Study Book for Our Life and Preaching Meeting
MAY 4-10
FINE-FINE LESSON FROM BIBLE | GENESIS 36-37
“The Brothers of Joseph Start to Jealous Joseph”
(Genesis 37:3, 4) And Israel love Joseph pass all e sons because na for old age e born Joseph, and e make special cloth for Joseph. 4 When e brothers see say their papa love Joseph pass all of them, they start to hate Joseph and na only quarrel them de quarrel with-am.
w14 8/1 12-13
‘Abeg Make Wuna Listen to This Dream’
Bible talk say: “When e brothers see say their papa love Joseph pass all of them, they start to hate Joseph and na only quarrel them de quarrel with-am.” (Genesis 37:4) We fit understand the reason why them de jealous Joseph, but e really bad as them allow this jealousy spoil their mind. (Proverbs 14:30; 27:4) You don ever vex because another person get something wey you think say na you suppose get-am? Remember the brothers of Joseph! Because of their jealousy, them do serious bad thing wey them regret after. Wetin them do na example for all Christian. We go really show say we get sense when we ‘de happy with people wey de happy.’—Romans 12:15.
Joseph know say e brothers hate-am. But, this one go make-am no wear the fine cloth wey e papa sew for-am? E fit be say this kind thing don come e mind. Remember say Jacob make this cloth as sign of e love and favor for Joseph. Joseph want do wetin go make e papa happy, so e continue to wear the cloth. Joseph show us good example. Even though say our Papa for heaven no de do partial, sometimes, e fit favor one of e servant pass others. Another thing be say, e want make we dey different from people for this wicked world wey don really spoil. Just like Joseph special cloth, our good character de make us different from people for this world. And when we dey different from them, e fit make them start de jealous us or even hate us. (1 Peter 4:4) Because of this one, we go start to do like them and hide our good character? No! We go do like Joseph and show our good character.—Luke 11:33.
(Genesis 37:5-9) After, Joseph dream one dream and e tell e brothers the dream, and they see another reason to hate Joseph. 6 E tell them say: “Make wuna listen to this dream wey I dream. 7 For that dream, we de gather wheat and de pack them together, and my own wey I don gather stand straight and wuna own stand round my own and wuna own bow down to my own.” 8 E brothers tell Joseph say: “You go really make yourself king over us and rule us?” So they see another reason to hate Joseph, because of e dream and the thing wey e talk. 9 After, Joseph still dream another dream, and e tell e brothers the dream: “I don dream another dream. For this one, sun, moon and 11 stars de bow down to me.”
(Genesis 37:11) And e brothers start to jealous Joseph, but e papa keep wetin Joseph don talk for mind.
w14 8/1 13 ¶2-4
‘Abeg Make Wuna Listen to This Dream’
Na Jehovah make Joseph dream the two dream. The two dream na about things wey go happen for future. And na message wey Jehovah want make Joseph tell people. So wetin Joseph go do, na wetin other prophets of God do many years after. This prophets tell the people of God wey no de obey e law, the judgment wey God go give them.
Joseph use respect tell e brothers say: “Make wuna listen to this dream wey I dream.” E brothers understand the dream, but they no like the dream at all. Them tell Joseph say: “You go really make yourself king over us and rule us?” Bible still talk about Joseph brothers say: “So they see another reason to hate Joseph, because of e dream and the thing wey e talk.” When Joseph tell e papa and brothers about the second dream, na the same thing still happen. Bible talk say: “E papa vex for Joseph and tell Joseph say: ‘Wetin be the meaning of this your dream? Me and your mama and your brothers go really come bow down to you?’” But Jacob their papa continue to think about-am. E mean say Jehovah de talk to the boy?—Genesis 37:6, 8, 10, 11.
Joseph no be the first or last servant of Jehovah, wey Jehovah send to tell people wetin go happen for future. And this kind message go make people vex and e fit make them suffer the prophet. Among all the prophets wey tell people this kind message, na Jesus be the number one. E tell e disciples say: ‘If they don suffer me, they go still suffer wuna.’ (John 15:20) All servant of Jehovah fit learn from Joseph as e no fear to do the right thing.
