Study Book for “Our Life and Preaching Meeting”

Study Book for Our Life and Preaching Meeting

NOVEMBER 6-12

FINE-FINE LESSON FROM BIBLE | JOB 13-14

“If Person Die, E Go Fit Live Again?”

w99 10/15 3 ¶1-3

Our Struggle for Long Life

SOME people today no gree with wetin Job talk about how life short, even though say e don write this thing since around 3500 years ago. Them no de really happy say the time wey them get to enjoy life before them grow old and die, dey short. Because of this one, people don de try to do different-different things wey go help them de live long.

For Job time, Egypt people de eat animal testicles. Them think say e go make them young again, but e no work for them. E get some people wey de try to change things like iron to gold. For olden days, one of the main things wey this people try to do na to make medicine wey go make person live long. Them still believe say to de eat with plate wey them use gold make de give person long life. Wetin one Chinese religion believe na say, person fit use things like to de think deep, to de do breathing exercise, and the kind food wey e de eat take change the way the body be so that e go fit live long life wey nothing fit destroy.

One spanish man wey e name na Juan Ponce de León na person wey de find out about things. People know-am as person wey really put body to find out about water wey person fit drink to remain young. One doctor for olden days talk for im book wey be Hermippus Redivivus say make them put young people wey be virgin for one small room for time of rainy season, make them collect the air wey them de breath come out for bottle and use-am make medicine wey go make people de live long. E clear say, all this things wey them do no work.

w15 4/15 32 ¶1-2

Tree Wey Them Cut Fit Grow Again?

IF YOU compare the big cedar tree of Lebanon with olive tree [Olea europaea], e go be like say olive tree no make sense for eye. But one special thing about this olive tree be say, e fit survive hard condition. Them don find out say some of this olive tree don stay reach 1,000 years. The way the root de spread under ground, de make-am fit survive even when them cut-am. As long as their root wey de ground still de alive, them fit grow again.

Job really dey sure say even if e die, e go live again. (Job 14:13-15) E use one tree—maybe one olive tree—take show say e really dey sure say God fit bring-am back to life. Job talk say: “Even tree get hope. If them cut-am, e go even still grow again.” When dry season stop and rain start to fall again, the root of olive tree wey dey ground fit make-am grow again even after them cut-am. And e go produce branch like new plant.—Job 14:7-9.

w11 3/1 22 ¶5

‘Jehovah Go Really Want See’

Wetin Job talk teach us one better lesson about Jehovah. Jehovah get special friendship with people wey be like Job, wey put theirself for e hand and allow-am mold them to be better people for im eye. (Isaiah 64:8) Jehovah value im people wey really stand well for im side. E really de hungry-am to see im people wey don die again. One person wey read book well-well talk say, the Hebrew word wey them use for here, ‘na one of the word wey strong well-well, wey de show the strong feeling wey person de get when e de hungry-am to do or see something.’ Yes, Jehovah no only de remember im people wey serve-am well, but e still de hungry-am to bring them back to life.

Fine-Fine Things Wey You See for Bible

it-1 191

Ashes

Them de use ashes represent something wey no get value. For example, Abraham tell Jehovah say e be dust and ashes. (Ge 18:27; see also Isa 44:20; Job 30:19.) And Job talk say the things wey the three people wey come comfort-am talk na ashes.—Job 13:12.

NOVEMBER 13-19

FINE-FINE LESSON FROM BIBLE | JOB 15-17

“Eliphaz No Show Better Example of How to Comfort Person”

w05 9/15 26 ¶4-5

Run From Bad Thinking!

For all the three times wey Eliphaz talk, e try to make Job believe say God de expect too much from im servants, sotey nothing wey them do de really good for e eye. Eliphaz tell Job say: “See! E no get faith for im servants, and e de always blame im angels.” (Job 4:18, footnote) Eliphaz still later talk about God say: “E no believe e holy ones, and even heaven no dey clean for e eye.” (Job 15:15) And e ask say: “The Almighty care whether you dey righteous?” (Job 22:3) Bildad agree with this thing wey Eliphaz talk. E even talk say: “Even the moon no bright, and the stars no pure for [God] eyes.”—Job 25:5.

