Dey Calm and Trust Jehovah

1. Like King David, which question some of us fit ask?

ALL of us want get peace for our life. Nobody like worry-worry. But sometimes, some things de make us worry. Because of this one, we de ask the same question wey King David ask Jehovah, say: “How long things go continue to worry me with serious pain for my heart every day?”​—Ps. 13:2.

2. Wetin we go talk about for this article?

² Na true say, all of us de worry sometimes. But things dey wey we fit do so that we no go de worry too much. For this article, we go first talk about some things wey fit make us de worry. Then we go talk about six things wey we fit do wey go help us dey calm when we de face problems.

WETIN FIT MAKE US DE WORRY?

3. Which things fit make us de worry, and we fit stop-am?

³ Plenty things fit make us de worry, and we no fit stop some of this things make they no happen. For example, we no go fit stop the price of things like food, clothes, or house rent make e no increase every year. And we no go fit control the number of times wey our workmate or schoolmate go try to tempt us make we lie or do things about sex. And we no go fit stop people make they no do things like to thief or kill people for our area. We de face all this problems because many people no de allow Bible guide them for the things wey them de decide. Another thing be say, Satan wey be the god of this world, know say some people go allow “the worry-worry for this world” to make them no serve Jehovah. (Matt. 13:22; 1 John 5:19) We no surprise say, the world get plenty problem wey de make people de over worry!

4. Wetin fit happen to us if we de over worry about our problems?

⁴ We fit worry about our problem sotey we no go fit think about any other thing. For example, we fit de worry say we no go get enough money to buy the things wey we need, or say we go sick and we no go fit go work or they go even sack us. We fit still de worry say we go do wetin Bible condemn when we face temptation. Small time, Satan go make people wey e de control to attack servants of God. So we fit de worry about wetin we go do when this people attack us. We fit de think for our mind say, ‘Na bad thing for me to worry about this kind things?’

5. Wetin Jesus mean when e talk say: “Make wuna no de worry”?

⁵ We know say Jesus tell e disciples say: “Make wuna no de worry.” (Matt. 6:25) Jesus mean say make we no worry at all? No! After all, some people wey serve Jehovah well for Bible time still worry about some things. But Jehovah no vex for them.b (1 Ki. 19:4; Ps. 6:3) Jesus de comfort us with wetin e talk. E no want make we over worry about the things wey we need sotey our service to Jehovah no go be the number one thing for our life. So wetin we fit do when something start to worry us?​—Check the box “How to Do-am.”

SIX THINGS WEY GO HELP US DEY CALM

6. As e dey for Philippians 4: 6, 7, wetin fit make us dey calm?

⁶ (1) De always pray. When we de worry about something, we fit pray to Jehovah make e help us. (1 Pet. 5:7) Jehovah fit answer your prayer when e give you “the peace wey [e] de give . . . This peace pass anything wey person fit understand.” (Read Philippians 4:​6, 7.) Jehovah go use e powerful holy spirit to make you get that peace.​—Gal. 5:22.

7. Wetin we suppose to remember when we de pray to God?

⁷ When you de pray to Jehovah, make you tell Jehovah how you de really feel. Tell Jehovah the problem, and explain how you de feel about the problem. If the problem get solution, tell God make e give you the sense to know the thing and to do-am. If you no get anything wey you fit do to solve the problem, tell Jehovah to help you make you no over worry about-am. When you de tell Jehovah the problem, as time de go, you go de see-am clear the way Jehovah de answer your prayer. If the answer no come quick-quick after you don pray, make you no stop to pray. Jehovah no only want make you talk wetin the problem be, but e still want make you continue to pray about the problem.​—Luke 11:8-10.

8. Wetin we suppose add for our prayer?

⁸ As you de tell Jehovah about all the things wey de worry you for heart, make sure say you remember to thank-am. E good make we de remember all the good things wey Jehovah don do for us, even when our condition really hard. But, wetin you suppose do if you no know how to tell Jehovah the way you de feel? Remember say Jehovah go answer your prayer, even if na only ‘Abeg, help me!’ you fit talk.​—2 Chron. 18:31; Rom. 8:⁠26.

9. Wetin we go do when we de fear?

⁹ (2) Trust the sense from Jehovah, instead of your own. For the time of prophet Isaiah, Judah people de fear say Assyria people go attack them. Judah people no want make Assyria people win them, so they tell Egypt people to help them. (Isa. 30:1, 2) Jehovah warn them say as they trust Egypt people, the result go too bad. (Isa. 30:7, 12, 13) Jehovah use Isaiah tell the people how they fit dey safe. The prophet talk say: “Wuna go dey strong if wuna dey calm and show say wuna trust [Jehovah].”​—Isa. 30:15b.

10. Wetin be some situation wey we fit use show say we trust Jehovah?

¹⁰ How we fit show say we trust Jehovah? Make we talk about some examples. Make we talk say they give you work wey go make you get more money, but you go need to use plenty extra hours for the work and e go make you no serve Jehovah well as you de do now. Or person for your workplace want date you, but the person never baptize as servant of Jehovah. Or think-am say your family member wey you love tell you say: “Whether na me or your God, choose one.” For each of this example, e go hard you to decide wetin to do, but for each of them Jehovah go help you know wetin you need to do. (Matt. 6:33; 10:37; 1 Cor. 7:39) The question be say, You go trust Jehovah and obey wetin e want make you do?