(Genesis 37:23, 24) As Joseph just come reach the place wey e brothers dey, they remove e cloth, the special cloth wey e de wear, 24 and they throw Joseph inside waterpit. This time the pit dey empty; water no dey inside.
(Genesis 37:28) And when business people from Midian de pass, they remove Joseph from the waterpit and sell-am to Ishmael people for 20 pieces of silver. This people carry Joseph go Egypt.
Fine-Fine Things Wey You See for Bible
(Genesis 36:1) This na the story of Esau, wey be Edom.
it-1 678
Edom
(Eʹdom) [Red], Children of Edom (Eʹdom·ites).
Na Edom be the second name wey them give Esau wey be Jacob twin brother. (Ge 36:1) Them start to call Esau that name the time wey e sell e birthright because of red stew. (Ge 25:30-34) And e come be say, when them born Esau, e body de red. (Ge 25:25) And this red color still dey part of the land wey Esau and e pikin them later stay.
(Genesis 37:29-32) Later when Reuben come back to the waterpit and see say Joseph no dey inside the pit, e tear e cloth. 30 When e go meet e brothers, e shout say: “The pikin no dey again! And me—wetin I go do?” 31 So they take the cloth of Joseph and kill one he-goat and put the cloth inside the blood. 32 After, they carry the special cloth to their papa and talk say: “See wetin we see. Abeg check whether this one na the cloth of your pikin or no be e cloth.”
it-1 561-562
Person Wey De Care for People or Things
When shepherd agree to keep or care for another person animals, e mean say the shepherd go answer if anything happen to the animals. And e de promise the person wey get the animals say e go feed the animals and people no go thief them. If somebody thief them, the shepherd go pay. But the Law wey Jehovah give them about this matter, show say when some kind things happen, the shepherd no go pay for the animals. For example, when bush animal kill or chop the animal, the shepherd no go pay. But before the owner of the animals go talk say the shepherd dey free, e must bring wetin go show say na bush animal chop-am. For example, e fit bring some part of the animal wey the bush animal chop remain. Then the owner go check-am and tell the shepherd say e dey free.
Na the same thing too if they say make person take care of any property, even for family. For example, na the senior son de take care of e brothers and sisters when their papa no dey with them. So e dey clear why Reuben wey be the senior son no want make anything happen to Joseph. When the other brothers talk say make them kill Joseph, Reuben talk for Genesis 37:18-30, say: “‘Make we no kill the boy. . . . Make we no troway blood. . . . Make we no harm Joseph.’” E plan na to save Joseph and take Joseph back to their papa. And when Reuben see say Joseph no dey inside the waterpit again, e really worry and “e tear e cloth,” and shout say: “The pikin no dey again! And me—wetin I go do?” E know say e go answer to e papa if Joseph no come back. To save Reuben from the trouble, them plan wetin go show say na animal for bush kill Joseph. How them do-am? Them soak Joseph special cloth for inside the blood of goat. When them reach house, them give the cloth to their papa. When e see the blood wey dey the cloth, e just talk say animal don kill Joseph. Na so Reuben take free from the trouble.—Ge 37:31-33.
MAY 11-17
FINE-FINE LESSON FROM BIBLE | GENESIS 38-39
“Jehovah No Ever Leave Joseph”
(Genesis 39:1) Ishmael people carry Joseph go Egypt and one Egypt man wey e name na Potiphar buy Joseph from them. Potiphar de serve for the palace of Pharaoh and na chief of all the bodyguard.
w14 11/1 12 ¶4-5
“How I Go Do This Kind Bad Thing?”
