Jehovah Witness People De Scatter Family or Them De Make Family Dey as One?

As Jehovah Witness people, we de try our best to make our family and the family of other people strong. We de respect God as e arrange family. (Genesis 2:21-24; Ephesians 3:14, 15) God de use Bible help people for the whole world to get strong and happy marriage.

The Way Jehovah Witness People De Help Families to Dey as One

We de try our best to follow the advice for Bible, because e de help us be better husbands, wives, papa, and mama. (Proverbs 31:10-31; Ephesians 5:22–6:4; 1 Timothy 5:8) The sense for Bible de help families to succeed even when people for that family dey for different-different religion. (1 Peter 3:1, 2) See wetin people wey their husband or wife change to be Jehovah Witness talk:

• “For the first six years wey we marry, na so-so vex and quarrel we de quarrel. After my wife Ivete become Jehovah Witness, e start to show more love and dey patient. The change wey my wife make save our marriage.”—Clauir, from Brazil.

• “I no support my husband, Chansa, when e start to study Bible with Jehovah Witness, because I de think say them de scatter family. Since that time, I don see say Bible don really help our marriage.”—Agness, from Zambia.

When we de preach, we de show people how the advice for Bible fit help them to

• Use sense choose husband or wife

• Succeed for the first year wey husband or wife marry

• Know how to do things with in-laws

• Manage money

• Stop to argue

• Learn how to forgive

• Train pikin them

When person change to be Jehovah Witness this one de bring quarrel for marriage?

Yes, e de happen sometimes. For example, one research work wey one company wey them de call Sofres do for 1998 talk say, 1 marriage out of every 20 marriage get serious problem when the husband or wife change to be Jehovah Witness.

Jesus talk say sometimes e disciples go get problem for their family. (Matthew 10:32-36) One man wey de write about things wey don happen before talk say when Rome de rule, “people de talk say when person change to be Christian e de scatter family.”a And na wetin them still de talk about some Jehovah Witness people today. This one mean say na Jehovah Witness de cause kata-kata for family?

When the European Court of Human Rights de judge one case wey they talk say Jehovah Witness de scatter family, the court talk say plenty times na the people for the family wey no be Jehovah Witness de cause problem because, they no de gree “accept and respect the freedom wey the Jehovah Witness for the family get to do wetin them de learn for their religion.” The Court still talk say: “This problem still dey for marriage wey the people for the family no dey for the same religion, and so no be only Jehovah Witness de face this kind problem.”b Even when family people no want make Jehovah Witness de do wetin them de learn for their religion, Jehovah Witness de try to follow the advice for Bible say: “No do anybody bad because they do you bad. . . . Make wuna do everything wey wuna fit do, to dey in peace with everybody.”—Romans 12:17, 18.

Why Jehovah Witness people believe say they suppose marry only person for their religion

Jehovah Witness de follow the advice for Bible wey talk say make they marry “only inside the Lord,” this one mean say they go marry person wey they get the same belief. (1 Corinthians 7:39) This command dey for Bible and e make sense. For example, the Journal of Marriage and Family for 2010 talk say, “when husband and wife dey for the same religion, de do the same things, and believe the same thing” them de get better marriage.c

But, Jehovah Witness no de tell people for the same religion with them say, make they leave their husband or wife because they no be Jehovah Witness. Bible talk say: “If any brother get wife wey no be believer and e gree to stay with the brother, make the brother no leave e wife; and if woman get husband wey no be believer and e gree to stay with her, make the woman no leave e husband.” (1 Corinthians 7:12, 13) Jehovah Witness de follow this command.