Study Book for Our Life and Preaching Meeting

MAY 3-9

FINE-FINE LESSON FROM BIBLE | NUMBERS 27-29

“Copy Jehovah Example​—No De Do Partial”

w13 6/15 10 ¶14

Love the Characters Wey Jehovah Get and Copy E Example

¹⁴ The five daughters of Zelophehad meet Moses and ask say: “Why the name of our papa go lost for e family because e no get son?” They beg Moses say: “Give us our papa land for the place wey e brothers get land.” You think say Moses talk say, ‘Na so the law talk, I no go fit do anything for wuna’? No, “Moses tell Jehovah about their matter.” (Num. 27:2-5) And wetin Jehovah do? Jehovah tell Moses say: “The daughters of Zelophehad correct. Make you no delay to give them the land wey their papa suppose get. E go be for where their papa brothers get land, and you must hand over the land to them.” Jehovah no just stop there, e make this thing become Law for Israel people. E tell Moses say: “If any man die and e no get son, wuna must make sure say e daughter get the land wey the man suppose get.” (Num. 27:6-8; Josh. 17:1-6) From that time, every woman for Israel wey face this kind problem go inherit e papa land.

w13 6/15 11 ¶15

Love the Characters Wey Jehovah Get and Copy E Example

¹⁵ This decision really show say Jehovah na God wey no de do partial. Jehovah treat the daughters of Zelophehad well, and with respect. Even though say they no get anybody to help them, Jehovah treat them the way e de treat other people. (Ps. 68:5) This na one of the plenty story for Bible wey show say Jehovah no de do partial, e de treat all e servants the same way.​—1 Sam. 16:1-13; Acts 10:​30-35, 44-48.

w13 6/15 11 ¶16

Love the Characters Wey Jehovah Get and Copy E Example

¹⁶ How we fit copy Jehovah as e no de do partial? Make we remember say, we go treat people without partial only if we believe say we suppose treat everybody for the same way. Na true say all of us fit de think say we no de do partial. But you go gree say sometimes e no really easy for us to know how we de treat other people. So how we fit really know if we de do partial? When Jesus want know who people de talk say e be, e ask e close friends say: “Who people de talk say the Son of man be?” (Matt. 16:13, 14) Make you do like Jesus. Ask person wey go fit tell you the truth whether you de do partial. But wetin you go do if the person tell you say you still de select the kind people wey you de do things with because of their tribe, position or wetin they get? Pray make Jehovah help you de treat people well. And beg-am make e help you change your character so that you go fit copy Jehovah as e no de do partial.​—Matt. 7:7; Col. 3:10, 11.

Fine-Fine Things Wey You See for Bible

it-2 528 ¶5

Offerings

Drink offering. For Israel that time, they be de give drink offering with other sacrifice, especially after they enter the Promise Land. (Nu 15:2, 5, 8-10) This drink offering na wine wey get alcohol and they go pour-am ontop altar. (Nu 28:7, 14; still check Ex 30:9; Nu 15:10.) Apostle Paul write to the brothers for Philippi say: “If them de pour me out like drink offering ontop sacrifice and the holy work wey wuna de do because of wuna faith, I de glad and I really happy with all of wuna.” As Paul use drink offering for this verse, e de talk about how e ready to do everything wey e fit do for other servants of Jehovah. (Php 2:17) Small time before apostle Paul die, e write to Timothy say: “They don already de pour me like drink sacrifice, and the time wey they go kill me don near.”​—2Ti 4:6.

