Copy Jehovah Example—Ready to Adjust

1. How servant of Jehovah fit be like tree? (Still check the picture.)

“WHEN breeze de blow, e no de break tree wey fit bend.” This one mean say for tree to fit survive e must ready to bend so that the breeze no go break-am. To fit continue to happy as we de serve Jehovah, we too need to de use our sense well and ready to adjust. How we fit do this one? We must ready to adjust when our condition change, ready to accept idea from other people, and respect other people decision.

2. Which better-better character go help us fit adjust when our condition change, and wetin we go talk about for this article?

² As servants of Jehovah, we need to ready to adjust. Another thing be say we want de carry body down and dey kind. For this article, we go see how this better-better character don help some servants of Jehovah succeed when their condition change. We go still see how this better-better character fit help us. But make we first learn from the example of Jehovah and Jesus.

JEHOVAH AND JESUS DE ADJUST WHEN THINGS CHANGE

3. How we know say Jehovah ready to adjust?

³ Bible call Jehovah “the Rock” because nothing fit make-am shake. (Deut. 32:4) But e still ready to adjust. As things de change, e de continue to adjust to make everything wey e get for mind for us, happen. Jehovah make us to fit copy e example. E don give us plenty advice for Bible wey fit help us make better decision no matter the problem wey we fit face. The way Jehovah de do things and the plenty advice wey e don give us, show say even though Jehovah na “the Rock,” e still ready to adjust.

4. Give example wey show say Jehovah ready to adjust. (Leviticus 5:7, 11)

⁴ Jehovah dey perfect and e still de put people condition for mind when e want do something. E no de tell us say make we do wetin pass our power. Make we see how e do this one for Israel people. E no tell everybody to do the same type of sacrifice whether the person get money to do-am or e no get. For some situation, e de allow people do sacrifice as their condition be.—Read Leviticus 5:7, 11.

5. Which example show say Jehovah de carry body down and de feel for people?

⁵ As Jehovah de carry body down and de feel for people, this one de make-am ready to adjust. Jehovah show say e really de carry body down the time wey e want destroy Sodom and Gomorrah. Jehovah use e angels tell Lot say make e and e family run go the area wey mountains dey. But Lot de fear the area. So e beg Jehovah say make e allow-am and e family run go Zoar. And Jehovah don decide say e go destroy Zoar. Jehovah get the power to tell Lot say e must do wetin E don tell-am, but Jehovah no do like that, e allow Lot run go Zoar. This one mean say Jehovah no go destroy Zoar again. (Gen. 19:18-22) Plenty years later, Jehovah show say e de feel for people when e forgive the people of Nineveh. Jehovah send prophet Jonah say make e go tell Nineveh people say E go destroy them and their city, because of their wicked life. But when the people repent, Jehovah pity them and e no destroy them again.—Jonah 3:1, 10; 4:10, 11.

6. Which example show say Jesus de copy the way Jehovah ready to adjust?

⁶ Jesus copy the way Jehovah de adjust. Jehovah send-am to this earth make e come preach to “the sheep wey don lost for the house of Israel.” The way Jesus do this work show say e ready to adjust. E get one time wey one woman wey no be Israel person beg Jesus say make e heal e pikin wey wicked demon de disturb. Jesus pity the woman and do wetin the woman want, as e heal the pikin. (Matt. 15:21-28) See another example. When Jesus start e preaching work, e talk say: “If anybody deny me . . . , me self go deny the person.” (Matt. 10:33) But Jesus deny Peter wey deny-am three times? No. Jesus know say Peter no happy at all as e deny Jesus, and say Peter really hold Jehovah tight. After Jehovah bring Jesus back to life, Jesus appear to Peter and tell-am say e love-am and e don forgive-am.—Luke 24:33, 34.

7. From wetin dey for Philippians 4:5, how we want make other people de see us?

⁷ We don see say Jehovah and Jesus always ready to adjust. What about us? Jehovah want make we ready to adjust. (Read Philippians 4:5.) Them translate Philippians 4:5 for one Bible translation as: “Make people know you as person wey ready to adjust.” Make we ask ourself say: ‘People de see me as person wey ready to adjust, wey de agree with other people, and no de quick vex? Or them de see me as person wey no de gree change e mind, harsh, or wey get strong head? I de talk say other people must do things the way I see say e suppose be? Or I de do things the way other people want if e no dey against wetin Jehovah want?’ If we always ready to adjust, e de show say we de copy Jehovah and Jesus well-well. Make we see two area wey we need to show say we de do things with sense and always ready to adjust. 1. When things change for us and 2. when the way other people de see something and their decision different from our own.

