Study Book for Our Life and Preaching Meeting
© 2025 Watch Tower Bible and Tract Society of Pennsylvania
MAY 5-11
FINE-FINE LESSON FROM BIBLE PROVERBS 12
Gain Dey for Hard Work
w16.06 30 ¶6
Character Wey Better Pass Diamond
E fit hard some of Jehovah people to fit get the kind work wey go give them the things wey them need for life. Instead make them find short cut wey go make them play wayo take get money, them de try to work hard and them de do their work well. As them de do this one, them de show say them value the better-better character wey God get pass any other thing, even the one wey be to de talk true, and to de do the correct thing.—Prov. 12:24; Eph. 4:28.
w15 2/1 5 ¶4-6
How to Enjoy Hard Work
E really good to think about that last question, because we de really happy for our work when we de see how other people de gain from-am. Jesus talk say: “Na when person de give e go happy pass when e de receive.” (Acts 20:35) No be only people wey we de work for or people wey de follow us do business de gain as we de do our work. Other people still dey wey de gain from our hard work. Some of this people na our family members and people wey need help.
Our family members. When family head de work hard to provide for im family, the family de gain for two ways. Number one, e de make sure say them get the things wey them need to fit live, like food, cloth to wear, and place to stay. As e de do this one, e de do the work wey God don give-am wey be to “provide for people wey be im own.” (1 Timothy 5:8) Number two, family head wey de do im work well de use im example teach other people say hard work dey important. Shane wey we don talk about for the article before this one talk say: “My papa na better example of person wey de work hard and wey de do im work well. E do carpenter work for most of im life. And for all the work wey e do, e de always talk true and do the correct thing. E example help me see say to de do hard work with our hands and to de make things wey fit help other people really dey important.”
People wey need help. Apostle Paul advice Christians say make them “do hard work, . . . so that [them] go fit get something to share with person wey no get.” (Ephesians 4:28) True-true, when we work hard to provide for ourself and our family, we fit still help other people wey need help. (Proverbs 3:27) So when we de work hard, e fit give us the chance to enjoy the happiness wey person de get when e de give.
Fine-Fine Things Wey You See for Bible
ijwyp article 95 ¶10-11
How I Strong Reach When Problem Dey?
● Control the way you de see your problem. Learn to know the difference between big problem and small one. Bible talk say: “When foolish person vex, e de show one time. But person wey get sense no de take insult as anything.” (Proverbs 12:16) No be all problem suppose worry you too much.
“For school, children de complain about small problem like say na really big problem. Then some friends for internet go answer them. This answer go make them vex more-more and them no go fit control theirself or control the way them de see their problem.”—Joanne.
MAY 12-18
FINE-FINE LESSON FROM BIBLE PROVERBS 13
No Let “the Lamp of Wicked People” Fool You
it-2 196 ¶2-3
Lamp
Other Way Wey Them Use-Am. Since lamp na something wey fit light person road so that e go fit see where e de go, them use-am represent the thing wey person de depend on wey fit help-am know the right way or the right thing to do. The book of Proverbs help us see the difference between righteous people and wicked people. E say: “The light of righteous people de shine well-well, but the lamp of wicked people go quench.” (Pr 13:9) The light of righteous people de continue to bright more-more. But even if e be like say the lamp of wicked people de shine, and them de succeed because of the bad things wey them de do, God go make sure say everywhere dark for them, them go hit their leg and them go surely fall. Na this kind thing de wait for person wey de curse im papa and im mama.—Pr 20:20.