We must dey careful make this kind thinking no affect us. Because e fit make us start to feel say God de expect us to do pass wetin our power fit carry. This kind feeling fit spoil our friendship with Jehovah. If we allow this kind thinking affect us, how we go feel when them give us strong correction for congregation? Instead make we dey humble and accept the correction, this kind thinking fit make us start to “de vex for Jehovah,” and de carry Jehovah for mind. (Proverbs 19:3) And this one na really big wahala!

w15 2/15 9 ¶16

Copy Jesus as E Dey Humble and De Show Care

¹⁶ Our better word. Our deep love for people de move us to “talk wetin go comfort people wey dey sad.” (1Thess. 5:14) Wetin we fit talk to encourage this kind people? We fit make them happy when we make them see say we really care for them. We fit thank them and help them see the better character wey them get and the better things wey them de do. We fit remind them say na Jehovah draw them to im son, because them really dey precious for im eye. (John 6:44) We fit still make them see say Jehovah really de care for “people wey de feel say their own don finish” or “wey life don tire.” (Ps. 34:18) Our better word fit really help people wey need comfort.—Prov. 16:24.

Fine-Fine Things Wey You See for Bible

w06 3/15 14 ¶11

Lessons From the Book of Job

7:9, 10; 10:21; 16:22—The things wey dey this Bible verse de show say Job no believe resurrection? The things wey Job talk na about wetin go happen after e die. So wetin Job mean? One thing wey Job de try talk be say, when e die, none of the people wey dey around-am go see-am again. For those people, Job no go come back to im house and nobody go welcome-am until the time wey God don arrange. Another thing be say, Job still de try talk say, nobody fit come back from grave by imself. Wetin e talk for Job 14:13-15 show-am clear say, e believe say resurrection dey.

NOVEMBER 20-26

FINE-FINE LESSON FROM BIBLE | JOB 18-19

“No Ever Abandon Your Brothers and Sisters”

w22.01 16 ¶9

Wetin We Fit Learn From Jesus Tears?

⁹ You fit support people wey their person die. Jesus no only cry with Martha and Mary, but e still listen to them and talk word wey go cool their heart. We fit do the same thing for people wey their person die. One elder for Australia wey im name na Dan, talk say: “After my wife die, I need support that time. Plenty husband and wife always dey ready to listen to me. Them allow me to show my pain and them no shame because I de cry. Them still de help me do things. For example, them de wash my motor, de go market for me, and de cook food for me when I no fit do this things by myself. And plenty times, them pray with me. Them show say them be better friends and brothers wey ‘you fit trust when problem dey.’”—Prov. 17:17.

w21.09 30 ¶16

When Person Wey You Love Leave Jehovah

¹⁶Continue to support faithful family members. Them need you to love and encourage them, especially now. (Heb. 10:24, 25) Sometimes, family members of people wey them disfellowship, don feel say some people for congregation no de talk to them again, like say them disfellowship them too. Make we no make them feel like that at all! We suppose praise and encourage young people wey their papa or mama don stop to serve Jehovah. Sister Maria wey them disfellowship im husband and wey e husband leave the family, talk say: “Some of my friends come my house and cook food, and help me study with my children. Them feel my pain and them cry with me. Them defend me when people talk things wey no correct about me. Them really encourage me, no be small!”—Rom. 12:13, 15.

w90 9/1 22 ¶20

You De Try to Help?

²⁰ Make elders for congregation know say, to remove person from elder or ministerial servant fit cause stress for the person, even if na the person decide to drop the privilege. If na person wey them no disfellowship and elders see say the person no de happy again, them need to help-am. (1Thessalonians 5:14) Make them help the person see say them need-am for congregation. Even if them give the person strong correction, e fit no take long time before the person go get privilege for congregation again if e dey humble and show say e happy for wetin the elders do.

