Study Book for Our Life and Preaching Meeting
JULY 5-11
FINE-FINE LESSON FROM BIBLE | DEUTERONOMY 11-12
“The Way Jehovah Want Make We Worship-am”
it-2 1007 ¶4
Soul
Wetin E Mean for Person to Worship Jehovah With All E Soul? As we don learn, “soul” mean the person e self. But for some verse, Bible advice us say make we use ‘all our heart and all our soul’ find God, love God and worship-am. (De 4:29; 11:13, 18) Deuteronomy 6:5 still talk say: “You must use all your heart, soul, and power love Jehovah your God.” Jesus talk say e dey important make we worship Jehovah with all our soul, all our power, and “with all our mind.” (Mr 12:30; Lu 10:27) The important question na, since the heart, power and mind na part of the soul or person, why Bible mention them together with soul? Make we use this example explain-am: Person fit sell e self (e soul) as slave to another person. Then e go become the person own and the person go become e master. Even with this one, e fit no still use all e heart, e mind, and e power work for e master so that e master go gain. (Still check Eph 6:5; Col 3:22.) So, e clear say the reason why they mention this other parts with soul, na so that we go always remember and use them work for Jehovah and e Son. Because na Jehovah get us and na e Son use e life save us. When we de use ‘all our soul’ worship Jehovah, e mean say na everything about us we go use, whether na our body, our power, our heart or our mind.—Still check Mt 5:28-30; Lu 21:34-36; Eph 6:6-9; Php 3:19; Col 3:23, 24.
it-1 84 ¶3
Altar
Jehovah command Israel people say when they enter the Promise Land, make they destroy all the altars, pillars and poles wey the people de use worship their gods. (Ex 34:13; De 7:5, 6; 12:1-3) E command them say make they no ever copy Canaan people or use their children do sacrifice as Canaan people de do. (De 12:30, 31; 16:21) Israel people no go build plenty altars, but na only one altar they go build to worship Jehovah the only true God. And na Jehovah go choose the place wey they go build the altar. (De 12:2-6, 13, 14, 27; this one different from Babylon people wey build 180 altar to worship only Ishtar, one of their gods.) The first time wey Jehovah say make Israel people build altar na after they cross River Jordan, and e say make they use stone build-am. (De 27:4-8) Joshua build this altar ontop Mount Ebal. (Jos 8:30-32) After Israel people don share the Promise Land for the different-different tribe, the tribe of Reuben, Gad and the half tribe of Manasseh build big altar near River Jordan. This one make them get problem with other tribe of Israel until they explain to them say the altar no be to worship other gods. But they build-am to show generations to come say they too na servants of Jehovah the true God.—Jos 22:10-34.
Fine-Fine Things Wey You See for Bible
it-1 925-926
Mount Gerizim
Small time after the people of Israel win Ai for war, Joshua gather them for Mount Gerizim and Mount Ebal, just as Moses don tell them. For there, Joshua read for Israel people the blessings wey they go get if they obey Jehovah, and the bad things wey go happen to them if they disobey. The tribe of Simeon, Levi, Judah, Issachar, Joseph, and Benjamin stand for the front of Mount Gerizim. The Levites with the ark of the covenant, dey for the valley, and the other six tribe stand for front of Mount Ebal. (De 11:29, 30; 27:11-13; Jos 8:28-35) E fit be say na the tribes wey dey front of Mount Gerizim answer when Joshua read the blessings, and the ones wey dey front of Mount Ebal answer when e read the bad things wey go happen if they disobey. Plenty place for Mount Ebal dey dry and get plenty big-big stones. Some people talk say na this one make Joshua face Mount Gerizim when e de read the blessings, because Mount Gerizim fine and de produce well pass Mount Ebal. But Bible no talk anything about this one. Joshua read the Law “make all the men of Israel, women, children, and strangers wey de live with them, hear.” (Jos 8:35) Any side wey the people dey for front of the two mountain, they hear Joshua voice. This one fit be because the way the area be, de make sound reach far place.—Go check EBAL, MOUNT.
