Wetin Be Resurrection?

The answer wey Bible give

For Bible, the word wey they translate as “resurrection” come from the Greek word a·naʹsta·sis wey mean to “raise up” or to “stand up again.” When they resurrect person, they don raise that person up from death and give the person life make e dey as e dey before.—1 Corinthians 15:12, 13.

Even though say the word “resurrection” no dey for the Hebrew Scriptures wey people de call Old Testament, the promise of resurrection dey for that part of the Bible. For example, through the prophet Hosea, God promise say: “I go save them from the power of the Grave; I go bring them back from death.”—Hosea 13:14; Job 14:13-15; Isaiah 26:19; Daniel 12:2, 13.

Where the people go dey after they bring them back to life? Some people wey they go bring come back to life go rule as king with Jesus for heaven. (2 Corinthians 5:1; Revelation 5:9, 10) Bible call this resurrection “the first resurrection,” this one mean say another resurrection go happen. (Revelation 20:6; Philippians 3:11) People wey go come back to life for this other resurrection go live for this earth.—Psalm 37:29.

How they go bring people back to life? God don give Jesus power to bring dead people back to life. (John 11:25) Jesus go bring back to life “all the people wey dey inside grave wey God want remember.” They go be the same people as them be before they die and they go remember all the things wey they know before. (John 5:28, 29) Some people go come back to life and live for heaven, and other people go come back to life for this earth with strong body.—Isaiah 33:24; 35:5, 6; 1 Corinthians 15:42-44, 50.

Which people go come back to life? Bible talk say, “righteous people and people wey no dey righteous go come back to life.” (Acts 24:15) Some of this righteous people na, Noah, Sarah, and Abraham. (Genesis 6:9; Hebrews 11:11; James 2:21) People wey no dey righteous na people wey no obey God because they no know God.

But some people really wicked sotey they no fit change. So when this people die, they no go bring them come back to life.—Matthew 23:33; Hebrews 10:26, 27.

Which time they go bring dead people back to life? Bible talk say they go bring people wey de go heaven back to life when Christ dey around and this one start for 1914. (1 Corinthians 15:21-23) The time wey they go bring people back to life for this earth go be when Jesus Christ de rule this earth for one thousand years, that time, the earth go be paradise.—Luke 23:43; Revelation 20:6, 12, 13.

Why e make sense to believe say dead people go fit come back to life? Bible tell us about nine people wey they bring back to life, and people see each of this nine people wey come back to life. (1 Kings 17:17-24; 2 Kings 4:32-37; 13:20, 21; Luke 7:11-17; 8:40-56; John 11:38-44; Acts 9:36-42; Acts 20:7-12; 1 Corinthians 15:3-6) The resurrection of Lazarus really dey special because e reach for four days before Jesus bring-am back to life and Jesus do-am for front of plenty people. (John 11:39, 42) Even people wey hate Jesus no fit deny the miracle wey Jesus do, na this one make they plan to kill Jesus and Lazarus.—John 11:47, 53; 12:9-11.

God really want bring dead people back to life and e get the power to do-am. With the strong power wey God get, e fit remember everything about each person wey e want bring come back to life. (Job 37:23; Matthew 10:30; Luke 20:37, 38) God fit bring dead people to back to life, and e want do-am! When Bible de talk about how God go bring dead people back to life, e talk say: “You go really want see the thing wey your hand don make.”—Job 14:15.

Wrong ideas about resurrection

Wrong idea: The resurrection na when the soul and the body join together.

The truth: Bible de teach say soul na the whole person, no be something wey de comot from the body and continue to live when person die. (Genesis 2:7, footnote; Ezekiel 18:4) When they bring person back to life, they no de join the body with soul; instead God de make the person again to be living soul.

Wrong idea: Some people go come back to life, but just after them de bring them come back to life, they go destroy them.

The truth: Bible talk say “people wey don do bad go resurrect get judgement.” (John 5:29) But they go judge them because of the things wey them do after they bring them come back to life, no be the things wey they do before they die. Jesus talk say: “People wey don die go hear the voice of the Son of God, and people wey listen go get life.” (John 5:25) God go write the names of people for “the scroll of life,” if they ‘listen’ or obey the things wey they learn after they come back to life.—Revelation 20:12, 13.

Wrong idea: When they bring person back to life, they go give the person the same body wey e get before e die.

The truth: After person die, the body go don rotten.—Ecclesiastes 3:19, 20.