Study Book for Our Life and Preaching Meeting
© 2024 Watch Tower Bible and Tract Society of Pennsylvania
JANUARY 6-12
FINE-FINE LESSON FROM BIBLE PSALMS 127-134
Papa and Mama—Continue to Care for Your Precious Gift
The Honor Wey Jehovah Don Give You for E Family, No Play With-Am!
9 Jehovah make us make we fit born children, and give us the work make we fit teach them to love and serve God. If you be papa or mama, you dey happy for this special gift? Even though say Jehovah bless the angels with plenty better things, e no make them for way wey them fit born children. So, if you be papa or mama and you de train pikin, make you no play with this kind special thing at all. Papa and mama don receive the important work to “teach and train [their children] for the way wey Jehovah want.” (Eph. 6:4; Deut. 6:5-7; Ps. 127:3) Jehovah organization don provide plenty things from Bible to help papa and mama. Some of this things na our book them, videos, music, and other things for Internet. E clear say our Papa for heaven and e Son love our young people. (Luke 18:15-17) When papa and mama trust Jehovah and really do their best to care for their children wey them love, Jehovah de glad. And this kind papa and mama de give their children the hope to be part of Jehovah family forever!
Papa and Mama—‘Train Your Children’ to Love Jehovah
20 Know your children well. Psalm 127 talk say children be like arrow. (Read Psalm 127:4.) Them fit use different-different things to make arrow, and arrow still get different-different size. For the same way, each pikin dey different. So papa and mama need to check how to train each of their pikin them. Make we see the example of one husband and wife for our time. Them de live for Israel. Them train their two children to serve Jehovah. Wetin help them? Them talk say, “We de separate the children when we want study with them.” But, na each family head go decide whether them need to separate their children when them de study with them.
Fine-Fine Things Wey You See for Bible
it-1 543
Plants for Bible
The person wey write this psalm talk some things about olive tree when e de talk about the promise wey dey for people wey de fear Jehovah. E say: “Your sons go surround your table like branches wey de come out from olive tree.” (Ps 128:1-3) Many times, na the small-small branches wey them cut from olive tree wey don grow well-well them de use plant new trees. Another thing be say, olive tree wey don old fit get branches wey de grow from the root, and na this ones them de use maintain theirself. Like this kind branches, sons go surround papa, and them go de do their part to make happiness dey for family.
JANUARY 13-19
FINE-FINE LESSON FROM BIBLE PSALMS 135-137
“Our Lord Big Pass All Other Gods”
it-2 661 ¶4-5
Power, Work Wey Show God Power
The way God de control the things wey e make dey special. For Jehovah to show say na im be the true God, e fit need to show the power wey e get to control the things wey e make, and e go do-am for special way as e concern im name. (Ps 135:5, 6) Since the sun, moon, the different planet, and the stars de follow the normal way wey God make them, since the condition of the weather (wey de produce heavy breeze, rain, and other things wey weather de cause) de obey the law wey de control them, since many locust de move up and down and birds de fly from one place go another place, e mean say all this things and many other normal things wey de happen no dey enough to make God name dey clean from the bad things wey people don do against that name and the lie-lie worship wey full everywhere.
Even with that one, Jehovah fit cause all this natural things wey e make to join prove-am say na im be God when e use them make wetin e want happen. And e fit even cause this things to do pass the normal way wey them suppose do. And many times, e de do-am for the exact time wey e don arrange. Even though say things like dry season, heavy rain, or some kind weather condition na something wey dey normal, the way Jehovah de use them to make im prophecy happen really dey special and different. (Compare 1Ki 17:1; 18:1, 2, 41-45.) Many times, the way this things take happen really de surprise person. E fit be because of how e serious reach or the big way wey e take happen (Ex 9:24) or because them happen for way wey e never happen before, or way wey people never hear about before, or for time wey e no suppose happen.—Ex 34:10; 1Sa 12:16-18.
Wetin You De Gain From Jehovah Love Wey No De Fail?