MAY 10-16

FINE-FINE LESSON FROM BIBLE | NUMBERS 30-31

“Do Wetin You Promise”

it-2 1162

Vow (Promise)

No Be By Force, But Once You Vow You Must Do-am. They no de ever force person to make vow. But once person make vow, Jehovah law talk say e must do-am. Na e make Bible talk about vow as something wey person go use e life pay, if e no do-am. (Nu 30:2; still check Ro 1:31, 32.) Since person fit use e life pay if e no do wetin e vow, na e make Bible warn us say make we really think well before we make any vow. The Law wey Jehovah give e people talk say: “If you make vow to Jehovah, . . . [e] go surely want make you do-am, and if you no do wetin you vow, e go be sin for you. But if you no make any vow, you no go sin.”​—De 23:21, 22.

it-2 1162

Vow (Promise)

Vow na serious promise wey person make to God. The person fit promise to do something, to make sacrifice or give gift, to do some kind work for Jehovah or decide say e no go do some things wey Jehovah law no condemn. They no de force person to make vow, the person de do-am from e heart. Since vow na serious promise, e just be like when person swear or take oath about something. And sometimes, Bible de use vow and oath together. (Nu 30:2; Mt 5:33) The main thing about vow na to promise God or another person wetin you go do. But oath na the promise wey person de make say e go talk true for wetin e know about some matter. Plenty times people de take oath to show say they go follow agreement.​—Ge 26:28; 31:44, 53.

w04 8/1 27 ¶3

Lessons From the Book of Numbers

30:6-8​—Servant of Jehovah fit cancel the vow wey e wife make? For this our time, when person make vow to Jehovah, na between the person and Jehovah. For example, when person promise to use e life serve Jehovah, na between the person and Jehovah. (Galatians 6:5) No husband get right to cancel that kind vow. But make wife no make vow wey Bible no support or wey no go allow-am do wetin e suppose do for e husband.

Fine-Fine Things Wey You See for Bible

it-2 28 ¶1

Jephthah

They fit give person to Jehovah to work for e house. Papa or mama fit do this one. One example na Samuel. Before Hannah born Samuel, e promise to give Samuel to Jehovah to work for tabernacle. And Elkanah wey be Hannah husband support this vow. As Samuel stop to suck breast, Hannah take Samuel go tabernacle. Hannah still do animal sacrifice when e take Samuel go tabernacle. (1Sa 1:​11, 22-28; 2:11) Another pikin wey work as Nazirite of Jehovah na Samson.​—Jg 13:​2-5, 11-14; still check the right wey papa get to cancel e daughter vow as e dey Nu 30:​3-5, 16.

MAY 17-23

FINE-FINE LESSON FROM BIBLE | NUMBERS 32-33

“Drive All the People Wey De Stay for the Land”

w10 8/1 23

You Know?

Wetin be the “high place” wey plenty place for Bible talk about?

Small time before Israel people enter the Promise Land, Jehovah tell them say make they destroy all the place wey Canaan people de use worship their gods. Jehovah command them say: “Wuna must . . . destroy all their gods wey they use stone and iron make, and all the high place wey them de use worship their gods.” (Numbers 33:52) This high place wey the people de use worship their gods fit be ontop hill for open place. Or where they build to use worship their gods for other place, like under tree or inside city. (1 Kings 14:23; 2 Kings 17:29; Ezekiel 6:3) This high place them fit get altar, image, pillars or poles wey them de worship, where them de burn incense, and other things wey them de use for their worship.

w08 2/15 27 ¶5-6

Learn From the Mistakes Wey Israel People Make

Today, plenty of the problem wey we de face, just be like the ones wey Israel people face. For this our time, plenty things dey wey fit be like idol for person. E fit be money, people wey de act film, sports people, politicians, some leaders for religion, and even family members. Any of this things fit become the main thing for our life. If we become tight friend with people wey no love Jehovah, e fit spoil our friendship with Jehovah.

The main thing for Baal worship na sex wey Jehovah hate. Na this kind sex draw plenty Israel people and make them start to worship Baal. This kind thing still de happen to some of Jehovah people today. For example, when person dey alone for house with e computer, e fit go watch wetin go spoil e friendship with Jehovah. E go really bad if servant of Jehovah allow picture or film of naked people spoil e friendship with Jehovah.

