Study Book for Our Life and Preaching Meeting

Study Book for Our Life and Preaching Meeting

OCTOBER 7-13

FINE-FINE LESSON FROM BIBLE | JAMES 3-5

“Show Say You Get the Sense From God”

(James 3:17) But first, the sense from heaven dey clean, then e love peace, e no de talk say e own idea must stand, e ready to obey, e de always feel for people and de do good things, e no de do partial, e no de pretend.

cl 221-222 ¶9-10

You De Use ‘the Sense From God’ for Your Life?

‘First, e clean.’ This one mean say person go dey clean no be only for outside but for inside. Plenty times, when Bible de talk about sense, e de connect-am to our heart. But sense from God no fit enter heart wey e dirty, or heart wey de think and like bad-bad things. (Proverbs 2:10; Matthew 15:19, 20) But, if we try our best to get clean heart even though sin dey our body, we go fit run from bad things and de do good things. (Psalm 37:27; Proverbs 3:7) So, e really good say to dey clean, na the first character of the sense from God. Even self, if we no get clean heart and we no de worship Jehovah the way e want, how we fit really show say we get the other character of this sense from God?

¹⁰ “Then e love peace.” The sense from God, de make us do our best so that peace go dey. And peace dey among things wey the spirit of God de give us. (Galatians 5:22) We de do our best so that we no go spoil the peace and one mind wey we get for congregation. (Ephesians 4:3) And when peace no dey, we still de do our best to make sure say peace dey. Why e dey important? Bible talk say: ‘Make wuna continue to live together in peace; and the God of love and peace go dey with wuna.’ (2 Corinthians 13:11) As long as we continue de live together in peace, Jehovah, the God of peace, go dey with us. The way we de treat brothers and sisters for congregation, fit affect our friendship with Jehovah. How we fit show say we want make peace dey? Make we see this example.

cl 223-224 ¶12

You De Use ‘the Sense From God’ for Your Life?

¹² “E no de talk say e own idea must stand.” Some Bible professors talk say the original Greek word wey we translate as “e no de talk say e own idea must stand,” for James 3:17 really hard to translate. Some translators don translate that word as “dey gentle,” “de endure,” and “to de think about how other people de feel.” The footnote for New World Translation show say this word mean “to change mind when better reason dey to change-am.” How we fit show for our life say we get this fine character?

cl 224-225 ¶14-15

You De Use ‘the Sense From God’ for Your Life?

¹⁴ “E ready to obey.” The Greek word wey we translate as “ready to obey” no dey any other place for the part of Bible wey they use Greek write. One Bible professor talk say them de use this word plenty times for soldiers wey de quick obey wetin their commander tell them. This word de make us think of person wey other people fit make-am change e mind quick-quick,” or person wey “de obey without complain.” Person wey the sense from God de control, de quick follow wetin Bible talk. No be person wey people know say once e don decide, e no de gree change e mind even when e get better reason to change-am. But na person wey de quick change e mind when e see say Bible show-am clear say e idea or wetin e think, no correct. Na that kind person you be?

“E De Always Feel for People and De Do Good Things”

¹⁵ “E de always feel for people and de do good things.” To de feel for people na one important thing wey the sense from God de make person do. Bible talk say person wey e get this kind sense de “always feel for people.” For this verse, they mention “e de always feel for people and de do good things,” together. Why? Na because plenty times, Bible show say na when we get feeling for people, we go want do good things for them. One book talk say to feel for person mean to “sorry for person wey e condition for life really bad and to do something to help the person.” So, person wey get the sense from God, no de get wicked heart. But, e de get good heart wey de feel for people. How we fit show say na so we be?

cl 226-227 ¶18-19

You De Use ‘the Sense From God’ for Your Life?

¹⁸ “E no de do partial.” Person wey e get the sense from God, no de feel say e skin color or country better pass other people their own. And if we get this sense from God, we go do our best to make sure say we remove anything from our heart wey fit make us do partial. (James 2:9) We no de select people wey we go do good for, maybe because they go school, get money, or because of their work for congregation; and we no de see other people for congregation as nothing just because say they no get anything. Make we show say we love this kind people because even Jehovah don show say e love them.