When person ‘lamp quench,’ e still mean say that person no get future. Another proverb talk say: “Because anybody wey dey wicked no get future; wicked people lamp go quench.”—Pr 24:20.
w12 7/15 12 ¶3
Serve the God of Freedom
3 If Satan fit deceive two perfect people, even plenty angels for heaven, and make them reject God as the person wey get the right and authority to rule them, e fit still deceive us. The way e de deceive people never change. E de try to make us feel say the things wey God want make we do na load for us, and e no go make us enjoy life. (1 John 5:3) This kind thinking fit really affect us if we de always allow-am enter our mind. One sister wey dey 24 years wey don put hand for sex wey no clean talk say: “Bad friends really affect me because I de always fear, I no want dey different from my friends.” E fit be say you self don face this kind thing.
w04 7/15 31 ¶6
“Wise Person De Use Sense Do Something”
Person wey de do wetin correct and wey de use sense do things go get blessing. Solomon tell us say: “Righteous people de eat and them de belleful, but wicked people belle go dey empty.” (Proverbs 13:25) Jehovah know wetin good for us for life, whether na for matter wey concern our family, how we de do things with other people, our preaching work, or when them de correct us. When we de follow the better-better advice wey dey inside God Word, we go surely enjoy the best way of life.
Fine-Fine Things Wey You See for Bible
it-2 276 ¶2
Love
Love Wey Them No Use for Correct Way. Because of all this one, e dey clear say person fit get real love and use-am for the correct way only if e ask for God spirit and follow the things wey dey God Word. For example, papa or mama fit love im pikin. But e fit allow that love de die small-small or e fit no use the love for the correct way because of the way e de feel. E fit de give the pikin everything wey the pikin ask for, e no de deny the pikin anything. E fit no de use the authority wey e get as papa or mama to correct the pikin or even give-am punishment sometimes. (Pr 22:15) This kind love dey selfish, and na family pride because them de feel say to give their pikin punishment no go make their family get respect for people eye. Bible talk say this kind person no really love im pikin, e hate-am, because e no de do the things wey go save the pikin life.—Pr 13:24; 23:13, 14.
MAY 19-25
FINE-FINE LESSON FROM BIBLE PROVERBS 14
When Problem Come, Think Before You Do Anything
Life Na Gift From God, Value-am
10 Sometimes, we no go fit stop some things wey fit put our life for danger, make them no happen. For example, we no go fit stop-am make disaster, sickness wey de spread, or riot no happen for our area. And when this kind thing happen, we fit do our best to hide ourself from danger and do wetin go make us fit survive-am. How? We go need to obey government people if them give us time ‘to de come out and time to stay inside’ or say make we pack comot from the area. (Rom. 13:1, 5-7) E dey possible to prepare for wetin we no expect before e happen. So make we put ear for wetin government for our area talk and do wetin them talk, this one go help us prepare well. For example, we fit keep some water wey we fit use for some time, food wey no de quick spoil, and some medicine.
11 Wetin we go do if sickness de spread for our area? Make we obey wetin government talk, like to de wash our hand, no de too near people, wear facemask, and quarantine. When we do this one, e go show say we really value life.
12 When wetin we no expect de happen, people go de talk different-different things wey fit no correct. Them fit be our friends, neighbors, and even news people. Instead make we “believe everything” wey we hear, e better make we listen to news from government and other people wey we de sure say their news correct. (Read Proverbs 14:15.) Governing Body and branch office them, de do their best to make sure say them get correct information before them tell us wetin we go do about our meeting and preaching work. (Heb. 13:17) When we obey their advice, we go protect ourself and other people from danger. And e fit make people for our area respect Jehovah organization more.—1 Pet. 2:12.
Get Strong Mind Like Zadok
11 If them give you the work to care for our brothers and sisters when serious bad thing de happen, how you fit show say you get strong mind like Zadok? (1) Do things the way Jehovah organization say make you do-am. When serious bad thing de happen, e dey important make we de obey wetin Jehovah organization talk, so that all of us go dey together as one. Follow direction from the branch office wey de care for una. (Heb. 13:17) Make elders de always check the things wey branch office don write about how to prepare before disaster happen, and wetin to do when e happen. (1 Cor. 14:33, 40) (2) Get strong mind but make you dey careful. (Prov. 22:3) Use sense do things. As you de help brothers and sisters, no put your life for danger anyhow. (3) Trust Jehovah with all your heart. Remember say Jehovah no want make bad thing happen to you and other brothers and sisters. So e go fit protect you as you de help brothers and sisters.