it-1 404 ¶2

Canaan

Joshua show say e really get sense as e destroy Canaan people, just as Jehovah don command Moses. (Jos 11:15) But Israel people no follow Joshua good example. They suppose destroy all Canaan people because they don spoil the land, but they no do-am. As Israel people leave Canaan people to stay with them, e cause plenty problem for them. As time de go, this one make the number of Israel people wey die, plenty pass the number of Canaan people wey for die if to say Israel people kill all of them as Jehovah talk. This one no join for people wey die because of other bad things like sex wey God hate, and idol worship. (Nu 33:55, 56; Jg 2:1-3, 11-23; Ps 106:34-43) Jehovah don first tell Israel people say e no go ever do partial for e judgment. So if they become friends with Canaan people, de marry each other, de worship Jehovah and Baal together, and de follow their bad way of life, Jehovah go destroy them and drive them from the land just as e don talk say e go do Canaan people.​—Ex 23:32, 33; 34:12-17; Le 18:26-30; De 7:2-5, 25, 26.

Fine-Fine Things Wey You See for Bible

it-1 359 ¶2

Boundary

After they don throw lot to know the area wey each tribe go dey, the next thing na to decide how the land for each tribe go big reach. And na the number of people for each tribe go help them know the size of land wey the tribe go get. Numbers 33:54 talk say: “Wuna must throw lot to share the land as wuna property, tribe by tribe. The big tribe go get big portion of land, and the small tribe go get small portion of land. Anywhere wey the lot choose for them, na that part of land each tribe go get as their own.” They no ever change the area wey the lot don choose for any tribe, but they fit adjust the size of land wey the tribe get. Na e make when they see say the land wey the tribe of Judah get too big, they cut some part give tribe of Simeon.​—Jos 19:9.

MAY 24-30

FINE-FINE LESSON FROM BIBLE | NUMBERS 34-36

“Run to Jehovah for Protection”

w17.11 9 ¶4

You De Run to Jehovah for Protection?

⁴ If Israel person kill another person by mistake, how they go handle the case? Even though say e do-am by mistake, e don kill and the blood of the person dey e head. (Gen. 9:5) If this kind thing happen, Jehovah say make they pity for the person. The person fit run go one of the six city of protection so that the family member of the dead person, no go kill-am. And they go protect-am for there. The man wey kill person by mistake must stay for that city until the high priest die.​—Num. 35:15, 28.

w17.11 9 ¶6

You De Run to Jehovah for Protection?

⁶ When e reach the city of protection, e go first report the matter to the elders for the city gate. Then the elders must welcome the person well. (Josh. 20:4) After sometime, they go send the person back to the city where e kill person, and the elders for that city go judge the case. (Read Numbers 35:24, 25.) Na only when the elders don confirm say na really by mistake, the person go fit go back to the city of protection.

w17.11 11 ¶13

You De Run to Jehovah for Protection?

¹³ Once person don dey inside the city of protection, they no go kill-am. Jehovah don first tell them say this kind city go protect them. (Josh. 20:2, 3) Jehovah no want make they judge the person again for the same sin. Or make the family member of the person wey die, enter the city to kill the man. So, e no need to fear say they go kill-am for wetin happen. As far say e dey inside the city, Jehovah go protect-am and nobody go kill-am. The city no be prison. For there, e go fit work, help other people, and worship Jehovah with peace of mind. E fit dey happy for there and de enjoy e life.

Fine-Fine Things Wey You See for Bible

w91 2/15 13 ¶13

Jesus Sacrifice Na the Correct Sacrifice for Our Sin

¹³ Adam and Eve no go gain from the sacrifice of Jesus. For the law wey Jehovah give Moses, e tell Israel people say: “No take anything exchange the life of anybody wey suppose die because e kill person.” (Numbers 35:31) Satan no deceive Adam, na Adam choose to sin against God. (1 Timothy 2:14) So we fit talk say Adam kill e children because they get sin from Adam and now, them de die. So, e clear say Adam suppose die. As perfect man, na e choose by e self to disobey God. Since Jehovah na righteous God, e go dey against e law to forgive Adam because of the sacrifice of Jesus. As Jehovah use the sacrifice of Jesus pay for the sin of Adam, e save Adam children from death. (Romans 5:16) If we look-am from the side of law, we fit talk say Jehovah remove the power of sin and death from the root. Na e make as Jesus die, e use e life pay for the sin of all the children of Adam.​—Hebrews 2:9; 2 Corinthians 5:21; 1 Peter 2:24.