¹⁹ “E no de pretend.” They fit use the Greek word wey we translate as “pretend” talk about “person wey de act film or drama.” For olden days, Greek and Rome people de wear big mask when them de act drama. So, they start de use the Greek word for “pretend,” talk about person wey de pretend to be wetin e no be. This part of the sense from God go help us make we no pretend when we de do things with brothers and sisters for congregation, or de pretend say we love them.

Fine-Fine Things Wey You See for Bible

(James 4:5) Or wuna think say na for nothing Bible talk say: “The kind jealous mind wey we get, de make us always want get everything”?

w08 11/15 20 ¶6

Lesson From the Book of James and Peter

4:5—Which verse James quote for here? James no quote any particular verse. But e fit be say e carry wetin e write for this verse from the lesson for some Bible verse like Genesis 6:5; 8:21; Proverbs 21:10; and Galatians 5:17.

(James 4:11, 12) Brothers, make wuna stop to de talk bad about each other. Anybody wey e talk bad about e brother or condemn e brother, de talk bad about the law and de condemn the law. Now, if you condemn the law, you no de follow law, but you don become judge. ¹² Na only one person dey, wey de give Law and de Judge, na him fit save and destroy person. But you, who you be to de judge your neighbor?

w97 11/15 20-21 ¶8

Faith De Make Us Always Pray and Dey Patient

⁸ Na sin to talk bad things about our brothers. (James 4:11, 12) But some people de like to talk bad about brothers and sisters for congregation. E fit be because they feel say they better pass them, or because they want bring other people down. (Psalm 50:20; Proverbs 3:29) The Greek word for “talk bad about” de show wetin fit happen when we no like person. We fit lie against the person or talk about small thing wey e do, like say na big thing. If we do this one, we don really condemn the person. And e mean say we de ‘condemn and talk bad about the law of God.’ How? For example, scribe and Pharisee people use cunning sense push God commandment go one side, and use their own way de judge people. (Mark 7:1-13) Na the same thing too, if we condemn brother wey Jehovah no condemn. E just be like say we don push the law of God go one side and de use our own way judge the person. That one no be sin? And if we de talk bad about our brothers, we no de show say we love them.—Romans 13:8-10.

OCTOBER 14-20

FINE-FINE LESSON FROM BIBLE | 1 PETER 1-2

“Wuna Must Dey Holy”

(1 Peter 1:14, 15) Now wey wuna de obey God as e children, make wuna stop to allow wuna body de push wuna to do the kind things wey wuna de do when wuna never know God, ¹⁵ but like the Holy Person wey call wuna, make wuna dey holy for everything wey wuna de do,

w17.02 9 ¶5

The Sacrifice of Jesus Christ Na “Perfect Gift” From God

⁵ How we fit show say we want make people praise the name of God? Na the way we de live our life. Jehovah want make we dey holy. (Read 1 Peter 1:15, 16.) This one mean say we go worship only Jehovah and we go use all our heart obey e word. Even when people de suffer us, we go do our best, to do wetin Jehovah want. If we de do good things, people go know say we de serve Jehovah and they go praise e name. (Matt. 5:14-16) As we de live holy life, we de show say everything wey Jehovah say make we do, really good for us. And we still de show say everything wey Satan talk against Jehovah, na big lie. When we make mistake because of sin, we de repent with all our heart and stop de do anything wey fit make people talk bad about Jehovah.—Ps. 79:9.

(1 Peter 1:16) because they don write-am say: “Wuna must dey holy because I dey holy.”

lvs 77 ¶6

How We Fit Choose Our Entertainment

⁶ Jehovah talk say, we must dey holy because e dey holy. (1 Peter 1:14-16; 2 Peter 3:11) Na only when our worship dey clean or holy, Jehovah go accept-am. (Deuteronomy 15:21) And our worship no fit clean, if we de do things wey Jehovah hate like sex wey bad, fight-fight or anything wey concern Satan and e demons. (Romans 6:12-14; 8:13) E go still vex Jehovah if na that kind film, video game or book we de watch and read. This one fit make our worship dirty and Jehovah no go accept-am. And e go spoil our friendship with Jehovah.