“Ishmael people carry Joseph go Egypt and one Egypt man wey e name na Potiphar buy Joseph from them. Potiphar de serve for the palace of Pharaoh and na chief of all the bodyguard.” (Genesis 39:1) Wetin this verse talk fit help us imagine the kind shame wey Joseph feel as them sell-am again. Now, e don be like ordinary property! E new master na one man from Egypt and e de work for Pharaoh palace. Just imagine as Joseph de follow this man for the busy streets for the big city. Now, them de go the place wey go be Joseph new house.
This house no just resemble Joseph papa house at all! Na for tent Joseph family de stay. And them de always move go different-different place because them get plenty sheep wey them de care for. But now for Egypt, Potiphar and other rich people de live for big house wey them paint with fine color. People wey de dig and find old-old things inside ground, talk say people for Egypt that time really like fine-fine garden. Their garden de get swimming pool, papyrus plant, lotus and other water-plant, with tall-tall tree wey fit block sun. And them go fence-am round. Some people de even build house inside garden. This kind house de get veranda, wey person fit sitdown enjoy fresh air, high window wey air go de pass enter the house, plenty room, big dining room and another side of the house wey servants de stay.
(Genesis 39:12-14) Then the woman hold the cloth of Joseph and talk say: “Sleep with me!” But Joseph leave e cloth for her hand and run go outside. 13 When the woman see say Joseph don leave e cloth for her hand and run go outside, 14 the woman start to cry and call the men for the house and talk say: “See! Wuna master bring this Hebrew man to make people laugh us. E come meet me to sleep with me, but I start to cry with all my voice.
(Genesis 39:20) So e master take Joseph and put Joseph for prison, the place wey them de keep the prisoners of the king, and Joseph remain there for the prison.
w14 11/1 14-15
“How I Go Do This Kind Bad Thing?”
We no know plenty things about the kind prison wey dey Egypt that time. But people wey de dig and find old-old things for ground, don see wetin remain from those kind prison. Things like, big-big house with small-small cell and underground prison. After, when Joseph de talk how the prison be, e describe the place as pit. This one mean say light no dey the place and no hope for person wey them put inside. (Genesis 40:15, footnote) The book of Psalms show say Joseph really suffer for the prison. E talk say: “Them chain e leg and neck with iron chain.” (Psalm 105:17, 18) Sometimes, when Egypt people no want make prisoner too de move, they go bend the prisoner hand go back and use iron, chain-am; or they go put iron chain round the prisoner neck. E clear say Joseph really suffer for that prison even though e no do any bad thing.
Another thing be say, Joseph no just suffer for small time. Bible talk say, “Joseph remain there for the prison.” E stay for that bad place for plenty years. Joseph no even know if e go ever come out. As time de go from days to weeks, and weeks to months, wetin help Joseph continue to trust Jehovah and no tire for life?
Bible talk say: “Jehovah continue to dey with Joseph and continue to show love wey e no de fail to Joseph.” (Genesis 39:21) So, no prison fence, chain or dark underground prison, fit ever make Jehovah no show us e love wey no de fail. (Romans 8:38, 39) We fit imagine how Joseph pray with all e heart to e Papa for heaven. And how Jehovah the “God of all comfort,” give Joseph peace of mind. (2 Corinthians 1:3, 4; Philippians 4:6, 7) Which other thing Jehovah do for Joseph? Bible talk say Jehovah continue to “make Joseph get favor from the chief officer of the prison.”
(Genesis 39:21-23) But Jehovah continue to dey with Joseph and continue to show love wey e no de fail to Joseph and make Joseph get favor from the chief officer of the prison. 22 So the chief officer of the prison make Joseph the head of all the prisoners for the prison, and na Joseph de control everything wey them de do for the prison. 23 The chief officer of the prison no worry at all about everything wey Joseph de control because Jehovah dey with Joseph and Jehovah make everything wey Joseph put hand to succeed.
w14 11/1 15 ¶2
“How I Go Do This Kind Bad Thing?”