MAY 31–JUNE 6

FINE-FINE LESSON FROM BIBLE | DEUTERONOMY 1-2

“Wuna De Judge for God”

w96 3/15 23 ¶1

Jehovah Na Righteous God and E No De Do Partial

Jehovah don give elders for congregation the work to judge any case wey concern serious sin. (1 Corinthians 5:12, 13) When elders de judge, they must remember say Jehovah want make they judge for the correct way, and show pity if they see reason to show pity. But if the person no gree repent, they no go pity the person. Elders no de disfellowship person to suffer the person. Their hope na say e go help the person repent. (Still check Ezekiel 18:23.) As Jesus Christ de direct them, the elders de make sure say partial no dey for any case wey they judge. This one mean say they be like “place wey person fit hide from heavy breeze.” (Isaiah 32:1, 2) So elders must show say they no de do partial and them de reason well.​—Deuteronomy 1:16, 17.

w02 8/1 9 ¶4

Use All Your Heart Support People Wey Jehovah De Use Direct Us

⁴ But no be only to know the Law go help elders fit judge well. They need to dey careful because they no dey perfect. The sin wey dey their body fit make them de think about only theirself, do partial or get long throat. And this one fit make them no judge well. Moses tell them say: “Make wuna no ever do partial when wuna de judge any case. Make wuna listen to poor man the same way wuna go listen to big man. Make wuna no fear anybody because, wuna de judge for God.” True-true, the people wey judge for Israel, judge for Jehovah. This one na really serious work from Jehovah wey elders suppose do with fear and deep respect for God!​—Deuteronomy 1:16, 17.

Fine-Fine Things Wey You See for Bible

w13 9/15 9 ¶9

We Fit Trust the Laws Wey Jehovah De Give Us

⁹ When Israel people start the 40 years journey for wilderness, Jehovah no explain to them exactly how e go direct, protect and care for them. But e show them plenty times say e na God wey they fit trust. Jehovah use pillar of cloud for day time and pillar of fire for night direct them. E use this one show them say e de support them as the journey no easy. (Deut. 1:19; Ex. 40: 36-38) Jehovah still give them the things wey they need. “Their cloth no fade or tear, and their legs no swell.” True-true, Jehovah “give them the things wey they need.”​—Neh. 9:​19-21.

JUNE 7-13

FINE-FINE LESSON FROM BIBLE| DEUTERONOMY 3-4

“The Law of Jehovah Correct and E De Give Person Sense”

it-2 1140 ¶5

Understanding

When person take e time de study Bible and de do wetin e learn, e go make the person get sense and de understand things pass e teachers and even people wey old pass-am. (Ps 119:99, 100, 130; still check Lu 2:46, 47.) This one na because the Law of Jehovah de give person sense and help the person understand how Jehovah want make e de do things. Na e make Jehovah tell Israel people say if they follow all the things wey e tell them, people around them go see them as people wey get sense and wey understand how to do things well. (De 4:5-8; Ps 111:7, 8, 10; still check 1Ki 2:3.) Person wey understand the Word of God know say e no fit break the Law of Jehovah and go free. So, e go beg Jehovah to help-am fit follow the Law. (Ps 119:169) This kind person de allow wetin e learn from the Word of God touch e heart (Mt 13:19-23), e de follow this things for e life (Pr 3:3-6; 7:1-4), and this one go make the person hate all kind of bad things (Ps 119:104). When Jesus dey this earth, e show say e really understand the Word of God. E allow Jew people to kill-am so that wetin Bible talk go happen.​—Mt 26:51-54.

w99 11/1 20 ¶6-7

Who Fit Give Like Jehovah?

The queen of Sheba really surprise for the things wey e see and hear when e visit King Solomon for Jerusalem. E tell King Solomon say: “All this your servants wey always dey with you and de hear your word of wisdom, go really dey happy!” (1 Kings 10:​4-8) Queen of Sheba no talk say the servants of Solomon go happy because of the money and plenty good things wey them de enjoy. But because them de always hear the words of wisdom wey Jehovah give Solomon. The queen of Sheba na really good example for Jehovah people today, as we de enjoy the words of wisdom from Jehovah and Jesus Christ.

