Wetin Bible Talk About Serious Dry Weather?

“China report say, this year na the year wey their weather hot pass, and the dry season for this year dey among the seasons wey dry pass wey them don ever get.”—The Guardian, September 7, 2022.
“E don de go five years now wey rain no fall for some parts of Africa.”—UN News, August 26, 2022.
“More than half of the countries wey dey for Europe fit face serious dry weather. This one fit be the worst weather wey them don ever get for the past 500 years.”—BBC News, August 23, 2022.

Many people wey sabi weather matter talk say, this kind condition go continue and e go even worst pass like this. Any hope say things go better for future? Wetin Bible talk?

Wetin Bible talk about serious dry weather

Bible talk wetin go happen for this our time:

“For different-different place, food no go too dey.”—Luke 21:11.

When rain no fall, food no go plenty. And when food no plenty, people go de suffer and die. This one de show say wetin Bible don talk de happen.—Revelation 6:6, 8.

Why weather de dry more-more

Bible talk the main reason why weather de dry more-more. E talk say:

“Person wey de waka no fit even direct im step.”—Jeremiah 10:⁠23.

This one mean say human being no de succeed when them direct or rule theirself. Na the bad decision wey them de make de cause serious dry weather and this one de make water scarce.

Many science people agree say the things wey people de do, don cause problem wey don affect the weather for the whole world, and because of this one, serious dry weather de worse for the whole world.
As people get long throat and as them no de think about the result of the law wey them make, this one don make them destroy the forest, spoil different-different area, and no de use the things wey God give us well. And because of this one, we fit no get place where better water de come from again.

Bible de give better hope.

Any hope dey for the future?

Bible promise say God go solve all this water problem. How e go take do-am?

1. God go “destroy the people wey de spoil the earth.” (Revelation 11:18) E go comot wetin de make water no dey. One of them na wicked people, wey get long throat wey de spoil the earth.—2 Timothy 3:1, 2.
2. “Ground wey heat don dry go be pool wey get plant.” (Isaiah 35:1, 6, 7) God go repair all the things wey serious dry weather don spoil, and e go change this earth to paradise wey get plenty water.
3. “You take care of the earth, you make-am produce plenty fruit and make the soil very good.” (Psalm 65:⁠9) And because of the blessing wey God go give, all the earth go get better food and clean water.