Peipata nawe ia Mbuʼu Umma Bana Sennango?

1. Appa ne pa umma kana benningowage gaʼi ne mbuʼu umma kana sennangowe?

Liʼi ege wali nawe mbarra Yahwe, Alla sennango. Na mbeige ngarra kua mbuʼu umma kana sennangowe. (1 Timotiu 1:11) Nia a rawi ulluge ne pa umma. Ne pa umma na benning poge ba kette ge, gaʼi mona ne umma monno lakawa a moripa sennango. Ata karisten na benningpoge ba manunndu pareta ata pareta tuba nawe pa umma monno catatan sipil.​—Mbaca Luka 2:1, 4, 5.

Peilinna pangeddana Alla tuba nawe pa umma? Na mbeige ghidda kabani monno mawinne bapa ia na dukki ba mate. A pamanawara wekki pona dukki ba mate. (Imbarani 13:4) Na mbuttu ge ate ne pewa. (Maleakhi 2:16) Takka, Na pakaloko ndi ba pewa monno ba paumma piʼa, na ia ata bana ndala ko.​—Mbaca Matiu 19:3-6, 9.

2. Peikoda ghidda laʼi monno minne?

Yahwe na padadiwa kabani monno mawinne gaʼi ka patulu wekkina. (Matiu 19:4, 5) Na pa ama, na benning poge bana wega ndi pangaʼa monno panungnga ndi tubana Alla mbarra ana monno mawinnena. Laʼi monno minne a paʼaka monno a pamanawara wekki pona. Oro ba ndaʼi laʼi, minne nda mangngu salana,a woro taunda pundi salada. Niawe pandua dengnga nawe koro umma.​—Mbaca Epesu 4:31, 32; 5:22-25, 33; 1 Petura 3:7.

3. Appa ne pa umma nda sennango, a pewa lolo?

Ba waʼi ko papa lummu, na benning poge ba tekki ndiawe, ba waige ne manawara. (1 Koriniti 13:4, 5) Mbuku Bia ndana panungnga kige ba waʼi ko masala, neba pewa baniawe lara a ndua pa deke.​—Mbaca 1 Koriniti 7:10-13.

4. Lakawa, appa pambeina Alla mbarrami?

Yahwe na mbeige gaʼi kai sennango. Na nya panungnga gaʼi ne moripami ba bua mane, bua winne kana nduawe. Na mbeige bai manundu mbarra inna, amami, oroge a wali kaibage bua mane, bua winne, monno a pande piʼa po. (Koloze 3:20) Alla na mbeige bai sennango oroge bai rawige pakalada ate dengnga.​—Mbaca Matiu 19:13-15; 21:15, 16; Epesu 6:1, 2.

5. Inna ama, appa paraimu ka sennango anami?

Na benning poge bau nyandi pangaʼa, umma, monno kalambeda. (1 Timotiu 5:8) Takka, gaʼi ka sennango, na benning poge bau panungnga ndi tubana Alla gaʼi ka manawara monno mbelajara wali mbarra Na. (Epesu 6:4) Tudda pa bowomu enga pakawoddeka dawe ate da anamu. Bau panungnga kundi tuba Mbuku Bia, ne moripada enga mananda nawe.​—Mbaca Ulangan 6:4-7; 2 Timotiu 3:15.

Papanungngamu monno bau deika wi enga paguna nawe aro mbarra anamu. Tekki podandi salada, gaʼi ka pandege salada, pata panungnga a linna waʼi na a tulu ndi gaʼi ka nda rawi kana ndapa sennango dengnga da. (Amsal 22:15) Takka, inda allu mbani kandi monno inda allu palu kawi.​—Mbaca Koloze 3:21.

Sakkitana Yahwe a palouso ndi mbuku, tora memada ba tulundi inna, ama, monno lakawa, iʼda ghitti mbuku wali dawe Mbuku Bia dana.​—Mbaca Jakupa 1:25.