Exodus
24 Then Jehovah tell Moses say: “Go up for the mountain, you and Aaron, Na′dab and A·bi′hu, and 70 of the elders for Israel, then stand far and bow down. 2 Make only you Moses come near Jehovah; but make the other men no come near, and make the rest of the people no follow you go up.”
3 Then Moses come, and tell the people all the things wey Jehovah don talk, and all the things wey e don decide, and all the people answer with one voice say: “All the things wey Jehovah don talk, we dey ready to do-am.” 4 So Moses write all the things wey Jehovah talk. Then e get up for early morning and for the down part of the mountain, e build one altar and 12 pillars wey stand for the 12 tribes of Israel. 5 After that one, e choose young men from Israel, and them give offerings wey them de burn and sacrifice bulls as peace sacrifice them to Jehovah. 6 Then Moses take half of the blood and put-am inside bowls, and e sprinkle the other half of the blood ontop the altar. 7 Then e take the book of the agreement and read-am loud to the people. And them talk say: “All the things wey Jehovah don talk, we dey ready to do-am and we go obey.” 8 So Moses take the blood and sprinkle-am ontop the people and talk say: “This one na the blood of the agreement wey Jehovah don make with una according to all this things wey una hear.”
9 Moses and Aaron, Na′dab and A·bi′hu, and 70 of the elders for Israel go up, 10 and them see the God of Israel. For under im leg something wey be like floor wey them make with sapphire stone dey there, and e de shine like the clear sky. 11 E no strike the men wey be leaders for Israel. Them see the true God for vision and them chop and drink.
12 So Jehovah tell Moses say: “Come meet me for up of the mountain and stay there. I go give you the stone slates wey get the law and the commandment wey I go write to tell them wetin them go do.” 13 So Moses and im servant Joshua start to go, and Moses go up for the mountain of the true God. 14 But e be don tell the elders say: “Make una wait for us for here until we come back come meet una. Aaron and Hur dey with una. Anybody wey get matter fit go meet them.” 15 Then Moses go ontop the mountain as the cloud cover the mountain.
16 Jehovah glory continue to dey ontop Mount Si′nai, and the cloud cover-am for six days. For the seventh day, e talk to Moses from the cloud. 17 For the people of Israel wey de look, Jehovah glory wey dey ontop the mountain just be like fire wey de burn something finish. 18 Then Moses enter inside the cloud and go up of the mountain. And Moses stay ontop the mountain for 40 days and 40 nights.