Fine-Fine Things Wey You See for Bible
it-2 1094
The Power to Think
But people fit start to hate person wey sabi use sense do things. E fit be say na wetin Proverbs 14:17 de try talk about when e say: “The person wey de quick vex de do things like say e no get sense, but people hate the man wey de think before e do something.” Many times, people wey no sabi think no dey happy when them see other people wey sabi use their brain well. Another thing be say them go hate people wey de use sense do the things wey God want. Na wetin Jesus Christ talk be this, e say: “Because una no be part of the world and I don choose una from this world, na im make the world hate una.” (Joh 15:19) The truth be say, the original-language word wey them translate as ‘the power to think’ wey Proverbs 14:17 de talk about fit connect with bad thinking. So the things wey them write for that verse fit still mean say them go hate person wey de plan bad things. And some translations talk say: ‘And them de hate man wey de plan bad things.’—JP, Ro.
MAY 26–JUNE 1
FINE-FINE LESSON FROM BIBLE PROVERBS 15
Help Other People to Dey Happy
w10 11/15 31 ¶16
We Go Hold Jehovah Tight!
16 Job na person wey sabi welcome people and care for them. (Job 31:31, 32) Even though say we no dey rich, we fit still “de always welcome and care for people.” (Rom. 12:13) Even if na small thing we get, we fit share-am with other people. Make we remember say “e better to eat vegetable where love dey than to eat plenty meat where love no dey.” (Prov. 15:17) When we de chop with people wey love Jehovah and for place wey love dey, we go really enjoy-am even if na simple food and we go fit continue to near Jehovah more-more.
w18.04 23-24 ¶16-18
Make We De Encourage Each Other “And De Really Do This Things”
16 E no go good if we believe say we no fit encourage other people because we de feel say we be quiet person. We no need to do many things to fit encourage person. E fit just be say na to smile for person when we de greet-am. If the person no smile for us back, e fit be say problem dey. And just to listen to person as e de talk about im problem fit just make im mind come down.—Jas. 1:19.
17 One young brother wey e name na Henri really feel pain when some of im family people stop to serve Jehovah, even im papa wey be elder wey them de respect well-well. One circuit overseer carry Henri go out to go drink coffee and e really encourage Henri. The circuit overseer allow-am talk things wey dey im mind. Henri come see say the only way to help im family start to serve Jehovah again, na for-am to continue to do im best to serve Jehovah well. Im mind really come down when e read Psalm 46; Zephaniah 3:17; and Mark 10:29, 30.
18 Marthe and Henri example help us see say, we fit encourage any brother or sister wey need person to encourage-am. King Solomon write say: “Word wey person talk for correct time, really dey good! Smile de make person heart happy and good report de make the bone strong.” (Prov. 15:23, 30) Another thing be say, when person no happy, we fit still read something from Watchtower or our website for the person. This one fit make-am happy again. Paul help us see say to de sing Kingdom song together fit encourage us. E write say: “Continue to teach and de encourage one another with holy songs, with songs to praise God, songs of worship to thank God, and make una de sing to Jehovah from the heart.”—Col. 3:16; Acts 16:25.
Fine-Fine Things Wey You See for Bible
ijwbq article 39 ¶3
Christian Fit Accept Medical Treatment?
2. E go good make I ask other doctors about the kind treatment wey I go take? E really good “when plenty people dey wey de give advice” especially if your condition dey serious.—Proverbs 15:22.