Fine-Fine Things Wey You See for Bible

w94 10/1 32

The Power Wey Better Word Get

But when Job need person to encourage-am, Eliphaz and the people wey dey with-am no talk better word. Them blame Job for the bad things wey de happen to-am, and them talk like say Job do bad thing wey nobody know, wey make-am de suffer. (Job 4:8) The Interpreter’s Bible talk say: ‘Wetin Job need na make person understand-am and pity-am. But wetin them tell-am na word wey be like say e make sense, but na fake and na lie-lie.’ All this things wey Eliphaz and im friends talk really pain Job sotey e cry talk say: “When una go stop to de trouble me, and de use mouth finish me?”—Job 19:2.

Make we no ever put any servant of Jehovah for pain or make-am cry because of our bad word. (Compare Deuteronomy 24:15.) One Bible proverb warn say: ‘Wetin you talk get power to destroy person life or make-am dey alive; so you must dey ready to get the result of wetin you de talk.’—Proverbs 18:21, TEV.

NOVEMBER 27–DECEMBER 3

FINE-FINE LESSON FROM BIBLE | JOB 20-21

“No Be to Get Money and Property De Make Person Righteous”

w07 8/1 29 ¶12

You ‘Rich for God Eye’?

¹² Jesus talk say to dey rich for God eye dey different from when person de gather money and property for imself. Wetin Jesus mean be say, make the main concern for our life no be to de gather plenty money and property or to de enjoy the plenty things wey we de gather. Instead make we use the things wey we get take make our friendship with Jehovah strong well-well. If we de do like that, e go make us rich for God eye. Why? Because e go open door for us to get many blessings from-am. Bible tell us say: “Na the blessing of Jehovah de make person rich, and e no de add suffer join-am.”—Proverbs 10:22.

Fine-Fine Things Wey You See for Bible

w95 1/1 9 ¶19

De Win Satan and the Things Wey E De Do

¹⁹ God servant wey be Job struggle with some kind bad feeling wey Satan use Eliphaz and Zophar cause for-am. (Job 4:13-18; 20:2, 3) Because of this one, Job come de suffer “pain,” and this one come make-am de “talk anyhow” about all the problem wey de disturb im mind. (Job 6:2-4; 30:15, 16) Elihu listen to Job and e use better mind take help Job see how Jehovah really de see the matter. For the same way today, elders de show say them care for people and them no de add join their pain. Instead, like Elihu, them de listen to this kind people and dey patient with them. And them de use God Word help them. (Job 33:1-3, 7; James 5:13-15) So, anybody wey de face problem, whether na real or na something wey de worry them for mind, or na person wey de fear the way Job fear, fit get the comfort wey Bible de give for inside congregation.—Job 7:14; James 4:7.

DECEMBER 4-10

FINE-FINE LESSON FROM BIBLE | JOB 22-24

“Human Being Fit Get Any Value for God Eye?”

w05 9/15 27 ¶1-3

Run From Bad Thinking!

Another thing wey be like the idea say God de expect too much from im servant, na say human being dey useless for God eye. The third time wey Eliphaz talk, e ask one question say: “Human being fit get any value for God eye, and E fit gain anything from person wey get deep sense?” (Job 22:2) Eliphaz de try talk say man de useless for God eye. For the same way, Bildad still talk say: “So how human being wey de die go dey righteous for God eye, and person wey woman born, how e hand fit dey clean?” (Job 25:4) From this things wey them talk, how Job wey be ordinary man, go ever think say e fit dey righteous for God eye?

Some people today still de get this kind bad feeling about theirself. Things like the way them take grow, the kind things wey them face for life, or the way people hate their tribe, fit don make them de get this kind feeling. But Satan and e demons still de happy to make person life dey useless. If them fit make person feel say nothing wey e de do fit good reach for God eye, then e go dey easy to discourage the person. Small time, this kind person fit start to comot from God side small-small and e fit even leave God kpatakpata.—Hebrews 2:1; 3:12.