16 When we trust Jehovah say e go protect us, that one de comfort us. But sometimes, problem fit make us feel bad and e fit hard us to happy again. When this kind thing happen, wetin Jehovah go do for us? (Read Psalm 136:23.) E go use e hand sofri carry us up, and help us stand again so that we go happy again. (Ps. 28:9; 94:18) How this one de help us? We know say we fit always trust Jehovah. This one de help us remember say Jehovah don bless us for two ways. Number one, we know say no matter where we dey for this earth, Jehovah go always protect us. And number two, our Papa for heaven de really care about us.
Fine-Fine Things Wey You See for Bible
it-1 1248
Jah
The way them use the word wey be Jah for Bible show say Jah na word wey connect with the strong feeling wey person de get when e de sing and praise Jehovah, de pray and de really beg Jehovah for something. And as Bible show, people de always use this word wey be Jah when them de happy because them don win and Jehovah don save them or when person don see something wey make-am believe the mighty power wey God get. Plenty examples dey of how them use this word for special way. The sentence, ‘Make una praise Jah!’ (Hallelujah) de show as wetin English de call doxology for the book of Psalms, and na one way wey person de show say e de praise God. The first place wey e show na Psalm 104:35. For other psalms, e fit dey for only the beginning (Ps 111, 112), sometimes e fit dey for inside the psalm (135:3), and for other times, e fit dey for only the end (Ps 104, 105, 115-117), but most times, na both for the beginning and for the end (Ps 106, 113, 135, 146-150). The book of Revelation show say angels for heaven de use this short form when them de praise Jehovah.—Re 19:1-6.
The remaining place wey “Jah” for show still help us see say them use the word when them de sing and pray to Jehovah. The song wey Moses sing after God save them dey there. (Ex 15:2) For the things wey Isaiah write, them join the two names together to form “Jah Jehovah” to make-am get more value. (Isa 12:2; 26:4) When Hezekiah de praise Jehovah after Jehovah heal-am when e de sick and e almost die, e use the word Jah many times to show the better way wey e de feel. (Isa 38:9, 11) Bible show the difference between the people wey don die wey no fit praise Jah and people wey don make up their mind to use their life praise-am. (Ps 115:17, 18; 118:17-19) Other psalms still dey wey show the prayer of people wey de thank Jehovah as e save them, protect them, and give them correction.—Ps 94:12; 118:5, 14.
JANUARY 20-26
FINE-FINE LESSON FROM BIBLE PSALMS 138-139
No Let Your Fear Stop You
Praise Jehovah for Inside Congregation
10 How you de feel anytime you even think-am say you want raise your hand to give comment? Your heart de cut because of fear? If na so, know say no be only you de feel like that. The truth be say, almost all of us de get small fear anytime wey we want give comment. Before you fit manage this your fear, you need to know wetin de cause the fear. You de fear say you fit forget the thing wey you want talk, or your answer fit no correct? You de worry say your comment fit no sweet reach other people their own? The truth be say, this things wey de make you fear de show say you get one better character. Them de show say you dey humble and you de see other people say them better pass you. Jehovah like this character no be small. (Ps. 138:6; Phil. 2:3) But you need to praise Jehovah and encourage your brothers and sisters for meeting, na the thing wey Jehovah want. (1 Thess. 5:11) E love you and e go give you the courage wey you need.
Encourage Each Other for Meeting
7 One thing wey fit help you na to check wetin dey some Watchtower articles wey we don study before. For example, make you prepare well. (Prov. 21:5) The more you understand wetin them go discuss for meeting, the more e go easy for you to raise your hand to answer question. Another thing na to make your answer short. (Prov. 15:23; 17:27) When your answer dey short, e go help reduce your fear to answer question. E go easy for brothers and sisters to remember short answer wey be one or two sentence, pass long answer wey talk about plenty things. When you give short answer wey you no just read-am from the paragraph, this one go show say you prepare well and say you understand wetin them de discuss for meeting.
