Small time, Jehovah go use e Kingdom end our problems. This one na better news wey everybody need to hear. Jesus want make e disciples tell everybody this good news! (Matthew 28:19, 20) How Jehovah Witness them don follow this command wey Jesus give?

1. How the thing wey Matthew 24:14 talk de happen for this our time?

Jesus talk say: “Them go preach the good news about the Kingdom for everywhere for this earth.” (Matthew 24:14) Jehovah Witness them dey happy to do this important work. We de preach the good news for the whole world for more than 1,000 language! To do this big work, we go need to arrange-am well and do our best. Na only Jehovah fit help us do this work.

2. Wetin we de do to preach to people?

We de preach to people anywhere wey we fit see them. Like Christians for the time of the apostles, we de preach “from house to house.” (Acts 5:42) For this way, we fit preach to millions of people every year. Since people no de dey house all the time, we still de preach for public places. We de always look for chance to tell people about Jehovah and wetin e get for mind for us.

3. Who get the work to preach the good news?

All real Christians get the work to preach the good news to other people. We de take this work serious. We de try our best to preach to people as we fit because this preaching fit save their life. (Read 1 Timothy 4:16.) They no de pay us to do this work because Bible talk say: “They give wuna for free, make wuna give free.” (Matthew 10:7, 8) No be everybody de listen to our message. But we continue to preach because our preaching de show say we de obey Jehovah, and de make Jehovah happy.

LEARN MORE THINGS

4. We de work hard to preach to everybody

VIDEO: How We De Preach “for the Whole Earth” (7:33)

• Wetin you like about how Jehovah Witness de work hard to preach?

Read Matthew 22:39 and Romans 10:13-15, and talk about this questions:

• How our preaching work de show say we care about other people?

• How Jehovah de feel about people wey de preach the good news?—Check verse 15.

5. We de work with God

Plenty real life example show say Jehovah de direct our work. For example, one brother for New Zealand wey e name na Paul meet one woman as e de preach from house-to-house for one afternoon. That morning, the woman don pray to God and e use the name of God, Jehovah, and tell God to send person make e come visit-am. Paul talk say: “After three hours, I reach the house of the woman.”

Read 1 Corinthians 3:9, and talk about this question:

• How this real life examples like the one for New Zealand show say Jehovah de direct the preaching work?

Read Acts 1:8, and talk about this question:

• Why we need make Jehovah help us so that we go fit do the preaching work?

You know?

Every week, for our midweek meeting, them de train us to help us preach well. If you don go one of this meetings before, wetin you think about the training wey we de get?

6. We de obey the command from God to preach

For the time of the apostles, people wey dey against the truth try to stop the disciples of Jesus as them de preach. Christians for that time defend their right to preach and “use law to prove the truth about the good news.” (Philippians 1:7) Jehovah Witness de do the same thing today.a

VIDEO: We De Use Law to Defend Our Right to Preach (2:28)

Read Acts 5:27-42, and talk about this question:

• Why we no go stop to preach? —Check verses 29, 38, and 39.

WETIN THIS LESSON TEACH

Jesus tell e disciples to preach the good news for everywhere for this world. Jehovah de help e people to do this work.

Wetin You Don Learn

• How Jehovah Witness de preach the good news for the whole world?

• How our preaching work de show say we care about other people?

• You think say the preaching work fit make us happy? Why?

LEARN OTHER THINGS

See how Jehovah Witness de preach to people for big cities.

Special Metropolitan Public Witnessing for Paris (5:11)

Wetin Jehovah Witness don do to help people wey war or problem make them run from their own country?

How We De Help People Wey Be Refugee to Learn About God (5:59)

Hear as one woman de explain why e dey happy as e de use all e life preach.

I Dey Happy Say I Choose Full-Time Service (6:29)

Learn about some important decisions wey they don make for court and how this one don make-am easy to preach the good news.