When old age and sickness don de come, e fit affect the things wey we fit do. The things wey we de do for Jehovah service now fit small pass wetin we de do when we still young, strong, and dey ok. E really de important make we know say Satan and e demons want make we feel say wetin we de do no good reach for God eye! We must run from that kind thinking.

w95 2/15 27 ¶6

Lesson About How to Handle Problem

E three friends discourage-am more-more as them de talk things wey dey their mind instead of to use the sense from God. Eliphaz no really think about the things wey e de talk at all. E even talk say, ‘God no get faith for im servants’ and e no really concern Jehovah whether Job dey righteous or not. (Job 4:18; 22:2, 3) E no get any word wey fit discourage person pass that one! E no surprise us to know say, Jehovah later give Eliphaz and e friends strong correction for the things wey them talk. Jehovah talk say: “Una no talk true about me.” (Job 42:7) But the one wey pass this one still de come.

w03 4/15 14-15 ¶10-12

Young People Wey De Make Jehovah Heart Glad

¹⁰ As e dey for Bible, no be only Job Satan de talk about when e say, Job de serve God because of wetin e de gain. Na everybody wey de serve God e de talk about—even you. In fact, na everybody for this world e de talk about. Satan tell Jehovah say: “Na everything wey person [no be only Job but anybody] get e go give because of im life.” (Job 2:4) You de see the work wey you get for this matter? For Proverbs 27:11, Jehovah de tell us say e get something wey we fit give-am—the chance to answer the person wey de insult-am, wey be Satan. Just imagine—the Person Wey High Pass de call you make you join-am handle this big matter wey dey ground. This one na really big privilege wey you get! You go fit do this thing wey Jehovah want make you do? Job do-am. (Job 2:9, 10) Jesus self do-am and many other people wey don live wey we no fit count, even many young people. (Philippians 2:8; Revelation 6:9) You self fit do-am. No think say you fit dey on your own and no join any side for this matter. With the way you de live your life, you go show whether na Satan side you dey or na Jehovah side. Which side you go choose?

Jehovah Care for You!

¹¹ Jehovah really care about the side wey you choose? The people wey don dey e side never plenty reach for-am to fit answer Satan? Na true say Satan talk say nobody de serve Jehovah because of love, and e don already clear say this thing wey Satan talk na lie. Even with that one, Jehovah want make you stay im side for this matter because e really care for you. Jesus talk say: “My Father for heaven no go like-am make even one of this small ones die.”—Matthew 18:14.

¹² E clear say, the side wey you choose really concern Jehovah. The one wey pass that one be say, the side wey you choose de affect am. Bible show-am clear say, Jehovah get deep feelings, and the good or bad wey people choose to do de affect im feelings. For example, when Israel people do bad things plenty times, e really pain Jehovah. (Psalm 78:40, 41) Before the flood wey happen for Noah time, when “people de really do plenty wicked things,” Jehovah “really feel pain for heart.” (Genesis 6:5, 6) Think about wetin this one mean. If you choose to follow wetin dey bad, you fit cause pain for the person wey make you. This one no mean say God dey weak, or say im feelings de control-am. Instead e love you and e care about you. Another thing be say, when we do wetin good, e de make Jehovah happy. And no be only because e go get answer to give Satan make-am de happy, but e go still get chance to bless you. And na wetin e want do be that. (Hebrews 11:6) E clear say Jehovah na the best papa wey really love you!

Fine-Fine Things Wey You See for Bible

w04 7/15 21-22

Use Spiritual Goals Praise the Person Wey Create You

Think of how Jehovah take make everything for this world. When Jehovah talk say, evening come and morning come, e de show say e don finish work for each day. (Genesis 1:5, 8, 13, 19, 23, 31) For anytime wey e want start to make things, e de always know wetin e get for mind to do or the reason why e de do-am for that day. God do wetin e get for mind as e de make everything. (Revelation 4:11) Job talk say: “When [Jehovah] don make up im mind, who go fit stop am? When e want do something, e de do-am.” (Job 23:13) E really sweet Jehovah when e see “everything wey e don make” and e talk say “e really good”!—Genesis 1:31.