Bible talk say: “Jehovah continue to dey with Joseph and continue to show love wey e no de fail to Joseph.” (Genesis 39:21) So, no prison fence, chain or dark underground prison, fit ever make Jehovah no show us e love wey no de fail. (Romans 8:38, 39) We fit imagine how Joseph pray with all e heart to e Papa for heaven. And how Jehovah the “God of all comfort,” give Joseph peace of mind. (2 Corinthians 1:3, 4; Philippians 4:6, 7) Which other thing Jehovah do for Joseph? Bible talk say Jehovah continue to “make Joseph get favor from the chief officer of the prison.”
Fine-Fine Things Wey You See for Bible
(Genesis 38:9, 10) But Onan know say the pikin no go be e own. So when e sleep with the wife of e brother, e waste e sperm for ground so that e no go born pikin for e brother. 10 Jehovah no like the bad thing wey e do, so Jehovah kill Onan too.
it-2 555
Onan
(Oʹnan) [from the original meaning “to fit born pikin; strong power”].
Onan na the second son of Judah. E mama na the daughter of one Canaan man wey e name na Shua. (Ge 38:2-4; 1Ch 2:3) Jehovah kill Er wey be Onan senior brother because of the bad thing wey e do. And Er no born any pikin before e die. So after e die, Judah wey be their papa tell Onan say make e marry Tamar, e brother wife. Na this one them de call brother-in-law marriage. If them born boy, e no go be Onan pikin but Er pikin. And na the boy go get the right of firstborn son and all the things wey suppose be Er own. But if them no born boy, na Onan go get all this things. So when Onan sleep with Tamar, e no allow e sperm enter inside Tamar. But e waste-am, e pour-am for ground. This thing wey Onan do different from person wey de play with e private part, because Bible talk say: “When e sleep with the wife of e brother,” e waste e sperm for ground. So, e clear say wetin Onan do no be mistake. E no gree make e sperm wey for make Tamar get belle, enter inside Tamar private part. Instead, e waste-am for ground. So, Jehovah kill Onan before e born any pikin because (1) e disobey e papa (2) e want get wetin no suppose be e own, and (3) e no get respect for Jehovah arrangement about marriage. No be because say e play with e private part.—Ge 38:6-10; 46:12; Nu 26:19.
(Genesis 38:15-18) When Judah see Tamar, e just feel say na prostitute, because Tamar don cover e face. 16 Because of this one, e go meet Tamar for the road and talk say: “Abeg, make I sleep with you” because e no know say na e daughter-in-law. But Tamar talk say: “Wetin you go give me so that you go sleep with me?” 17 Judah talk say: “I go give you one young goat from my plenty goat.” But Tamar talk say: “You go give me something to show say you go send the goat.” 18 Then e ask-am say: “Wetin you want make I give you?” Tamar talk say: “Your seal ring, your rope and your walking stick.” Then, e give her and sleep with her, and Tamar get belle for Judah.
w04 1/15 30 ¶4-5
Question Wey Some People Don Ask
Na bad thing Judah do as e no allow Shelah e son marry Tamar as e be promise. Another thing be say, e sleep with one woman wey e think say na temple prostitute. Wetin e do na sin against God because na only e wife e suppose sleep with. (Genesis 2:24) But the truth be say, the person wey Judah sleep with, no be prostitute. E no know say e don do the brother-in-law marriage wey Shelah suppose do as e sleep with Tamar. And na so e become the papa of the pikin them wey Tamar born.
And for Tamar side, wetin e do no be sin. People no see the two boys (twins) wey e born as children wey prostitute born. When Boaz wey come from Bethlehem marry Ruth wey come Moab, for brother-in-law marriage, the elders for Bethlehem talk good thing about Perez wey be Tamar son. They tell Boaz say: “Make the pikin wey Jehovah go give you from this young woman, make your family be like the family of Perez wey Tamar born for Judah.” (Ruth 4:12.) Perez dey among Jesus Christ great grand papa them.—Matthew 1:1-3; Luke 3:23-33.
