Learn From Wetin Bible Don Talk Say Go Happen

1. Wetin fit help us enjoy to de study wetin Bible talk say go happen?

YOU de like to study wetin Bible talk say go happen? One young brother wey im name na Ben talk say: “I de enjoy to study wetin Bible talk say go happen.” You de feel like Brother Ben? Or you de fear to study-am? E fit be say to study-am no de sweet you. But when you know why Jehovah allow im servants write them for Bible, you fit start to like them.

2. Wetin we go talk about for this article?

² For this article, we go talk about why we suppose study wetin Bible talk say go happen and how we go take study-am. We go still talk about two things wey Daniel talk say go happen and how we go gain from them.

WHY E GOOD MAKE WE DE STUDY WETIN BIBLE TALK SAY GO HAPPEN?

3. Wetin we go do to fit understand wetin Bible don talk say go happen?

³ We need help to fit understand wetin Bible talk say go happen. For example, just think-am say you travel go where you no know, but your friend wey follow you know the area well-well. E know all the road for the area, where una don reach and where una de go. You go really happy say your friend follow you. Like this your friend, Jehovah know how we don near the end of this wicked world reach and everything wey go happen for front. So to fit understand wetin Bible don talk say go happen, we need to carry body down beg Jehovah make e help us.—Dan. 2:28; 2 Pet. 1:19, 20.

4. Why Jehovah make sure say them write wetin go happen for future, for Bible? (Jeremiah 29:11) (Still check the picture.)

⁴ As good papa and mama want make e better for their children, na so Jehovah want make im children get better future. (Read Jeremiah 29:11.) But Jehovah pass ordinary papa and mama because e fit tell us wetin go happen for future. E make sure say them write some important things wey go happen for future, for Bible, so that we go know before them happen. (Isa. 46:10) E do this one because e love us. But wetin go help you dey sure say wetin Bible talk say go happen, go really happen?

5. Wetin young people fit learn from Max story?

⁵ For school wey our young brothers and sisters de go, them get plenty people wey no de respect Bible. The way them de behave and the way them de talk, fit make young servant of Jehovah start to doubt whether wetin e de learn for Bible na true. See wetin happen to Brother Max. E talk say: “When I never reach 20 years, I start to doubt say wetin my papa and mama de teach me for Bible, na true and whether Bible na really the Word of God.” Wetin im papa and mama do? Max talk say: “Them dey calm even though say wetin I talk worry them.” Im papa and mama use Bible answer all im question. Max still do something. E talk say: “I study the things wey Bible talk say go happen, and I talk to other young people about wetin I learn.” How this one help Max? E talk say: “E make me believe with all my heart say Bible na God word!”

6. Wetin you go do if you start to doubt wetin Bible talk, and why?

⁶ If you de doubt say wetin Bible de teach na true, make you no let-am too worry you. But you need to do something about-am. Doubt be like rust, if e enter property wey you value and you no comot-am, small-small, e go destroy-am. So to fit remove the doubt wey be like rust for your faith, you need to ask, yourself this question, ‘I believe wetin Bible talk say go happen for future?’ If you no believe-am, you need to study the ones wey Bible talk wey don already happen. Make we talk about how you fit do this one.

HOW YOU GO TAKE STUDY WETIN BIBLE TALK SAY GO HAPPEN?

7. Wetin we learn from prophet Daniel about how to study wetin Bible talk say go happen? (Daniel 12:10) (Still check the picture.)

⁷ Prophet Daniel show all of us better example about how to study wetin Bible talk say go happen. Na the correct reason make Daniel study-am. E want know the truth. Another thing be say Daniel carry body down. E know say Jehovah go help-am understand wetin e want study if e continue to be Jehovah friend and de obey-am. (Dan. 2:27, 28; read Daniel 12:10.) Daniel show say e de carry body down as e beg Jehovah to help-am. (Dan. 2:18) Another thing be say, Daniel take time study-am well. E use the scrolls wey dey that time do research. (Jer. 25:11, 12; Dan. 9:2) How you fit copy prophet Daniel example?

