Study Book for Our Life and Preaching Meeting
FEBRUARY 3-9
FINE-FINE LESSON FROM BIBLE | GENESIS 12-14
“The Promise Wey Jehovah Make to Abraham—How E Concern You?”
(Genesis 12:1, 2) Then Jehovah tell Aʹbram say: “Comot from your country and leave your family people and the house of your papa and go the country wey I go show you. 2 I go make you become big nation, and I go bless you, and I go make people know your name, and you go be blessing to other people.
it-1 522 ¶4
Agreement
Agreement With Abraham. The agreement wey Jehovah make with Abraham start to work when Abram (Abraham) cross river Euphrates as e de go Canaan. After 430 years, Jehovah make another agreement with Israel people say they go obey e Law. (Ga 3:17) When Abraham dey Ur for Chaldea, wey dey Mesopotamia, Jehovah tell Abraham say make e travel go the country wey e go show-am. (Ac 7:2, 3; Ge 11:31; 12:1-3) Israel people stay for land of Canaan and Egypt for 430 years. Exodus 12:40, 41 (LXX) talk say na the “very day” wey e complete 430 years, Israel people comot as slave for Egypt. This one happen for Nisan 14, 1513 B.C.E. That day, Jehovah bring e people out from Egypt, and na that day them start the Passover celebration. (Ex 12:2, 6, 7) This one de show say na Nisan 14, 1943 B.C.E., Abraham cross river Euphrates, as e de go Canaan. And e clear say na that time the agreement wey Jehovah make with Abraham, start to work. Jehovah still appear to Abraham again when e don reach Shechem wey dey the land of Canaan. But this time Jehovah make the promise big pass as e dey before. E tell Abraham say: “I go give this land to your pikin.” So, Jehovah show say this promise connect with the one wey e make for Genesis 3:15. And e still show say the “pikin” wey Genesis 3:15 talk about, go come from the family of Abraham. (Ge 12:4-7) After, Jehovah add other things join for this promise for Genesis 13:14-17; 15:18; 17:2-8, 19; 22:15-18.
(Genesis 12:3) I go bless the people wey go bless you, and I go curse anybody wey go curse you, and all family for this earth go surely get blessing because of you.”
w89 7/1 3 ¶4
Why E Dey Important Make You Know the Truth About Abraham?
This promise go don really surprise Abraham, and God repeat this promise to Abraham at least two times again. (Genesis 18:18; 22:18) One thing wey Jehovah go do to make sure say this promise happen, na to resurrect people from different-different family wey no de exist again. This people wey Jehovah go resurrect go really enjoy life. Why? Because that time this earth go just dey the way e first dey when God make Adam and Eve. After that one, they go learn wetin they go do to live forever.—Genesis 2:8, 9, 15-17; 3:17-23.
(Genesis 13:14-17) After Lot don go, Jehovah tell Aʹbram say: “Abeg, raise your head up and from the place wey you dey, look north, south, east and west, 15 because I go give you and your pikin all this land wey you de see, as wuna own, forever. 16 And I go make your pikin plenty like sand-sand for this earth, so that if anybody fit count the sand-sand wey dey this earth, then e go fit count all your pikin. 17 So now, make you travel go all part of the land, because I go give you this land.”
it-2 213 ¶3
Law
Because of wetin they write about how people for olden days de hand over land to person wey want buy-am, some professors believe say, they go first show the person the whole land and all the boundary. They go stand for high place show the person the land, and when the person talk say “I don see-am,” e show say e don agree to buy the land. When Jehovah tell Abraham say e go get the land of Canaan, e first show Abraham the whole land. But Abraham no talk say, “I don see-am.” Why? E fit be because Jehovah talk say e go give the land to Abraham pikin, after. (Ge 13:14, 15) Na Moses Jehovah choose to represent the people of Israel. So, Jehovah show Moses the land wey e promise say e go give them. If wetin this professors believe, correct, then e mean say as Jehovah show Moses the land, e don already hand over the land to Israel people. And na Joshua go lead them to take the land. (De 3:27, 28; 34:4; still think about wetin Satan tell Jesus for Mt 4:8.) Another thing wey de show say they don hand over land to person na, when the person waka for all corner for the land because e want take over the land. (Ge 13:17; 28:13) Wetin they write for some olden days document, show say any time wey they want sell land, they go write down the number of trees wey dey the land.—Compare Ge 23:17, 18.