“Preachers of the Good News Carry Their Case Go Court” (God’s Kingdom Rules!, chapter 13)

Jesus talk say all Christians must baptize. (Read Matthew 28:19, 20.) But wetin be baptism? And wetin person fit do to baptize?

1. Wetin be baptism?

The word “baptize” come from one Greek word wey the meaning na “to dip” something inside water. When they Baptize Jesus, they dip Jesus inside River Jordan, and after, e “come out from the water.” (Mark 1:9, 10) Like Jesus, them de dip true Christians inside water when them de baptize them.

2. When person baptize, wetin e de show?

When person baptize, e de show say e don give e life to Jehovah. How person de show this one? Before person baptize, e go pray and tell Jehovah say e want use all e life serve Jehovah forever. The person go promise to worship only Jehovah and wetin go dey important pass for e life go be to do wetin Jehovah want. E go decide to “deny e self and . . . continue to follow” the example of Jesus and wetin Jesus teach. (Matthew 16:24) As e don give e life to Jehovah and baptize, e go make-am possible for the person to be tight friend with Jehovah and with other servants of Jehovah.

3. Wetin person need to do before e fit baptize?

Before you fit baptize, e dey important make you learn about Jehovah and get strong faith for Jehovah. (Read Hebrews 11:6.) As you know more about Jehovah and your faith de strong, e go make you love Jehovah more. Then you go want tell other people about Jehovah and live your life the way e want. (2 Timothy 4:2; 1 John 5:3) When person de “waka for the way wey Jehovah want and . . . do wetin e like,” the person go decide to give e life to God and baptize.—Colossians 1:9, 10.a

LEARN MORE THINGS

4. We fit learn from the baptism of Jesus

Read Matthew 3:13-17 to learn more things about how Jesus baptize. Then talk about this questions:

• Jesus na baby when e baptize?

• How they baptize Jesus? They just pour water for e head?

Jesus start to do the special work wey Jehovah say make e do for this earth after e baptize. Read Luke 3:21-23 and John 6:38, and talk about this question:

• After Jesus baptize, which work e put as number one for e life?

5. E dey possible for you to baptize

When person first think say e need to give e life to God and baptize, e fit make the person fear. But, small-small, you go reach one stage wey you no go de fear to make this important decision. To see some people wey don make this decision, play the VIDEO.

VIDEO: How We Fit Be Friend of Jehovah (1:11)

Read John 17:3 and James 1:5, and talk about this question:

• Wetin fit help person to dey ready to baptize?

1. We de give our life to Jehovah when we promise for prayer say we want serve Jehovah forever

2. For the day wey we baptize, we de show people say we don give our life to God

6. When person baptize, e go be part of the family of Jehovah

When we baptize, we go be part of the family of Jehovah wey dey together as one for the whole world. Even as we no come from the same place or grow for the same way, we get the same beliefs and de live the same clean life as Jehovah want. Read Psalm 25:14 and 1 Peter 2:17, and talk about this question:

• How baptism de make person be tight friend with Jehovah and with other servants of Jehovah?

WETIN THIS LESSON TEACH

Jesus teach say Christians must baptize. Before person go fit baptize, e go need to get strong faith for Jehovah, follow e laws, and give e life to Jehovah.

Wetin You Don Learn

• Wetin be baptism and why e dey important?

• Wetin baptism de show?

• Wetin person need to do before e fit give e life to Jehovah and baptize?

LEARN OTHER THINGS

Learn wetin baptism mean and wetin e no mean.

“Wetin Be Baptism?” (E dey for jw.org)

Learn about some things wey person need to do before e fit baptize.

“Love for Jehovah Go Move You to Baptize” (Watchtower, March 2020)

Read wetin make one man decide to baptize.

“They Be Want Make I Dey Sure Say Wetin I De Learn From Bible Na the Truth” (The Watchtower, February 1, 2013)

See why to baptize na important thing and how you fit prepare to baptize.

“Make I Baptize?” (Questions Young People Ask—Answers That Work, Volume 2, chapter 37)