JULY 12-18
FINE-FINE LESSON FROM BIBLE | DEUTERONOMY 13-15
“The Law Show Say Jehovah Really De Care for Poor People”
it-2 1110 ¶3
Tithe
E be like say another tithe dey wey Israel people de do every year. This tithe no be the one wey them de use support the work of the Levites. But the Levites still de gain from-am. Normally, different-different family for Israel de really use this tithe when the whole nation gather for their festivals. For people wey their house too far from Jerusalem, and they no fit carry the things wey they want use as tithe, they go sell-am and take the money go Jerusalem. And when they reach Jerusalem, they go use the money buy anything wey they need for the festival. (De 12:4-7, 11, 17, 18; 14:22-27) Every seventh year na Sabbath year. So, for every third and sixth year before the Sabbath year, they go contribute this tithe for the Levites, strangers for their land, people wey their husband don die, and children wey no get papa. They no go use-am for theirself and their family for the festivals.—De 14:28, 29; 26:12.
it-2 833
Sabbath Year
They still call the Sabbath year “the year wey people de cancel anything wey person de owe them [hash·shemit·tahʹ].” (De 15:9; 31:10) For the Sabbath year, they go leave the land make e rest, they no go plant anything for the land. (Ex 23:11) They go still leave or cancel anything wey person de owe them. Them de do this one to honor Jehovah. Even though no be wetin everybody believe, some people talk say Israel people no de really cancel wetin person de owe them. But say that year, no Israel person go tell another Israel person wey de owe-am, say make e pay. This one na because the Israel person no go get money to pay since they no de do farm work that year. But e fit meet stranger wey de owe-am, to pay. (De 15:1-3) Some teachers for Jew religion talk say if na wetin they borrow their poor brother wey need help, they go cancel-am. But if na the one wey they borrow the person for business, e go pay back. They still talk say for the time of the apostles, one man wey e name na Hillel start one arrangement to help people wey borrow person money. They fit go court to complain so that the money or wetin they borrow another person, no go just go like that.—The Pentateuch and Haftorahs, edited by J. Hertz, London, 1972, pp. 811, 812.
it-2 978 ¶6
Slave
Laws about slave and their master. For the land of Israel, the way them de treat Israel person wey be slave different from the way them de treat stranger wey be slave. Stranger wey be slave de continue to be slave, and when e master die, e fit become slave to e master pikin. (Le 25:44-46) But them de free Israel person when e don complete seven years as slave, or for the year of Freedom, depending on the one wey first reach. And they must treat Israel person wey be slave as worker wey them de pay. (Ex 21:2; Le 25:10; De 15:12) If Israel person sell e self as slave to stranger for the land of Israel, e fit buy e self back any time, or person wey get the right to buy the person back, fit still buy-am back any time. The money wey they go pay to buy the person back go depend on the years wey remain before the year of Freedom or before e seven years as slave complete. (Le 25:47-52; De 15:12) When them de free Israel person wey be slave, e master go give-am things wey e go use start life as freeman. (De 15:13-15) If the man get wife before e become slave, e wife go follow-am comot. But if na the master give-am wife (if the woman na stranger, e no go dey free for the seventh year), the wife and children go continue to stay with e master. When this kind thing happen the Israel person wey be slave fit choose to continue to stay with e master. Then e master go use big needle put hole for e ear to show say e go be slave for e whole life.—Ex 21:2-6; De 15:16, 17.
Fine-Fine Things Wey You See for Bible
w06 4/1 31
Question Wey Some People Don Ask
Wetin we fit learn from the command for Exodus 23:19 wey talk say: “Make wuna no ever cook small goat with e mama milk”?
This command for the Law of Moses dey inside Bible three times. E de help us understand say Jehovah na God wey know wetin good and wetin bad. God wey get feeling and wey dey kind. E still make-am clear say Jehovah hate make people de worship other gods.—Exodus 34:26; Deuteronomy 14:21.
To cook small goat or other animal with e mama milk, dey against the way Jehovah arrange things. God make breast milk so that e go be food for pikin and make the pikin grow. One professor talk say to use the mama breast milk cook the pikin “no de show respect for the arrangement wey God don make between the mama and pikin.”
Another thing na say, some people talk say e fit be say people wey de worship other gods de do-am to make rain fall. If this one na true, this command go don save Israel people from the nonsense and wicked things wey other nation around them de do. For the Mosaic Law, Jehovah give Israel people clear warning say make they no follow the way other nations de do things.—Leviticus 20:23.