Fine-Fine Things Wey You See for Bible

(1 Peter 1:10-12) The prophets wey talk about the favor wey wuna go get from God, really check and try to learn everything wey they fit learn about this salvation. ¹¹ Before this time God don use e spirit tell them say Christ go suffer and after, e go enjoy plenty blessing. Na e make they continue de learn so that they go know the things wey go happen to Christ and the particular time wey e go happen. ¹² God make them know say no be theirself them de serve, but na wuna. Na them write the things wey wuna don hear. And wuna hear-am from the people wey preach the good news to wuna with the power of the holy spirit wey God send from heaven. And na this same things, the angels really want know about.

w08 11/15 21 ¶10

Lesson From the Book of James and Peter

1:10-12. Angels really want know and understand the deep things wey God don use e prophets for olden days write about the anointed Christian congregation or Israel of God. But, na only when Jehovah start de do things with the congregation, this things come dey clear. (Eph. 3:10) E dey important make we copy the example of the angels. Make we de try our best to want know the “deep things of God.”—1 Cor. 2:10.

(1 Peter 2:25) Because wuna first be like sheep wey don miss road, but now wuna don come back to the shepherd and overseer wey de protect wuna life.

it-2 565 ¶3

Overseer

The Greatest Overseer. The book of Isaiah 53:6, talk about people wey be ‘like sheep wey don miss road.’ E be like say na there apostle Peter take wetin e write for the beginning part of 1Peter 2:25. Peter still talk say: “But now wuna don come back to the shepherd and overseer wey de protect wuna life.” This verse de talk about Jehovah God. Why we talk so? This people wey Peter write to, na Jehovah sheep wey don miss road. But now, Jesus Christ don bring them come back to Jehovah, the Greatest Shepherd of e people. (Ps 23:1; 80:1; Jer 23:3; Eze 34:12) Jehovah na still overseer. Na him de check our heart. (Ps 17:3) When Jehovah check (Gr., e·pi·sko·peʹ) person, e fit condemn the person. For example, na wetin happen to Jerusalem for first century C.E. They no know the time wey Jehovah check [Gr., e·pi·sko·pesʹ] them. (Lu 19:44) Jehovah fit still check [Gr., e·pi·sko·pesʹ] person and e go mean good thing for the person. For example, servants of God wey de make people praise God.—1Pe 2:12.

OCTOBER 21-27

FINE-FINE LESSON FROM BIBLE | 1 PETER 3-5

“The End of Everything Don Near”

(1 Peter 4:7) But the end of everything don near. So, make wuna show say wuna get better sense, and make wuna de always remember to pray.

w13 11/15 3 ¶1

“De Always Remember To Pray”

IF YOU don do night shift before, we sure say you go agree with wetin this former night worker talk. E talk say, “the time wey sleep de really catch night worker, na for early morning, when everywhere still dark.” Servants of Jehovah today de face this kind problem. We don really near the end of this wicked world. And this time just be like early morning when everywhere still dark. So we need to try our best make we no sleep. (Rom. 13:12) We go enter big trouble if we start to sleep or stop to do things wey Jehovah want, now wey the end of this wicked world don near! E dey important now make we “get better sense” and de “always remember to pray”.—1 Pet. 4:7.

(1 Peter 4:8) But the main thing be say, make wuna get strong love for each other, because love de cover plenty sin.

w99 4/15 22 ¶3

How You Fit Know and Run From Anything Wey Fit Make You Stop to Worship Jehovah

Finally, make wuna always de remember wetin apostle Peter talk. E say: “The end of everything don near. So, make wuna show say wuna get better sense, and make wuna de always remember to pray. But the main thing be say, make wuna get strong love for each other, because love de cover plenty sin.” (1 Peter 4:7, 8) E dey easy to let other people mistake or our own, affect our heart and mind and make us stop to worship Jehovah. Satan really know say this kind thing fit make us weak. Satan de like use cunning put problem between servants of Jehovah, make e fit win them. So, we must de show say we really love our brothers and de quick forgive them, so that we no go give Satan any chance.—Ephesians 4:25-27.