Fine-Fine Things Wey You See for Bible
(Genesis 13:8, 9) So Aʹbram tell Lot say: “Abeg, make me and you no quarrel, and make the people wey de care for your animals and my own no quarrel, because we be brothers. 9 Abeg, look the whole land, and choose where you go go, because e go better make we separate. If you go left, then I go go right; but if you go right, then I go go left.”
w16.05 5 ¶12
Make Wuna Use Love Solve Problem
12 Bible de teach us how we fit make peace when we get problem with people. One example for Bible na the story of Abraham and Lot. As Abraham get plenty animal na so Lot still get. The people wey de help them care for their animal start to quarrel among theirself because land wey all the animal go chop grass from, no plenty. Abraham no like the quarrel, so e tell Lot make e first choose land wey e go carry e family and animals go. (Gen. 13:1, 2, 5-9) Abraham really show good example. Na peace e want, no be wetin e go gain. Jehovah leave Abraham make e suffer because say Lot choose the best land? No. Just after this thing happen between Abraham and Lot, Jehovah promise say e go really bless Abraham. (Gen. 13:14-17) Jehovah no go ever leave e servants make they suffer forever because say they use love solve problem wey they get with person.
(Genesis 14:18-20) And Mel·chizʹe·dek king of Saʹlem and priest of the Most High God, bring out bread and wine. 19 Then e bless [Aʹbram] and talk say: “Make the Most High God wey make heaven and earth, bless Aʹbram; 20 And make the Most High God receive all the praise, because e don help you win all your enemy!” And Aʹbram give [Melchizedek] one tenth of everything.
(Hebrews 7:4-10) True-true, this man na really important person! Na e make even Abraham the head of the family, give this man one tenth of the best things wey e get from the war. 5 Na true say the Law command the sons of Levi, wey they appoint as priest to take tithe from Israel people, even though Israel people na their brothers and still be children of Abraham. 6 But this man wey no come from the family of Levi, take tithe from Abraham and e bless [Abraham] the person wey God don promise say e go bless. 7 Now e clear say na person wey de give blessing, high pass the person wey de receive the blessing. 8 And for the first case, na people wey de die, de take tithe, but for the other one, na person wey they don talk say e still dey alive. 9 And we fit even talk say Levi, wey de collect tithe, still pay tithe through Abraham, 10 because e still dey inside [Abraham], e great grandpapa when Melchizedek meet [Abraham].
it-2 683 ¶1
Priest
Melchizedek na king of Salem and na priest (ko·henʹ). But e no be like other priests. Bible no talk about e family, when they born-am or when e die. E no be priest because e papa na priest. And e no take over this position from person and nobody take over from-am. Melchizedek na king and priest at the same time. E high pass all the priest wey come from the family of Levi. Bible talk say when they never born Levi, Abraham, Levi great grandpapa, pay tithe to Melchizedek. So, e just be like say na Levi pay the tithe to Melchizedek. And Melchizedek bless Abraham for wetin e do. (Ge 14:18-20; Heb 7:4-10) So, Melchizedek de represent Jesus Christ. Bible even talk say Jesus na ‘priest like Melchizedek and e go be priest forever.’—Heb 7:17.
FEBRUARY 10-16
FINE-FINE LESSON FROM BIBLE | GENESIS 15-17
“Why Jehovah Give Abram and Sarai Different Name?”
(Genesis 17:1) The time wey Abram dey 99 years, Jehovah appear to [Abram] and talk say: “Na me be the Almighty God. Worship me with all your heart and always de do the correct thing.
