Leviticus

7 “‘This one na the law of the offering for the bad thing wey person do: Na something wey really dey holy. 2 Them go kill the offering for the bad thing wey person do for the place where them de kill the offerings wey them de burn, and make them sprinkle the blood for all the sides of the altar. 3 E go give all im fat together with the fat from the tail, the fat wey cover the intestines, 4 and the two kidneys with their fat wey near the waist. E go still remove the fat wey dey ontop the liver together with the kidneys. 5 The priest go burn them to make smoke comot from ontop the altar as offering wey them make with fire to Jehovah. This one na offering for the bad thing wey person do. 6 Every man among the priests go chop-am, and make them chop-am for holy place. Na something wey really dey holy. 7 The law about the sin offering still concern the offering for the bad thing wey person do; na the priest wey use-am do sacrifice for sin get-am.

8 “‘When the priest bring the offering wey them de burn for person, the skin of the offering wey them de burn wey the person give the priest go be for the priest.

9 “‘All the grain offering wey them bake for inside the oven or prepare for inside the pan or ontop the flat pan,* na the priest wey give the offering get-am. E go be im own. 10 But all the grain offering wey them mix with oil or wey dry go be for all the sons of Aaron. Each of them go get equal share.

11 “‘Now this one na the law of the peace sacrifice wey person fit give Jehovah: 12 If e give-am to show say e de tell God thank you, e go give the sacrifice wey them de use thank God together with bread wey no get yeast wey them mix with oil and wey get ring shape, wafers wey no get yeast and wey them put oil, and bread wey get ring shape wey them make with better flour,* wey them mix well and wey get enough oil. 13 E go give im offering together with bread wey get ring shape and wey yeast dey inside, and im peace sacrifice them wey be the sacrifice wey them de use thank God. 14 E go take from-am and bring one bread of each of the offering as holy part to Jehovah. Na the priest wey sprinkle the blood of the peace sacrifice them go get-am. 15 E go chop the flesh of im peace sacrifice them, wey be the sacrifice wey them de use thank God, for the day wey e give-am. Make e no ever keep any of-am till morning.

16 “‘If the sacrifice wey e give as offering na promise or na offering wey person de give from im heart, them go chop-am that day wey e give im sacrifice, and them go fit still chop wetin remain from-am the next day. 17 But anything wey remain from the flesh of the sacrifice reach the third day, make them burn-am with fire. 18 But if them chop any of the flesh of im peace sacrifice for the third day, God no go accept the person wey give-am. E no go get any gain from that one. Na something wey really bad, and the person* wey chop some of-am go answer for im sin. 19 Una no go chop flesh wey touch anything wey no clean, una go burn-am with fire. Everybody wey clean fit chop the clean flesh.

20 “‘But anybody* wey no clean and chop the flesh of the peace sacrifice wey be Jehovah own, una must kill* that person* comot from im people. 21 If person* touch anything wey no clean, whether na something wey no clean from person or animal wey no clean or anything wey no clean wey be rubbish, and e chop some of the flesh of the peace sacrifice, wey be Jehovah own, una must kill* that person* comot from im people.’”

22 Jehovah continue to talk to Moses say: 23 “Tell Israel people say, ‘Make una no ever chop any fat of bull or of young ram or of goat. 24 The fat of any animal wey una see wey don die and the fat of animal wey another animal kill, una fit use-am for any other thing, but make una no ever chop-am. 25 Anybody wey chop fat from animal wey e give as offering wey them make with fire to Jehovah, una must kill* that person comot from im people.

26 “‘Make una no ever chop any blood for any place wey una de stay, whether na the one for birds or the one for other animals. 27 Anybody* wey chop any blood, una must kill-am* comot from im people.’”

28 Jehovah continue to talk to Moses say: 29 “Tell Israel people say, ‘Anybody wey de give im peace sacrifice to Jehovah go bring part of the offering from im peace sacrifice to Jehovah. 30 E go use im own hand bring the fat together with the breast as offering wey them make with fire to Jehovah, and e go wave-am go back and front as offering wey them de wave for front of Jehovah. 31 The priest go burn the fat to make smoke comot from ontop the altar, but na Aaron and im sons go get the breast.

32 “‘Una go give the right leg as holy part to the priest from una peace sacrifice them. 33 Na Aaron son wey give the blood of the peace sacrifice them and the fat go get the right leg as im share. 34 And I take the breast of the offering wey them de wave and the leg of the holy part from the peace sacrifice them of Israel people, and I give them to Aaron the priest and im sons as law wey go last for Israel people.

35 “‘This one na the part from Jehovah offerings wey them make with fire wey them go keep separate for the priests, for Aaron and im sons, for the day wey e appoint them to serve as priests to Jehovah. 36 Jehovah command Israel people say make them give them this part for the day wey e anoint them. This one na law wey go dey for long time for all their generations.’”

37 This one na the law wey concern the offering wey them de burn, the grain offering, the sin offering, the offering for the bad thing wey person do, the sacrifice wey them de use appoint priests, and the peace sacrifice, 38 just as Jehovah don command Moses for Mount Si′nai for the day wey e command Israel people to bring their offerings to Jehovah for the wilderness of Si′nai.