How We fit Help After Disaster Happen

Natural disaster de happen well-well now pass before. When e happen, them go really need to organize the work wey they go do to help people wey the disaster affect well. Because of this one, the Governing Body don arrange make all branch office get Disaster Relief Department.

When the brothers for this department hear say disaster happen, them go quick-quick call the elders wey dey the area to know which kind help the publishers go need. If the things wey the disaster damage pass wetin the publishers fit handle, branch go send brothers wey qualify to direct the work, make them go help for where the disaster for happen. The brothers fit ask for volunteers wey go work or ask people to donate some particular things, or them fit buy and share things give people wey the disaster affect.

Many reason dey why e good to handle the matter like this. E fit help us make we no do double work, make confusion no dey, and we no go waste money and materials. This kind things fit happen when brothers do things their own way.

The brothers wey branch office appoint fit decide the amount of money and the number of people wey them go need for the work. They fit still decide to meet government people wey dey the area wey the disaster for happen wey go fit help so that the work go fit move fast. So abeg, no start to collect money from people or send things give people wey the disaster affect by yourself, and no travel go the area unless them say make you go.

Even with that one, e de hungry us to help when disaster happen. (Heb 13:16) We really love our brothers! So wetin we fit do? The most important thing na to pray for the people wey the disaster affect and for the people wey de help them. We fit still donate money to the worldwide work. Since na Governing Body de direct the branch office, na the branch office go fit really know the best way to use the money and where they go really need-am. And if you go like to join for the work, make you fill the form Local Design/Construction Volunteer Application (DC-50).

WATCH THE VIDEO FLOOD WEY REALLY SPOIL THINGS FOR BRAZIL, AND AFTER, MAKE WUNA ANSWER THIS QUESTIONS:

Wetin really sweet you for the way Jehovah Witness people work to help people after the flood wey happen for Brazil for the year 2020?