it-1 817
Mistake, To De Look for People Their Mistake
But no be so e be for man, because man de make mistake for almost everything wey e de do. We carry sin and mistake from Adam. (Ro 5:12; Ps 51:5) But Jehovah wey no de make mistake, and wey get sorry-heart, really know everything about us, ‘e know say we be dust from ground.’ (Ps 103:13, 14) Because Noah obey and hold Jehovah tight, Jehovah talk say Noah dey “different from the people wey live that time.” (Ge 6:9) Jehovah tell Abraham say: “Worship me with all your heart and always de do the correct thing.” (Ge 17:1) Even though this two people no dey perfect and them die, Jehovah wey de see wetin dey person heart, see them as people wey de always do the correct thing. (1Sa 16:7; compare 2Ki 20:3; 2Ch 16:9.) Jehovah tell the nation of Israel say make them no do bad things as them de worship Jehovah. (De 18:13; 2Sa 22:24) Jehovah send e Son wey no get mistake (Heb 7:26), make e come die for us. Because of this one, anybody wey obey and put faith for the Son, God go see the person as person wey dey righteous or person wey de always do the correct thing. Even with this one, na Jehovah still be the God wey no de make mistake and wey de judge well.—Ro 3:25, 26; go check INTEGRITY; PERFECTION.
(Genesis 17:3-5) As Abram hear this one, e lie down face ground, and God continue de talk with [Abram] say: 4 “See, I don make agreement with you and you go really be papa of plenty nation. 5 Your name no go be Abram again but your name go be Abraham, because I go make you papa of plenty nation.
it-1 31 ¶1
Abraham
Plenty years don pass, and Abraham and Sarah don dey for Canaan for about ten years, but Sarah never still born pikin. So Sarah tell Abraham say make e sleep with Hagar wey be e servant from Egypt, so that e go born pikin for Sarah. Abraham agree. So for the year 1932 B.C.E., Hagar born Ishmael, and that time, Abraham dey 86 years. (Ge 16:3, 15, 16) After plenty years again, for the year 1919 B.C.E., when Abraham dey 99 years, Jehovah tell Abraham make e do something wey show say the special promise to Abraham still dey. E tell Abraham say make e circumcise all the men wey dey e house. Jehovah still change e name from Abram to Abraham because e go make Abraham “papa of plenty nation.” (Ge 17:5, 9-27; Ro 4:11) After small time, three angels visit Abraham, and e welcome them well as na Jehovah send them. The angels promise say Sarah go get belle and born boy before one year!—Ge 18:1-15.
(Genesis 17:15, 16) Then God tell Abraham say: “As for your wife Sarai, make you no call-am Sarai again, because now e name na Sarah. 16 I go bless-am, and e go born boy for you; I go bless-am and e go come be nations; kings go come from-am.”
w09 2/1 13
E Matter Wetin Your Name Mean?
Because of wetin God don arrange to do for future, e change some mature people name. For example God change the name of Abram wey mean “Papa Don Get Praise,” to Abraham wey mean “Papa of plenty people.” Abraham really become papa of plenty nation, just as e name mean. (Genesis 17:5, 6) Still think about Sarai wey be Abraham wife. The name Sarai mean “Quarrel-quarrel.” How you think say e go feel when God change e name to Sarah, wey mean “Princess”? This one show say e children-children, go become kings.—Genesis 17:15, 16.
Fine-Fine Things Wey You See for Bible
(Genesis 15:13, 14) Then God tell Abram say: “Make you know say your pikin them go be strangers for land wey no be their own and the people for the land go make them slave and suffer them for 400 years. 14 But I go judge the nation wey go make them slave, and after that one, them go comot from the land with plenty good things.
it-1 460-461
The Way Things Happen One By One
Jehovah tell Abram (Abraham) say: “Make you know say your pikin them go be strangers for land wey no be their own and the people for the land go make them slave and suffer them for 400 years.” (Ge 15:13; still check Ac 7:6, 7.) Jehovah tell Abraham this thing before Sarah born the pikin wey Jehovah promise Abraham. Hagar wey be Sarah servant from Egypt, born Ishmael for Abram for the year 1932 B.C.E. And Sarah born Isaac for the year 1918 B.C.E. (Ge 16:16; 21:5) Na the year wey Israel people comot from Egypt, their “suffer” end. (Ge 15:14) When you count 400 years go back from the year wey Israel people comot from Egypt e go take you to 1913 B.C.E. That time, Isaac dey around five years, and Ishmael dey around 19 years. And e be like say na that year Isaac stop to suck breast. And e don already become “stranger” for land wey no be e own. And the suffer wey God talk say the people of the land go suffer the children of Abraham, start when Ishmael start to de “laugh-laugh” Isaac. (Ge 21:8, 9) Even though for this our time, people fit talk say wetin Ishmael do to Isaac no mean anything, but the way people for that time see-am, really different. How we know this one? Na because of wetin Sarah do and because God agree with wetin Sarah talk, say make Abraham drive Hagar and Ishmael. (Ge 21:10-13) As them write wetin Ishmael do Isaac for Bible, e still show say na that time, the 400 years of suffer start, and e end when Israel people comot from Egypt.—Ga 4:29.