8. Why some people de study wetin Bible talk say go happen, but wetin we suppose do?

⁸ Think about why you de study wetin Bible talk say go happen. You de study-am because you want know the truth? If this na your reason, Jehovah go help you. (John 4:23, 24; 14:16, 17) But some people get other reason why them de study wetin Bible talk say go happen. Them fit de study-am to find wetin go show say Bible no be God Word. Them feel say if them see wetin show say Bible no be God Word, them go fit live their life the way them like. But when we de study wetin Bible talk say go happen, we need to get the correct reason to study-am. Another character still dey wey we need to get to fit understand wetin Bible talk say go happen.

9. Which character we need to fit understand wetin Bible talk say go happen? Explain.

⁹ Carry body down. Jehovah don talk say e go help people wey de carry body down. (Jas. 4:6) So when we de study wetin Bible talk say go happen, we need to pray to Jehovah make e help us understand-am. Another thing be say we need to agree say we need help from the faithful slave wey God de use teach us for the correct time. (Luke 12:42) Since Jehovah na God wey no want make things scatter, e make sense say e de use only one group of people help us understand the truth for Bible.—1 Cor. 14:33; Eph. 4:4-6.

10. Wetin you learn from Sister Esther story?

¹⁰ Take time study-am well. When you want study about wetin Bible talk say go happen, start with the one wey you like pass. Na wetin one sister wey im name na Esther do. E like to know more about wetin Bible talk about the Messiah. E talk say: “When I dey 15 years, I start to do research to see whether the things wey them write about the Messiah, na wetin them write before them born Jesus.” Wetin e read for some scroll wey them de call Dead Sea Scrolls really help-am. E talk say: “Them write some of them before them born Jesus, so the things wey Bible talk about the Messiah, go really be from God.” Sister Esther still talk say: “To fit understand something, I need to read-am plenty times.” But e really happy say e do the research. After Sister Esther take time study the things wey Bible talk say go happen well, e talk say: “E come dey clear to me say wetin Bible talk na true.”

11. Wetin we de gain when we know say wetin Bible talk na true?

¹¹ When we see say some of the things wey Bible talk don already happen, e de help us trust Jehovah more-more for the way e de direct us and say everything wey e talk, go happen. Another thing be say, wetin Bible talk de give us hope say our future go better. When we study them, e de make our mind come down no matter the problem wey we de face. Now make we talk about two things wey prophet Daniel write say go happen, wey don de happen for this our time. If we understand them, e go help us fit make better decision.

WHY E DEY IMPORTANT TO UNDERSTAND THE FEET OF THE IMAGE WEY BE IRON AND CLAY?

12. Wetin the feet of the image wey be iron wey mix with clay, stand for? (Daniel 2:41-43)

¹² Read Daniel 2:41-43. For the dream wey prophet Daniel explain for King Nebuchadnezzar, the feet of the image wey e see for the dream “na iron wey them mix with clay.” When we compare this one with wetin dey other chapter for the book of Daniel and Revelation, we go fit talk say the feet of the image stand for Britain and America government wey come together to form one world power. And for this our time, na them get power pass for the whole world. Prophet Daniel talk say this world power “go strong for one way and still weak for another way.” Why e still weak? Because the people wey them de rule, wey stand for the clay de make the government weak and no fit use their strong power for some matter.b

13. Which important truth we learn from the feet of the image?

¹³ We learn plenty things from the dream about the image wey prophet Daniel explain to King Nebuchadnezzar, and especially about the feet of the image. Number one, the world power wey Britain and America form don show say e strong like iron. For example, even though Britain and America join other country to win World War I and World War II, na them do the main work. But this world power don weak and e go continue to de weak because people wey them de rule de fight against each other and against the government. Number two, na this world power go be the last to rule before God Kingdom go destroy all the government for this earth. Even though say sometimes, other country de fight against this world power, them no go ever fit take over from this world power. We know this one because na “the stone” wey stand for God Kingdom go destroy the feet of the image, wey be the world power wey Britain and America form.—Dan. 2:34, 35, 44, 45.