Fine-Fine Things Wey You See for Bible
it-1 862 ¶4
To De Forgive
To de forgive other people for wetin them do you, no matter how many times wey them do you bad na something wey Christian must do. (Lu 17:3, 4; Eph 4:32; Col 3:13) God no de forgive people wey no de gree forgive other people. (Mt 6:14, 15) But even though say serious sin make them remove “the wicked person” from the congregation, them fit later call-am back if e really repent. That time everybody for congregation go show-am say them love-am. (1Co 5:13; 2Co 2:6-11) Christians no need to forgive people wey wicked, wey de open eye commit serious sin and no de gree repent. This kind people de become God enemy.—Heb 10:26-31; Ps 139:21, 22.
JANUARY 27–FEBRUARY 2
FINE-FINE LESSON FROM BIBLE PSALMS 140-143
Do Your Best After You Don Pray
“Listen Well to Wetin the Person Wey Get Sense De Talk”
13 See advice as love from God. Jehovah want the best thing for us. (Prov. 4:20-22) Jehovah de show say e love us when e use e Word, our book them, or any brother or sister for congregation, to give us advice. Hebrews 12:9, 10 talk say: “God de correct us for our own good.”
14 Put mind for the advice, no be for the way the person give the advice. Sometimes, we fit feel say the person wey give us advice, no give-am for correct way. The truth be say, anybody wey want give advice suppose give-am for way wey go make-am easy for person to accept-am. (Gal. 6:1) But if na we person de give advice, e good make we put our mind for wetin we fit learn from the advice, even though say the person wey de give the advice no de give-am for correct way. We fit ask ourself this questions: ‘Even though say I no like the way the person give the advice, I fit learn something from wetin the person talk? I fit do like say I no see the mistake of the person wey de give the advice, and learn from the advice?’ E go really good if we find way to gain from any advice wey we receive.—Prov. 15:31.
w10 3/15 32 ¶4
Continue to Get “Pure Heart” for This Hard Time
Problem from people wey dey against us, money problem, and serious sickness really de affect some of God servants. Sometimes, e even still de affect their heart for bad way. Even King David experience this kind thing: “My power don de finish; my heart no de feel anything again.” (Ps. 143:4) Wetin help-am to fit endure for this kind time? David remember the way God de treat Im servants and how e imself don see the way Jehovah save-am. E think deep about wetin Jehovah don do because of Im wonderful name. David de take time think about the things wey God make. (Ps. 143:5) For the same way, to de think deep about our God and all the things wey e don do and wey e still de do for us go help us when we de face problem.
w15 3/15 32 ¶2
Marry ‘Only Person Wey De Follow the Lord’—E Still Make Sense?
Sometimes you fit de feel like David, wey talk say: “Answer me quick-quick, O Jehovah; my power don de finish. No hide your face from me.” (Ps. 143:5-7, 10) For time like this, e go good to give your Papa for heaven time to show you wetin e want for you. You fit do this one when you take time read im Word and think deep about wetin you de read. You go know e commandment and you go see the things wey e don do for im people for past. As you de listen to-am, you go dey sure say to obey-am really make sense.
Fine-Fine Things Wey You See for Bible
it-2 1151
Poison
Another Way Them De Use-Am. The lie-lie and the bad things wey wicked people de talk about person de really spoil person name. Bible talk say this kind thing be like serious poison from snake. (Ps 58:3, 4) Bible talk about people wey de spoil other people name. E say: “Viper poison dey the back of their lips” (or “under their lips”), even as the thing wey de produce this poison dey for back of the snake lips and the teeth dey the jaw for up. (Ps 140:3; Ro 3:13) Tongue wey de spoil person name, de talk bad about person, de spread lie-lie teaching or things like that, full with “poison wey fit kill person.”—Jas 3:8.