(1 Peter 4:9) Make wuna de do good to each other and no de complain.

w18.03 14-15 ¶2-3

Dey Do Good Now and You Go Happy!

² One of the thing wey Peter tell the brothers be say, make them “de do good to” each other. (1 Pet. 4:9) The Greek word wey we translate as “dey do good” mean to “love stranger or to care for them.” But when Peter use this word, na brothers and sisters e get for mind, no be strangers. E say make them de help each other, even though they already know theirself. How this one go help them?

³ E go make them near each other. Think-am, person don invite you come e house before? You remember how you feel? What of the time wey you invite people for your congregation come your house, e no make wuna friendship tight pass before? We fit no really know our brothers and sisters well, until we invite them come our house. As things dey bad more more for apostle Peter time, the brothers and sisters really need to near each other. Na so we suppose do as we dey live for this “last days.”—2 Tim. 3:1.

Fine-Fine Things Wey You See for Bible

(1 Peter 3:19, 20) And na for this condition e go preach to the spirits for prison, ²⁰ those ones wey disobey that time wey God sofri de wait make Noah build the ark, wey e use carry only eight people pass the water and nothing do them.

w13 6/15 23

Question Wey Some People Don Ask

Wetin Bible mean when e talk say Jesus “preach to the spirits for prison”? (1 Pet. 3:19)

▪ Apostle Peter talk say this spirits na the ‘ones wey disobey for the time of Noah.’ (1 Pet. 3:20) E clear say Peter de talk about those angels wey choose to join Satan for e wicked way. Jude talk say this angels “no gree stay for their original position but leave their place.” E still talk say God ‘don chain them forever for thick darkness until the time wey e go destroy them.’—Jude 6.

Which bad things this spirit them do for the time of Noah? Before the heavy rain, this spirits change theirself to be like ordinary people. This one na something wey God no want make they do. (Gen. 6:2, 4) Another thing be say, God no make angels to sleep with women. So, all the angels wey sleep with women don go against God arrangement. (Gen. 5:2) God go destroy this wicked angels when the time come. As Jude talk-am, God don put them inside “thick darkness.” And this one just be like prison.

So when and how Jesus take preach to this “spirits for prison”? Peter write say this one happen after God resurrect Jesus as spirit. (1 Pet. 3:18, 19) Still remember say Peter talk say Jesus “preach”! The way Peter write-am for this verse show say this thing don happen before e write wetin dey this verse. E be like say na small time, after Jesus resurrect, e tell this wicked angels the kind punishment wey they go receive. The preaching wey Jesus preach to them no be to tell them say them get hope. But na judgement message e preach to them. (Jonah 1:1, 2) Jesus get the power to condemn this wicked spirits because e don show strong faith, e hold Jehovah tight reach the end, and now Jehovah don resurrect Jesus. This one don show say Satan no get power to control Jesus.—John 14:30; 16:8-11.

For future, Jesus go chain Satan and all the wicked spirits and throw them inside abyss. (Luke 8:30, 31; Rev. 20:1-3) Until that time, this wicked angels go dey inside the “thick darkness” wey God put them. And they no go ever escape their destruction.—Rev. 20:7-10.

(1 Peter 4:6) Inshort, na e make they still preach the good news to dead people, so that even though people judge them because of how they see them, God go see say them dey alive because them dey live their life as people wey the spirit of God de direct.

w08 11/15 21 ¶8

Lesson From the Book of James and of Peter

4:6—Which people be the ‘dead people wey they preach the good news to’? This na the people wey God be see as dead people because before they learn the truth, sin de control them. (Eph. 2:1) But after they put faith for the good news, God start de see them as people wey dey alive.