The last one na say, this law help us see say Jehovah really dey kind. The truth be say, other part of the Law still command Israel people say make they no de treat animals anyhow. And e protect them so that they no go do things wey dey against the arrangement of God. For example, the Law talk say make they no sacrifice any animal wey never stay reach seven days with e mama. Make they no kill the mama and pikin the same day and make they no take any bird and e egg or pikin from their nest the same day.—Leviticus 22:27, 28; Deuteronomy 22:6, 7.
E clear say the Law no be just long list of command wey hard to obey. We don learn plenty things from the directions wey de the Law. One of them be say, we don sabi how we fit de live the kind life wey go really help people understand the kind God wey Jehovah be.—Psalm 19:7-11.
JULY 19-25
FINE-FINE LESSON FROM BIBLE | DEUTERONOMY 16-18
“Things for the Law Wey Show the Correct Way to Judge Case”
it-1 343 ¶5
Blindness
Plenty place for the Law wey Jehovah give Israel people warn them say make them no take bribe, gift or favor one side. Why? Because this things fit cover judge eye and make the judge do partial. When this kind thing happen, we fit talk say this judge don blind. Na e make Bible talk say: “Bribe de blind people wey de see well.” (Ex 23:8) And e “de blind people wey get sense.” (De 16:19) So, no matter how judge good reach, when e collect gift from people wey e want judge, this one go surely affect e judgement. Bible show say no be only gift fit blind judge. The way the judge de feel about the person wey e want judge, fit still affect e judgement. Bible talk say: ‘No ever favor poor person just because e poor and no favor big man because of e money.’ (Le 19:15) So, judge no go bend case because of how e de feel or wetin plenty people want. E no go condemn rich people just because them rich.—Ex 23:2, 3.
it-2 511 ¶7
Number
Two. For Bible, when they want judge case, two people must talk wetin they see and know about the case. When they talk the same thing, e go confirm say wetin they talk for the matter na true. So, before any judge go make decision for any case, two or three people must confirm say the matter na true. For this our time, na the same way Jehovah organization de judge case. (De 17:6; 19:15; Mt 18:16; 2Co 13:1; 1Ti 5:19; Heb 10:28) Jehovah still follow this method when e send Jesus come this earth to save us from sin and death. Na e make Jesus talk say: “They still write-am for wuna Law say: ‘Wetin two people talk na true.’ I de talk about myself and my Papa wey send me still de talk about me.”—Joh 8:17, 18.
it-2 685 ¶6
Priest
For Israel, the main work of priests na to explain the Law of God to the people. They still do important work when e reach time to judge case. For any city wey the priests dey stay, they always ready to help people wey de judge case. When case dey wey pass the power of the people wey de judge, na the priests go handle-am. (De 17:8, 9) When they kill person and nobody know who kill-am, na the priests and the elders for the city go handle the matter. The priests go make sure say they follow wetin Jehovah talk when this kind thing happen so that the city go dey free from the blood of the person. (De 21:1, 2, 5) If husband start to feel say e wife don sleep with another man, e must take e wife go tabernacle. Then the priest go do all the things wey Jehovah say make they do for this kind matter, so that Jehovah go make them know whether the woman really do-am or e no do-am. (Nu 5:11-31) Israel people must follow wetin the priests and judges talk for any case. Anybody wey no gree respect or obey their decision, must die!—Nu 15:30; De 17:10-13.
Fine-Fine Things Wey You See for Bible
it-1 787
Disfellowship
As the Law talk, before they go decide say they go kill person for any case, at least two person must talk say the person really do wetin they say e do. (De 19:15) Na the people wey talk say the person do the thing, go be the first to stone-am. (De 17:7) This one go show say they really love the Law of God and say they want make the land of Israel dey clean. E go still make them dey careful, so that they no go hurry go talk wetin they no dey sure of, or lie against person.