(Genesis 15:16) But them go come back to this place when e reach the fourth generation, because the time wey Amʹor·ites go receive their punishment, never reach.”
it-1 778 ¶4
Exodus
“When e reach the fourth generation.” Make we no forget say Jehovah tell Abraham say when e reach the fourth generation, e pikin them go return to Canaan. (Ge 15:16) From the time wey Jehovah agreement with Abraham start to work, go reach when Israel people comot from Egypt, na 430 years. And e pass four generations of Abraham children wey live that time. Evenself, wetin they write about people that time, show say them de live long. But na only 215 years Israel people live for Egypt. So how we fit calculate this four generation? Make we use the example of just one tribe of Israel calculate this ‘four generation’ from the time wey them enter Egypt. Make we use the tribe of Levi: (1) Levi born (2) Kohath; Kohath born (3) Amram; Amram born (4) Moses.—Ex 6:16, 18, 20.
FEBRUARY 17-23
FINE-FINE LESSON FROM BIBLE | GENESIS 18-19
“Jehovah Destroy Sodom and Gomorrah”
(Genesis 18:23-25) Then Abraham go near God and talk say: “You go really destroy righteous people together with wicked people? 24 What if 50 righteous people dey the city, you go still destroy them? You no go forgive the city because of the 50 righteous people wey dey there? 25 You no go ever think-am to kill righteous people together with wicked people. If you do like that, e mean say you don punish righteous people join wicked people. The Judge of the earth no go do the correct thing?”
w17.04 18 ¶1
“The Judge of the Earth” Go Do the Correct Thing All the Time
You wey be “judge of the earth no go do the correct thing?” (Gen. 18:25) Abraham use that question show say e really dey sure say na the correct thing Jehovah go do to Sodom and Gomorrah. Abraham know say Jehovah no go ever do wetin no correct. E no go ever destroy righteous person together with wicked person. Abraham no fit imagine say that kind thing fit ever happen. After about 400 years, Jehovah talk about e self say: “The Rock, mistake no dey wetin e de do because e de always do the correct thing. Na God wey no de fail person, wey no de ever do partial. E de do the correct thing and e way straight.”—Deut. 31:19; 32:4.
(Genesis 18:32) Finally e talk say: “Abeg Jehovah, make you no vex with me, just allow me talk one more time: What if na only ten people you see for there?” E answer say: “Because of the ten people, I no go destroy the city.”
Patience—E No De Tire to Get Hope
Na Jehovah be the number one example of patience, and na e example we go follow. (2 Pet. 3:15) Plenty times for Bible, Jehovah don show say e really dey patient. (Neh. 9:30; Isa. 30:18) For example, after Jehovah don decide say e go destroy Sodom, Abraham ask Jehovah question many times about the thing way Jehovah don already decide. But, wetin Jehovah do? First of all, Jehovah allow make Abraham talk. E dey patient and listen to all the question wey Abraham de ask and the way e de feel. Jehovah show say e listen because e repeat everything wey Abraham talk. And e promise Abraham say e no go destroy Sodom, even if na only ten people dey righteous for there. (Gen. 18:22-33) Jehovah dey patient, e de always listen, and e no de vex anyhow! This one na correct example wey we go copy.
(Genesis 19:24, 25) And Jehovah make sulfur and fire fall for Sodom and Gomorrah like rain—Na Jehovah send-am from heaven. 25 So e destroy all the city, yes, e destroy the whole area and everybody wey dey all the city, go reach the plants.
w10 11/15 26 ¶12
Na Jehovah Be the King Wey Get the Right to Rule!