For us to fit make wetin we plan happen, we need to get strong mind to fit do-am. Wetin fit help us get this kind strong mind? Even when the earth just dey like that and e empty, Jehovah don already see how the end go be—say e go really fine and e go make people praise and honor-am. For the same way, we fit do the things wey we get for mind to do when we de think about the result and wetin we fit gain when the thing wey we plan don happen. That na wetin happen to Tony wey be 19-years. E no ever forget how e feel when e visit the branch office of Jehovah Witness for Western Europe. From that time, the question wey dey Tony mind na, ‘How e go be to live and serve for that kind place?’ Tony no ever stop to think about how this one go fit happen and e continue to do things wey go make-am happen. E really happy well-well when them later call-am to come work for branch after some years don pass.

DECEMBER 11-17

FINE-FINE LESSON FROM BIBLE | JOB 25-27

“Person No Need to Dey Perfect to Stand Well for God Side”

it-1 1210 ¶4

Stand Well for God Side

Job. Job na man wey live around the time of Joseph death and the time of Moses. Bible describe-am as “good man wey stand well for God side. E de fear God and e hate wetin bad.” (Job 1:1; check JOB.) The way God question Satan about Job when Satan appear for the meeting for heaven make-am clear say, part of the matter wey dey between God and Satan na whether humans go fit stand well for God side. Satan claim say na bad reason de make Job de worship God. E talk say Job de serve God for e own selfish gain, no be with better mind. With this thing wey Satan talk, e come de question the way Job de serve God. But when Satan come get the chance to destroy everything wey Job get and even kill Job children, e no fit still make Job leave Jehovah. (Job 1:6–2:3) Even as e fail, e still claim say Job dey selfish, say Job fit endure all the things wey don happen to-am because e still de alive and nothing don happen to-am. (Job 2:4, 5) After, Satan strike Job with one bad disease wey really de pain. Job wife come de encourage-am make e curse God. Even im friends use the things wey them think say them de talk to encourage-am take add join im pain. (Job 2:6-13; 22:1, 5-11) Job make them know say im na man wey stand well for God side. E say: “I no go ever leave God till I die! I go continue to dey righteous and I no go ever stop to do like that. My heart no go judge me all the days wey I go live.” (Job 27:5, 6) The way Job stand well for God side even with everything wey happen to-am, show say Satan wey be God enemy na liar.

w19.02 3 ¶3-5

No Tire to Hold Jehovah Tight!

³ For person wey de serve God, wetin integrity mean? E mean say the person love Jehovah with all im heart, and e no go ever leave Jehovah. So the number one thing for the person life na how to make Jehovah happy for everything wey e de do. Make we talk about how Bible use the word integrity. For Bible, the Hebrew word for integrity mean: something wey complete, wey full, or wey dey sound. For example, Israel people use animals do sacrifice to Jehovah. The Law talk say the animals need to dey sound. (Lev. 22:21, 22) God no allow im people bring sick animal and animal wey one leg, one eye, or one ear, no dey. Na important thing to Jehovah say make the animal dey sound, or complete. (Mal. 1: 6-9) We fit understand why e dey important to Jehovah make something dey sound or complete. When we buy something like fruit, book, or tool for work, we no want the one wey get big hole for body or wey some parts de miss. We want the one wey dey sound, complete, or full. Na so God de feel about us too. The way we love Jehovah, and the way we hold Jehovah tight suppose to dey complete, or sound.

⁴ So, this one mean say we need to dey perfect to show say our service to God dey complete? After all, we fit de feel say we de make plenty mistakes, or we get fault. Make we talk about two reason why we no need to think say for our service to dey complete, or to get integrity, we must dey perfect. Number one, Jehovah no de put mind for our mistakes or fault. Bible tell us say: “If you de count mistakes, O Jah, then who go fit stand before you, O Jehovah?” (Ps. 130:3) God know say we no dey perfect and we de make mistake. So e dey ready to forgive us. (Ps. 86:5) Number two, Jehovah know wetin we fit do and wetin we no fit do. E no de tell us to do wetin pass our power. (Read Psalm 103:12-14.) So how Jehovah fit de see us as complete, or sound, person?