Another thing wey we suppose put for mind na the next thing wey the queen tell Solomon, e talk say: ‘Make Jehovah your God receive all the praise.’ (1 Kings 10:⁠9) E really dey clear to the queen of Sheba say the sense and all the good things wey Solomon get na from Jehovah. This na wetin Jehovah don first promise Israel people. E talk say if they obey e commandment, that one “go show people wey go hear about all this command, say [Israel people] get sense and de understand how to do things well. And the people go talk say, ‘True-true people from this nation really get sense and sabi how to do things well.’”​—Deuteronomy 4:​5-7.

w07 8/1 29 ¶13

Your Friendship With God Strong?

¹³ When Jehovah bless e people, e de always give them the best. (James 1:17) For example, the land wey Jehovah give Israel people, na “land wey milk and honey de flow for inside.” Na true say Israel people talk say the land of Egypt de flow with milk and honey. But the Promise Land wey Jehovah give them different from the land of Egypt for at least one important way. Moses tell Israel people say the Promise Land na ‘land wey Jehovah de take care of by e self.’ So, this one mean say Israel people go enjoy the land because Jehovah go de take care of them. All the time wey Israel people worship Jehovah the way e want, Jehovah really bless them. And the way they live their life really better pass all the people wey dey around them. True-true, na blessing from Jehovah de “make person rich”!​—Numbers 16:13; Deuteronomy 4:5-8; 11:8-15.

Fine-Fine Things Wey You See for Bible

w04 9/15 25 ¶3

Lessons From the Book of Deuteronomy

4:15-20, 23, 24​—This Law mean say person no fit make image to decorate e house? No. Wetin Jehovah talk be say make Israel people no make image for worship. Make they no bow down and worship any image. Bible no condemn to carve things or draw and paint things to decorate house. ​—1 Kings 7:18, 25.

JUNE 14-20

FINE-FINE LESSON FROM BIBLE | DEUTERONOMY 5-6

“Train Your Children to Love Jehovah”

w05 6/15 20 ¶11

Papa and Mama Give Your Children the Things Wey They Need

¹¹ Plenty times when we de talk about how papa and mama fit train their children to love Jehovah, na Deuteronomy 6:​5-7 we de read. Abeg open your Bible and read-am. You go notice say the place talk say make papa and mama first love Jehovah with all their heart. This one mean say they need to de study Bible well. They must de read Bible every time and de think about wetin they learn. This one go help them really understand and love the way Jehovah de do things, the laws wey e don give, and the reasons why e give the laws. E go still help them know plenty things for Bible wey go make them de happy, de fear Jehovah and love Jehovah. True-true, they go get many good things to teach their children.​—Luke 6:45.

w07 5/15 15-16

How I Fit Give My Children the Best Training?

Things wey dey important to you, wey you really like, and want get, de show for wetin you de talk and do. (Romans 2:21, 22) From when they small, children de learn from the things wey their papa and mama de do. Children de fit know wetin dey important to their papa and mama, and most times na this things go still dey important to them. If you really love Jehovah, your children go know. For example, if your children de see say you de read and study Bible, they go know say e dey important to you. They go come know say wetin dey important pass to you, na things wey concern the Kingdom. (Matthew 6:33) As you de attend meeting and de preach every time, e go show them say na the worship of Jehovah be number thing for your life.​—Matthew 28:19, 20; Hebrews 10:24, 25.

w05 6/15 21 ¶14

Papa and Mama Give Your Children the Things Wey They Need

¹⁴ As e dey for Deuteronomy 6:7, wuna fit use different-different time and way teach wuna children about Jehovah. Wuna fit do this one, when wuna de travel, de do some things for house together, or even when wuna just dey together de relax. This one no mean say na every time wuna go de talk about Bible. Instead, make the way wuna de talk with each other every day de show say wuna love Jehovah. For example, different-different topic dey inside Awake! wey wuna fit use discuss with wuna children. Wuna fit discuss topic wey concern animals wey Jehovah make, fine-fine place for this earth, and the different-different tradition and culture of other people. This kind discussion fit make your children start to read our publications more-more.​—Matthew 24:45-47.