JULY 26–AUGUST 1
FINE-FINE LESSON FROM BIBLE | DEUTERONOMY 19-21
“Life Really Dey Important to Jehovah”
w17.11 14 ¶4
Copy the Way Jehovah De Judge and De Show Mercy
4 E dey easy to run go any of the six city of protection. Jehovah command Israel people say make they choose three city for one side of River Jordan, and another three for the other side, wey they go use as city of protection. Why? So that e go dey easy for person wey kill another person by mistake to quick run enter the city of protection. (Num. 35:11-14) They must make sure say all the road to the city of protection good. (Deut. 19:3) Israel people their culture be say, they must put signpost for the road wey go show the person wey de run, the correct road to the city. As e be say Israel people get six city of protection, if somebody kill person by mistake, e no need to run go another country where e fit start to worship lie-lie god.
w17.11 15 ¶9
Copy the Way Jehovah De Judge and De Show Mercy
9 The main reason why Jehovah say make Israel people get six city of protection na because e want make their hand dey clean from blood. (Deut. 19:10) Jehovah love life and e hate people “wey de kill innocent person.” (Prov. 6:16, 17) Jehovah na holy God and e no de do partial. E no go keep quiet when somebody kill person even though say na by mistake. Na true say they go show the person mercy if na by mistake, but e must still take the case go meet the elders for the city. When the elders judge-am and see say e really kill the person by mistake, e must stay for the city of protection till the high priest die. This one fit mean say e go stay for there till e die. As the matter serious, e help Israel people know say life really dey important to Jehovah. To show say they really respect Jehovah wey give them life, they no go do anything wey go put people life for danger, even though na by mistake.
it-1 344
Blood
Jehovah give everybody life and e want make they enjoy-am. So, if anybody kill another person, e must answer to Jehovah. This one dey clear from wetin Jehovah tell Cain when e kill e brother Abel. E tell Cain say: “The blood of your brother de cry to me from ground.” (Ge 4:10) So if person hate e brother and want make e die, or e talk lie about e brother so that they go kill-am, if anything happen to e brother, the blood of e brother go dey e head.—Le 19:16; De 19:18-21; 1Jo 3:15.
Fine-Fine Things Wey You See for Bible
it-1 518 ¶1
To Judge Case for Court
For the land of Israel, court wey them de judge case de normally dey for the city gate. (De 16:18; 21:19; 22:15, 24; 25:7; Ru 4:1) When Bible say “city gate,” e mean open place for inside the city near the gate. Na for city gate them de teach the people of Israel the Law, and read the commandments to them. (Ne 8:1-3) For the city gate, e dey easy to get person wey fit stand for you when you want do some important things, like to buy land and other things, because plenty people go de pass there for day time. Another thing na say, when them de judge any case for the gate, plenty people go know about the case. This one fit make the judge them, judge the case well and make correct decision. So e clear say, place dey wey they arrange near the gate where the judge them de sitdown to judge case. (Job 29:7) Samuel travel round Bethel, Gilgal, and Mizpah to judge case for the people of Israel for this city them. E still judge case for Ramah where e house dey.—1Sa 7:16, 17.
AUGUST 2-8
FINE-FINE LESSON FROM BIBLE | DEUTERONOMY 22-23
“The Law Show Say Jehovah Really De Care About Animals”
it-1 375-376
Heavy Load
For olden days, them de use animals carry load. And Jehovah tell Israel people say if they see say the donkey of their enemy fall with the heavy load wey e carry, they must help the donkey. (Ex 23:5) Anything wey animal fit carry, na load. For example, Naaman talk about load wey two donkey go fit carry.—2Ki 5:17.
it-1 621 ¶1
Deuteronomy
The book of Deuteronomy still show say Jehovah de care about animals. Jehovah tell Israel people say make they no take mama bird wey de protect e pikin them for inside nest, because e go dey easy to catch-am as e de care for e pikin them. They must leave the mama make e go, but they fit take the pikin them. So that the mama go fit born other pikin. (De 22:6, 7) Jehovah still tell them say make farmer no join big and small animal, like bull and donkey, together to do e farm work, so that the small animal no go suffer. (De 22:10) They no suppose tie the mouth of the bull when e de match wheat so that hunger no go finish-am when the food wey e de suffer for, dey e front.—De 25:4.
w03 10/15 32 ¶1-2
No Join Yourself With People Wey No De Serve Jehovah
AS YOU de see for the picture, the camel and bull wey the farmer join together to do the farm work, de suffer. The wood wey the farmer use join them together, na the one wey they suppose use join two animal wey get the same size and power. But as e use-am join this big and small animal together, the two come de suffer. Because Jehovah care about this animals, na e make e tell Israel people say: ‘Make they no join bull and donkey together and use-am do farm work.’ (Deuteronomy 22:10) Na still the same thing with bull and camel.