12 We dey sure say Jehovah go soon show e power so that people go know say na e get the right to rule. E no go leave wicked people, e go destroy them. And now, we know say we don de live for the last days. But how we know say Jehovah go destroy wicked people? (1) Jehovah destroy wicked people for the time of Noah. (2) E destroy Sodom and Gomorrah. (3) E destroy Pharaoh and e army. (4) E destroy Sisera and e army. (5) E destroy Sennacherib and 185,000 soldiers of Assyria. (Gen. 7:1, 23; 19:24, 25; Ex. 14:30, 31; Judg. 4:15, 16; 2 Ki. 19:35, 36) So we really dey sure say Jehovah go destroy all the people wey no get respect for e name and wey dey do wicked things to e servants. And now things wey de happen de show say Jesus don de rule for heaven and say this wicked world go soon end.—Matt. 24:3.
Fine-Fine Things Wey You See for Bible
(Genesis 18:1) After, Jehovah appear to [Abraham] for where the big-big tree of Mamre dey. That time, [Abraham] sitdown near the door of the tent and na the time of the day wey sun de really hot.
(Genesis 18:22) So the men comot from there and they waka go the side wey Sodom dey. But Jehovah stay with Abraham.
w88 5/15 23 ¶4-5
Anybody Don Ever See God?
Now we fit understand why Abraham talk with the angel wey represent Jehovah, like say na Jehovah e de talk with direct. As e be say na the exact thing wey God want tell Abraham the angel talk, and as na Jehovah the angel de represent, na e make Bible talk say “Jehovah appear to [Abraham.]”—Genesis 18:1.
No forget say just as phone or radio fit carry exactly wetin we talk to the person wey we de talk with, na so angels fit carry message from God to the people wey God want talk to. So this one make-am clear say Abraham, Moses, Manoah, and other people talk with angel like say na God them de talk with. Even though the people wey the angel appear to fit see the angel and the glory of God wey the angel carry, they no fit see God. So e dey clear say as apostle John talk say “no man don ever see God,” na really true. (John 1:18) So na the angel wey God send, them see, no be God.
(Genesis 19:26) But the wife of Lot dey back. So e start to de look back and turn to pillar of salt.
Help Other People Manage Stress
3 The decision wey Lot make dey bad. Na Lot decide to live for the place wey people of Sodom de live. The character of the people for the place too dirty. (Read 2 Peter 2:7, 8.) Money dey the place, but Lot face different-different problem because e move go there. (Gen. 13:8-13; 14:12) Maybe the wife like the city or some of the people for the place, and because of this one e no obey Jehovah. The wife of Lot die when God use fire and sulfur destroy the place. And what about the two daughter wey Lot get? The men wey they want marry, die for Sodom. Lot lose the house wey e de stay and e property. Apart from that one, e lose e wife, and na this one pain pass any other thing. (Gen. 19:12-14, 17, 26) For this time wey things hard for Lot, you think say Jehovah stop to dey patient with Lot? No.
FEBRUARY 24–MARCH 1
FINE-FINE LESSON FROM BIBLE | GENESIS 20-21
“Jehovah De Always Do Wetin E Promise”
(Genesis 21:1-3) Jehovah remember Sarah just as e don talk, and Jehovah do wetin e don promise Sarah. 2 So Sarah get belle and e born boy pikin for [Abraham] for the time wey Jehovah promise, even as Abraham don old. 3 Abraham name the boy pikin wey Sarah born for-am, Isaac.
wp17.5 14-15
God Call Sarah “Princess”
As Sarah laugh, e mean say e no get faith? No! Bible talk say: “Because Sarah get faith, e get belle even though e don pass the age wey woman de get belle, because e trust say God wey make the promise must do-am.” (Hebrews 11:11) Sarah really know Jehovah, e know say Jehovah no de fail to do wetin e promise. Who no go like get that kind faith? So make we do our best to really know the God of the Bible. Na that time e go really dey clear to us why Sarah get the kind faith wey e get that time. Jehovah na God wey we really fit trust because e de always do anything wey e promise—sometimes, the way Jehovah go do-am, fit really surprise us and make us laugh!
DO WETIN YOUR WIFE TALK
When Sarah dey 90 years e finally get wetin e don de pray for, from e young age. When Abraham dey 100 years, Sarah born boy for-am. Abraham name the boy Isaac, wey mean “Laugh,” just as Jehovah say make e name the boy. Even though Sarah don old, we fit imagine the fine smile wey go dey e face when e talk say: “God don give me wetin go de make me laugh; anybody wey hear-am go laugh with me.” (Genesis 21:6) This gift from Jehovah really make Sarah happy for the rest of e life. But e still give Sarah serious work.
