Wetin Bible Talk About Natural Disaster?
The answer from Bible
No be God de cause the natural disaster wey de happen today, but e de care about people wey the disaster affect. God Kingdom go remove natural disaster and all the things wey de make us suffer. But for now, God de comfort people wey natural disaster affect.—2 Corinthians 1:3.
Why we fit dey sure say natural disaster no be punishment from God?
Bible verses wey fit comfort people wey natural disaster affect
Why we fit dey sure say natural disaster no be punishment from God?
For Bible, wey see-am say the way God use natural things like rain, thunder, and things like that take punish wicked people different from the way natural disaster de happen today.
Natural disaster no de select who e de kill and injure. But when God use natural things punish bad people for Bible time, E make sure say na only wicked people suffer. For example, when God destroy Sodom and Gomorrah, e make sure say nothing happen to Lot and im two daughters wey be good people. (Genesis 19:29, 30) God de see the heart of the people wey de live that time and na only the wicked people e destroy.—Genesis 18:23-32; 1 Samuel 16:7.
Most times, natural disasters no de warn people before e happen. But before God use natural things destroy wicked people, e de first warn them. The disaster no de affect the people wey listen to the warning.—Genesis 7:1-5; Matthew 24:38, 39.
People decision and the things wey them don do de cause disaster or make some disaster worst. How? Na as them de spoil the earth and de build house for areas wey them know say things like earthquake, flood, and other disaster fit happen. (Revelation 11:18) We no go blame God for the bad things wey de happen because of people mistake.—Proverbs 19:3.
Natural disaster na sign say we de live for last days?
Yes, Bible prophecy show say disaster go de happen for “the last days of this world.” (Matthew 24:3; 2 Timothy 3:1) For example, when Jesus de talk about our time, e say: “Food no go too dey, and ground go de shake open for different-different place.” (Matthew 24:7) Small time, God go comot everything wey de cause us pain and make us suffer, even natural disaster.—Revelation 21:3, 4.
How God de help people wey natural disaster affect?
God de use im Word comfort people wey disaster affect. Bible don help us see say God de care for us and E de feel pain when we de suffer. (Isaiah 63:9; 1 Peter 5:6, 7) Bible still help us see the better promise say for future natural disaster no go happen again.—Check “Bible verses wey fit comfort people wey natural disaster affect.”
God de use im servants help people wey disaster affect. God de help people wey de worship-am for this earth to copy the example of Jesus. Bible talk-am say Jesus go comfort “people wey de feel say their own don finish” and e go “comfort all the sad people.” (Isaiah 61:1, 2) People wey de worship God de try to copy Jesus example.—John 13:15.
God still de use im servants to give people wey natural disaster affect the things wey them need.—Acts 11:28-30; Galatians 6:10.
Jehovah Witness people de help people for Puerto Rico wey heavy breeze and water affect
Bible advice fit help us prepare for natural disaster?
Yes. Even though say them no write the Bible to help us prepare for natural disaster, e get advice wey fit really help us. For example:
Plan wetin you go do if natural disaster happen. Bible talk say: “When person get sense, e go see danger and hide.” (Proverbs 22:3) E go make sense if we plan wetin we go do before natural disaster go happen. This kind plan fit be to get small bag wey we go put something wey we fit need in case something wey we no expect happen, and for person to discuss with im family about were them go meet in case disaster happen.
Value your life pass property. Bible tell us say: “We no bring anything come this world, and we no go fit carry anything comot.” (1 Timothy 6:7, 8) We need to ready to leave our house and property and run from natural disaster. We really need to remember say our life dey important pass any property wey we get.—Matthew 6:25.