No be normal thing for farmer to make e animals suffer like that. But if the farmer no get two bull, e fit use two different kind of animal wey e get. So, e fit be say this one na wetin the farmer for the picture decide to do. Because they no get the same size and power, the small animal go de struggle make e dey the same line with the big animal, and the big animal go get plenty work to do.
Fine-Fine Things Wey You See for Bible
it-1 600
Debt, Debtor
Debt na anything wey person de owe, or wey e must pay back or do for person. For Israel that time, the main reason why people de owe, na when their business fall. For Israel person to owe money na problem because e go become servant to the person wey e de owe. (Pr 22:7) Na e make Jehovah command them say make they get open-hand and borrow their poor brother wetin e need. And make they no borrow their poor brother anything with interest to gain from them. (Ex 22:25; De 15:7, 8; Ps 37:26; 112:5) But if they borrow stranger money, they fit collect interest. (De 23:20) Some Jew professors talk say this one mean say na only when person borrow money to do business, e go pay interest, no be the one wey e borrow to feed e self. Since strangers for Israel na visitors, and most of them na business people, e make sense for them to pay interest for wetin they borrow. Another thing be say the strangers too, de add interest for wetin they borrow other people.
AUGUST 9-15
FINE-FINE LESSON FROM BIBLE | DEUTERONOMY 24-26
“The Law Show Say Jehovah Really De Care for Women”
it-2 1196 ¶4
Woman
Even the Law wey concern people wey de go fight war, talk say make man wey just marry no go war for one year. This law favor the man and e wife because e go give them chance to born pikin. The pikin go be comfort for the mama when the papa don go war or even die for war.—De 20:7; 24:5.
it-1 963 ¶2
To Pick Wetin Remain for Farm
Na true say this better arrangement to help poor people for Israel de encourage people to get open-hand, no de think of only theirself, and to trust Jehovah for e blessing. But e no de encourage poor people to dey lazy. This one really make wetin King David talk clear. E talk say: ‘I never see say God abandon anybody wey dey righteous, or allow e children de look for food.’ (Ps 37:25) If poor Israel person de work hard and follow this Law, e and e family no go hungry and they no go beg for food.
w11 3/1 23
You Know?
For the land of Israel, if man die when e never born pikin, e brother go marry e wife so that they go fit born pikin for the dead man make e name no lost. (Genesis 38:8) They later add this arrangement for the Mosaic Law and start to call-am brother-in-law marriage. (Deuteronomy 25:5, 6) Wetin Boaz do as e dey for the book of Ruth, show say if the man no get any brother to marry e wife, another man for the family go marry the woman.—Ruth 1:3, 4; 2:19, 20; 4:1-6.
Wetin the Sadducees talk for Mark 12:20-22 show say for the time of Jesus, they still de do brother-in-law marriage. Flavius Josephus, one Jew man wey write about wetin happen for apostle their time, talk say them de do brother-in-law marriage so that the name of the family no go lost, to make sure say the family property remain with the family, and to care for the dead man wife. That time, wife no fit inherit e husband property. But if the woman born pikin from the brother-in-law marriage, the pikin go inherit the dead man property.
Fine-Fine Things Wey You See for Bible
it-1 640 ¶5
Divorce
Certificate of Divorce. E no go make sense to talk say na the Mosaic Law make-am easy for Israel people to divorce their wife anyhow. Before Israel person go divorce e wife, e must follow wetin the Law talk. E go write paper or certificate of divorce, give e wife and drive-am from e house. (De 24:1) Na true say Bible no talk everything wey they go do for this kind matter. But e fit be say before the man write the certificate, e go meet the elders and priests, and they go first try to settle the problem between the man and e wife. The time wey the man go use prepare the certificate and other things wey e must do before e divorce e wife, fit give the man time to change e mind. The woman must do something wey really bad before e husband fit divorce-am. When they follow the Law the way Jehovah say make they follow-am, e go stop Israel people make they no divorce their wife anyhow. And this one go still protect the woman make e husband no treat-am anyhow. Bible no talk wetin them de write for inside the “certificate of divorce.”