Fine-Fine Things Wey You See for Bible

w19.02 22 ¶11

How the Law Show Say Jehovah Love People and De Treat Them Well

¹¹ Wetin we learn: Jehovah no de only see how person be for outside. E still de see wetin we really be for inside, or wetin dey inside our heart. (1 Sam. 16:7) No matter wetin we de think, no matter how we de feel, and no matter wetin we do, we no go fit hide-am from God. E de look for the good thing wey dey our heart, and e want make that good thing grow. But e want make we notice any bad thing wey de enter our mind and control-am before we put hand for the bad thing.​—2 Chron. 16:9; Matt. 5:27-30.

JUNE 21-27

FINE-FINE LESSON FROM BIBLE | DEUTERONOMY 7-8

“Make Wuna No Ever Make Any Marriage Agreement With Them”

w12 7/1 29 ¶2

Why Jehovah Want Make E People Marry Only Servants of Jehovah?

Jehovah know say Satan want make the nation of Israel start to worship other gods and spoil their friendship with Jehovah. Na e make Jehovah warn them say make they no form marriage agreement with people wey no de worship-am. E talk say: ‘They go make wuna sons stop to worship me and start to worship other gods.’ And many things fit spoil if Israel people start to worship other gods. Jehovah go stop to protect them because they no be e friends again. And this one go make-am easy for their enemy to fight against them and win them. This one go still make-am hard for the Messiah to come from their nation. So e really clear why Satan want make Israel people marry people wey no de worship Jehovah.

w15 3/15 30-31

Marry ‘Only Servant of Jehovah’​—This Advice Still De Work?

Even as e be, Jehovah don tell us for Bible say make we marry only people wey de worship-am. Why? Because Jehovah know wetin good for us. E want make we de happy. So e want protect us so that we no go make mistake wey go cause pain for us. For Nehemiah time, plenty Israel people marry women wey no de worship Jehovah. This one make Nehemiah talk about the bad example of King Solomon. E talk say, ‘Even though say Jehovah love Solomon, the women from other country wey e marry, make Solomon sin against Jehovah.’ (Neh. 13:23-26) So Jehovah don command us to marry only e servants because e know wetin good for us. (Ps. 19:7-10; Isa. 48:17, 18) We really de thank Jehovah for the better advice wey e de give us because e love us. As we de obey them, we de show say Jehovah na our King and say e get the right to tell us wetin to do.​—Prov. 1:5.

w15 8/15 26 ¶12

Choose Your Friends Well for This Time of the End

¹² Servants of Jehovah especially the ones wey don reach to marry, need to dey careful about people wey them de choose as friend. Bible don warn us say: ‘Make wuna no de join do things with people wey no de serve Jehovah like say wuna be the same. Na which business good and bad get? Or wetin concern light and darkness?’ (2 Cor. 6:14) Bible advice servants of Jehovah wey de find who they go marry, to marry only servant of Jehovah wey de follow wetin Bible talk. (1 Cor. 7:39) When we marry person wey really love Jehovah, we go get husband or wife wey go help us continue to hold Jehovah tight.

