Which Time God Start to Create Everything for Heaven and Earth?

How Bible answer?

Bible no talk the time wey God start to create everything for heaven and earth or the time wey e spend to finish the work. Wetin e talk na say: “For the beginning, God make heaven and earth.” (Genesis 1:1) Bible no talk the time wey “the beginning” start. But the way the book of Genesis arrange how things happen, e show say the beginning na before the six periods, or “days,” wey God use to create things.

The six days wey God use to create things na normal 24 hours day?

No. For Bible, the word “day” fit mean different period of time, e depend on the thing wey that verse de talk about. For example, for one verse for Bible, when e de describe the whole six days wey God use create everything for heaven and earth, e talk say na one day.—Genesis 2:4.

Wetin happen for the six days of creation?

That time, the earth “just dey like that, e dey empty,” but God change-am to place wey people fit live for inside. (Genesis 1:2) E come make things wey get life. Bible talk about six group of things wey happen for the days wey God de create things.

Day 1: God make light shine for the earth. Na since that time night and day don dey.—Genesis 1:3-5.
Day 2: God separate the water so that big space go dey between the water wey go dey for up and the one wey go dey for the earth.—Genesis 1:6-8.
Day 3: God make dry land appear. E still make grass and plant grow from ground.—Genesis 1:9-13.
Day 4: God make the sun, moon, and stars so that e fit dey clear to see-am from the earth.—Genesis 1:14-19.
Day 5: God make plenty things wey de live inside water and the ones wey de fly for sky.—Genesis 1:20-23.
Day 6: God make animals wey de live for land and e make man and woman.—Genesis 1:24-31.

For the end of the six days, God rest from the work wey e don de do, e stop to make things.—Genesis 2:1, 2.

The story of creation for the book of Genesis agree with science?

The story of creation for Bible no talk plenty explanation wey science de use. But e describe the way God create things for simple way wey even person for Bible time go fit understand how things happen. The story of creation for Bible no dey against the correct things wey science don succeed to prove. Robert Jastrow na expert for science matter about stars and planets (astrophysicist). E talk say: “The way the book of Genesis talk the story dey different, but the important things for creation wey Bible talk about na the same thing wey people wey de study stars and planets talk. The things wey happen before people start to live just appear, and e get particular time wey everything start.”

Which time God create sun, moon and stars?

The sun, moon, and stars don already dey as part of “the heavens” wey God create for “the beginning.” (Genesis 1:1) But, e clear say their light no shine reach the earth because cloud cover everywhere. (Genesis 1:2) So even though say light show for earth for the first day, you no fit know where the light de come from. For the fourth day, the cloud don clear. If person be de watch from the earth, Bible describe how e go be. E talk say the sun, moon and stars come start to “shine ontop the earth.”—Genesis 1:17.

Wetin Bible talk about how old the earth be?

Bible no talk anything about the age of the earth. The only thing wey Genesis 1:1 talk na say everything for heaven and for earth, get beginning. This one agree with the correct things wey science don prove and wetin they don talk about how old the earth fit be..