10 Pea neʼe logo te fineʼaliki ʼo Sepa ki te fakamatala ʼo ʼuhiga mo Salomone, ʼae neʼe iloa ʼuhi ko te huafa ʼo Sehova.+ Koia, neʼe haʼu ai ke ina ʼahiʼahiʼi ia ia ʼaki ni fehuʼi faigataʼa.*+ 2 Neʼe tau ki Selusalemi mo ʼana hahaʼi faifekau ʼe kaugamalie ʼosi,+ pea mo he ʼu kamelo neʼe natou ʼamo te lolo neʼe fai ʼaki te ʼu ʼakau fakamagoni,+ mo he tuʼuga aulo pea mo ni maka maʼuhiga. Pea neʼe alu kia Salomone ʼo fehuʼi age te ʼu meʼa fuli ʼae neʼe ina fia iloʼi. 3 Pea neʼe tali e Salomone ki ʼana fehuʼi fuli. Neʼe mole he meʼa neʼe faigataʼa fau* ki te hau ke ina fakamahino age.