READY TO ADJUST WHEN THINGS CHANGE

8. Wetin go help us fit adjust when things change for us? (Still check footnote.)

⁸ To show say we de do things with sense, we go ready to adjust when things change. When things change, e fit make life hard us. For example, we fit get serious sickness when we no even expect. Or problem for government or business, fit turn things up-side-down and make things hard for us well-well. (Eccl. 9:11; 1 Cor. 7:31) Even when Jehovah organization change the way we de do somethings, e fit hard us to adjust. No matter wetin happen, we go fit adjust if we do this four things: (1) Agree say things don change, (2) think about how things go be for front, no be how e be before, (3) de see the good things wey de happen for our life now, and (4) de help people.b Make we see how this four things don help our brothers and sisters when things change for them.

9. Wetin help Brother Emanuele and e wife Francesca fit bear-am when their condition change?

⁹ Agree say things don change. Brother Emanuele and e wife Francesca na missionary for another country. As them start to learn the new language for the country wey them de serve, coronavirus come start. Because of this one, them no come de go Kingdom Hall and meet brothers and sisters face-to-face. Small time, Sister Francesca mama come die. Sister Francesca be really want travel go see e family but the coronavirus sickness no allow-am. Wetin help-am fit bear all this problem? The first thing wey Brother Emanuele and e wife Francesca do na to pray make Jehovah give them sense to dey careful everyday so that them no go de worry too much about their problem. Jehovah answer their prayer as e use our organization give them wetin them need for the correct time. For example, wetin one brother talk for one video interview really make their mind come down. The brother talk say: “If we quick agree say things don change for us, that one go help us quick happy again and fit use our new condition well.”c The second thing wey help them be say them learn how to use phone preach and start Bible study. The third thing wey them do be say them show say them value the way brothers and sisters for their congregation help them and encourage them. One sister send them short message with Bible verse, every day for one year. If we follow this example when things change for us and agree say thing no be the way them be before, we go enjoy the things wey we fit do for our new condition.

10. How Sister Christina adjust when organization stop the English congregation wey e de go?

¹⁰ Think about how things go be for front, no be how e be before. Sister Christina na from Romania but e de stay for Japan. E really pain-am when organization talk say them no go de use English do meeting again for e area. Even with this one, e no continue to feel bad and continue to think about how e enjoy congregation meeting for English. E join Japanese language congregation and do e best to use the language preach. E tell one woman wey e de work with before say make e teach-am how to speak the language. The woman gree say them fit use Bible and Enjoy Life Now and Forever! brochure, learn how to speak the language. This one help Sister Christina sabi speak the language and the woman come like to learn the truth. If we no de think about how things be for us before, but we de think about the future with good mind, we fit get plenty blessing for our new condition.

11. Wetin help one brother and sister wey their business fall, to fit adjust?

¹¹ De help people. One husband and wife for one country wey the government ban our work lost all the money wey them get when all the business for the country fall. Wetin help them fit adjust? The first thing wey them do na to reduce the way them de spend money. The next thing wey them do be say, instead of them to de think about their problem, them decide to spend more time for the preaching work, and help other people learn about Jehovah. (Acts 20:35) The husband talk say, “Because we de spend plenty time for preaching, e de give us more time to do wetin Jehovah want, so we no even get time to de think about our problem.” When our condition change, we must remember say e dey important to continue to help people, especially to help people learn about Jehovah.

12. How apostle Paul example fit help us adjust for our preaching work?

¹² To fit do our preaching work well, we need to de adjust. People wey we de meet for preaching don learn different-different things about God and them come from different-different place and their culture different. We fit learn from apostle Paul because e adjust the way e de preach to the people wey e meet. Jesus make Paul, “apostle to the nations.” (Rom. 11:13) So Paul preach to Jew people, Greek people, people wey go school well-well, village people, people for government, and kings. To fit preach to all this kind people make e touch their heart, e become “everything to all kind of people.” (1 Cor. 9:19-23) E put mind for their culture, where them come from, and wetin them believe to fit preach to them well. We too fit make the way we de preach better if we de adjust the way we de preach when we meet different-different people.