14. When we understand wetin prophet Daniel talk about the feet of the image, how e fit help us make better decision?

¹⁴ You really believe say wetin prophet Daniel talk about the feet of the image na true? If you believe-am, e go really affect the way you de live your life now. You no go de pursue money and property for this world wey God go soon destroy. (Luke 12:16-21; 1 John 2:15-17) If you understand wetin Bible talk about the feet of the image, e go help you understand say the preaching and teaching work really dey important for this time wey we dey. (Matt. 6:33; 28:18-20) After you don study wetin prophet Daniel talk about this image, make you ask yourself say, ‘The decision wey I de make de show say I really believe say small time, God Kingdom go destroy all the government for this earth?’

WHY E DEY IMPORTANT TO UNDERSTAND WHO BE “THE KING OF THE NORTH” AND “KING OF THE SOUTH”?

15. Who be “the king of the north and “king of the south” for this our time? (Daniel 11:40)

¹⁵ Read Daniel 11:40. Daniel chapter 11 talk about two king or two government wey de drag for power to be the government wey get power pass for the whole world. When we compare wetin the book of Daniel talk about-am, with wetin other place for Bible talk, we go fit talk say “the king of the north” na Russia and other country wey de support-am. And the king of the south na the world power wey Britain and America form.c

16. Wetin our brothers and sisters de face for the country wey “the king of the north” de control?

¹⁶ The king of the north de suffer Jehovah servants wey de live for the country wey them de rule. Them don beat plenty servants of Jehovah and put them for prison because them no gree leave Jehovah. Instead to make our brothers and sisters fear, wetin “the king of the north” de do them de make their faith strong. Why? Na because them know say wetin “the king of the north” de do them, na wetin prophet Daniel talk say go happen.d (Dan. 11:41) When we know this one, e go help us get strong hope and continue to hold Jehovah tight.

17. Which problem God people wey de live for the country them wey “the king of the south” de rule, de face?

¹⁷ Before-before, “the king of the south” don suffer our brothers and sisters. For example, for the time of World War I and II, them put many servants of Jehovah for prison because them no gree go fight war. And them pursue their children comot from school because them no salute flag. But for this our time, Jehovah people wey de live for the country them wey “the king of the south” de rule, de face test of faith for different way. For example, when them de do campaign for election, servant of Jehovah fit start to support one party for inside im mind or de hope say e go better if one of the people win. E fit no vote, but for im mind and heart, e get person wey e want make e win. E really dey important make we no support any side whether na for wetin we de do or for our mind!—John 15:18, 19; 18:36.

18. How the fight between “the king of the south” and “the king of the north” suppose affect us? (Still check the picture.)

¹⁸ People wey no put faith for wetin Bible talk say go happen fit worry well-well when them see say “the king of the south” de fight against “the king of the north.” (Dan. 11:40) The two of them get nuclear bomb wey fit kill everybody for this earth. But we know say Jehovah no go allow make them use-am. (Isa. 45:18) Instead to allow wetin them de do make us fear, e de make our faith strong more-more. Because e de show say the end of Satan world, don near.

CONTINUE TO STUDY WETIN BIBLE TALK SAY GO HAPPEN

19. Wetin we suppose put for mind about wetin Bible talk say go happen?

¹⁹ We no know how some things wey Bible talk go happen. Even prophet Daniel no know the meaning of everything wey e write. (Dan. 12:8, 9) But this one no mean say e no go happen. We trust Jehovah say e go let us know wetin we need to know for the correct time, just as e do for Bible time.—Amos 3:7.

20. Wetin Bible talk wey go soon happen, and wetin we suppose continue to do?

²⁰ Governments for this world go talk say: “Peace don dey and we don dey safe!” (1 Thess. 5:3) After that one, them go attack lie-lie religion and destroy-am. (Rev. 17:16, 17) The next thing wey them go do na to attack Jehovah people. (Ezek. 38:18, 19) Then Armageddon go follow. (Rev. 16:14, 16) We dey sure say all this things wey Bible don talk, go soon happen. But before them happen, make we continue to de study them and help other people do the same thing. This one go show say we really value wetin our Papa for heaven de do for us.