FEBRUARY 3-9
FINE-FINE LESSON FROM BIBLE PSALMS 144-146
“The People Wey Their God Na Jehovah Go Dey Happy!”
w18.04 32 ¶3-4
Question Wey Some People Don Ask
2. The way them translate-am match with the rest verse for the psalm. We understand say the word ‘then’ for verse 12 mean say all the blessings wey verse 12 to 14 de talk about concern righteous people—people wey de beg make them save them and free them from wicked people hand (verse 11). The adjustment still show for verse 15 where them use the word “happy” two times and the two match for better way. So because of this one, the happiness wey this two place de talk about concern the same people—the “people wey their God na Jehovah!” Still get-am for mind say, the original Hebrew language wey them use no get punctuation mark like, quotation mark. So translators must try know the correct way to translate-am. And them go still need to check the way them take write-am for Hebrew language, wetin the other verse wey dey around-am talk, and other place for Bible wey talk something like that.
3. The way them come translate-am again match with other place for Bible wey talk say God go bless people wey de serve-am well. Because of the new way wey them take translate the word asher, the psalm come agree with the better hope wey David get say after God save im people from their enemy hand, God go bless them with plenty things, and them go happy. (Lev. 26:9, 10; Deut. 7:13; Ps. 128:1-6) For example, Deuteronomy 28:4 talk say: “God go bless una children and wetin una plant, e go bless the pikin wey una animal born, and bless una young cattle and sheep.” True-true, when Solomon wey be David pikin be king, Israel people really enjoy peace and Jehovah bless them well-well. Another thing be say, some things wey happen when Solomon de rule show us how things go be when the Messiah don de rule.—1 Ki. 4:20, 21; Ps. 72:1-20.
Continue to Make Your Hope Strong
16 The hope wey we get to live forever na really important gift from God wey we no suppose play with at all. We de hope to get the better things wey we go enjoy for future and we really dey sure say this one go happen. Our hope be like anchor. E de make us dey close to Jehovah so that we go fit endure our problems, we fit stand well when people de give us trouble, and we no go even fear to die. E be like helmet, e de protect the way we de think so that we fit reject things wey no correct and do the things wey correct. This hope wey Bible talk about de help us near God more-more, and e de show us say the love wey God get for us really strong no be small. We de really gain as we continue to do wetin go make our hope dey clear and strong.
17 Apostle Paul encourage the Christians for Rome for the letter wey e write to them. E talk say: “Dey happy because you get hope.” (Rom. 12:12) Paul dey happy because e dey sure say if e continue to dey faithful, e go get life wey no go end for heaven. Our hope fit make us dey happy too because we dey sure say Jehovah go do the things wey e don promise. Bible talk say: “Any person wey . . . get hope for Jehovah e God go dey happy, . . . the Person wey always dey faithful.”—Ps. 146:5, 6.
w18.01 26 ¶19-20
Which Kind Love De Make Person Really Happy?
19 E don reach about 6,000 years wey human being don de suffer. And this world wey Satan de control go soon end. Today, we de see people wey like theirself, wey like money, and wey like enjoyment pass any other thing. This kind people de only put mind for wetin them go get, and na wetin them want be the number one thing for their life. But this kind people no de really happy. Instead, Bible tell us say: “Any person wey the God of Jacob de help and wey get hope for Jehovah e God go dey happy.”—Psalms 146:5.
20 We love Jehovah well-well. And every year, plenty people de come join us. This one really show say God Kingdom don de rule and e go soon bring better blessings come this earth. Real happiness wey de last de come when person de do wetin God want and when e know say e de do wetin de make the Person wey high pass happy. And the people wey love Jehovah go dey happy forever! For the next topic, we go see some of the bad character wey people wey love only theirself de get. And we go still learn how this bad character take different from the ones wey Jehovah servants de get.
Fine-Fine Things Wey You See for Bible
it-1 111 ¶9
Animals
Bible de teach us say make we de treat animals well. Jehovah describe imself as person wey de use love provide and care for this animals. (Pr 12:10; Ps 145:15, 16) The law wey God give Moses encourage people to care for animals well. When them see say animal de lost, them go carry-am go back to the owner, and when the load wey the animal carry too heavy, them go remove some so that the load no go too heavy. (Ex 23:4, 5) Them no go use them work anyhow. (De 22:10; 25:4) Like the people that time, animals too need to rest for Sabbath. (Ex 20:10; 23:12; De 5:14) Them go control or destroy animals wey dey dangerous. (Ge 9:5; Ex 21:28, 29) To bring two different animal together to born pikin na wetin God forbid.—Le 19:19.