RESPECT OTHER PEOPLE DECISION

13. Which danger 1 Corinthians 8:9 talk about, and how we fit run from this danger?

¹³ Deep sense go still help us respect how other people choose to do things. For example, some sisters like to use makeup, but some no like-am. Some servants of Jehovah de drink alcohol, but some no de drink at all. All of us like good health, but the kind treatment wey we de take fit different. If we think say na our own better pass and de try force people to follow-am, we go cause serious problem for congregation. And we no go want make problem dey for congregation. (Read 1 Corinthians 8:9; 10:23, 24) Make we use two example, show how we fit follow advice for Bible and still continue to do wetin go make peace dey congregation.

14. Which Bible advice we suppose get for mind when we want choose cloth and hairstyle?

¹⁴ Cloth and hairstyle. Jehovah no tell us the kind cloth wey we must wear, but e give us advice wey go help us choose the type wey go make-am happy. Our dress suppose make people see us as servants of Jehovah. The way we de dress suppose show say we get deep sense, we no de over do things, and say we de “think well.” (1 Tim. 2:9, 10; 1 Pet. 3:3) So make we no allow the way we de dress, make people de put eye for our body. Advice from Bible go still help elders make them no de make their own rules about the kind hairstyle wey brothers and sisters go choose or the kind cloth wey them go wear. For example, elders for one congregation want help some young brothers for their congregation, wey don de copy the bad hairstyle of people for their area. How the elders go fit do this one wey them no make their own rule? Circuit overseer advice the elders say make them tell the young brothers say: “If you dey platform and na only the way you dress and your hairstyle brothers and sisters de look instead to put mind for wetin you de talk, make you know say the way you dress and your hairstyle get problem.” This one help the young brothers do the correct thing and the elders no make any rule for them.d

15. Which Bible law and advice we de follow when we want choose the kind treatment wey we go take? (Romans 14:5)

¹⁵ Health matter. E dey each person hand to choose how e go care for e health. (Gal. 6:5) But when we want choose the kind treatment wey we go take, we must obey Bible law wey talk say make we no take blood and make we no put hand for anything wey concern demons. (Acts 15:20; Gal. 5:19, 20) Apart from this ones, we fit choose the kind treatment wey we want. Some people believe say e better to go see doctor for hospital and take medicine, but other people believe say na traditional medicine better pass. No matter how you feel about the type of treatment wey you like pass, you need to respect the right wey brothers and sisters get to choose the kind treatment wey them want. For this matter, we need to put this four things for mind: (1) Na only God Kingdom go fit comot all our sickness finish. (Isa. 33:24) (2) Each person must “really dey sure” with all e mind say the treatment wey e choose, na the best for-am. (Read Romans 14:5.) (3) We no want talk bad about the kind treatment wey brother or sister choose and we no want do anything wey go make them stop to worship Jehovah. (Rom. 14:13) (4) We must show love to our brothers and sisters and we believe with all our mind say the peace wey dey Jehovah organization dey important pass wetin we think say na e correct. (Rom. 14:15, 19, 20) If this four things wey we don talk always dey our mind, e go help us continue to make our friendship with our brothers and sisters better, and peace go continue to dey for congregation.

16. How elder fit show say e ready to adjust for congregation matter? (Still check the pictures.)

¹⁶ Make elders de show say them ready to adjust. (1 Tim. 3:2, 3) For example, make elder no think say other elders suppose always agree with wetin e talk just because e old pass them. E know say Jehovah go fit use e holy spirit move any elder for the body of elders to talk wetin fit help them make better decision. And if the decision no dey against wetin Bible talk, elder wey ready to adjust go support-am even if e no see the matter the way the other elders see-am.

WETIN WE GO GAIN IF WE DE ADJUST?

17. Wetin we go gain when we de use our sense well and ready to adjust?

¹⁷ We de enjoy plenty blessing when we de use our sense well and de adjust when things change. We de enjoy better friendship with our brothers and sisters and peace for congregation. We go enjoy friendship with Jehovah people wey come from different-different culture and place. And the one wey better pass be say we de copy our papa for heaven wey always ready to adjust.