Question Wey Some People Don Ask
Wetin dey for Jehovah “mind” wey e go put for the heart of the governments for this world to do very soon?
Revelation 17:16, 17 talk wetin go happen when great tribulation want start. E talk say: “The ten horns wey you see and the big wicked animal go hate the prostitute and them go collect everything wey e get and naked-am and them go chop im body and them go use fire burn-am kpatakpata. Because God put-am for their heart to do wetin dey im mind, yes, to do the one thing wey them get for mind wey be, to give their kingdom to the big wicked animal.” Our publications don talk before say the thing wey Jehovah go put for the mind of governments for this world na to destroy all lie-lie religion.
But we need to adjust wetin we understand before. Wetin dey the “mind” of Jehovah wey e go put for the heart of the governments of this world, na for them “to give their kingdom to the big wicked animal.” To fit understand how this one go happen, make we answer this questions.
Wetin the prostitute, the big wicked animal, and the ten horns stand for? Another name wey Bible call “the prostitute” na “Babylon the Great,” and e stand for all lie-lie religion for this world. “The big wicked animal” na United Nations. Them first start this organization for 1919 to bring peace for the world and them de call-am League of Nations that time. (Rev. 17:3-5) “The ten horns” stand for all the governments for this world wey de support “the big wicked animal.”
Which kind friendship dey between the prostitute and the big wicked animal? The prostitute “sitdown ontop” the big wicked animal. This one mean say the prostitute de support the big wicked animal and de try make-am fit do wetin e want.
Wetin go happen to the prostitute? The big wicked animal and the ten horns wey de support-am “go hate the prostitute” sotey them go take everything wey the prostitute get and show everybody say the prostitute really dey wicked. And them go destroy the prostitute kpatakpata as Jehovah don talk. (Rev. 17:1; 18:8) Na so all the lie-lie religion for this world go take end. But before this one go happen, Jehovah go make the governments for this world to do something wey never happen before.
Wetin Jehovah go make the governments for this world to do? E go put-am for their heart to do wetin dey “im mind” wey be to “give their power and authority to the big wicked animal.” As we don talk before, this wicked animal na United Nations. (Rev. 17:13) Wetin this one mean? E mean say no be the governments go just decide on their own to give their power and authority to the big wicked animal. The prophecy show say na Jehovah go make them do this one. (Prov. 21:1; compare Isaiah 44:28.) The governments go de give their power to the big wicked animal small-small? No! E go happen at once. Then, the big wicked animal wey be United Nations go destroy all lie-lie religion for this world kpatakpata.
So wetin we fit expect say go happen for future? Make we no expect to hear for news say governments don de give more support to United Nations small-small. But we fit expect say Jehovah go make the governments to give their power to the big wicked animal wey be United Nations, and this one go happen quick-quick. When this one happen, we go know say great tribulation go soon start. But as we de wait for that time, “make we dey awake and make our mind dey clear” because plenty things go soon change!—1 Thess. 5:6.