JUNE 2-8
FINE-FINE LESSON FROM BIBLE PROVERBS 16
Three Questions Wey De Help Person Make Good Decision
w14 1/15 19-20 ¶11-12
De Choose the Correct Thing When You Dey Young
11 Na when we de serve Jehovah we de happy pass. (Prov. 16:20) E clear say Jeremiah secretary wey be Baruch forget this one. E get one time wey e no come de enjoy im worship of Jehovah again. Jehovah come tell-am say: “But you de look for big-big things for yourself. No de look for those things again. Because I go soon bring trouble for everybody, . . . and any place wey you go, I go allow you run comot with your life.” (Jer. 45:3, 5) Wetin you think? Wetin for don make Baruch happy—to de look for big-big things for imself, or to survive as person wey hold Jehovah tight when them destroy Jerusalem?—Jas. 1:12.
12 One brother wey e name na Ramiro wey really de happy as e de do things for other people talk say: “I come from one poor family wey de live for one village wey dey the Andes Mountains. So na big opportunity for me when my elder brother talk say e go pay for my university education. But I just newly baptize as Jehovah Witness, and I don receive another invitation from one pioneer to follow-am go preach for one small town. I follow the pioneer, l learn how to barb hair, and I open barber shop to support myself. When we tell people say we go teach them Bible, many of them agree. Later, I join one congregation wey them just newly start wey de use the language of the town. I don dey full-time service for ten years now. No other work fit give me the happiness wey I don get as I de help people learn about the good news for their own language.”
w13 9/15 17 ¶1-3
You Don Change the Kind Person Wey You Be?
THE area wey we grow and the way them train us de affect all of us. E de affect the way we de dress, the kind food wey we de like, and the way we de behave. Why? Part of the reason be say, our condition for life and the kind people wey dey around us de really affect us.
2 But some things dey wey dey important pass the kind food wey we de like and the way we de dress. For example, them train us to see some things as good and to accept-am but to see other things as bad and reject-am. But different people de see this matter of wetin good and wetin bad for different way. The things wey we choose to do fit even be because of wetin our conscience move us to do. Bible show say many times, “people of the nations wey no get law de do the things wey the law talk by theirself.” (Rom. 2:14) But this one mean say for matter wey no get direct law from God, we fit just de follow the way them train us or the things wey people de do for our area?
3 E get two important reason why e no suppose be like that for Christians. Number one, Bible remind us say: “E get the way wey be like say e good for man eye, but for the end the result na death.” (Prov. 16:25) Because we no dey perfect, we no get the power to know wetin correct finish wey fit help us direct our step well. (Prov. 28:26; Jer. 10:23) Number two, Bible show say na Satan wey be “the god of this world” de control the things wey de happen for this world. (2 Cor. 4:4; 1 John 5:19) So if we want make Jehovah bless us, we need to follow wetin dey Romans 12:2.—Read.
Fine-Fine Things Wey You See for Bible
it-1 629
Correction
Wetin De Happen When We Listen and When We No Gree Listen. Fools, wicked people, or people wey no get sense de show say them hate the correction from Jehovah and them de reject-am. (Ps 50:16, 17; Pr 1:7) The bad things wey de come because of this kind foolishness make-am dey clear say his kind people need more correction. And many times, na strong correction them need. Proverbs talk say: “Deep sense de give life to people wey get-am, but na the foolishness of fools de correct them.” (Pr 16:22) Them fit bring poverty for theirself, disgrace, sickness, and even death. The things wey happen to Israel people show how this matter serious reach. Them no gree listen when Jehovah de use the prophets correct them. Because of this one, Jehovah no gree bless and protect them again. Last-last, them face the strong correction wey them don announce before—them destroy their city and carry them as slave.—Jer 2:30; 5:3; 7:28; 17:23; 32:33; Ho 7:12-16; 10:10; Zep 3:2.