AUGUST 16-22
FINE-FINE LESSON FROM BIBLE | DEUTERONOMY 27-28
“Jehovah Go Really Bless Wuna Pass as Wuna Expect”
w10 12/15 19 ¶18
The King Wey Jehovah Spirit De Direct Go Make Us Enjoy Plenty Blessing
18 To listen to God mean say we must allow wetin we de learn from Bible and our publications enter our heart. (Matt. 24:45) E still mean say we must obey God and e Son, Jesus Christ. No wonder Jesus talk say: ‘No be everybody wey de call me, ‘Lord, Lord,’ go enter the Kingdom for heaven. Na only people wey de do the things wey my Father for heaven want, go enter.’ (Matt. 7:21) To listen to God still mean say we must use all our heart support the arrangement wey Jehovah don make. This one na the arrangement of the Christian congregation and the elders wey Jehovah don give us as gift.—Eph. 4:8.
w01 9/15 10 ¶2
Jehovah Blessing Go Plenty Pass Wetin Wuna Expect
2 The Hebrew word wey they translate as ‘de listen,’ for Deuteronomy 28:2 show say Jehovah people must continue to listen. Jehovah people no go just de listen to Jehovah when they like, but they must make-am part of their life. Na only when they do this one Jehovah go bless them pass as they expect. The Hebrew word wey we translate as ‘plenty pass wetin they expect,’ na “overtake” for English Bible. This word de describe the way hunter de chase animal until e catch-am.
w10 9/15 8 ¶4
Do Your Best to Get Blessing From Jehovah
4 How Jehovah want make the people of Israel obey e commandments? For the Law wey Jehovah give Israel people, e tell them say e no go happy if they no worship-am with “happiness and joy.” (Read Deuteronomy 28:45-47.) If Jehovah say make we do something, we suppose obey Jehovah with all our heart, no be the way animals and demons de obey. (Mark 1:27; Jas. 3:3) When we use all our heart obey Jehovah, we de show say we love Jehovah. This one go make us de happy, because we get faith say the commands from Jehovah no be heavy load. And say e go bless us if we use all our heart do wetin e want.—Heb. 11:6; 1 John 5:3.
Fine-Fine Things Wey You See for Bible
it-1 360
Boundary Mark
For the law wey Jehovah give Israel people, e say make they no shift wetin they use mark boundary with their neighbor. (De 19:14; still check Pr 22:28.) In fact, curse go follow anybody wey shift wetin they use mark the boundary between e and e neighbor. (De 27:17) As e be say na from the land them de get their food, if person shift e neighbor boundary, e mean say e don reduce the food wey e neighbor go get from the land. For olden days, them de see person wey do this kind thing as thief. (Job 24:2) But some people for Israel still do this wicked thing. Bible talk say for the time of Hosea, the prince them for Judah be like people wey de shift their neighbor boundary.—Ho 5:10.
AUGUST 23-29
FINE-FINE LESSON FROM BIBLE | DEUTERONOMY 29-30
“To Worship Jehovah No Too Hard!”
w09 11/1 31 ¶2
Jehovah Don Give Us the Chance to Choose
To know wetin Jehovah want and do-am, really hard? Moses talk say: “This command wey I de give you today no too hard, and e no dey far from you.” (Deut. 30:11) Jehovah no de tell us say make we do wetin we no fit do. All e commandment make sense and we fit do them. E dey easy for us to know wetin e want make we do. We no need to go “heaven” or “cross go the other side of the sea” before we learn wetin Jehovah want make we do. (Deut. 30:12, 13) Bible don tell us how Jehovah want make we live our life.—Micah 6:8.
w09 11/1 31 ¶1
Jehovah Don Give Us the Chance to Choose
BECAUSE of the bad things wey happen to one sister when e be small pikin, e feel say e no go fit succeed for life. E talk say: “I de always get some kind fear say I no go fit worship Jehovah well.” Na true say we no go fit worship Jehovah well because some kind things don happen to us? No. Jehovah don give us the right to fit choose wetin we go do. So, we fit choose how we go live our life. Jehovah want make we choose the correct thing. E don give us Bible wey fit help us learn how to do the correct thing. Think about wetin Moses talk for Deuteronomy chapter 30.
w09 11/1 31 ¶4
Jehovah Don Give Us the Chance to Choose
E matter to Jehovah wetin we choose? Yes o! Jehovah use Moses advice us say make we “choose life.” (De 30:19) But, how we fit choose life? Moses still explain for Bible say to choose life, we must ‘love Jehovah our God, listen to e voice and really hold-am tight.’ (De 30:20) If we love Jehovah, we go listen and obey e command, and we go hold-am tight no matter wetin happen. When we de do this things e mean say we don choose life because we go live the best life now, and still get the hope to live forever for Paradise.—2 Peter 3:11-13; 1 John 5:3.
