Who Be John the Baptist?

The answer wey Bible give

John the Baptist na prophet of God. (Luke 1:76) Them born-am before them born Jesus. God give-am work to prepare way for the Messiah, or Christ. John do this one as e preach God message to Jew people to help them come serve God again.—Mark 1:1-4; Luke 1:13, 16, 17.

The message wey John preach go help people wey get better mind to fit know say na Jesus wey come from Nazareth be the Messiah wey de come. (Matthew 11:10) John advice people wey de listen to-am say make them repent from their sin and make them baptize to show say them don repent. (Luke 3:3-6) Because e baptize many people, them de call-am John the Baptist or John the Baptizer. For all the people wey John baptize na Jesus own important pass.a—Mark 1:9.

For this article

• Wetin make John the Baptist special?

• Who be John the Baptist papa and mama?

• Who make them kill John the Baptist?

• John the Baptist and Jesus de do competition?

• How many men wey their name na John dey for Bible?

Wetin make John the Baptist special?

Them talk the work wey e go do: As e preach, John make wetin Bible don talk about Jehovah messenger happen. (Malachi 3:1; Matthew 3:1-3) John do im work “so that the people wey e go ready for Jehovah, go be people wey don prepare”—that one mean say e help Jew people to accept the message about Jesus wey be the person wey de represent God.—Luke 1:17.

The kind life wey e live: Jesus talk say “e no get anybody wey big pass John the Baptist, but the person wey small pass for the Kingdom wey dey heaven, big pass-am.” (Matthew 11:11) Because John no be only prophet but e still be the “messenger” wey them don talk about, e no get any servant of God wey dey before-am wey high pass-am. Jesus still talk say John no go dey for the Kingdom wey dey heaven.b This prophet wey dey faithful die before Jesus Christ make-am possible for people to go heaven. (Hebrews 10:19, 20) Even with that one, John go dey among the people wey go live for this earth when God Kingdom de rule and e go live forever for Paradise.—Psalm 37:29; Luke 23:43.

Who be John the Baptist papa and mama?

John papa and mama na husband and wife wey their name na Zechariah and Elizabeth. Zechariah na Jew person and na priest e be. Na miracle them take born John, because im mama no fit get belle, or no fit born pikin. No be only that one Elizabeth and Zechariah “don old.”—Luke 1:5-7, 13.

Who make them kill John the Baptist?

King Herod Antipas send people to cut John head. Na because of im wife Herodias e do-am. Herodias hate John because John be don tell Herod say, as Herod marry Herodias e no dey correct for Jew people law and Herod de claim say im be Jew person.—Matthew 14:1-12; Mark 6:16-19.

John the Baptist and Jesus de do competition?

Nothing dey for Bible wey support this kind idea. (John 3:25-30) The truth be say John talk-am for public say im work na to prepare the way for the Messiah, no be to do competition with-am. John talk say: “I de use water baptize people. . . to make Israel know-am. John still talk say: “Na the Son of God be this..” (John 1:26-34) So John really happy to hear say Jesus succeed for im ministry.