MAY 18-24
FINE-FINE LESSON FROM BIBLE | GENESIS 40-41
“Jehovah Save Joseph”
(Genesis 41:9-13) Then the chief of the people wey de give wine to Pharaoh, talk say: “I de confess my sin today. 10 Pharaoh be vex with e servants. And e put me for jail for the house of the chief of all the bodyguard, me and the chief of the people wey de bake bread for the king. 11 Then the two of us dream for the same night. Our dream no be the same, and e get different meaning. 12 And one young Hebrew man dey with us for the prison, na servant of the chief of all the bodyguard. When we tell this young man our dreams e tell us the meaning of each dream. 13 And e happen just as the man tell us. They put me back for my office, but they hang the other man.”
w15 2/1 14 ¶4-5
“No Be God De Talk the Meaning of Dreams?”
The person wey de give Pharaoh wine, fit don forget Joseph, but Jehovah no ever forget-am. One night, Jehovah make Pharaoh dream two dream wey e no fit forget. For the first dream, Pharaoh see seven fine-fine fat cow wey de come out from River Nile, and seven wowo dry cow de follow them. Then the seven wowo cow, chop the seven fine-fine cow. After, Pharaoh dream again, for the dream, e see seven corn wey grow come out and produce seven fine-fine corn. But another seven wey don dry and wey de sick come out and chop the seven good ones. When Pharaoh wake up for morning, the dream really disturb-am, so e call all e wise men and magic priests make them interpret the dream. But all of them fail. (Genesis 41:1-8) Whether the dream confuse them sotey them no fit talk, or all of them de talk different-different thing, we no know. Wetin we know be say, them no fit tell Pharaoh the meaning of e dream even though say Pharaoh want know the meaning of e dream by all means.
At last, the man wey de give Pharaoh wine, remember Joseph! E mind really judge-am, so e tell Pharaoh about the young man wey e see for prison around two years ago. E tell Pharaoh how Joseph talk the meaning of e dream and the dream of the man wey de bake bread. At once, Pharaoh send them make them go bring Joseph come out from prison.—Genesis 41:9-13.
(Genesis 41:16) Then Joseph answer Pharaoh say: “No be me de do-am! Na God go talk wetin go happen to Pharaoh.”
(Genesis 41:29-32) “Plenty food go dey for everywhere for Egypt for seven years. 30 But after this years, seven years of hunger go come, and they no go remember say food plenty for Egypt before, and the hunger go finish the land. 31 And they go forget say plenty food dey before because of the hunger wey go dey after, the hunger go really dey serious. 32 Pharaoh dream two times because the true God dey sure about the matter, and na wetin the true God go soon do.
w15 2/1 14-15
“No Be God De Talk the Meaning of Dreams?”
Jehovah love people wey dey humble and wey de worship-am well. Na because of this one e help Joseph make e fit talk wetin the dream mean. But the wise men and priests no know wetin e mean. Joseph tell Pharaoh say the two dream mean the same thing. As Jehovah make Pharaoh see the dream two times, e mean say wetin the dream mean, must happen, nothing fit stop-am. The seven fat cow and the seven fine-fine corn, mean say for seven years, food go plenty for Egypt. But the seven wowo cow and the seven dry corn, mean seven years of hunger wey go start after the seven years of plenty food. The hunger go finish all the plenty food for the land.—Genesis 41:25-32.
(Genesis 41:38-40) So Pharaoh ask e servants say: “Another person dey wey get the spirit of God like this man?” 39 Then Pharaoh tell Joseph say: “Since God don make you know all this things, nobody dey wey get sense and fit care for things like you. 40 Na you go de control my house and all my people go obey everything wey you talk. Na only because I be king I go get power pass you.”
w15 2/1 15 ¶3
“No Be God De Talk the Meaning of Dreams?”