FEBRUARY 10-16
FINE-FINE LESSON FROM BIBLE PSALMS 147-150
We Get Plenty Reason to Praise Jah
w17.07 18 ¶5-6
“Why E Good Make We Praise Jah”?
5 Jehovah make all Israel people mind come down, and e do-am one by one. Na wetin e still de do for us today. The person wey write Psalm 147 talk about God say: “E de heal people wey de feel say their own don finish; e de bandage their wound.” (Ps. 147:3) Yes, Jehovah de care for people wey de face problem, whether them de sick or them no happy. Today, Jehovah really ready to make our mind come down, and to make us happy. (Ps. 34:18; Isa. 57:15) E de give us sense and power to fit bear any wahala wey we de face.—Jas. 1:5.
6 The same person wey write Psalm 147 still talk about the stars wey dey heaven. E say: Jehovah “de count the number of the stars” and e “get name wey e de call them.” (Ps. 147:4) Why e be like say e change the topic, come de talk about stars? Think-am like this: The person wey write this psalm de see the stars with im eyes, but e no fit know how many them really be. As time de go, the number of stars wey we fit see don plenty pass before. Some people think say, the stars wey dey for only Milky Way galaxy many well-well (reach billions). And e fit be say the number of galaxy (plenty star wey dey together) wey dey fit reach trillions! The truth be say, we no fit count the stars. But Jehovah wey make them, get name wey e de call each of them. This one mean say each of them dey special to Jehovah. (1 Cor. 15:41) What about the people wey e done make for this earth? The God wey know where each star dey anytime, fit still know each of us! E fit know exactly where we dey, how we de feel, and the particular thing wey we need anytime.
w17.07 18 ¶7
“Why E Good Make We Praise Jah”?
7 Jehovah no only know you. E still understand how you de feel when you dey problem, and e get the power to help you. (Read Psalm 147:5.) You fit de feel say your problem big pass you, and you no fit handle-am. God know where your power reach, “E remember say [you] be dust from ground.” (Ps. 103:14) Because we no dey perfect, we de make the same mistake everytime. E really de pain us sometimes and we de regret-am when we talk wetin we no suppose talk, do bad thing wey our body want or when we start to jealous other people because of wetin them get! This kind things no de happen to Jehovah, but still, e really understand us no be small!—Isa. 40:28.
w17.07 21 ¶18
“Why E Good Make We Praise Jah”?
18 The person wey write Psalm 147 know how God really favor Israel people. Na only them God give im word and im law. (Read Psalm 147:19, 20.) Today, na only us de bear God name and na real blessing for us. To know Jehovah and see how im Word de work for our life don make us enjoy better friendship with-am. Like the person wey write Psalm 147, you no get many better reason to shout ‘Praise Jah!’ and to encourage other people to do the same thing?
Fine-Fine Things Wey You See for Bible
it-1 316
Birds
One of the person wey write psalm call the ‘birds wey get wings make them praise Jehovah (Ps 148:1, 10), and birds de do this one with the way their body be and the way Jehovah design them. Each bird fit get up to 1,000 to more than 20,000 feathers. And each feather get wetin them de call shaft wey get plenty different branch wey them de call barbs, and them de form something like web. Each barb get plenty small-small things wey them de call barbule, each of this barbule still get plenty-plenty things wey them de call barbicels and hooklets. Them don see say one six-inch feather of one pigeon fit get hundreds of thousands of barbules and millions of barbicels. The way Jehovah arrange everything for the wings of bird wey de make them fit fly, better pass the way them make any machine wey fit fly today, like aeroplane and things like that. Bird bone get space for inside, and na this one de make them no heavy. When one bird wey them de call frigate bird open e wings, the measurement from left to right na 2-m (7 ft), and the weight of the skeleton fit be only about 110 g (4 oz). Some bones wey dey the wings of big bird wey de fly de get something wey de support them, like the thing wey them de call strut wey de support the wing of aeroplane.