When Isaac dey five years, the family do small occasion to show say Isaac don stop to suck breast. But no be everybody for the house happy for the occasion. Bible talk say Sarah “continue to see” one wicked thing wey Ishmael de always do. That time, Ishmael dey 19 years and e de always laugh-laugh Isaac. This one no be just joke or play-play. After plenty years, Jehovah make apostle Paul write say na suffer, Ishmael suffer Isaac. Sarah really understand wetin Ishmael do, e know say that kind thing na danger for the life of Isaac. Sarah know say Jehovah don keep special work for Isaac. So e gather courage and tell Abraham say make e drive Ishmael and Hagar e mama.—Genesis 21:8-10; Galatians 4:22, 23, 29.
Wetin Abraham do when e hear this one? Bible talk say: “Abraham no happy for wetin Sarah talk.” Because Abraham love e son Ishmael, e no see any reason why e go drive the pikin and e mama. But Jehovah see the problem so e tell Abraham say: “Make you no vex because of wetin Sarah de talk about the boy and your slave girl. Do wetin Sarah talk, because na from Isaac your children go come.” Jehovah still promise Abraham say e go care for Hagar and Ishmael. And Abraham do as Jehovah talk.—Genesis 21:11-14.
(Genesis 21:5-7) Abraham dey 100 years when [Sarah] born Isaac for-am. 6 Then Sarah talk say: “God don give me wetin go de make me laugh; anybody wey hear-am go laugh with me.” 7 And e still talk say: “Who for fit tell Abraham say, ‘Sarah go get e own children’? But now, I don born boy for [Abraham], for e old age.”
(Genesis 21:10-12) So e tell Abraham say: “Drive this slave girl and e son, because the son of this slave girl no go share from the things wey my son, Isaac go inherit!” 11 Abraham no happy for wetin [Sarah] talk. 12 Then God tell Abraham say: “Make you no vex because of wetin Sarah de talk about the boy and your slave girl. Do wetin [Sarah] talk, because na from Isaac your children go come.
(Genesis 21:14) So Abraham get up for early morning, e take bread and skin bottle wey water dey inside and give-am to Hagar. E put-am for Hagar shoulder and tell Hagar say make e and the boy go. So e go and start de waka-waka for inside the wilderness of Beersheba.
Fine-Fine Things Wey You See for Bible
(Genesis 20:12) Even self, na my sister e really be, na the same papa born us, but no be the same mama, so e come be my wife.
wp17.3 12, ftn.
“You Be Fine Woman”
Sarah na Abraham sister. Na Terah born the two of them, but no be the same mama born them. (Genesis 20:12) That time, person fit marry e sister but no be so e be now. E really dey important make we remember say that time different from this our time. People for that time, de live long because their time dey near the time of Adam and Eve. And brother and sister from the same family fit marry each other. This one no go put the life of the children wey they go born for danger, as e de happen this time. After about 400 years, people no come de live long life again. And na that time Jehovah give Israel people Law say make them no marry their family member again.—Leviticus 18:6.
(Genesis 21:33) Later e plant tamarisk tree for Beersheba, and for there, e call the name of Jehovah wey be the everlasting God.
w89 7/1 20 ¶9
Abraham Na Example for Anybody Wey Want Be Friend of God
9 Abram still do another thing show say e get faith. Bible talk say: “E build altar to Jehovah.” (Genesis 12:7) And e be like say e sacrifice animal for the altar, because the Hebrew word for altar mean “place wey them de do sacrifice.” Later, Abraham still show say e get faith when e build altar for other part of the land. Another thing wey e do be say “e call the name of Jehovah.” (Genesis 12:8; 13:18; 21:33) For Hebrew language, when they talk say person “call on the name” of another person, e mean say the person “make people know (preach) about the person.” The family of Abram and the people of Canaan fit don hear about the name of Jehovah from Abram. (Genesis 14:22-24) Na so e still be with everybody wey want be friend of Jehovah. They must call the name of Jehovah to show say they get faith. This one mean say they go preach to people. “This one na fruit wey our mouth de produce as sacrifice wey we de give God.” And na e we de use teach people about the name of God.—Hebrews 13:15; Romans 10:10.