Isaiah 41:10—“No Fear, I Dey With You”

“No fear, I dey with you. No worry, I be your God. I go make you strong, yes I go help you. I go really hold you with my right hand wey de do wetin correct.”​—Isaiah 41:​10, New World Translation.

Wetin Isaiah 41:10 mean?

For this Bible verse, Jehovaha de remind people wey de worship-am well say e go help them no matter any problem wey them face.

“I dey with you.” Jehovah de use this word tell people wey de worship-am say them no need to fear because them no dey alone. Because e de see the problem wey them de face and because e de hear their prayer, e just be like say, e dey there with them when them de face the problem.​—Psalm 34:15; 1 Peter 3:12.

“I be your God.” No matter the problem wey Jehovah servants de face, Jehovah de use this word make their mind come down as e de remind them say e never stop to be their God, and say e still accept them as im worshippers. Them fit dey sure say e no get how their condition hard reach wey Jehovah no go fit do something to help them.​—Psalm 118:6; Romans 8:32; Hebrews 13:6.

“I go make you strong, yes I go help you. I go really hold you with my right hand wey de do wetin correct.” For this place, Jehovah repeat the same idea for three different ways to show say e go really help im servants. When Jehovah talk say e ‘go really hold im servants with im right hand,’ e de try help them imagine how e go help them when them need im help. If im servant fall, Jehovah fit use im right hand pull-am up.​—Isaiah 41:13.

One of the main thing wey God de use to help im people, na Bible. (Joshua 1:8; Hebrews 4:12) For example, Bible de give better advice wey fit help us when we de sick, when we de face money problem, or when person wey we love die. (Proverbs 2:​6, 7) God fit still use im holy spirit to help im servants to fit think well when them de face problem and to help them make the problem no overworry them for mind.​—Isaiah 40:29; Luke 11:13.

Things Wey Dey Around Isaiah 41:10

For Jew people wey worship Jehovah well, even though say them go later carry them go Babylon as slave, this Bible verse make their mind come down. Jehovah be don talk say near the time wey Jew people go comot from Babylon, them go hear story about one enemy nation wey go come fight Babylon and many nations wey near Babylon. (Isaiah 41:​2-4; 44:​1-4) When Babylon people and the other nations de fear because of wetin want happen, Jew people no need to fear because Jehovah go protect them. In fact, Jehovah tell them three times say make them “no fear.”​—Isaiah 41:​5, 6, 10, 13, 14.

The truth be say, when Jehovah talk wetin dey Isaiah 41:​10, na this Jew people wey them later carry as slave go Babylon e de talk to that time. But e make sure say them write this word for Bible to comfort people wey de worship-am for this our time. (Isaiah 40:8; Romans 15:4) Jehovah still de help im servants today just as e help im servants for Bible time.