JUNE 9-15
FINE-FINE LESSON FROM BIBLE PROVERBS 17
Enjoy Peace for Your Marriage
g 9/14 11 ¶2
How to Forgive When Person Make Us Vex
Check yourself well. Bible help us see say some people “de quick vex” and “de over vex.” (Proverbs 29:22) Na that kind person you be? Ask yourself say: ‘If person do me something, I de always carry-am for mind? I de quick vex? I de make trouble for small matter?’ Bible talk say “the person wey de talk about one matter everytime de scatter tight friends.” (Proverbs 17:9; Ecclesiastes 7:9) This kind thing fit still happen for marriage. So if you de carry things wey person do you for mind, ask yourself say, ‘I fit dey patient with my husband or wife more-more?’—Bible advice: 1 Peter 4:8.
w08 5/1 10 ¶6–11 ¶1
To Solve Problem
1. Get time to discuss the matter. “Everything get e own time, . . . time dey to keep quiet and time dey to talk.” (Ecclesiastes 3:1, 7) As the demonstration wey dey up show, some problems fit make us really vex. If that kind thing happen, try to control yourself for sometime—to “keep quiet”—before quarrel start. You fit save your marriage if you follow Bible advice wey talk say: ‘To start quarrel be like where plenty water de leak come out, so stop-am before fight start.’—Proverbs 17:14, New Century Version.
But “time dey to talk.” Problems be like grass, when you leave-am, e go just de grow. So no just cover the matter and de hope say e go just comot. If you stop any discussion, look for another better time when una go talk about the problem. This one go show say you get respect for your husband or wife. This kind promise fit make una do wetin dey Bible wey talk say: “Make una no allow sun go down when una still de vex.” (Ephesians 4:26) True-true, e good make you do wetin you promise.
Fine-Fine Things Wey You See for Bible
it-1 790 ¶2
Eye
The way we de do our eyes sometimes de really show how we de feel. E fit show whether we de feel pity for person or not (De 19:13); the eyes fit ‘blink’ for way wey show say we de use person do yeye, or say we de plan bad thing. (Ps 35:19; Pr 6:13; 16:30) Them fit still describe person wey no want help person, or wey no de like to do something for another person as person wey de close im eyes or de hide im eyes. (Mt 13:15; Pr 28:27) Them talk say the eyes of stupid person de waka reach the end of the earth, e de go up and down when e no get one particular thing wey e de look. E de think go everywhere, but e no de think the right thing wey e suppose think. (Pr 17:24) Them even de know how person health be, whether e still get power, or whether e de happy, from the way wey e eyes be. (1Sa 14:27-29; De 34:7; Job 17:7; Ps 6:7; 88:9) King Jehoshaphat tell Jehovah say: “Na you we de look.”—2Ch 20:12.
JUNE 16-22
FINE-FINE LESSON FROM BIBLE PROVERBS 18
Encourage People Wey Get Health Problem
Correct Sense De Shout Call People
17 Think before you talk. If we no dey careful, we fit cause big problem with the things wey we de talk. Bible talk say: “Wetin person no use sense talk be like when them use knife chuk person. But wetin them use sense talk de make person well.” (Prov. 12:18) We de make peace dey when we no de gossip about the mistakes of other people. (Prov. 20:19) If we want make wetin we talk de cool people for heart, and no cause them pain, make we always de study Bible, and allow the things wey we de study control our heart. (Luke 6:45) When we de think deep about wetin dey inside Bible, the things wey we de talk go be like “the place wey sense de pour come out from.” Wetin we de talk go always de encourage other people.—Prov. 18:4.
mrt article 19 box
Wetin You Fit Do If Serious Sickness Catch You
De listen well. One of the best ways to help your friend na to de listen anytime wey e de talk. No feel say you must talk something to answer everything wey e de talk. Many times, na just for you to listen. Try get open heart and make you no judge. No believe say you know how your friend de feel, especially if the kind sickness wey e get no be the type wey de show for face.—Proverbs 11:2.