Pharaoh do as e promise. Quick-quick, them wear Joseph fine cloth. Pharaoh give Joseph golden necklace, ring wey e de use as stamp, and chariot wey king de use. E still give Joseph the right to travel round Egypt and start to make plan for the seven years of plenty food. (Genesis 41:42-44) Just one day, Joseph don comot from prison and e don enter palace. That morning, na inside prison e wake up, but now e go sleep as second person to Pharaoh. E really clear say Joseph really put faith for Jehovah! Jehovah see all the suffer wey Joseph don suffer for plenty years. And Jehovah handle the problem for the correct time and the correct way. No be only to end Joseph suffer Jehovah want, e still want protect the future of the nation of Israel. For the article wey de come for future, we go see how Jehovah do-am.
Fine-Fine Things Wey You See for Bible
(Genesis 41:14) So Pharaoh say make they bring Joseph, and they no waste time to bring Joseph from prison. Joseph shave and change e cloth and go see Pharaoh.
w15 11/1 9 ¶1-3
You Know?
Why Joseph shave all e hair before e go meet Pharaoh?
The book of Genesis talk say Pharaoh tell e servants say make them go bring Joseph from prison quick-quick, so that e go talk wetin the dream mean. And by this time, Joseph don de prison for plenty years. Even though Pharaoh want see Joseph quick-quick, Joseph still take e time shave. (Genesis 39:20-23; 41:1, 14) As the person wey write this Bible verse talk about this thing wey Joseph do, e show say e really know the culture of Egypt people.
Plenty people for the time of Joseph de allow their beard-beard for chin grow, even Jacob and e people. But as one book talk, na only the people of Egypt no de allow their beard-beard for chin, grow that time. (McClintock and Strong’s Cyclopedia of Biblical, Theological, and Ecclesiastical Literature.)
Na only beard-beard for chin Egypt people that time de shave? One magazine wey the name na Biblical Archaeology Review, talk say for some tradition of Egypt people, person wey want go meet Pharaoh, go need to arrange e self like say e de go inside temple. This one go mean say Joseph go don shave all the hair for e head and body.
(Genesis 41:33) “So make Pharaoh look for somebody wey get sense and wey fit take care of things and put the man to control things for the land of Egypt.
w09 11/15 28 ¶14
Servants of Jehovah De Respect People
14 Papa and mama wey be servant of Jehovah for Bible time de make sure say them teach their pikin how to respect people. Think about the good way Abraham and e pikin Isaac talk with each other for Genesis 22:7. Even Joseph show say e papa and mama really train-am well. When them put Joseph for prison, e treat other people for there with respect. (Gen. 40:8, 14) The way Joseph talk with Pharaoh show say e really know how to talk with person wey get high position.—Gen. 41:16, 33, 34.
MAY 25-31
FINE-FINE LESSON FROM BIBLE | GENESIS 42-43
“Joseph Really Control E Self”
(Genesis 42:5-7) So the sons of Israel join other people for road to buy food, because the hunger don even reach the land of Canaan. 6 Na Joseph de control everything for the land, and na e de sell food for all the people of the earth. So the brothers of Joseph come bow down for e front with their face for ground. 7 When Joseph see e brothers, e know who them be quick-quick, but e no tell them who e be. So e talk to them with vex say: “Which place wuna come from?” they talk say: “We come from the land of Canaan and we want come buy food.”
w15 5/1 13 ¶5
“I be God?”
But Joseph remember e brothers? Yes, as e see them, e just know who them be. Another thing be say, when e see e brothers de bow down to-am, e remember wetin e dream when e still be small boy. Bible talk say “Joseph quick-quick remember the dreams” wey Jehovah make-am dream, when e still be small boy. Jehovah use the dreams show say time de come when the brothers of Joseph go bow down to Joseph. And na wetin de happen now! (Genesis 37:2, 5-9; 42:7, 9) Wetin Joseph go do? E go welcome them or e go revenge?
w15 5/1 14 ¶1
“I be God?”
E fit be say the kind things wey happen to Joseph, no go ever happen to you. But, we don see say peace no dey plenty family today. When we get this kind problem for our family, our mind fit push us to do wetin we like. But e go better if we follow the example of Joseph. Make we try our best to understand wetin Jehovah want make we do. (Proverbs 14:12) Na true say e dey important to make peace with our family people. But the one wey dey important pass, na peace with Jehovah and Jesus.—Matthew 10:37.