OCTOBER 28–NOVEMBER 3

FINE-FINE LESSON FROM BIBLE | 2 PETER 1-3

“Always Remember Say the Day of Jehovah De Come”

(2 Peter 3:9, 10) Jehovah no dey slow about wetin e promise, as some people think. But e dey patient with wuna because e no want destroy anybody. Instead, e want make everybody repent. ¹⁰ But the day of Jehovah go come like thief. That day the heavens go pass comot with loud noise, but because the things for heaven and earth really hot, they go melt, and the earth and things wey people de do for the earth go open.

w06 12/15 27 ¶11

Jehovah No Go Allow E People Suffer Forever

¹¹ So wetin Jesus mean when e talk say Jehovah go make sure e people get the correct judgement “quick-quick”? Bible show say even though Jehovah really dey patient, e no go delay to destroy wicked people when the time reach. (Luke 18:7, 8; 2 Peter 3:9, 10) For example, Jehovah no waste time to destroy wicked people with heavy rain for the time of Noah. Na the same thing happen for the time of Lot. Jehovah use fire from heaven destroy wicked people that time. And Jesus talk say na the same thing go happen when e go come destroy wicked people for our time. (Luke 17:27-30) That time too, the destruction of wicked people, “go just come quick-quick.” (1 Thessalonians 5:2, 3) So, make we always get-am for mind say Jehovah no go leave this wicked world make e stay pass the time wey e suppose destroy-am.

(2 Peter 3:11, 12) Since na like this all this things go melt, wuna no suppose de think about the kind people wey wuna be? Whether wuna de live clean life and de worship God well ¹² as wuna de wait and de always remember say the day of Jehovah de come? That day heaven go burn for fire and the things for heaven and earth go melt because of the strong heat.

w06 12/15 19 ¶18

“The Time Wey Jehovah Go Destroy Wicked People Don Near”

¹⁸ No wonder apostle Peter advice us say make we de always remember say “the day of Jehovah de come.” How we fit do this one? Number one, na to “de live clean life and de worship God well.” (2 Peter 3:11, 12) When we de do this things, e go make us de happy say small time, that day go come. The Greek word wey we translate as “always remember,” mean to make something “happen quick-quick.” We no fit do anything to make that day come quick-quick. But, when we de busy de work for Jehovah, that day go be like say e come quick-quick.—1 Corinthians 15:58.

Fine-Fine Things Wey You See for Bible

(2 Peter 1:19) Na e make we really dey sure say everything wey God talk go happen. And e dey important make wuna de think about this things. Make e dey wuna heart like lamp wey de shine for dark place, until day break and the morningstar come out.

w08 11/15 22 ¶2

Lesson From the Book of James and Peter

1:19—Na who be the “morningstar,” which time e come out and how we know say this one don happen? The morningstar na Jesus Christ when e don begin rule as King. (Rev. 22:16) Na for 1914, Jesus come out or start to rule as King of the Kingdom of God, and this one mark the new beginning. When Jesus dey this earth, e take three of e disciples go ontop mountain and show them vision of the kind power and glory wey e go get as King for the Kingdom of God. This vision really show say we fit trust everything wey God talk say go happen. When we de think about the meaning of this things, e go make us de live the kind life wey Jehovah want. And na this one go show say we really believe say the morningstar don come out.

(2 Peter 2:4) True-true, God no leave the angels wey sin make they go free. But, e punish them. E throw them inside Tartarus and chain them for thick darkness until when e go destroy them.

w08 11/15 22 ¶3

Lesson From the Book of James and Peter

2:4—Wetin be “Tartarus,” and which time they throw the bad angels for there? Tartarus just be like prison. But na only demons God put for there, no be people. This Tartarus no be ordinary prison, but na the condition wey God put them so that they no go ever fit understand the fine-fine things wey e don arrange to do. The demons wey God put for this condition no get hope at all. Na for the time of Noah, God put them for there. And na so they go dey, until God destroy them.