Talk wetin go make your friend strong. You fit no know wetin you go talk, but to make your friend see-am say you know say e de really struggle, talk wetin go make-am dey strong, even if na small thing you talk, e better pass make you no talk at all. If you no know wetin you go talk, you fit just talk small thing wey come your heart like, “I no really know wetin I go talk, but I want make you know say you dey for my heart.” No talk say, “E fit even bad pass like this” or “At least, you no get . . . ”
To show say you care about your friend, you fit even learn about the kind sickness wey e get. Your friend fit really dey happy to see say you de try your best to understand wetin e de face and this one go even help you to fit talk something wey go help your friend. (Proverbs 18:13) But dey careful, make you no start to de give advice wey e no ask you.
Do something to help your friend. Instead make you de think say you know how to help, ask your friend wetin you fit do. Remember say, e fit no want tell you say e really need help because e no want be like load for your neck. If na so, you fit tell your friend some things wey you fit do, like to help-am buy some things for market, to clean e house, or do some other work.—Galatians 6:2.
No tire. As your friend de manage e sickness, sometimes, e fit tell you say e no go fit do some things wey una be don plan, or e fit talk say e no want talk with you. Dey patient and try understand. No stop to give your friend the support wey e need.—Proverbs 18:24.
wp23.1 14 ¶3–15 ¶1
How to Help People Wey Get Mental Problem
“Talk wetin go comfort people.”— 1 THESSALONIANS 5:14.
Your friend fit de worry-worry, or e fit de feel like say e dey useless. If you de do things wey go make-am know say you care about-am, e fit encourage-am and make im mind come down even if you no know exactly wetin to talk.
“Real friend de show love all the time.”—PROVERBS 17:17.
Do things to help-am. Instead make you de feel say you know how to help, ask the person wetin you fit do to help-am. If e de hard your friend to talk wetin e need, try to mention some things wey the two of una fit do together, like to stroll together. Or you fit help-am buy things wey e need for house, do im cleaning, or some other work.—Galatians 6:2.
“Dey patient.”—1 THESSALONIANS 5:14.
Your friend fit no always ready to talk. Make your friend see say you always ready to listen to-am anytime wey e want talk. Because of the sickness wey your friend get, e fit talk or do things wey fit pain you. E fit cancel the plan wey una don make together, or de vex anyhow. As you de try to help-am with the things wey e need, dey patient and try to understand-am.—Proverbs 18:24.
Fine-Fine Things Wey You See for Bible
it-2 271-272
Lot, I
To de cast lot na something wey them de do for olden days when them de decide how to settle matter wey dey ground. The way them de do-am na to put stones or small-small wood or slate ontop cloth wey them fold, “lap,” or inside container and then shake-am together. The person wey im lot fall come out or wey hand carry come out na the one wey them go choose. The lot wey them de cast be like serious agreement. Them fit pray before them cast the lot or them go just expect say Jehovah go help them as them de cast the lot. Them de use the word lot (Heb., goh·ralʹ) when them de talk about “share” or “portion.”—Jos 15:1; Ps 16:5; 125:3; Isa 57:6; Jer 13:25.
How them de use-am. Proverbs 16:33 talk say: “Them de cast lot for lap, but every decision wey come out na from Jehovah.” For Israel, the better way wey them de use lot na to end problem: “To de cast lot de end problem, and e de settle problem between strong people wey dey against each other.” (Pr 18:18) Them no de use-am for sport, to play, or for gamble. Them no de use-am bet, or de set money put—no be game wey person for de loose or win. Them no de do-am to make the temple or the priest rich or just to help anybody. But the Roman soldiers dey selfish, and na wetin them go gain dey their mind when them cast lot for Jesus cloth as Psalm 22:18 don first talk.—Mt 27:35.
JUNE 23-29
FINE-FINE LESSON FROM BIBLE PROVERBS 19
Make You Be Real Friend to Your Brothers
How We Fit Make Our Love for Each Other Continue to Dey Strong?
16 Put mind for the good side of your brothers and sisters. For example, think-am say you go enjoy yourself with some brothers and sisters. For there, una snap one picture together. You still snap two other picture join in case the first one no good. You don get three picture now. For one of the picture, you see say one brother squeeze face. Wetin you go do with the picture? You go delete-am because you get two other pictures wey everybody for the picture de smile.