(Genesis 42:14-17) Joseph tell them say: “As I don talk before, ‘wuna come because wuna want use cunny know how our land be!’ 15 I go test wuna. As long as Pharaoh still de alive, wuna no go leave this place until wuna small brother come here. 16 Make one of wuna go bring wuna small brother and the rest of wuna go dey here for prison. This one go show whether wetin wuna de talk na true. And if no be true, as long as Pharaoh still dey alive, e mean say wuna be want use cunny know how our land be.” 17 Then, e put all of them together for prison for three days.
w15 5/1 14 ¶2
“I be God?”
Joseph test e brothers to see whether they don change. E vex with them and talk say they come because they want use cunning see how the land of Egypt be. E talk this thing for Egypt language and another person interpret-am for them. But as they want defend theirself, them tell Joseph about their family. They even talk say their small brother de house with their papa. Joseph no let them know say e happy for wetin they talk. And because e want know whether Benjamin really dey alive, e tell them say: ‘I go test wuna. One of wuna go go bring wuna small brother.’ After, Joseph agree say e go leave them make them go bring their small brother, if one of them go gree stay for prison for Egypt.—Genesis 42:9-20.
(Genesis 42:21, 22) And they start to tell each other say: “Them de punish us because of the thing wey we do to our brother, because we see as e de cry de beg us to show pity, but we no listen. Na this one bring us this trouble.” 22 Then Reuben answer them say: “I no tell wuna say, ‘Make we no sin against the pikin,’ but wuna no listen? Now them de ask back e blood.”
it-2 108 ¶4
Joseph
Because of the things wey happen to the brothers of Joseph for Egypt, they come feel say God de punish them because they sell Joseph. For Joseph front, e brothers begin de blame theirself for wetin them do Joseph. But, they no know say na Joseph stand for their front. As Joseph hear the things wey them de talk, wey show say they don repent, e no fit bear-am again. So e comot from where them dey, go cry. When e come back, e chain Simeon and put-am for prison until they bring their small brother.—Ge 42:21-24.
Fine-Fine Things Wey You See for Bible
(Genesis 42:22) Then Reuben answer them say: “I no tell wuna say, ‘Make we no sin against the pikin,’ but wuna no listen? Now them de ask back e blood.”
(Genesis 42:37) But Reuben tell e papa say: “You fit kill my own two sons if I no bring back your son to you. Allow me make I take Benjamin, and I go bring-am back to you.”
it-2 795
Reuben
Reuben really show say e get some good character. When the other nine brothers want kill Joseph, e beg them say make them throw Joseph inside dry well. Wetin e get for mind, na to save Joseph. (Ge 37:18-30) More than 20 years after this thing happen, Reuben still remind e brothers say e no join them plan against Joseph. That time, them go Egypt go buy food, and the person wey dey in charge, talk say them use cunning come check how the land of Egypt be. So, the brothers start to blame theirself say na wetin them do Joseph, de make them suffer. (Ge 42:9-14, 21, 22) When Jacob no gree make Benjamin follow e brothers go Egypt, Reuben still show say e get good character. E tell their papa say: “You fit kill my own two sons if I no bring [Benjamin] back to you.”—Ge 42:37.
(Genesis 43:32) They serve Joseph for e own table and they serve e brothers for different table and the Egypt people with Joseph chop for different table, because according to Egypt people, na bad thing to chop food with Hebrew people.
w04 1/15 29 ¶1
Lesson From the Book of Genesis—II
43:32—Why Egypt people see-am as bad thing to chop with Hebrews? The main reason fit be say Egypt people de feel say their religion and where them come from, better pass other people own. Another thing be say, Egypt people hate people wey de care for sheep. (Genesis 46:34) Why? E fit be because for Egypt that time, them de see shepherds as people wey no be anything because they no get money. E fit still be say as farmland no too plenty, they hate anybody wey de find land where animals go chop from.