FEBRUARY 17-23
FINE-FINE LESSON FROM BIBLE PROVERBS 1
Young People—Who Una Go Listen To?
w17.11 29 ¶16-17
No Let Anything Make You Miss Wetin God Promise
16 What if you be young person and you de feel say your Christian papa and mama no de understand you and them no de let you do wetin you want? You fit start to de vex and that one fit even make you de doubt whether to serve Jehovah na the best way of life. But if you allow the way you de feel make you stop to serve Jehovah, the result no go good and you go soon see say no other person really love and care for you reach your papa and mama wey de serve Jehovah and people for your congregation.
17 If your papa and mama no de correct you, you no go de wonder whether them really care about you? (Heb. 12:8) But maybe na the way your papa and mama take de correct you de vex you. Instead of you to de vex, try to see why them de correct you like that. So calm down and try your best make you no de over vex. Bible talk say: “When person get sense, e no de too talk, and when person know wetin e de do, e go dey calm.” (Prov. 17:27) Try to de behave like mature person wey de sofri take advice. Think about the gain and no de worry yourself about how them take de correct you. (Prov. 1:8) Na big blessing to get papa and mama wey really love Jehovah. Them go really want help you and make sure say you get the better life wey God don promise.
w05 2/15 19-20 ¶11-12
De Protect Your Friendship With God
11 Try to make God happy, no be man. E dey normal for person to want dey part of one particular group. Everybody need friend, and when them make person part of something, e de make the person happy. When person dey young, or even when e don de old, the feeling to de follow friends and do wetin them de do or do wetin go make them happy de dey strong. But no be everytime our friends or our age group de really want wetin good for us. Sometimes na person wey go join them do wetin bad them de find. (Proverbs 1:11-19) When Christian don de allow bad friends to control-am, e de always try to hide who e really be. (Psalm 26:4) Apostle Paul warn say: ‘No de follow the behavior of the world wey dey around you.’ (Romans 12:2, The Jerusalem Bible) Jehovah de give us the power wey we need to fit fight the temptation to follow the way this world de behave.—Hebrews 13:6.
12 When temptation to follow the way the world de do things de try to make us forget our friendship with God, e good make we remember say to hold God tight dey important pass wetin people de think about us or to de follow wetin de reign. The advice wey dey Exodus 23:2 fit guide us. E say: “No ever join do bad just because plenty people de do-am.” When many Israel people come de doubt whether Jehovah go fit do wetin e promise, Caleb get strong mind and no gree follow them. E dey sure say everything wey God promise na true and e fit trust-am and God bless-am for wetin e do. (Numbers 13:30; Joshua 14:6-11) For the same way, you don ready to run from the temptation to follow wetin people think say be the correct thing so that you go fit protect your friendship with God?
Fine-Fine Things Wey You See for Bible
it-1 846
Fool
For Bible, the word “fool” no de talk about person wey get mental sickness, but them de use-am talk about person wey no de reason and wey de follow the kind life wey no agree with wetin Jehovah want. Different-different Hebrew word wey them take describe this kind person na kesilʹ (‘stupid person’; Pr 1:22), ʼewilʹ (“foolish person”; Pr 12:15), na·valʹ (‘person wey no get sense’; Pr 17:7), and lets (‘person wey de use other people do yeye’; Pr 13:1). The Greek aʹphron de talk about ‘person wey no de reason well’ (Lu 12:20), a·noʹe·tos de talk about “person wey no get sense” (Ga 3:1), and mo·rosʹ na ‘fool’ or “foolish” person (Mt 23:17; 25:2).
FEBRUARY 24–MARCH 2
FINE-FINE LESSON FROM BIBLE PROVERBS 2
Why E Good to Put Body for Personal Study?