Fine-Fine Things Wey You See for Bible
it-1 665 ¶3
Ear
Because Israel people really stubborn and they no gree obey Jehovah, Jehovah use e servants talk say they be people wey their ‘ear no de hear.’ (Jer 6:10; Ac 7:51) This one just be like say something don block their ear, make they no fit hear. Jehovah de help e people understand the truth from Bible and obey e command. But if people no want know the truth about Jehovah and obey e word, e go leave them make they continue to reject the truth. (De 29:4; Ro 11:8) Apostle Paul talk about the time wey some people wey call theirself Christian go dey against the truth. They no go want hear the truth from Bible. But they go de listen to people wey de teach lie-lie, and de talk wetin de “sweet” them for ear. (2Ti 4:3, 4; 1Ti 4:1) Another thing be say, person fit still hear wetin go shock-am especially if na bad news.—1Sa 3:11; 2Ki 21:12; Jer 19:3.
AUGUST 30–SEPTEMBER 5
FINE-FINE LESSON FROM BIBLE | DEUTERONOMY 31-32
“Learn From the Examples Wey Dey One Song for Bible”
“Make My Heart to Be One to Fear Your Name”
8 Just before Israel people enter Promise Land, Jehovah teach Moses one song. (Deut. 31:19) Then Moses go teach Israel people this song. (Read Deuteronomy 32:2, 3.) When we think about wetin dey verse 2 and 3, e clear say Jehovah no want make they hide e name, or treat the name like say e too holy to call. Jehovah want make everybody know e name! Na really special thing for Israel people to hear as Moses de teach them about Jehovah and e wonderful name! The thing wey Moses teach them make their faith strong and encourage them. This one just be like when rain de fall small-small ontop plant to help them grow. How we fit make sure say the way we de teach dey like that?
9 When we de preach, make we use Bible show people say the name of God na Jehovah. We fit give them our books, show them videos, and other things wey we get for Internet wey talk about Jehovah. For work, school, or when we de travel, we fit see chance talk about this God wey we love and the kind person wey e be. We fit tell them about the better things wey Jehovah go do for us and the earth. And when they hear this things, they fit see for the first time say Jehovah get strong love for us. As we de tell people the truth about Jehovah the God wey we love, we de make e name dey holy. We de help people see say they don teach them plenty lie about God. The things wey we de teach people for Bible good for them, and na the best.—Isa. 65:13, 14.
w09 5/1 14 ¶4
You Understand the Examples Wey They Use Describe Jehovah for Bible?
Bible still use things wey no get life describe the kind God wey Jehovah be. For example, Bible describe Jehovah as the “Rock of Israel,” “high mountain,” and “place of protection.” (2 Samuel 23:3; Psalm 18:2; Deuteronomy 32:4) Why Bible compare Jehovah with Rock? Just as they no fit move or shift big rock from the position wey e dey, na so Jehovah fit become strong place of protection for you.
w01 10/1 9 ¶7
Copy Jehovah Example When You De Train Your Children
7 Think about the love wey Jehovah show Israel people. Moses use one fine example describe the kind love wey Jehovah show Israel people, when they just become nation. Bible talk say: “Just as eagle wey de teach e pikin them how to fly, go de fly around them, spread e wings, bring them out and carry them for e back, na only Jehovah continue to lead [Jacob].” (Deuteronomy 32:9, 11, 12) When eagle want teach e pikin them how to fly, e go de move e wings up and down so that e go encourage them to fly. Eagle de normally build e nest ontop high mountain. So, when any of the small eagle fly out from the nest, the mama go de fly ‘around-am.’ If e be like say the small bird want fall, the mama go quick fly go under the bird, and carry-am for “e back.” Na the same thing Jehovah do for Israel people. E use love care for them just like small pikin. E give them the Law of Moses. (Psalm 78:5-7) And e still care for them as special people and save them when them dey trouble.
Fine-Fine Things Wey You See for Bible
w04 9/15 27 ¶12
Lessons From the Book of Deuteronomy
31:12. Make small children for congregation sitdown with big people when they go meeting, so that they go listen and learn well.