Jehovah Name Dey Important to Jesus

1-2. (a) Wetin Jesus do the night before e die? (b) Wetin we go talk about for this article?

FOR Thursday evening, Nisan 14, 33 C.E., Jesus do the Lord Evening Meal with im faithful apostles. E know say Judas go soon betray-am, im enemies go torture-am, and them go kill-am. So after them chop finish, e tell im apostles many things wey go encourage them. Before them comot from the place wey them do the Lord Evening Meal, Jesus say one important prayer. This prayer dey for John chapter 17.

² For this article, we go see some things wey we fit learn from this prayer wey Jesus talk, and from the things wey dey im mind the night before e die. We go still see how this prayer show wetin dey important to Jesus when e dey this earth.

“I DON MAKE THEM KNOW YOUR NAME”

3. Wetin Jesus talk about Jehovah name, and wetin e mean? (John 17:6, 26)

³ Jesus tell Jehovah for that prayer say: “I don make them know your name.” We see say this one really dey important to Jesus because e talk-am two times for that prayer. (Read John 17:6, 26.) But wetin be the meaning of this thing wey Jesus talk? E mean say Jesus disciples no know say God name na Jehovah before? No. Why we talk like that? Jehovah name dey almost 7,000 times inside the part of the Bible wey them use Hebrew language write. And because Jesus disciples na Jew people, them already know say God name na Jehovah. So when Jesus talk say “I don make them know your name,” e no mean say e teach them say God name na Jehovah. Instead, e de talk say e don teach them the kind God wey Jehovah be. E don help im disciples know the better-better character wey Jehovah get, wetin e get for mind for people and for this earth, wetin e don do, and the things wey e go still do for future. True-true, na only Jesus really know Jehovah well.

4-5. (a) Wetin fit make us start to value person more? Give example. (b) Wetin help Jesus disciples to know Jehovah more?

⁴ Imagine say e get one elder for your congregation wey im name na David, this brother na doctor and you don know-am for plenty years. One day when you de sick, them rush you go hospital and na that brother save your life. This one go make you love the brother pass before, and anytime wey you hear the brother name, you go remember wetin e do for you. Now, you no go just de see Brother David as that elder wey you don know for long time, but you go still de see-am as the doctor wey save your life.

⁵ Na so e still be for Jesus disciples. Them don already know Jehovah name, but them start to love Jehovah more when Jesus help them to really know-am. Why we talk like that? We fit talk like this because Jesus copy im Papa example for everything wey e talk and do. So when Jesus disciples listen to the way Jesus de teach, and when them de see how e de treat other people, this one help them to really “know” Jehovah.—John 14:9; 17:3.

“YOUR OWN NAME WEY YOU DON GIVE ME”

6. Wetin Jesus mean when e talk say ‘you don give me your own name’? (John 17:​11, 12)

⁶ When Jesus de pray about im disciples, e beg Jehovah say: “Make you protect them because of your own name wey you don give me.” (Read John 17:​11, 12.) This one mean say Jesus name change to Jehovah? No. Notice say for that prayer, when Jesus de talk about the name of Jehovah, e talk say, “your own name.” E clear say Jesus name no change to Jehovah. So wetin Jesus mean when e talk say: ‘you don give me your own name’? The truth be say, Jehovah send Jesus to represent-am and talk for-am. Jesus use im Papa name do plenty miracles, and e even talk say ‘e come with im Papa name.’ (John 5:43; 10:25) Apart from this one, Jesus name mean say “Na Jehovah De Save.” So Jehovah name dey inside the meaning of Jesus name.

7. Give example wey show say e dey possible for Jesus to represent and talk for Jehovah?

⁷ To fit understand how Jesus fit represent and talk for Jehovah, make we see this example. Person wey de rule fit send another person go somewhere to represent-am and talk for-am. So people go accept wetin e de talk, like say na the person wey send-am de talk to them. For the same way, Jesus fit represent and talk for Jehovah because na Jehovah send-am.—Matt. 21:9; Luke 13:35.

8. Before Jesus come this earth, why Jehovah talk say Jesus carry im name? (Exodus 23:​20, 21)

⁸ Bible call Jesus “the Word” because Jehovah use Jesus to tell angels and people wetin e want make them know and do. (John 1:​1-3) E fit be say na Jesus be the angel wey Jehovah send to care for Israel people when them dey for wilderness. When Jehovah de tell Israel people say make them obey that angel, e still tell them why them need to obey the angel. E talk say: “Because e carry my name.”a (Read Exodus 23:​20, 21.) Jehovah talk like this because Jesus de talk for-am, and na im be the main person wey de prove say everything wey Jehovah de do correct, and say Jehovah dey holy.

“PAPA, MAKE YOU HONOR YOUR NAME”

9. Wetin show say Jehovah name really dey important to Jesus?

⁹ As we don talk before, Jehovah name dey very important to Jesus even before e come this earth. And when Jesus dey this earth, everything wey e do show say Jehovah name still dey important to-am! When the time wey im enemy go kill-am don de reach, Jesus tell Jehovah say: “Papa, make you honor your name.” At once, Jehovah use loud voice talk for heaven say: “I don honor-am and I go honor-am again.”—John 12:28.

10-11. (a) How Jesus honor Jehovah name? (Still check the picture.) (b) Why people need to know say Jehovah name dey holy, and say everything wey Satan talk about Jehovah na lie?

¹⁰ Jesus really honor im Papa name. How e do this one? E tell people about the better-better character wey Jehovah get and the wonderful things wey e don do. But Jesus still do another thing. E need to prove say everything wey Jehovah don do really correct and say Im name dey holy. Jesus show how this one dey important for the prayer wey e teach im disciples. E talk say: “Our Papa wey dey heaven, make your name dey holy.”—Matt. 6:9.