17 The things wey we de remember about our brothers and sisters just be like the pictures wey we keep. We de always like to remember the good time wey we enjoy with our brothers and sisters. But imagine say one time wey you de enjoy with some brothers and sisters, one brother or sister talk or do something wey make you vex. Wetin you go do? Why you no try forget wetin e do just as you go delete the picture wey you no like? (Prov. 19:11; Eph. 4:32) We fit forget the small-small things wey our brothers do wey make us vex, when we remember plenty good things wey them don do. So, na the better things wey our brothers and sisters do, we want de remember.
Continue to Make Your Love Grow
10 Make we self de look for how we fit help our brothers and sisters to show say we love them. (Heb. 13:16) See the example of Sister Anna, wey we talk about for the article before this one. After strong breeze blow for their area, them visit one family wey be Jehovah Witness and see say the breeze don scatter their roof. This one make all their cloth dirty. Sister Anna talk say: “We carry all their cloth go wash, we iron them, fold them and return-am to them. For our mind, na just small thing we do for them. But this thing wey we do, make us be tight friends reach today.” Because Sister Anna and e husband love brothers and sisters, this one move them to help them.—1 John 3:17, 18.
11 When we do good to people and show say we love them, them go see-am say we de do our best to copy Jehovah. And them go value wetin we do for them, pass as we think. Sister Khanh wey we talk about before, still de remember people wey help-am when e dey young. E talk say: “I thank Jehovah for all the sisters wey carry me go preaching when I dey young. Them come carry me for house, buy food for me, and still go drop me for house. Na now I know say no be small work them do. And them do-am because them love me.” Sister Khanh talk say: “I wish say I go fit pay them back for all the good things wey them do for me, but I no know where all of them dey now. But Jehovah know where them dey and e go bless them for me.” Wetin Sister Khanh talk na true. Na true say no be everybody go remember to thank us for wetin we do for them. But Jehovah de see everything wey we de do for our brothers and sisters, even wetin we think say e small. E value them and e go pay us back.—Read Proverbs 19:17.
Make Una Continue to Show Each Other Love Wey No De Fail
6 Think-am say one man don work for one company for many years, and e de do e work well. But all this years, e never ever meet the owners of the company. And e fit no always agree with the decisions wey the company de make. But e still de work for there because e need that work to get money to care for e family. No be because e really love the company. And e go continue to work for the company until e retire unless e get better work for another place.
7 So, wetin be the difference between the way the man work for the company and love wey no de fail? The difference na the reason for the action. The man still dey that company because of the money wey e de get. But servants of Jehovah for Bible time show love wey no de fail because e come from their heart, no be because them force them to do-am or because of wetin them go gain. Think about the example of David. Even though say Jonathan papa want kill David, David continue to love Jonathan with all e heart. David love this e dear friend sotey even many years after Jonathan die, David continue to show love wey no de fail to Jonathan pikin, wey be Mephibosheth.—1 Sam. 20:9, 14, 15; 2 Sam. 4:4; 8:15; 9:1, 6, 7.
Fine-Fine Things Wey You See for Bible
it-1 515
Advice, Person Wey De Give Advice
Na Jehovah get deep sense pass for the whole world. Na only-am no need person to advice-am. (Isa 40:13; Ro 11:34) Because the Son get God spirit and e de follow the advice from im Papa, na im make-am fit work as “Wonderful Counselor,” and e fit de guide and direct people. (Isa 9:6; 11:2; Joh 5:19, 30) This one make-am clear say for any advice to really work well, e must be wetin Jehovah support. Any advice wey no agree with wetin Jehovah want no get value. That one no be advice at all.—Pr 19:21; 21:30.
