, de fight, and de put hand for things about demons. (Read Proverbs 6:16-19; Rev. 21:8) Na we de gain when we follow wetin Bible talk. And when we see the gain, our love for Jehovah and e law go strong pass as e dey before.
w93 4/15 17 ¶12
Young People—Wetin Be Your Goal?
12 Wetin dey important pass be say, you must learn to hate wetin bad and run from-am. (Psalm 97:10) How you fit hate something wey you be like or de enjoy before? Na when you think about wetin that thing fit cause! “Make una no deceive unaself: God no be person wey them fit fool. Anything wey person de plant na wetin e go still harvest. Because the person wey de follow wetin im body want go get death from im body, but the person wey de follow wetin the spirit want, go get life wey no go end from the spirit.” (Galatians 6:7, 8) When body de push us to do wetin body want, think about how this one go make Jehovah feel. (Compare Psalm 78:41.) Still think-am say you fit carry belle wey you no want, or carry sickness like AIDS. Still think about how e go destroy your happiness and bring shame to you. Another thing be say e fit cause problem wey fit affect you for the rest of your life. One woman wey be Christian talk say: “Before me and my husband meet each other, we don de put hand for sex wey no clean. Even though say two of us don be Christian now, the kind life wey we live before de always cause quarrel and jealousy for our marriage.” Another thing wey you no go forget na say, e fit affect your privilege for congregation or even make them disfellowship you! (1 Corinthians 5:9-13) E make any sense to put hand for enjoyment wey no go last, but wey go cause plenty pain?
Fine-Fine Things Wey You See for Bible
Wetin Go Help You Really Dey Sure Say the Word of God “Na True”?
2 All servants of Jehovah believe with all their heart say Jehovah na “the God of truth” and say na better thing e get for mind for us. (Ps. 31:5; Isa. 48:17) We know say we fit trust wetin we read for Bible and say, “everything wey [God] talk na true.” (Read Psalm 119:160.) One professor wey de talk about Bible talk say: “Everything wey God talk na true. All of them go happen as e talk-am. So, servants of God fit trust wetin e talk because they trust the God wey talk-am.” We really agree with wetin this professor talk.
DECEMBER 30–JANUARY 5
FINE-FINE LESSON FROM BIBLE PSALMS 120-126
Them Plant With Tears, But Really Happy When Them De Harvest
w04 6/1 16 ¶10
People Wey De Give God Glory Go Get Blessing
10 When we decide to become servant of Jehovah, we de fight against Satan. James 4:7 promise say if “una stand against Devil, . . . e go run comot from where una dey.” This place no de tell us say e dey easy to do this one. To fit serve God, we really need to work hard. (Luke 13:24) But Bible make this promise for Psalm 126:5 say: “People wey de plant seed with tears go shout with joy when them de harvest.” Yes, the God wey we de worship no be the one wey no de value wetin we de do. E “de reward people wey de use all their heart de look for-am,” and e de bless people wey de give-am glory.—Hebrews 11:6.
Your Faith Go Fit Help You Face the Things Wey Go Soon Happen?
17 You still de struggle with the pain of your person wey die? Take time read story of people wey them resurrect for Bible. This one go make your faith strong. You de feel bad because they disfellowship your family member? Study Bible so that you go dey sure for your mind say Jehovah de always discipline e people for the correct way. No matter the problem wey you de face, use-am as chance to make your faith strong. Pray to Jehovah and tell-am how you de feel. No ever separate yourself from brothers and sisters for congregation. (Prov. 18:1) De do things wey go help you endure, even if you de cry when you remember wetin happen to you. (Ps. 126:5, 6) Continue to de go meeting, preaching, and de read Bible. And continue to think about the wonderful blessings wey Jehovah go give you for future. As you de see the way Jehovah de help you now, your faith go de grow and e go strong pass before.
w01 7/15 18-19 ¶13-14
Do Your Best for the Harvest Work!
13 Wetin dey Psalm 126:5, 6 de really make the mind of God servants wey dey do this harvest work come down, especially people wey them de suffer because of their faith. E say: “People wey de plant seed with tears, go shout with joy when them de harvest. Person wey comot, even if e de cry, de carry e bag of seed, go come back de shout with joy, de carry e load come.” When the person wey write this psalm de talk about to plant seed and to harvest, e de show the way Jehovah bless and care for im people wey come back from Babylon. Them really happy as them free them from Babylon, but them fit don cry as them de try to plant for the ground wey them don abandon for the 70 years wey them dey Babylon. Even with that one, people wey still continue to plant and join for the building work enjoy plenty blessing and them really gain.
14 We fit cry when we de face problem, or when them de suffer us or any of our brothers and sisters because we de serve Jehovah. (1 Peter 3:14) As we de do this harvest work, e fit no easy for us because e fit be like say we no de get any result as we de preach. But if we continue to plant and water-am, God go make things grow. And many times, e dey do-am for way wey big pass wetin we expect. (1 Corinthians 3:6) And the plenty number of Bible and publication wey we don give out de show this one.
Fine-Fine Things Wey You See for Bible
cl 73 ¶15
Power to Protect—“Na God De Protect Us”
15 First think about how we de get protection. As people wey de worship Jehovah, we fit expect say e go protect all of us together. If not, e go dey easy for Satan to attack us. Just think-am: Nothing go sweet Satan “wey de rule this world,” pass say make e remove anything wey concern true worship. (John 12:31; Revelation 12:17) Some government people wey get power well-well don ban our preaching work and them don try to remove us kpatakpata. But Jehovah people no shake, and them no stop to de preach! Why different-different nation wey get power well-well never fit stop the work wey this small group of Christians de do, even when e be like say this small group no get power to fight back? Because Jehovah de use e powerful wings de protect us!—Psalm 17:7, 8.