⁵ Wetin fit make our service to God complete? Na love for our Papa for heaven fit help us. Our love for God and the way we hold God tight, must dey complete, or sound. If our love dey like that even when we de face temptation, then our service to God dey complete. (1Chron. 28:9; Matt. 22:37) Make we talk again about the three people wey we talk about for the beginning. Wetin make them do wetin them do? You think say the young girl no like to enjoy for school, the young man like to feel shame when e want preach to person, or the family man want lose e job? No be so. Instead, them know say the things wey Jehovah want make them do, dey correct. And them put their mind for wetin Jehovah, their Papa for heaven, go like. Them get love for God, and na this love de make them de first think about wetin e like before them make decision. As them do this one, them show say them get integrity, or their service to God dey complete.

Fine-Fine Things Wey You See for Bible

w16.11 9 ¶3

Our Organization De Follow Wetin Bible Talk

³The way God create things show say e sabi arrange things well and nobody sabi reach-am. Bible talk say: “E use sense set the foundation of the heavens make nothing fit shake-am.” (Prov. 3:19) Na only “small part of the things wey e de do” we know and “na only small part about who e be we don hear.” (Job 26:14) But the small one wey we know about all the planet, the stars, and the galaxies, de move us to agree say all this things wey Jehovah make really arrange well. (Ps. 8:3, 4) Galaxy na plenty million stars wey dey together. All of them de move for space and them really arrange well. Why e be say planets wey dey our solar system de travel round the sun for way wey e be like say them de obey traffic law? True-true, the way everything for this world take arrange well help us see say we need to hold Jehovah wey make the heaven and the earth tight, and we need to give-am our praise and our worship.—Ps. 136:1, 5-9.

DECEMBER 18-24

FINE-FINE LESSON FROM BIBLE | JOB 28-29

“You Get Better Name Like Job?”

w02 5/15 22 ¶19

Dey Kind and Show Love to People Wey Need Help

¹⁹The Bible story wey we don talk about, show say we need to show love to people wey need help, people wey no fit help theirself. Abraham need Bethuel help so that im family line go fit continue. Jacob need Joseph help so that them go fit carry im body go Canaan after e die. And Naomi need Ruth help to fit get pikin wey go inherit the family property and continue the family line. For the same way today, we need to show love especially to people wey need help. (Proverbs 19:17) Make we copy the example of Job wey show love to “poor people wey de cry for help” and to “person wey im own don almost finish.” Job still “make widow happy” and e come become “eyes for people wey no de see and leg for people wey no fit waka.”—Job 29:12-15.

it-1 655 ¶10

Cloth

Them still use cloth represent many other things. As we know, uniform or one special kind of cloth de show say person na part of one kind organization or say e de support one kind movement. For the same way, the way Bible talk about cloth de show the side wey person stand and the things wey e choose to do, just as e be for Jesus illustration about the marriage garment. (Mt 22:11, 12; check HEADDRESS; SANDAL.) For Revelation 16:14, 15, when Jesus Christ de talk about our worship, e warn say make we no sleep and loose the good name wey we get as better witness of the true God. This one go really bad for us when “the war of the great day of God the Almighty” reach.

w09 2/1 15 ¶3-4

Wetin Dey Special About Name?

We no get anything wey we fit do about the name wey them give us when them born us. But na only we go fit choose how we want make people take know us. (Proverbs 20:11) Why you no ask yourself say: ‘If Jesus or the apostles get the chance, which name them go choose for me? Wetin go be the correct name to describe my character or the kind person wey I be?

This na serious question wey we need to think about. Why? King Solomon wey get sense well-well write say: “To get good name better pass plenty money and property.” (Proverbs 22:1) True-true, na really big thing we get if we get good name or them use better thing know us for where we de stay. The one wey dey important pass be say, if we get good name with God, we don get better thing wey go last forever. Why we talk like that? God promise say e go write the name of people wey de fear-am for im book “wey them write to remember people” and e go give them the chance to get everlasting life.—Malachi 3:16; Revelation 3:5; 20:12-15.

Fine-Fine Things Wey You See for Bible

g00 7/8 11 ¶3

De Smile—E Good for You!