JUNE 30–JULY 6
FINE-FINE LESSON FROM BIBLE PROVERBS 20
Things Wey Fit Help Two People Wey Dey Relationship Succeed
‘How Two People Wey Dey Relationship Fit Make Better Decision?’
3 Even though say the time wey man and woman de use know each other de sweet, them need to know say na serious matter because e fit make them decide say them go marry each other. For the day wey man and woman de marry, them de promise Jehovah say them go love and respect each other as far as say them dey alive. Before you make any promise, you suppose think-am well. (Read Proverbs 20:25.) Especially the promise wey person make before e marry. The time wey man and woman de use know each other, go help them make better decision. The better decision fit be to end the relationship, or to decide say them go marry each other. Na bad thing if them end the relationship because them see say e no go work? No o! Because e don give them the chance to know if them go fit marry each other or not.
4 E dey important for people wey never marry to remember say, the reason why two people de try know each other na to help them know if them go fit marry. If them get this one for mind, e go make them no start relationship with person wey them don already know say them no go marry. But no be only people wey never marry need to put this one for mind. Na all of us need to get this one for mind. For example, some people de think say if two people dey relationship, e mean say them must marry each other. How this one de affect people wey never marry? Sister Melissa wey never marry wey dey United States, talk say: “When two people de try know each other, some people too de put eye for their body and de expect say them must marry each other. This one no de make things easy at all. Because of this one, some people don continue relationship wey them don see say e no go work. And e don still make some people wey never marry, fear to start relationship.”
How You Fit Find Person Wey You Fit Marry?
8 How you fit take style look the other person when the person no know? For meeting and for get-together, you fit see some things about im character, the way e de behave, and about im friendship with Jehovah. Who be im friends, and wetin e de like talk about? (Luke 6:45) Wetin you plan to do with your life dey the same with im own? You fit ask elders for im congregation and other brothers and sisters wey know-am well. (Prov. 20:18) You fit ask wetin people know about-am and im character. (Ruth 2:11) As you de try to look this person, no do things wey go make the person shame or de feel somehow. No de follow the person go everywhere or try know everything about the person.
‘How Two People Wey Dey Relationship Fit Make Better Decision?’
7 How you fit really know the other person well? You fit do this one when you de ask question, and listen well as the other person de talk. Another thing na to talk how you de really feel. (Prov. 20:5; Jas. 1:19) To fit do this one, una fit choose to do things wey go make-am easy for una to talk to each other. For example, una fit plan to chop together, waka together for area wey people dey, and preach together. Una fit still know about each other when una spend time with friends and family members. Another thing be say, you fit arrange to do things wey go make you see how the other person de behave for different-different situation, with different people. See wetin Brother Austin from Netherlands do, when e de try know Sister Alicia. E talk say: “We arrange to do things wey go make us know each other more. Plenty times, the things wey we de do na simple things, like, to cook together and do other work together with our family and friends. When we de do this things, we de see each other better-better character and where we no de do well.”
8 Another thing wey fit help una know each other well na when una de study Bible together. If una marry, una go need to de do family worship so that Jehovah go be number one Person for una marriage. (Eccl. 4:12) So e go good make una arrange time wey una go use study Bible together now, as una de try know each other. Na true say brother no be the head of the sister when them never marry. But, as una de study together, una go fit know how each other friendship with Jehovah really be. Brother Max and im wife Lisa wey dey United States, talk another thing wey them gain as them de study Bible together before them marry. E say: “Small time after we start to know each other, we start to study our book them wey talk about relationship, marriage, and family matter. As we de study them, e make-am possible for us to fit talk about some important things wey for hard us to talk about.”
Fine-Fine Things Wey You See for Bible
it-2 196 ¶7
Lamp
As Proverbs 20:27 show, “The breath of man na Jehovah lamp wey e take de search the deep-deep things wey dey the heart.” Wetin person breath come out, or talk come out, whether na good thing or bad thing, de show the kind person wey e be for inside.—Compare Ac 9:1.