Truth Still Dey Important Today?

You think say e de hard more-more to separate truth and lie? Instead make people de allow the truth and wetin correct control them, na how them de feel and wetin them think them de follow pass. For the whole world today, many people no believe say truth dey.

No be today people don de think like that. 2,000 years ago, Pontius Pilate wey be Governor for Rome that time use style ask Jesus say: “Wetin be truth?” (John 18:38) Even though say Pilate no wait for Jesus answer, im question dey important. For this world wey people no fit separate truth from lie, Bible fit help us know wetin truth be.

Truth really dey?

Yes. When the Bible de talk about “truth”, e de talk about wetin correct and wetin good. E de teach us say all truth de come from Jehovaha God, and e call-am “the God of truth.” (Psalm 31:5) Na truth from God dey inside Bible, and Bible talk say that truth be like light, and e de guide us so that nothing for this world today go confuse us.​—Psalm 43:3; John 17:17.

How you fit know the truth?

God no want make we accept the truth just because e dey Bible. But, e want make we de use the way we de reason check-am well instead of to de follow the way we de feel. (Romans 12:1) God want make we know-am and love-am with ‘all our mind,” and e de encourage us to check whether wetin we de learn from Bible na really true.​—Matthew 22:37, 38; Acts 17:11.

Where lie-lie come from?

Bible tell us say na Satan the Devil wey be God enemy first start to lie, and Bible call-am “the papa of lie.” (John 8:44) E tell Adam and Eve lie about God. (Genesis 3:1-6, 13, 17-19; 5:5) And since that time, Satan don continue to de lie and no want make people know the truth about God.​—Revelation 12:9.

Why lie-lie full everywhere today?

For this our time wey Bible call “last days,” Satan de decieve people well-well pass before. E de easy to see how people de use lie-lie deceive other people just to get something from them. (2 Timothy 3:1, 13) Lie-lie still full many religion today. Wetin Bible talk about this our time show say people “go find teachers for theirself wey go tell them wetin go sweet them for ear,” and them “go stop to listen to the truth.”​—2 Timothy 4:3, 4.

Why truth dey important?

People de trust each other when them de talk true among theirself. But when them no trust each other, things no go go well. Bible talk say God want make we de follow the truth as we de worship-am. E talk say: “The people wey de worship [God] must worship-am with spirit and truth.” (John 4:24) If you want learn how the truth from Bible fit help you know the lie-lie wey religion de teach and wetin you fit do make them no control your life, read the articles under this topic “Lies That Make God Seem Unlovable.”

Why God want make I know the truth?

God want save you, but you need to learn the truth about-am for that one to happen. (1 Timothy 2:4) If you learn about wetin correct and wetin no correct for God eye and follow them, you go be im tight friend. (Psalm 15:1, 2) God send Jesus come earth to help people learn the truth. E want make we de listen to wetin Jesus de teach us.​—Matthew 17:5; John 18:37.

God go comot lie-lie for this world?

Yes. God hate-am when people use lie-lie deceive other people to get something from them. E don promise say e go destroy people wey continue to de talk lie. (Psalm 5:6) When God do that one, e go still do wetin e promise say: “Mouth wey de talk truth go last forever.”​—Proverbs 12:19.