11. Which story them for Bible we fit study so that we go dey calm when people de give us trouble?

¹¹ (3) Learn from good examples and bad ones. Plenty story for Bible show say e really dey important make we dey calm and trust Jehovah. As you de study about all this story for Bible, make you think about wetin help servants of God to dey calm when other people de give them serious trouble. For example, when the high court for Jew people command the apostles make they stop to preach, they no fear. Instead, they talk with strong heart say: “Na God we must obey as ruler, no be people.” (Acts 5:29) Even after they flog the apostles, they no still fear. Why? Because they know say Jehovah dey their side. Jehovah dey happy with them. So, they continue to preach the good news. (Acts 5:40-42) For the same way, when they want kill the disciple wey e name na Stephen, e dey calm sotey e face “be like the face of angel.” (Acts 6:12-15) Why? Because e really dey sure say Jehovah dey happy with-am.

12. As e dey for 1 Peter 3:14 and 4:14, why we fit dey happy when people de suffer us?

¹² The apostles really see wetin make them believe say Jehovah dey with them. God give them the power to do miracles. (Acts 5:​12-16; 6:8) But no be so e be with us today. Even with that one, Jehovah make us know for Bible say when we de suffer because we de do the correct thing, e dey happy with us and e spirit dey with us. (Read 1 Peter 3:14; 4:14.) So make we no worry ourself about wetin we go do if people begin suffer us for future. Instead, make we do our best now to get full trust more-more for Jehovah say e fit support and save us. Just as the disciples for Bible time do, we must trust the thing wey Jesus promise when e say: “I go give wuna wetin wuna go talk and the sense wey go make all the people wey dey against wuna no fit argue or talk anything.” Jesus give us hope when e talk say: “Na when wuna endure, wuna go save wuna life.” (Luke 21:12-19) And make you no forget say, Jehovah de always remember things about e servants wey serve-am well till they die, no matter how the thing small reach. And with this things wey Jehovah know, e go bring them back to life.

13. How we fit gain when we study example of people wey no dey calm and trust Jehovah?

¹³ We fit still learn from wetin happen to people wey no dey calm and trust Jehovah. When we study the bad example of this people, e go help us make we no do the same mistake wey they do. For example, when plenty army come attack King Asa of Judah, e trust Jehovah and Jehovah help-am win. (2 Chron. 14:9-12) After, King Baasha for Israel come attack Asa with small army. But this time, Asa no trust Jehovah to save-am, as e don do before. Instead, e pay Syria people to help-am. (2 Chron. 16:1-3) And near the end of e life, when e get one serious sickness, e no trust Jehovah to help-am.​—2 Chron. 16:12.

14. Wetin we fit learn from the mistakes wey Asa make?

¹⁴ Asa first trust Jehovah to save-am when e get problems. But after, e no trust Jehovah to help-am. Instead, e try to solve the problem by e self. If person first look the matter, the plan wey Asa get to tell Syria people make they help-am fight Israel people fit be like wetin dey good. But Judah peace no last. Jehovah use one prophet tell Asa say: “Because you trust the king of Syria and you no trust Jehovah your God, the army wey the king of Syria get don escape from your hand.” (2 Chron. 16:7) We must dey careful make we no think say we fit handle our problem by ourself and fail to beg Jehovah to use e Word help us. Even if e be say we must make decision quick-quick, make we dey calm and trust Jehovah. E go help us make the right decision.

15. Wetin we fit do when we de read Bible?

¹⁵ (4) Cram Bible verse them. When you see Bible verse wey show say e really dey important to dey calm and trust Jehovah, make you try cram-am. Wetin fit help you na when you read the Bible verse them loud or you write them down and check them again plenty times. Jehovah command Joshua make e de always read the book of the Law and think about wetin e read so that e go fit do things with sense. The things wey e read for the Law go still help-am make e no fear because of the situation wey e go face. (Josh. 1:8, 9) Plenty verse them for Bible fit help you make you dey calm and get peace of mind for situation wey fit make you de worry or fear normally.​—Ps. 27:1-3; Prov. 3:25, 26.

16. How Jehovah de use congregation to help us dey calm and trust-am?

¹⁶ (5) Spend time with brothers and sisters. Jehovah de use our brothers and sisters to help us dey calm and trust-am. For our meeting, we de benefit from the different-different talk wey we de hear, the comment wey people de give, and better word wey our brothers and sisters de use encourage us when we de talk with them. (Heb. 10:24, 25) We fit still get better encouragement when we tell our close friends for congregation about the things wey we de worry about. “Good word” wey better friend tell us fit help us make we no de worry too much.​—Prov. 12:25.

17. As e dey for Hebrews 6:19, how our Kingdom hope fit help us dey calm even with hard condition wey we de face?

¹⁷ (6) Continue to get strong hope. Our Kingdom hope “be like anchor [for ship].” This hope “de hold our life.” E de make us balance well even when we de face hard condition or when things de worry us for mind. (Read Hebrews 6:19.) Think about the better future wey Jehovah don promise us wey worry-worry no go dey again. (Isa. 65:17) Just think-am say you de live for Paradise wey peace dey, and bad things no de happen again. (Mic. 4:4) Your hope go still de strong more-more as you de tell people about Paradise. Do everything wey you fit do to preach and make disciples. If you do like that, you go fit “really dey sure of the hope go reach the end.”​—Heb. 6:11.

18. Which things we fit face for future, and how we fit face them well?

¹⁸ As this wicked world de end small-small, we go face more problems wey go cause worry-worry. Our yeartext for 2021 fit help us face this problems and dey calm because we trust Jehovah, and no be because of our own power. As the year de go, make we de do things wey show say we get faith for wetin Jehovah promise, when e say: “Wuna go dey strong if wuna dey calm and show say wuna trust me.”​—Isa. 30:15.