Fine-Fine Things Wey You See for Bible

w04 2/1 13 ¶4

Jehovah De Give Us Wetin We Need Everyday

⁴ As we de pray make Jehovah give us the things wey we need every day, we suppose de remember say we still need to learn about Jehovah every day. Even though say Jesus really hungry because e never chop for 40 days and 40 night, e no gree turn stone to bread. E tell Satan say: “Them don write-am say: ‘No be only food go give person life, but na all the things wey Jehovah talk with e mouth go give person life.’” (Matthew 4:4) Na wetin Moses tell Israel people, Jesus quote from. Moses tell them say: “[Jehovah] leave wuna make wuna hungry so that wuna go dey humble. Then e give wuna manna as food. The kind food wey wuna and wuna papa them never see before, so that wuna go know say no be only food person need to live but person still need every word wey de come from the mouth of Jehovah, to dey alive.” (Deuteronomy 8:3) The way Jehovah give Israel people manna make them get food to chop, and still teach them important lessons about their friendship with Jehovah. Number one, they go ‘pick manna wey each person go chop that day.’ If they gather manna wey pass wetin each person need for that day, the remaining one go spoil and start to smell. (Exodus 16:4, 20) But, this one no de happen for the sixth day when they go gather the food for that day and the next day, wey be Sabbath day. (Exodus 16:5, 23, 24) So the manna teach them say they must obey Jehovah, and say no be only food go keep them alive but na “every word wey de come from the mouth of Jehovah.”

JUNE 28–JULY 4

FINE-FINE LESSON FROM BIBLE | DEUTERONOMY 9-10

“Wetin Jehovah Your God Want From You?”

w09 10/1 10 ¶3-4

Wetin Jehovah Want From Us?

Wetin go make us de obey Jehovah from our heart? Moses talk something wey fit help us. E talk say: “Fear Jehovah your God.” (De 10:12) This one no be fear say Jehovah go punish us when we do bad. But na the fear or deep respect wey we get for Jehovah and the way e want make we de live our life. If we really de fear God, we no go want do anything wey e hate.

So, wetin suppose be the main reason why we de obey God? Moses talk say make we, ‘Love Jehovah and use all our heart worship Jehovah our God.’ (De 10:12) To love Jehovah no be just to get the feeling for our heart. One book talk say: “Sometimes for Hebrew language, the words wey them de use talk about “feeling” still mean to do something wey de show how we de feel.” This same book still talk say to love God mean say “we go do things wey show say we love” God. So, if we really love God, we go do things wey we know say go make God happy.​—Proverbs 27:11.

w09 10/1 10 ¶6

Wetin Jehovah Want From Us?

When we obey Jehovah from our heart, e go bless us. Moses write say: “Make wuna follow all the commandment from Jehovah wey I de command wuna today, so that things go better for wuna.” (De 10:13) True-true, na we go gain from everything wey Jehovah don tell us to do. And we expect-am to be like that because Bible talk say, “God na love.” (1 John 4:8) So, all the command wey Jehovah give us na to make our life better. (Isaiah 48:17) When we de do everything wey Jehovah want, that one go save us from plenty problem now. And for future, we go enjoy plenty blessing for the Kingdom.

cl 16 ¶2

You Fit Really Be Friend of God?

² Abraham na person wey really enjoy friendship with God. For Bible, Jehovah call Abraham “my friend.” (Isaiah 41:8) In fact, Jehovah see Abraham as e tight friend. Jehovah get this kind friendship with Abraham, because Abraham “put faith for Jehovah.” (James 2:23) Even today, Jehovah still de find people wey really love-am so that e go be their “tight friend.” (Deuteronomy 10:15) Bible encourage us say: ‘Make we come near God, and God go come near us.’ (James 4:8) For this verse, we go see say Jehovah de invite us to be e friend. And e promise us say if we do our best to be e friend, e go be our friend too.

Fine-Fine Things Wey You See for Bible

it-1 103

People of Anak

The people of Anak really tall and big. Na them be de stay for the area for Canaan wey mountains dey and some area wey near water, especially for the south side of Canaan. When Moses send the 12 spy to check the land of Canaan, three important people from the tribe of Anak be de stay for Hebron. Their name na Ahiman, Sheshai, and Talmai. (Nu 13:22) Na for Hebron, the 12 spy first see people from the tribe of Anak. Because of the way the people of Anak be, 10 spy give bad report wey make Israel people fear. They talk say this Anak people na children of the giant them wey live for the time of Noah. And say Israel people be like “grasshopper,” if you compare them with Anak people. (Nu 13:28-33; De 1:28) Because of their big size, them de use them describe the people of Emim and Rephaim wey be giant. And because of their power, people de use them make parable say: “Who go fit stand against the sons of Anak?”​—De 2:10, 11, 20, 21; 9:1-3.