To de smile really mean anything? Well, you remember anytime wey person smile for you and e come make you happy and dey calm? Or when them no smile for you and you come de fear or feel say them no like you? Yes, smile really mean something. E de affect both the person wey de smile and the person wey them smile for. Job for Bible talk about im enemies say: “When I smile for them, them no de believe-am; and the light for my face de make their mind come down.” (Job 29:24) “The light” for Job face fit mean say e de smile or e de happy.

DECEMBER 25-31

FINE-FINE LESSON FROM BIBLE | JOB 30-31

“How Job Continue to Dey Clean”

w10 4/15 21 ¶8

Comot Your Eyes From Useless Things!

⁸ To do things wey the eyes and body want fit still affect true Christians today. Na this one make God Word encourage us say make we de control ourself for the things wey we de look and wey our body want. (1Cor. 9:25, 27; read 1John 2:15-17.) The good man wey be Job know say the things wey we de look and the things wey our body want connect with each other. E talk say: “I don make agreement with my eye. So how I go de look young woman and de think wetin no clean for my mind?” (Job 31:1) Job no only talk say e no go touch woman for way wey no clean, but e no go even allow e mind to de think wetin no clean. Jesus make-am clear say we must remove this kind bad thinking from our mind and make-am dey clean. E say: “Anybody wey continue to de look woman sotey e want sleep with-am, e don already sleep with-am for im heart.”—Matt. 5:28.

w08 9/1 11 ¶4

Think About Wetin Go Happen for the End

Before you start to de waka for this kind road, ask yourself say, ‘Where this road fit carry me go’? To just stop and think about wetin fit happen for the end, fit help you make you no put hand for things wey fit bring bad result. AIDS and other kind of disease wey de come from sex wey no clean for God eye, to carry belle, to de do abortion, relationship wey de scatter, and for conscience to de worry person, na things wey de happen to people wey choose to disobey warning sign. Apostle Paul talk about the end of the road for people wey de put hand for sex wey no clean for God eye. E say: Them “no go enter the Kingdom of God”—1Corinthians 6:9, 10.

w10 11/15 5-6 ¶15-16

Young People—Make God Word De Guide Una

¹⁵ Which time you think say temptation fit affect you pass—when you dey with people or when you dey alone? Well, when you dey school or work, the mind to do wetin Jehovah want fit dey strong. E fit dey easy to notice things wey fit affect your friendship with Jehovah. But e dey easy for temptation to fit affect you when you de relax, when you no dey ready for any temptation.

¹⁶ Why you go want obey God even when you dey alone? Remember this one: You fit make Jehovah feel sad or you fit make e heart glad. (Gen. 6:5, 6; Prov. 27:11) The things wey you de do de affect Jehovah because “e de care for [you].” (1Pet. 5:7) E want make you listen to-am for your own good. (Isa. 48:17, 18) When some of Jehovah servant for Israel that time no follow e advice, them make-am feel pain. (Ps. 78:40, 41) But Jehovah come get deep love for Prophet Daniel, and one of Jehovah angel tell Daniel say e be “special person.” (Dan. 10:11) Why? Daniel hold Jehovah tight, no be only when e dey where people dey, but even when e dey alone.—Read Daniel 6:10.

Fine-Fine Things Wey You See for Bible

w05 11/15 11 ¶3

To De Listen With Love

The times wey Job friends hear the things wey Job de talk about, no small pass ten times. Even with that one, Job still shout say e wish say e get person wey go listen to-am. (Job 31:35) Why? Because the way them listen no make Job mind come down. Them no care about-am and them no want understand how e de feel. E clear say them no sabi listen or feel for person. But apostle Paul talk say: “Make all of una get one mind, de feel for each other, de love each other like people for the same family, de really pity for each other and de carry body down.” (1Peter 3:8) How we fit show say we de feel for people. One way na to try understand them and show say we care about how them de feel. To de talk things like, “that one go don really vex you” or “you go don feel say them no understand you” na one way wey we fit show say we care about how them de feel. Another way na to talk the thing wey the person talk for your own way. This one go show say you really understand wetin e de talk. To de listen with love mean say, we no go only put ear down to listen to the things wey the person de talk, but we go try to use the things wey e de talk understand how e de feel.