“Continue for the Truth”
16 Many of us no like to de read and study. But Jehovah want make we de study Bible and our book them so that we go fit know more things about the truth. (Read Proverbs 2:4-6.) When we study, we de always gain plenty things. One brother wey e name na Corey talk how e de study Bible. E say e de take time look each verse. E talk say: “I de check all the footnote wey dey the verse, de check other Bible portion wey connect to the verse, and do other research about-am. . . . I de really gain when I de study Bible like this!” Whether na like this we de study Bible or we de use another method wey different, we de show say the truth dey important to us when we de take time study Bible.—Ps. 1:1-3.
Correct Sense De Shout Call People
3 Person get sense when e de use wetin e know to make better decision. But to get correct sense pass that one. Bible talk say: “To fear Jehovah na the start of sense, and to know the Person Wey Holy Pass mean to understand.” (Prov. 9:10) So when we get important decision to make, we need to find out wetin Jehovah think about-am. This one go show say we “know the Person Wey Holy Pass.” We fit do this one when we de study Bible and our book them. When we do like that we de show say we get correct sense.—Prov. 2:5-7.
4 Jehovah na the only Person wey fit give us correct sense. (Rom. 16:27) Why we fit talk say correct sense de Come From Jehovah? Number one, na Jehovah make everything, and e know everything about the things wey e don make. (Ps. 104:24) Number two, everything wey Jehovah de do de show the kind sense wey e get. (Rom. 11:33) Number three, people de always gain when them follow the better advice wey Jehovah de give. (Prov. 2:10-12) If we want really get correct sense, then we must accept this three main truth wey we don talk for here and allow them to help us for the things wey we de do and when we de make decision.
w16.09 23 ¶2-3
Young People—Do Wetin Go Make Your Faith Strong
2 As young person wey de serve Jehovah or wey de learn about-am, e de do you to agree with some kind belief, like the belief say things come by eself, instead of the belief say person dey wey make everything? If na so e be, some things dey wey you fit do to make your faith continue to dey strong. One of this things na to use the power to think wey God don give wey “go protect you.” E go protect you from lie-lie story wey fit destroy your faith.—Read Proverbs 2:10-12.
3 Na when we learn the correct thing about God we fit get real faith. (1 Tim. 2:4) So as you de study Bible and our book them, no rush do-am. Use the power to think wey God don give you, to fit ‘understand’ wetin you de read. (Matt. 13:23) Make we see how this one fit help you get strong faith say na God make everything and still help you believe wetin Bible talk. Many things dey wey fit prove this things.—Heb. 11:1, ftn.
Fine-Fine Things Wey You See for Bible
it-1 1211 ¶4
Hold God Tight
To fit hold God tight for our life na something wey dey possible, but person no fit do-am with e own power, na when e get deep faith and trust for Jehovah and the power wey Jehovah get to save-am. (Ps 25:21) God don promise say e go de ‘guide’ and ‘protect’ the people wey de hold-am tight. (Pr 2:6-8; 10:29; Ps 41:12) As them de always try to do things wey go make Jehovah happy, e de help them fit balance their life. And this one de help them focus on the plan wey them get to serve Jehovah. (Ps 26:1-3; Pr 11:5; 28:18) Na true say Job see wetin surprise-am, say people wey hold God tight de die because of the rule of wicked people, and them fit even die join wicked people. But, Jehovah still make us dey sure say e de notice the life of people wey hold-am tight and e don promise this kind people say the thing wey e go use bless them go last forever, them go really get peace for future and e no go ever fail to give them anything wey good. (Job 9:20-22; Ps 37:18, 19, 37; 84:11; Pr 28:10) As e be for Job case, na when person hold God tight, e de get real value and respect, no be just when e get money and property. (Pr 19:1; 28:6) Na big honor for children to get person like Job as papa or mama and them go really happy. (Pr 20:7) This kind children de learn better thing from their papa life example, and them go enjoy part of the good name and the respect wey e don gain.