¹¹ Why people need to know say Jehovah name dey holy, and say everything wey Satan talk about Jehovah na lie? Na because for garden of Eden, Satan talk lie against Jehovah. E tell Adam and Eve say Jehovah de lie and say e de hide good things from them. (Gen. 3:​1-5) So Satan de try talk say Jehovah no de do things for the correct way. Because Satan lie against Jehovah, people fit de think say Jehovah na bad God. Later, for Job time, Satan talk say people de worship Jehovah only because of wetin them go get from Jehovah. Because Satan de lie well-well, e still talk say people go stop to worship Jehovah when them get problem because them no really love Jehovah from their heart. (Job 1:​9-11; 2:4) We need time to know who de really lie, whether na Jehovah or na Satan.

“I DE SURRENDER MY LIFE”

12. Because Jesus really love Jehovah name, wetin e ready to do?

¹² Because Jesus really love Jehovah, e even ready to die to fit show say Jehovah name dey holy and say the way e de do things really correct.b (John 10:​17, 18) Adam and Eve no obey Jehovah, instead, them follow Satan. But Jesus no do like that, e ready to come this earth to prove say e really love Jehovah. E obey Jehovah for everything wey e talk and do. (Heb. 4:15; 5:​7-10) E continue to hold Jehovah tight even reach the time wey e die for torture pole. (Heb. 12:2) This thing wey Jesus do show say e really love Jehovah and Im name.

13. Why e be say Jesus na the best person to prove say Satan de lie? (Still check the picture.)

¹³ As Jesus obey Jehovah for everything wey e talk and do, this one prove say na Satan de lie no be Jehovah! (John 8:44) Jesus know Jehovah pass any other person wey don ever live for this earth and for heaven. If any truth dey inside wetin Satan talk about Jehovah, Jesus for don know. But Jesus make up im mind say e go defend Jehovah name. Even when e be like say Jehovah leave Jesus, e ready to die instead of to disobey im Papa wey e really love.—Matt. 27:46.c

“I DON FINISH THE WORK WEY YOU GIVE ME”

14. Because Jesus obey Jehovah reach the end, how Jehovah reward-am?

¹⁴ For Jesus prayer for the night before e die, e talk say: “I don finish the work wey you give me to do.” E trust say Jehovah go reward-am if e obey-am reach the end. (John 17:4, 5) And Jehovah really bless-am. When Jesus die, Jehovah no leave-am for grave. (Acts 2:​23, 24) E bring Jesus back to life and give-am the position wey high pass the one wey e get before. (Phil. 2:8, 9) After some time, Jesus start to rule as King of God Kingdom. Wetin God Kingdom go do? The second part of the prayer wey Jesus teach im disciples answer this question. E talk say: “Make your Kingdom come. Make wetin you [Jehovah] want happen for this earth as e dey for heaven.”—Matt. 6:10.

15. Which other things Jesus go do?

¹⁵ For future, Jesus go fight the war of Armageddon and destroy wicked people. (Rev. 16:​14, 16; 19:​11-16) After this one, e go throw Satan for “abyss,” wey be the place wey e no go fit do anything, e go just be like person wey don die. (Rev. 20:​1-3) Then, Jesus go rule for one thousand years, and e go bring peace back to this earth and help us dey perfect. E go bring the people wey don die back to life and make the whole earth paradise. This one go make wetin Jehovah get for mind for this earth happen!—Rev. 21:​1-4.

16. Wetin go happen after Jesus don rule for one thousand years?

¹⁶ Wetin go happen after Jesus don rule for one thousand years? Sin no go dey again and everybody go dey perfect. Today, we de beg Jehovah to forgive us for our sin because Jesus don die for us. But that time, we no go need to do this one again. Another thing be say, we no go need the 144,000 to be priests, and we no go need Jesus to be our High Priest before we go fit get better friendship with Jehovah. And “the last enemy wey be death,” no go dey again. People wey don die go don come back to life. Everybody for this earth go dey perfect.—1 Cor. 15:​25, 26.

17-18. (a) Wetin go happen for the end of the One Thousand Years wey Jesus go rule? (b) Wetin Jesus go do when e don rule finish? (1 Corinthians 15:​24, 28) (Still check the picture.)

¹⁷ Which other thing go happen for the end of the One Thousand Years wey Jesus go rule? Something wey really dey special go happen. Nobody go ever doubt again say Jehovah de rule for correct way and say e dey holy. Why we talk like that? For garden of Eden, Satan talk say Jehovah na person wey de lie and say E no really love us. So after the One Thousand Years wey Jesus go rule don finish, everybody go don know say Jehovah way na the best. Jehovah go don show say e be Papa wey really love im children, and nobody go fit doubt-am.

¹⁸ For the end of the One Thousand Years wey Jesus go rule, everybody go don know say wetin Satan talk about Jehovah na lie. But wetin Jesus go do when e don rule finish? E go go against Jehovah like Satan? No! (Read 1 Corinthians 15:​24, 28.) Jesus go give the Kingdom back to Jehovah. E go still put imself under Jehovah. True-true, Jesus no be like Satan. E ready to give everything to Jehovah because e really love-am.

19. Wetin show say Jehovah name really dey important to Jesus?

¹⁹ Everything wey we don talk, don show why Jehovah give im name to Jesus. When Jesus come this earth, everything wey e do really show the kind God wey Jehovah be. But wetin show say Jehovah name really dey important to Jesus? Jesus really value Jehovah name sotey e ready to die for that name, and e ready to give everything back to Jehovah when e go rule finish for the end of the One Thousand years. How we fit copy Jesus example? We go answer this question for the next article.