To Play Gamble Na Sin?

Wetin Bible talk

Even though say Bible no talk plenty things about to play gamble, different-different things wey Bible talk help us know say God de see-am as sin.​—Ephesians 5:​17.a

• Na long throat de make people de play gamble and God no like person wey get long throat. (1 Corinthians 6:​9, 10; Ephesians 5:​3, 5) People wey de play gamble de hope say them go make money when other people lose. But Bible talk say God hate people wey de use long throat collect other people money or property.​—Exodus 20:17; Romans 7:7; 13:​9, 10.

• Even if person de use small money play gamble, this one fit make-am come love money well-well sotey e go put-am for trouble.​—1 Timothy 6:​9, 10.

• People wey de play gamble de always believe say na luck de help them win. But, God de see people wey de think like that the same way e de see people wey de worship idol. And God no like idol worship.​—Isaiah 65:11.

• Bible advice us say make we de do hard work instead of to de hope say we go get something when we no do anything or say we want use small thing get big thing. (Ecclesiastes 2:​24; Ephesians 4:​28) People wey de follow this Bible advice go “chop the food wey them work for.”​—2 Thessalonians 3:​10, 12.

• When person de play gamble, e no de think about other people, but the only thing wey dey im mind na how to win and Bible condemn this kind character.​—Galatians 5:​26.